Ov, Yesu Walejana Karung ka Misiny?
ANTU itiyijina malejan ma karung ka misiny ajimbwiling mazu ma Yesu mafundau mu Marko 9:48 (ap verse wa 44, ni wa 46). Ndiy wajimbula amanfuny akad kufang ni kasu kakad kujimang. Anch muntu wakwipul piur pa mazu minam, ukumwakul nchik?
Kukwatijan nich version wa Bibil usadidila, muntu ukutwish watang verse wa 44, ni wa 46, ap wa 48 mulong maverse minam amafundil chilik chimwing mu yikarumun yimwing ya Bibil.a Tutangin Testament Musu ni Kuseng anch: “Anch dis diey diakutakel ku kwipwakal dibwita ruku; mulong chidi chiwamp kudi ey kwandam ku want wa Nzamb nich dis dimwing, kangal kwandam ni mes maad ku Gehen. Kudia amanfuny au akad kufang, ni kasu kakad kujimang.”—Marko 9:47, 48.
Chikalap nchik, antu amwing alondiling anch mazu ma Yesu makasikeshin anch kwinyim kwa kufa mipim ya antu ayimp yimening mar chikupu. Chilakej, Iniversite wa Navarre ulondil piur pa Sagrada Bibil wa Chiputulukesh anch: “Nsalejetu wasadila [mazu minam], chakwel kwisambin mar ma chikupu mu karung ka misiny. Chisu chivud ‘manfuny makad kufang’ akat kumarumburil mudi ushon wa chikupu wovilingau antu afishinau nich kuya mu karung ka misiny; ni ‘kasu kakad kujimang,’ mudi dipup dia ku mujimbu.”
Pakwez, ilikej mazu ma Yesu ni mazu mansudiel ma uprofet wa Isay.b Ov, chimekenap anch Yesu wadinga ujimbwil mazu minam madia mu Isay shapitre wa 66? Chimeken anch mu shapitre winou muprofet wisambidin kuya pol pa “Yerusalem mwi Nkurubuk (Gehen) ya Hinom, kwadingau ni kuyilambwil antu (Yer 7:31) ni yeza chakin kamu kwikal dishitil dia yishoshot ya musumb.” (The Jerome Biblical Commentary) Chijingidij chidia mu Isay 66:24 chakin kamu chidiap cha antu ameshinau mar; chisambidin yital. Chilejenau mudi amanfuny—kadiap antu afila ap anch mipim yakad kufang. Chawiy lel, mazu ma Yesu marumburikin ik?
Shinshikin mutapu urumburilau Marko 9:48 mu buku wa Katolik El evangelio de Marcos. Análisis lingüístico y comentario exegético Volum wa II anch: “Mufund audioshin mu Isay (66,24). Pinipa muprofet ulejen mitapu yaad yadingau ni kuyishesh yital: kuyivundish ni kuyosh shitit . . . kwisambin kwa amanfuny ni kasu mu verse winou kukasikeshidin chitongijok cha kushesh. . . . Yawonsu yaad yikwet usu wa kushesh nich chikupu (‘kakujimangap, kafungap’): charumburik anch kwikil mutapu wa kwiyep. Mu chijingidij chinech, in kupand kusu ading amanfuny ni kasu—kadiap muntu—ni yawonsu yadinga ni kushesh chom chin chawonsu chikuwila mwishin mwa usu wau. Chawiy lel, kwinoku kudiap kurumburil kwa mar ma chikupu, pakwez kusheshik kwa chikupu, mulong mudi kwikil kuvumbuk, kudi dirumburish dia rufu ra nsudiel. Chawiy, [kasu] kadi, chijingidij cha disheshik dia chikupu.”
Muntu win mwawonsu wija anch Nzamb wakin udi ni rukat ni utentamina ufanyidin kwikal tayad amana mutapu utwishikina kutesh mazu ma Yesu mwi njil yiney. Kalondap anch antu ayimp akez kuman mar ma chikupu. Pakwez, adi mu ubaj wa disheshik dia chikupu diakad kutwish kuvumbuk.
[Mazu madia kwishin kwa paj]
a Mu maniskri mavud ma Bibil madiaku mwikiling verse wa 44 ni wa 46. In kwilej Bibil itiyijin anch chimeken maverse minam maad eza kumawejinaku kwinyim. Mulej Archibald T. Robertson ufundil anch: “Mu maniskri makur ni makuchingejin nakash mwikil maverse minam maad. Meza kumekena mu mibombu ya ma maniskri madiokala ku Kurand ni mu Siriya (Byzantin). Machirikidin kwau chamwamu verse wa 48. Chawiy tumatikina nimero wa 44 ni wa 46 mu maverse makadia kwikal makin.”
b “Pakubudikau, akez kaman mijimbu ya afu ya antu ambwambwila am. Amanfiny akata kuyidia kakez kafap, ni kasu kakata kuyosh kakez kajimap. Akez kikal yom yitakanena kudi antu awonsu pakez kayimanau.”—Isay 66:24.