‘Dandamen Kwendil mu Uyakin’

1. Mutapu ik tukata kutanyinamu anch twisambin piur pa mutapu twashikena kujingunin “uyakin”?

“MUTAPU ik washikena kujingunin uyakin?” Pakad kwidjidjek, wakwil kal ku chipul chinech tupamp tuvud nakash. Chid pakach pa yipul yikatau kwipulijan ambay in Kristu anch akimbin kwijikijan nawamp. Tukatining kutesh mutapu washikenau akadivar ni anambaz netu kumwijik ni kumukat Yehova, ni tusangaredining kand kuyilej mulong wak tukwatina uyakin nich usey. (Rom 1:11) Mambamb mud minam matuvurishining usey wa uyakin. Matukwashining kand kukasikesh mupak wetu wa ‘kudandamen kwendil mu uyakin’—charumburik anch, kudandamen kushakam mu mutapu ukutuletina yiyukish ya Yehova ni kwikal ni dilau diend.​—3 Yoh. 4.

2. Yom ik tukumana mu mutu wa mulong winou?

² Mu mutu wa mulong winou, tukuman mayingishin mamwing matubachikina kukat uyakin. Kupwa tukuman mutapu tukutwisha kudandamen kukat chipan chinech cha usey nakash. Pakad kwidjidjek, kusal mwamu kukutukwash kumujikitish nakash Yehova mulong wa yom yasalay mulong wa kutupwitin ku uyakin. (Yoh. 6:44) Kukukasikesh kand impu yetu ya kurumburil uyakin kud antu akwau.

MAYINGISHIN MATUBACHIKINA KUKAT “UYAKIN”

3. Diyingishin ik dia usey kupandakan tukweta dia kukatin uyakin?

³ Tukwet mayingishin mavud matubachikina kukat uyakin. Diyingishin dia usey kupandakan rid rukat retu mulong wa Yehova Nzamb udia Musul wa uyakin. Kusutin Dizu diend Bibil, twimenap kwetu kusu pa kumwijik anch ud Sakatang mwin dikand diawonsu, pakwez twashikena kand kumwijik mud Tatukwetu wa mwiur utukatina ni utubangidina. (1 Pita 5:7) Twij nawamp anch Nzamb wetu ud mwin “ranaken ni mwin riy, wakad kwovang ujim swa, wizwila sens nich rukat ni uyakin.” (Kub. 34:6) Yehova ukatining kutentam. (Isay 61:8) Chimwovishining kusansan nakash pakuman tukat kuman mar, ni ukwet impu ni ukatin kupwish mar mawonsu pa chisu chatekinay kal. (Jer. 29:11) Chisangareshin mud ik! Chawiy chitushimokishinap pa kuman anch tumukatin Yehova nakash!

4-5. Mulong wak kambuy Paul wafanakesha ruchingej retu ni nkal?

⁴ Diyingishin ik dikwau tukweta dia kukat uyakin? Uyakin ukat kutuletin yiyukish yivud nakash. Shinshikin chilakej. Mu uyakin wa Bibil mwawiy mudia ruchingej retu ra machuku ma kurutu. Mulong wa kwovakesh usey wa ruchingej, kambuy Paul wafunda anch: ‘Tukwet ruchingej riner ridia mud nkal mulong wa kuchidij mwom.’ (Heb. 6:19) Mud mutapu nkal ukatay kujamish waat, ruchingej retu rimedina pa Bibil rikutwish kutukwash kulik kuzazat chisu turishina ni yikokujol.

⁵ Mu verse winou, Paul wading wisambidin piur pa ruchingej ra kuya mwiur rikwetau in Kristu azizidinau many. Pakwez mazu mend mayitadin kand in Kristu akweta ruchingej ra kushakam chikupu pa divu dikwikala paradis. (Yoh. 3:16) Chakin kamu, kwilej piur pa ruchingej ra mwom wa chikupu kwatuletina musangar nakash mu mwom.

6-7. Mutapu ik wataninayamu Yvonne mu kwilej uyakin piur pa machuku ma kurutu?

⁶ Shinshikin chilakej cha nambaz Yvonne. Kapaminap mu uyakin, ni padingay mwanikanch, wading wovil wom wa rufu. Uvurikin chisu chatangay mazu manam mashala mu manangu mend: “Dichuku dimwing mwom wetu ukushik kwinsudiel.” Ulondin anch: “Mazu minam mantongisha uchuku wa kabuj piur pa machuku ma kurutu. Natonga anch: ‘Kwafanyina kwikal yom yiwamp twafanyina kuchingejin mu mwom.’ ‘Mulong wak nidiaku?’ Nadingap nikatina kufa!”

⁷ Mu kusut kwa chisu padingay changadin, Yvonne watanijana ni Atuman a Yehova. Ulondina anch: “Nasambisha kwitiyij anch nikutwish kwikal ni ruchingej ra kushakam chikupu pa divu dikwikala Paradis.” Kwilej Bibil kwamukwasha mutapu ik nambaz netu? Amwinend urumburil anch: “Nikatap kand kuchish uchuku wa kabuj mu kwiyakamish mulong wa machuku ma kurutu ap mulong wa rufu.” Mud mutapu ukutwisha kutongin, uyakin ud wa usey nakash kudiay Yvonne, ni wasangera nakash kuyirumburil antu akwau ruchingej rend ra machuku ma kurutu.​—1 Tim. 4:16.

8-9. (a) Ikundj wa mu chishimu cha Yesu wakwata nich usey ik dipit diatanay? (b) Usey ik ukwatina nich uyakin?

⁸ Mu uyakin wa Bibil mud kand rusangu ruwamp piur pa Want wa Nzamb. Yesu wafanakesha uyakin piur pa Want nich dipit dijindjikinau. Mud mufundinau mu Mateu 13:44, Yesu walonda anch: “Want wa Mwiur ufanaken mudi dipit diajindjikau mu chir. Muntu mukwau wadibudikina niyend wadijindjik kand. Waya nich musangar nakash, walandish yom yend yawonsu yakwetingay chakwel achirik mulong wa kuland chir chinicha.” Man anch ikundj winou kadingap kwend kakimbina dipit dined. Pakwez padibudikinay, wasala usu wend wawonsu mulong wa kudikal nich. Chawiy, walandisha yom yend yawonsu yadingay nich. Mulong wak? Chid mulong wading wij usey wading nich dipit dined. Diading dikwet usey nakash kusutamu yom yawonsu yalikayap.

⁹ Ov, wawiy mutapu wiyovila niyey piur pa uyakin? Pakad kwidjidjek, mwawiy kamu! Twij anch kwikil chom mu mangand minam tukutwisha kufanakesh nich musangar tukweta wa kumusadin Yehova katat, ni ruchingej tukweta ra kwikal ni mwom wa chikupu mu machuku ma kurutu mwinshin mwa winyikel wa Want wend. Dilau tukweta dia kwikal mu uruund wa pakampwil ni Yehova did dia usey nakash kusutamu yom yawonsu twipukina mulong wa kwipan kumusadin. Rusot retu rijim rid ra kusal “machuku mawonsu yom yikatilay.”​—Kol. 1:10.

10-11. Yom ik yamubachika Michael kuswimp mu mwom wend?

¹⁰ Avud pakach petu alikap yom yivud nakash mulong wa kwikal ni dilau dia Yehova. Amwing alikap midimu ya nfalang jivud nakash yasalangau mu mangand minam. Akwau imika kwandjik mutu ni nshing mu kukimb mapit. Ni akwau kand aswimpa mashakamin mau chisu chilejau piur pa Yehova. Yiney yawiy yom yasalay Michael. Kapaminap mu uyakin. Padingay nsand, wileja mutapu wa kubulan. Ulondin anch: “Cha usey nakash kud am chadinga kwikal ni mujimbu uwamp. Yisu yimwing, niyova anch kwikil muntu ukutwisha kwimbul.” Pakwez pasambishay kwilej Bibil, Michael wileja chitongijok cha Yehova piur pa chisum. (Kus. 11:5) Walonda piur pa ambay a uruw Atuman ileja nend Bibil anch: “Kanlejap ap pakemp anch nifanyidin kulikap karateka; pakwez adandamena ching kwinfudish uyakin wa Bibil.”

¹¹ Pading padandamedinay Michael kwilej piur pa Yehova, rukat rend mudiay ndiy rakula. Yom yamupukuna nakash rading ranaken ra Yehova mulong wa atushalapol end. Mu kusut kwa chisu, Michael wajingunina anch wading ufanyidin kukwat mupak wa kuswimp mu mwom wend. Ulondin anch: “Najingunina anch kulikap karateka wading mupak ujim nakash nading nifanyidina kukwat. Pakwez najingunina kand anch nifanyidin kumusangaresh Yehova, ni nikala nich kashinsh anch kumusadin ndiy kwading kwa usey nakash kusutamu chom chawonsu nafanyina kulikap.” Michael wamekesha kujikitish mulong wa usey ukweta uyakin wajinguninay, ni kujikitish kwinoku kwamubachika kuswimp nakash mu mwom wend.​—Jak. 1:25.

12-13. Uyakin wa Bibil wamukwasha mutapu ik Mayli?

¹² Mulong wa kumekesh usey ukweta uyakin, Bibil ufanakeshin uyakin nich mwend wa kasu umunyikina mu mididim. (Kus. 119:105; Efes 5:8) Mayli wa mu Azerbaijan, ukwatin nich usey nakash ukwash watambulay mu Dizu dia Nzamb. Wapamina mu dijuku dia anvaj adia mu marelijon kushalijan. Tatukwend wading mwin Islam, ni makwend wading mwin Yuda. Ulondin anch: “Ap anch kandikal nidjidjekangap piur pa kwikalaku kwa Nzamb, kwading yom yivud niyipulang. Niyipulang anch: ‘Mulong wak Nzamb watanga antu, ni mulong wak ukutwishay muntu kuman mar mu mwom wend wa kabuj, kupwa amumesh kand mar chikupu mu karung ka misiny?’ Mulong antu alondining anch yom yawonsu yikata kusadik rid rusot ra Nzamb, chawiy niyipula anch: ‘Ov, komb Nzamb win ud kwend mud mwant uyikedina antu ni usangera kuyiman antu akat kuman mar?’”

¹³ Mayli wadandamena kukimb yakul ku yipul yend. Mu kusut kwa chisu witiya kwilej Bibil ni wikala Kaman wa Yehova. Ulondin anch: “Uyakin wa Bibil wankwasha kwikal ni musangar mu mwom wam. Kurumburil kwovikena nawamp kudia mu Dizu dia Nzamb kwanletina chisambu.” Mud Mayli, etu awonsu tukat kumutumbish Yehova, ‘ndiy kamu watutazuka kudiokal mu mididim, kwandam mu chimunyik chend chikwamushena.’​—1 Pita 2:9.

14. Mutapu ik tukutwisha kukudish rukat retu mulong wa uyakin? (Tal kand mushet: “Yom Yikwau Tukutwisha Kufanakesh Nich Uyakin wa Bibil.”)

¹⁴ Yiney yid kwau yilakej yikemp yimekeshina usey wa uyakin. Pakad kwidjidjek, ukutwish kutongijokin pa yilakej yikwau. Ov, umen nchik anch wakwat mupak wa kushinshikin mu dilejan diey dia pakampwil mayingishin makwau mafanyidina kutubachik kukat uyakin? Pitudandamedina kukat nakash uyakin, tukuman mitapu yivud ya kumekesh anch tuukatin nakash.

MUTAPU TUKATA KUMEKESH ANCH TUKATIN UYAKIN

15. Mutapu ik umwing tukutwisha kumekesh anch tukatin uyakin?

¹⁵ Tukutwish kumekesh anch tukatin uyakin kusutin kwilej nich mushiku Bibil ni mikand yetu yimedina pa Bibil. Chom cha usey nakash tufanyidina kulam mu manangu chawiy ech: chikalap nchik uvud wa mivu twasadina kal mu uyakin, tuchikwet kal yom yivud nakash ya kwilej. Nimero wakusambish wa Chinong cha Kalam walonda anch: “Uyakin ud mud kachisalamb kakemp kawamp kadia mwi mpay ya mwom, kad mukach mwa masuk ma yinfananfan mavud makajikina ni kukakangesh kumekan patok. Mulong wa kukaman, ufanyidin kukashinshikin nawamp piswimp. . . . Anch ukimbin kukabwit, ufanyidin kusal usu nakash. Kangal wasanger kwey chisalamb chimwing cha uyakin. . . . Pol kamu, kimb kamu yisalamb yivud.” Kwilej uyakin ud mudimu ukash, pakwez chid cha usey nakash kusal mwamu.

16. Mulad ik wa kwilej umena anch ud uwamp nakash? (Jinswir 2:4-6)

¹⁶ Kadiap etu awonsu tukatina kutang ni kwilej Bibil. Pakwez Yehova utwitin ‘kudandamen kukimb’ ni ‘kudandamen kusurab’ mulong wa kwikal ni ronganyin rikurikina ra uyakin. (Tang Jinswir 2:4-6.) Anch twipan mu kusal usu mud winou, tukutaninamu nakash. Pantaliken ni kutang kwa Bibil, Corey ulondin anch ukat kushinshikin pa verse umwing pa chisu chimwing. Urumburil anch: “Nikat kutang ma not mawonsu ni kutal mareferans matekinau, ni kupwa nikat kukimbijol kand. . . . Kusadin mulad winou wa kutang kwankwasha kwilej yom yivud nakash!” Tusadin mulad winou ap bwat, tukat kumekesh kujikitish kwetu mulong wa uyakin anch twishil chisu ni twasal usu wa kwilej uyakin.​—Kus. 1:1-3.

17. Chom ik chirumburikina kushakam kukwatijan ni uyakin? (Jakobu 1:25)

¹⁷ Chakin, twij anch tufanyidinap kwetu kwimen pa kwilej uyakin. Mulong wa kutaninamu nakash, tufanyidin kushakam kukwatijan ni uyakin, charumburik anch kusadin yom twilejin mu mwom wetu. Ching kusu anch twasal mwamu chad lel uyakin watuletin musangar wakin. (Tang Jakobu 1:25.) Mutapu ik tukutwisha kwikal nich kashinsh anch tushich kukwatijan ni uyakin? Mukadivar umwing wapana chitongijok anch tufanyidin kwishinshikin ayinetu mulong wa kuman ku mutambu tukasikena ni ku mutambu tuziyina kwitina kuwapish. Kambuy Paul walonda pa mulong winou anch: “Chom chijim tudandamenany kamu salal mwi njil yitwayila kal djat ni katat.”​—Fil. 3:16.

18. Mulong wak tufanyidina kusal usu wawonsu mulong wa ‘kudandamen kwendil mu uyakin’?

¹⁸ Tongijokin bil pa yiyukish yidiokila ku kusal usu wa ‘kudandamen kwendil mu uyakin’! Tukatap kusu kwimen pa kuwapish mashakamin metu, pakwez kusal mwamu kukat kumusangaresh kand Yehova ni ambay netu in Kristu. (Jnsw. 27:11; 3 Yoh. 4) Ov, tukwetanap chakin kamu mayingishin majim mafanyidina kutubachik kukat uyakin ni kushakam kukwatijan ni uyakin?