Lamany ‘Rukat Riwadinganya Nich Pakusambish’

“Lam ba-a chiukweta.”—KUBUR. 3:11.

1, 2. Mutapu ik wiyova piwitiyija anch yom wadinga wilejina piur pa Yehova yadinga yakin?

OV, UVURIKIN piwileja kapamp ka kusambish piur pa ruchingej ramushena riyinkishinay Yehova antu ashinshamena kudi ndiy? Anch wadinga pakusambish mu relijon windjing, wiyova nchik pakurumburilau jintong ja Nzamb kukwatijan nich yilondil Mifund ap malejan madinga makukasikedina kutesh pawamatesha kamu zwang? Pamwingap wajingunina kapamp kamwing anch wadinga muntu wadimbau kal. Pakwez mutapu ik usanger katat mulong akumunyikin kal chitokish! Anch akulila kudi anvaj in Kristu, ov, uvurikin mutapu wadinga ni kwiyov pawitiyija amwiney anch yom yadingau ni kukulej piur pa Yehova yadinga yakin ni wakwata mupak wa kushakam kwambatan nich?—Rome 12:2.

² Akadivar ney avud in a muspiritu akukulej anch niyawiy ova musangar nakash, pashejinau piswimp ni Yehova, ni ndiy amwinend washejina piswimp nau. (Yoh. 6:44) Musangar wau wayibachika ku kusal mijikit ya Ukristu. Izula too misangar chawiy chasotay kuyilej antu akwau yovau. Ov, mwamu niyey wiyova?

3. Mwikadil ik wadinga mu chikumangen cha Efes payituminau uruu kudiay Yesu?

³ Pisambinay piur pa chikumangen cha Ukristu cha mu Efes cha mu mivu chitot ya kusambish, Yesu wisambina pa “rukat rey ruwading nich pakusambish.” In Efes adinga nich ngikadil yivud yiwamp, pakwez rukat ramekeshau kwisambishil mulong wa Yehova, rasambisha kutalal. Chawiy, Yesu wayileja anch: “Am nij kal midimu ni yisalijok yey, ni kujamish kwey; ey kiwitiyijap tuyimp twa antu, pakwez wayipakila awiy akat kwipil ayinau anch apostol, kadip apostol, ni kuyijingunin adi in makasu; nij ey wakasikeshil ni kuman mar mulong wa dijin diam wakad kuziy. Pakwez chinikisila kudi ey chawiy ech, ey washil kal rukat rey ruwading nich pakusambish.”—Kubur. 2:2-4.

4. Ov, mulong wak uruu wayituminau in Efes kudi Yesu udi wa usey ilel unou?

⁴ Chiyul chayinkishau in Efes kudi Yesu ni ku yikumangen yikwau yisambinay mu buku wa Kuburik chadinga chifanyidin kamu ku mikadil yidiaku lel pa chirung chetu mukach mwa in Kristu azizidilau many kudiosh mu muvu wa 1914 djat ni ilel unou. (Kubur. 1:10) Chikwau, chitwishikin anch djat ni katat in Kristu amwing akutwish ashadish “rukat [radingau] nich pakusambish” mulong wa Yehova ni mulong wa uyakin wa Ukristu. Nich chitongijok chinech mu manangu, el tushinshikinany kusutil ku kuvurik ni kutongijokin pa uman wey amwiney, ukutwish walam, wachirish, ni kukudish rukat ni mushiku wadingau nich kwisambishin mulong wa Nzamb ni mulong wa uyakin.

Chom ik Chikwitiyikishina Anch Ukwet Uyakin?

5, 6. (a) Mwin Kristu umwing ni umwing ufanyidin kwitiyij chom ik? (b) Chom ik chakwitiyikisha anch Atuman a Yehova alejen uyakin? (c) Chom ik chikutwisha kumukwash muntu avuvurisha rukat rend ra kusambish?

⁵ Muntu win mwawonsu ukwipana kudi Yehova ufanyidil bil ‘ijika’ amwinend “yiwapila ni yirijekina ni yiwanyidina ku rusot ra Nzamb.” (Rome 12:1, 2) Mu chom chinech, mudi kwilej uyakin wa Bibil. Chom chikutwisha kumwitiyikish muntu kampand anch Atuman a Yehova alejen uyakin chikutwish chashalijan nich chikumwitiyikisha muntu kanang. Amwing avurikin anch aswimpa manangu patangau dijin dia Nzamb mu Bibil ap pateshau uyakin piur pa ngikadil ya afu. (Kus. 83:18; Mul. 9:5, 10) Chom chayikwata antu amwing chadinga rukat ramanau mukach mwa antu a Yehova. (Yoh. 13:34, 35) Pakwez, djat ni ilel amwing achidi ni kutongang anch chirumburikin ik kulik kwikal mu mangand. Ashikena kal ku kulond anch in Kristu akin kakutwishap iyandjik mu milong ya chipolitik ap mu jinjit ja muchid ap wisu.—Isay 2:4; John 6:15; 17:14-16.

⁶ Kudi avud, yitongijok yiney ni yikwau yawiy yavuvurisha nakash rukat rau mulong wa Nzamb. Itekina chisu chakwel uvurik chom ik chakwitiyikisha uyakin. Udi muntu ukweta mikadil ni ngikadil yey pakampwil, chawiy mayingishin mey mulong wa kumukat Yehova ni kwitiyij kwey mu yakushilamu yend chakin kamu yishalijadin ni ya antu akwau. Chakin kamu, mayingishin minam machidi ni katat makash kudi ey mudi muwilejam kwisambishil. Uyakin kandikal ukarumuka. Chawiy lel, kuchirikinang yitongijok yiney ni yovil yiney kukutwish mwi njil kanang kuvuvurish ni ku kuchirishin rukat rey ra kusambish mulong wa uyakin.—Tang Kuseng 119:151, 152; 143:5.

Kasikesh ‘Rukat Rey ra Kusambish’

7. Ov, mulong wak tuswiridin kukasikesh rukat retu mulong wa uyakin, ni mutapu ik tukutwisha kurikasikesh?

⁷ Pamwingap kudi yom yivud yaswimpina kal mu mwom wey kudiosh piwipanina kudi Yehova. rukat rey ra kusambish mulong wa uyakin radinga ra usey, pakwez mu kusut kwa chisu, waswirikena rukat rijim nakash chakwel ura nich yikokujol yisu yikutwisha kupak ritiy rey. Pakwez, Yehova wakukwasha. (1 Kor. 10:13) Chawiy, uman wey mu kusut kwa mivu kudi kand kwa ukwash kudi ey. Kwakukwasha kal chakwel ukasikesha rukat rey riwadinga nich kwisambishil, ni kwikadil kal njil yikwau yiukutwisha kwijikin amwiney yom yiwamp, ni kwitiyij rusot ra Nzamb.—Yosh. 23:14; Kus. 34:8.

8. Mutapu ik wijingunishay Yehova amwinend kudiay Moses, ni mutapu ik wezau in Isarel ku kumwijik Nzamb nakash-nakash?

⁸ Mudi chilakej, tushinshikinany mwikadil mwadingau in Isarel payilejay Yehova rutong rend ra kuyipandish kudiokal mu uswik mu Idjibit. Nzamb wijingunisha amwinend kudi Moses, walond anch: “Am nidi mudi nidia.” (Kub. 3:7, 8, 13, 14) Charumburik anch, Yehova wadinga ulondil anch ukutwish wikal chawonsu chisotilay chakwel ayikola antu end. Pa kuman yishiken yalondulaku ni mikadil yadingaku, in Isarel mutapu wamekeshay Yehova mu jinjil jikwau untu wend—mudi Mwin Dikand Diawonsu, mudi Nkalansambu, Ntakel, Mupandish, Mwin Kwas Njit, ni Mukol.—Kub. 12:12; 13:21; 14:24-31; 16:4; Neh. 9:9-15.

9, 10. Mikadil ik yikutwisha kumukwash muntu ashikena ku kumwijik Nzamb, ni mulong wak chidi cha usey kuuvurikang uman winou?

⁹ Mwikadil wey ushalijadin nich wa in Isarel a pasak. Chikalap nchik mwamu, niyey wamen kal yom yakwitiyikisha anch Nzamb uyikatiling muntu ni muntu panrend, chawiy chakasikesha ritiy rey. Pamwingap Yehova wiyijikisha amwinend kwikal mwi njil yimwing Mukol, Mwongoj, ap Mulej. (Tang Isay 30:20b, 21.) Ukutwish pamwingap wamana chakul cha patok cha malembil mey. Ukutwish wara nich mulong kanang, ni mbay mwin Kristu ukutwish wakwakul. Ap kusutil ku kwilej kwey amwiney ukutwish watan maverse mafanyidina padi amwiney.

¹⁰ Anch akwit ang uyirumburilaku antu indjing uman winou, antu amwing kakutwishap akwachik. Oku, yishiken yiney kiyadingap mudi yilay. Pakwez ey uyimen mudi ya usey kudi ey. Inge, Yehova wiyijikisha kamu kwikal chiswiridinay kwikal mulong weyey. Tongin bil pa mivu yey ya kusambish mu uyakin. Ov, ukutwish wavurik yom yivud pawatesha amwiney anch Yehova ukubangidin mu mwom wey? Anch inge, kuvurikang yishiken yiney ni mutapu wayova kukutwish kwavuvurish mu muchim wey yovil ya rukat ya chilik chimwing mulong wa Yehova mudi yiwova pasak. Usangera uman winou. Utongijokina. Udi uman ulejena anch Yehova ukubangidin, ni kwikil muntu ukutwisha kudjibwil kwa kwitiyij kwey kwinoku.

Ishinshikina Amwiney

11, 12. Anch rukat ra mwin Kristu mulong wa uyakin rasambishin kal kutalal, chom ik chikutwisha kwikal musul, chiyul ik chaletay Yesu?

¹¹ Anch kiwovilap kand rukat mudi riwova kwisambishil mulong wa Nzamb ni uyakin, chidiap anch mulong kudi chom kanang chakarumukina kudi ndiy bwat. Yehova kakatap kukarumuk. (Mal. 3:6; Yak. 1:17) Wadinga ukusangaredin pasak, ni ukusangaredin djat ni ilel kupandakanamu muchadinga. Chawiy lel, ov, kudi chom kanang, chaswimpina kal mu urund wey ni Yehova? Ov, wiyovil mudi anch udi mu chipwichik chikash, wiyakamishin nakash nich yakamish? Pamwingap pasak wadinga ni kulembil nich muchim wey wawonsu, wilejanga nakash, ni watongijokina nakash-nakash. Ov, wadinga nich mushiku ukash mu mujikit ni chisu ni chisu wadinga ni kuya ku yikumangan ya chikumangen ni katat kwakepin kal?—2 Kor. 13:5.

¹² Ukutwishap watwish kujingunin yom yiney mudi ey, pakwez anch wayijingunin, ov, yasambisha nchik? Ov, kubangin kwakin, mudi kubangin muchifanyidina dijuku diey, kubangin ukash wa mujimbu wey, ap yom yikwau mudi yiney, yakushadishishin kal yovil yey ya kusal swa piumena kushejin kwa dichuku dia Yehova? Yesu wayileja atwimbuy end anch: “Dimukany en ayinen, palemp michim yen yakifund kudia ni kukwachik kwa maruvu ni yom ya mwom winou, ni dichuku dinidia dikwez kudi en mudi kwoz kwa chilemb; mulong chawiy kand chikeza kwez kudi antu awonsu ashicha pa divu diawonsu. Pakwez en lamangany mu yisu yawonsu, lembilangany chakwel upandakanany ni kurezik mu yom yiney yawonsu yikeza kez.”—Luka 21:34-36.

13. Yakob wafanikesha Dizu dia Nzamb nich ik?

¹³ Yakob wapepilau afunda Bibil wayikasikesha ambay nend akaritiy chakwel ishinshikina ayinau chakin kamu kwambatan nich Dizu dia Nzamb. Yakob wafunda anch: “Ikalany in kusadil dizu, kangal wikalany in kutesh kusu, mwamu widimbany ayinen. Mulong anch muntu udi mwin kutesh wa dizu kusu, kadip mwin kusadil, ndiy udi mudi muntu ukat kwitadil mu chintadil; mulong ukat kwitadil amwinend, wend udiokal ni kujimbar kwijik chifu cha untu chadiay nich. Pakwez ndiy ukat kutadil mu chijil chitentamina, chijil cha kwikol, chawiy ukushakam, kakwikalip mudi mwin kutesh wend uvuramen, pakwez ching mwin kusadil wa mazu, muntu winou akez kamuyukishil mu yisalijok yend.”—Yak. 1:22-25.

14, 15. (a) Ov, mutapu ik ukutwishay Bibil kukukwash utenchika mwikadil wey wa muspiritu? (b) Ufanyidin kutongijokin pa yom ik?

¹⁴ Muntu ukutwish wasadil chintadil chakwel itala anch uwapin. Chilakej, anch ikundj waman anch nkol wend wipwatin, ukumurijek wikasay nawamp. Anch mband waman anch nswich jend jivuzangen, ukutwish wirijekaj. Chawiy chimwing, Mifund yitukwashining tushinshikina chitudia. Anch twiyilikej ayinetu ni yilondilay Bibil chidi mudi anch, twitadil mu chintadil. Pakwez chikwikal cha usey ik anch twital mu chintadil anch kitusadilap chom kanang chakwel turijeka chitwamananga chiyipina? Tukusal cha manangu anch twasal kwambatan nich yitumena mu “chijil chitentamina” cha Nzamb, tukwikal in ‘kudisadil.’ Chawiy lel, muntu win mwawonsu anch rukat rend ra kusambish rasambishin kal kutalal ukusal nawamp anch watongijokin pa yipul yiney: ‘Yipwichik ik nirishina nich mu mwom, ni mutapu ik nisadila kwambatan nich? Mutapu ik nasalanga pasak? Ov, kudi chom chaswimpina kal?’ Anch kwishinshikin kwey amwiney kwinoku kwajingunish chom chiyipinaku, kangal wachidiwuril. Anch kudi kuswir kwa kuyitenchik, sal usu pakad kucheleu uyitenchik.—Heb. 12:12, 13.

¹⁵ Kutongijokin kwinoku kukutwish kand kukukwash witekina jintong jisikena mulong upama muspiritu. Kambuy Paul wamwinkisha Timote mbay nend wa mudimu chiyul chipepidilau chakwel awapish mudimu wend. Paul wamukasikesha nsangarum winou anch: “Lamat ku mudimu winou; sok mu yom yiney; chakwel kujimb kwey kukumekan kudi antu awonsu.” Niyetu tukusal nawamp anch twasok mu yom yiney, mu kutok kwa Dizu dia Nzamb, kuya kurutu ik kutukutwisha kusal.—1 Tim. 4:15.

16. Ubaj ik ufanyidina kudimukin piwishinshikidina amwiney kukwatijan nich kutok kwa Mifund?

¹⁶ Kwishinshikin kwin kwawonsu kwakin kudi mulong wa kujingunin kuziy kanang. Kukutwish kwamwovish muntu kuziy, pakwez kangal walikin mwikadil winou ukushikena. Oku, rutong ra kwishinshikin ridi ra kujingunin pisu pitufanyidina kurijek. Chakin kamu, Satan, ukusot anch mwin Kristu iyova mudi kafanyidinap chom mulong wa kuburen kwend kuwanyin. Chakin kamu, ndiy walonda kal anch Nzamb ukisining usu wawonsu wa kusot kumusadil. (Yob 15:15, 16; 22:3) Minam madi makasu malikay Yesu nich kukapuk; Nzamb umumening umwing ni umwing wetu nich usey nakash. (Tang Mateu 10:29-31.) Kujingunin kwey kuziy kwey kufanyidin kukusal ukwata mupak nich kwikepish chakwel usala nawamp, nich ukwash wa Yehova. (2 Kor. 12:7-10) Anch mayej ni kuvul kwa mivu yawiy yikukangeshina kusal yiukutwisha kusal, komb itekina jintong jisikena, pakwez kangal walik ulika rukat rey ritalal.

Kudi Yom Yivud ya Kusanger

17, 18. Yiyukish ik yidiokila ku kukasikesh rukat rey riwadinga nich kwisambishil?

¹⁷ Kudi kwisakin kujim ku kudandamen kukasikeshin rukat riwadinga nich kwisambishil. Ukutwish wamwijik Nzamb nakash ni kusangar kwey mulong wa wintakel wend wa rukat. (Tang Jinswir 2:1-9; 3:5, 6.) Nfund a kuseng walonda anch: “Mu kuyilam [dirumburish dia Yehova] mwawiy mudia difut dijim. Malejan ma Nzamb madi makin, makat kuyibabesh ayisup.” Chikwau kand, “ayuk kwau awanyidina mwi njil, akata kwendil mu yijil ya [Yehova].”—Kus. 19:7, 11; 119:1.

¹⁸ Chakin kamu ukutwish witiyij anch ukwet yom yivud yiwamp yitufanyidina kusanger. Ov, watesh kal mayingishin madia kwinyim kwa yom yisadikina mu mangand. Ukutwish wisakin kwikang kwa muspiritu ni kubangin kwa Nzamb kuyibangidinay antu end ilel. Pakad kwidjidjek wovil musangar, anch Yehova wakupwitina kudiay ndiy mu chikumangen cha pa mangand mawonsu ni wakwinkisha ey chisend cha kwikal umwing wa Atuman end. Chind yiyukish yey yiukweta! Anch akwit anch usala dipang dia yom yiney, dikutwish dikal dilemp nakash. Kusalang mwamu chisu ni chisu kukez kukukwash niyey usadila dibabesh dined: “Lam ba-a chiukweta.”—Kubur. 3:11.

19. Kuwejin pa kutongijokin pa urund wey ni Nzamb, yom ik kand yikwau yidia ya usey chakwel kulam ukash wa muspiritu?

¹⁹ Kutongijokin pa mutapu wakula ritiy rey mu mivu yiney yawonsu yasutila kal ridi rizau rimwing rikutwisha kukukwash ulam ba-a chiukweta. Jurnal unou wachirikina kal kakwau ni kakwau pa kupwitin manangu ku yom yikwau ya usey ya kulam nich ukash wa muspiritu. Mu yom yiney mudi malembil, kukumangan ni kwakul ku yikumangan ya Ukristu, ni kusal nich mushiku mudimu wa patok. Yom yiney yikutwish yakukwash kuvuvurish, kuchirish, ni kukasikesh rukat rey riwadinga nich kwisambishil.—Efes 5:10; 1 Pita 3:15; Yuda 20, 21.

Ukwakul Nchik?

• Misu mayingishin mey makushikija ku kumukat Yehova chakwel kwikal musul wa kukukasikesh ilel?

• Kutongijokin pa uman wey mu kusut kwa mivu kukutwish kwakwitiyikish ik?

• Ov, mulong wak ufanyidin kushinshikin rukat rey?

[Chipich chidia pa paj wa 23]

Uyakin ik wakupwita ni kukwitiyikish?

[Chipich chidia pa paj wa 25]

Ov, umen yom mudi ey amwing yiufanyidina kutenchik?