“Nikendil mu Uyakin Wey”

1-3. (a) Mutapu ik tufanyidina kwiyov piur pa uyakin wa mu Bibil? Let chilakej. (Tal yipich ya kwinsambishin.) (b) Yom ik tukwisambina mu mutu wa mulong winou?

NLEL, antu avud akat kuland chom kanang mu magazin ni kupwa achichirish kand chom chinech. Pamwing ap kakatinap chom chalandinau mudi mwading mutonginau ap chiyipin. Chawiy akat kukwat mupak wa kuchiswimp ni chom chikwau ap kwit anch ayichirishin nfalang jau.

² Tufanyidinap kusal mwamu piur pa uyakin wa mu Bibil. Anch ‘twauland’ tufanyidinap ‘kuulandish,’ charumburik anch ang twilej uyakin, tufanyidinap kuulikap. (Tang Jinswir 23:23; 1 Timote 2:4) Mudi twisambinang mu mutu wa mulong wasambelang, twasutisha chisu chivud mulong wa kwilej uyakin. Chikwau kand, pamwing ap twalika mudimu watwandjikinang nfalang jivud. Chikwau kand, twaswimpa mutapu wetu wa kushakam nau antu akwau, twaswimpa mutapu wetu wa kutong ni wa kusal yom, ap twalika kand kwiyandjik mu yishankur ap yisal yakad kumusangaresh Yehova. Pakwez tukwet kashinsh anch kwikil chom twalika chikweta usey mudi yiyukish tutambwila kusutin kwijik uyakin.

³ Yesu wapana chishimu piur pa mwin kwisak wading ukimbina usang wa ufun. Pamanay muntu winou usang wading wa usey nakash, walandisha pakad kulab yom yawonsu yadingay nich chakwel alanda usang winou. Usang winou umekeshin uyakin piur pa Want wa Nzamb. Kusutin chishimu chinech, Yesu wamekesha usey ukweta uyakin kudi antu aukimbina. (Mateu 13:45, 46) Pitwileja kapamp ka kusambish uyakin, charumburik anch uyakin piur pa Want wa Nzamb ni uyakin wawonsu wa usey udia mu Bibil, niyetu twalika pakad kulab chom chin chawonsu twading tukweta mulong wa kuutambul. Chawiy anch twadandamen kukwat uyakin nich usey, tukuulikap uyakin winou ap pakemp. Pakwez cha ushon, antu a Nzamb amwing alika kukwat uyakin nich usey ni aulika. Tufanyidinap kusal mwamu! Tufanyidin kulondul chiyul cha Bibil cha “[kudandamen] kwendil mu uyakin.” (Tang 3 Yohan 2-4.) Charumburik anch tufanyidin kutek uyakin pa ndond ya kusambish ni kumekesh mwamu kusutin mashakamin metu. Pakwez mulong wak ni mutapu ik ukutwishay muntu ‘kulandish’ ap kulikap uyakin? Mutapu ik tukutwisha kwikal nich kashinsh anch tukusalap mwamu? Ni mutapu ik tukutwisha kukwat mupak wa “[kudandamen] kwendil mu uyakin”?

MULONG WAK NI MUTAPU IK UKATAU ANTU AMWING ‘KULANDISH’ UYAKIN?

4. Mulong wak antu amwing kadandamenap kwendil mu uyakin pa chirung cha Yesu?

⁴ Pa chirung cha Yesu, antu amwing itiya uyakin kadandamenap kwendilamu. Chilakej, kupwa kwa Yesu kusal chilay ni kudish antu avud, antu inay amulondula ushad ukwau wa karung ka Galalia. Pakwez kupwa Yesu walonda chom chimwing chayisala nayimp anch: “Anch kiudilanyap mujimbu wa Mwan a muntu ni kuna mash mend, kiukwikalanyap nich mwom wakin.” Pa ndond pa kumwipul Yesu chakwel arumburil chirumburikina mazu minam, awiy alonda anch: ‘Mazu minam masalen nyimp nakash. Ov, nany ukutwisha kumatesh?’ Mudi chibudikin, “in kumulondul Yesu avud alika, [kakatap] kand kuya nend ap kusu pakemp.”​—Yohan 6:53-66.

5, 6. (a) Nlel mulong wak antu amwing akat kupwepuk ku uyakin? (b) Mutapu ik ukutwishay muntu kupwepuk ku uyakin?

⁵ Cha ushon, nlel antu amwing akat kulik uyakin. Mulong wak? Amwing ipwakala mulong wa kurumburil kusu kwa verse wa Bibil ap chom kanang chalonday ap chasalay mukadivar wijikena nawamp. Akwau kakatap chiyul chidiokila mu Bibil chayinkishau kudi muntu kanang ap kand mulong kadingap kwovijadina ni muntu kanang mu chikumangen. Ni akwau niyawiy alondula mafundish ma makasu ma in kupumbok ni ma antu akwau akata kulond makasu piur petu. Minam madi mayingishin makemp pakach pa mayingishin mavud masadina anch antu amwing amulik Yehova ni chikumangen kwa kwikatin. (Hebereu 3:12-14) Chafanyina kwikal chiwamp mudi ik anch antu inay amuchingejina Yesu mudi mwasalay Pita! Povau antu akwau nayimp mulong wa mazu ma Yesu, Yesu wayipula atwimbuy end anch niyawiy ading akatin kumusha. Pita wakula anch: “Nsalejetu, ov, tukuya kand kudi nany? Ey yey ukweta mazu makata kulet mwom wa chikupu.”​—Yohan 6:67-69.

⁶ Antu akwau asambisha kupwepuk pakemp pakemp ku uyakin, pamwing ap pakad kuman mutapu yishikedina. Muntu udiokila ku uyakin pakemp pakemp udi mudi waat upwepwilau ku chikum. Bibil utulejin anch tufanyidin kubabal chakwel ‘kangal twapwepuk.’ (Hebereu 2:1) Yisu yivud, muntu ukata kupwepuk ku uyakin kakusalangap mwamu kwa kwikatin. Pakwez ukat kulik urund wend ni Yehova kwikal uziyila, ni mu kusut kwa machuku ukutwish washadish urund winou. Mutapu ik tukutwisha kwikal nich kashinsh chakwel yom yiney kangal yatushiken?

MUTAPU IK TUKUTWISHA KWIKAL NICH KASHINSH ANCH TUKULANDISHAP UYAKIN?

7. Yom ik yikutukwasha kulik kulandish uyakin?

⁷ Mulong wa kudandamen kwendil mu uyakin, tufanyidin kwitiy ni kuziyin chom chin chawonsu chilondinay Yehova. Tufanyidin kusal uyakin wikal chom cha usey nakash mu mwom wetu ni kulondul mbil ja Bibil mu chom chin chawonsu tusadina. Mwant David wamukana Yehova mu malembil anch: “Nikendil mu uyakin wey.” (Kuseng 86:11, TMK) David wakwata mupak wa kudandamen kwendil mu uyakin, niyetu tufanyidin kusal mwamu. Anch tusadinap mwamu, tukutwish kusambish kutong piur pa yom twasha mulong wa uyakin ni tukutwish ap kuchirikin kand yom yimwing. Pakwez tufanyidinap kutond uyakin wa mu Bibil tufanyidina kwitiy ni tufanyidina kulik. Tufanyidin kwendil mu “uyakin wawonsu.” (Yohan 16:13) Mu mutu wa mulong wasambelang, twisambidin yom yitan tukutwisha kulik mulong wa kwilej uyakin ni kuusadin. Pinap tukuman mutapu tukutwisha kwikal nich kashinsh anch tukuchirikinap yom twasha.​—Mateu 6:19.

8. Mutapu usadidinay mwin Kristu chisu chend ukutwish nchik kumupwepul ku uyakin? Let chilakej.

⁸ Chisu. Mulong wa kwikal nich kashinsh anch tukupwepukap ku uyakin, tufanyidin kusadin nich manangu chisu chetu. Anch tubabelap, tukutwish kusutish chisu chivud mu kwipuwangej, mu kusengan, mu kwandam pa Internet, ap kutal televizion. Ap anch yom yiney yidiap kamu yiyimp, tukutwish kusambish kusadin chisu twafanyinang kwilej ni kusal mudimu wa kulejan. Yom mudi yiney yamushikena Emma.a (Tal mazu ma kwinshin.) Kudiosh padingay mwanikanch, wakatang kwandam pa atubar ni wandamang chisu chin chawonsu chikukatay. Pakwez wasambisha kwifish nich mulong wa chisu chasutishangay mu kwipuwangej ni wakwata mupak wa kuswimp yom yading yitekinay pa ndond ya kusambish. Emma wilejina kand kusutin yom yamanay Cory Wells, nambaz wasalang masengan ma kwandam pa atubar matazukinau anch rodeo.b (Tal mazu ma kwinshin.) Katat Emma ukat kusutish chisu chivud mu mudimu wa Yehova ni ukwet kand chisu nakash cha kusutish pamwing ni dijuku diend ni arund nend amusadidina niyau Yehova. Wiyovil kwikal piswimp ni Yehova ni ukwet musangar wa kwijik anch usadidin chisu chend nich manangu.

9. Mutapu ik ukutwisha yom ya ku mujimbu kwikal ya usey nakash kudi etu?

⁹ Yom ya ku mujimbu. Mulong wa kudandamen kwendil mu uyakin, tufanyidinap kulikidil yom ya ku mujimbu yikal ya usey nakash kudi etu. Chisu twileja uyakin, twajingunina anch kumusadin Yehova kudi kwa usey nakash kusutamu yom ya ku mujimbu ni twading ni musangar wa kulikap chom chin chawonsu mulong wa uyakin. Pakwez pasutina chisu, tukutwish kuman antu akwau akat kuland ma aparey elekitronik mabudikina katat ap akat kusanger yom yikwau yilandinau ni nfalang. Tukutwish kusambish kwiyov mudi tuburedin chom kanang. Tukutwish kulik kusanger yom tukweta ni kusambish kushinshikin nakash piur pa kwikal ni yom kusutamu kushinshikin pa kumusadin Yehova. Yiney yituvurishin yom yamushikena Demas. Wakata nakash “yom ya mangand” yasala anch alik chisend chend cha kusal pamwing ni Paul. (2 Timote 4:10) Pamwing ap Demas wakata nakash yom ya ku mujimbu kusutamu kumusadin Nzamb. Ap pamwing ap kakatap kand kwipan mulong wa kusal pamwing ni Paul. Dilejan ik twilejidinaku? Pamwing ap pakur twading tukatin kamu nakash yom ya ku mujimbu. Anch tubabelap, rukat rinira rikutwish kand kupam ni kwikal rikash ni rikutwish kusal anch tushadish rukat retu mulong wa uyakin.

10. Chibachikin ik tufanyidina kujijamen?

¹⁰ Mutapu wa kushakam nau antu akwau. Mulong wa kwendil mu uyakin, tufanyidinap kulikidil antu akad kumusadin Yehova ikala ni yibachikin padi etu. Pitwileja uyakin, urund wetu nau arund ni antu a mu dijiku akad kwikal Atuman waswimpa. Pamwing ap antu amwing alimisha yitiyij yetu yisu, pakwez akwau ading akisin. (1 Pita 4:4) Chakin kamu, tusadin usu wawonsu mulong wa kwovijan nau antu a mu dijuku ni kuyisadin yom yiwamp. Pakwez tukutwishap kuvuramen yijil ya Nzamb mulong wa kuyisangaresh awiy. Mudi twilejina mu 1 Korint 15:33, arund netu a piswimp afanyidin kwikal antu amukatina Yehova.

11. Mutapu ik tukutwisha kwipuk yitongijok ni yisal yijondila?

¹¹ Yitongijok ni yisal yijondila. Mulong wa kwendil mu uyakin, tufanyidin kwikal ishitwila ap inangina ku mes kwa Yehova. (Isay 35:8; tang 1 Pita 1:14-16.) Pitwileja uyakin, twaswimpa yom yimwing mu mwom wetu mulong wa kulondul mbil ja Bibil. Kudi antu amwing asala kuswimp kujim nakash. Pakwez tufanyidin kudandamen kubabal chakwel kangal twaswimp mwom wetu wishitwila ni mwom wijondila. Yom ik yikutukwasha kujijamen choziu chawonsu cha kusal yom yijondila? Tongin piur pa chom chapanay Yehova chakwel twikal ishitwila. Wapana mwom wa usey wa Mwanend mukatish, Yesu Kristu! (1 Pita 1:18, 19) Mulong wa kutukwash kushal ishitwila ku mes ma Yehova, tufanyidin chisu chawonsu kuvurik usey ukweta chakupesh cha Yesu.

12, 13. (a) Mulong wak tufanyidina kuman machuku ma misambu mudi mumamenau kudi Yehova? (b) Yom ik tukimbina kwisambin?

¹² Yishankur ni yaku yakad kumusangaresh Nzamb. Antu a mu dijuku, ambay a mudimu, ni arund a ku shikol akutwish kutubachik chakwel tubombakan nau mu misambu yau. Yom ik yikutwisha kutukwash kujijamen chibachikin cha kwiyandjik mu yishankur ni mu machuku ma misambu makad kumusangaresh Yehova? Tufanyidin kwijik nawamp mayingishin masadina anch Yehova alika kwitiyij machuku minam ma misambu. Tufanyidin kukimbijol mu yichap yetu ni kuvurik mutapu wasambisha machuku mamwing ma misambu. Anch twatongijokin pa mayingishin makwatijadina ni Mifund masadina anch tulik kusal nau misambu yiney, tukat kwikal nich kashinsh anch twendididin mwi njil yikata “kumusangaresh Nsalejetu.” (Efes 5:10) Anch twachingejin mudiay Yehova ni Dizu diend, tukwovap wom piur pa yom yikutwishau kutong antu.​—Jinswir 29:25.

¹³ Tuchingejin anch tukudandamen kwendil mu uyakin chikupu. Pakwez yom ik yikutwisha kutukwash kukwat mupak wa kudandamen kwendil mu uyakin? Kudi yom yisatu tufanyidina kusal.

KWAT KAMU MUPAK WA KWENDIL MU UYAKIN

14. (a) Kudandamen kwilej Bibil kutukwashin mutapu ik kukwat mupak wa kulam baa uyakin? (b) Mulong wak tukwet kuswir kwa manangu, dipup, ni ronganyin?

¹⁴ Chakusambish, dandamen kwilej Bibil ni kutongijokin pa yom wilejina. Chisu chawonsu ikal ni program wa kusalang mwamu. Anch wilej nakash, ukukat uyakin ni ukukwat mupak wa kuulam baa. Jinswir 23:23 utulejin ‘kuland uyakin’ ni utulejin kand anch tufanyidin kuland “manangu, [dipup] ni ronganyin.” Chitinap kwau ching kusu kwijik uyakin wa mu Bibil. Pakwez tufanyidin kuusadin mu mwom wetu. Anch twatambul ronganyin, tukat kukumangej yom yin yawonsu twilejina pamwing ni yom twijing kal. Manangu makat kutubachik kusal kukwatijan ni yom twija. Yisu yimwing uyakin ukat kutupup kusutin kutulej yom kanang tufanyidina kuswimp. Tufanyidin kwikal aswapela kwitiy dipup dined, dilondinay Bibil anch dipandakenamu utad wa usey nakash.​—Jinswir 8:10.

15. Mutapu ik utuchidijina uyakin mudi nshipu?

¹⁵ Cha kaad, kwat mupak wa kusadin uyakin mu mwom wey wawonsu. Bibil ufanakeshin uyakin ni nshipu wa isalay. (Efes 6:14) Pasak, nshipu wamukwashang isalay ni wamuchidijang kwi njit anch umukasin nakash mwi mbund yend. Anch wamushadish, nshipu kafanyinap kumukwash. Mutapu ik utuchidijina uyakin mudi nshipu? Anch twalam uyakin chisu chawonsu, ukutuchidij ku kutong yom yiyimp ni ukutukwash kukwat mipak yiwamp. Anch tukwet mulong ukash ap atupakin kusal chom chiyimp, uyakin wa Bibil ukutukwash kukwat mupak wa kusal yom yidia yiwamp. Mulong isalay kafanyinap kuya kwi njit pakad nshipu wend, niyetu tufanyidinap kulik uyakin. Tufanyidin kwikal nich kashinsh anch tusadidin uyakin wa Bibil mu mwom wetu wawonsu. Isalay wafanyinang kand kusamik mpak ya musamun mwi nshipu yend. El tumanany mutapu tukutwisha niyetu kusal mwamu.

16. Kufundish uyakin kutukwashin mutapu ik kudandamen kwendil mu uyakin?

¹⁶ Cha kasatu, sal usu wa Kuyifundish antu akwau uyakin wa Bibil. Bibil amufanakeshin ni mpak ya musamun. Mudi mwalamangay ba isalay muwamp mpak yend ya musamun, tufanyidin kulam ba Dizu dia Nzamb. (Efes 6:17) Etu awonsu tukutwish kwikal in kufundish awamp, “kulejan dizu dia uyakin nich kutentam.” (2 Timote 2:15) Pitusadidina Bibil mulong wa kuyifundish antu akwau, tukat kushiken kwijik uyakin ni kuukat nakash. Ni tukat kukwat mupak wa kudandamen kwendil mu uyakin.

17. Mulong wak uyakin udi wa usey kudi ey?

¹⁷ Uyakin udi chipan cha usey nakash chidiokila kudi Yehova. Ukat kusal anch chituswapel kwikal ni urund wa piswimp pamwing ni Tatukwetu wa mwiur Yehova. Chinech chidi chom cha usey nakash tukutwisha kwikal nich. Yehova watufundishin kal nakash, pakwez dined didi kwau disambishin! Utukanin anch ukudandamen kutufundish chikupu. Chawiy, kumangej uyakin mudi ukutwisha kukumangej yom ya usey. Dandamen “[kuland] uyakin, kangal waulandish.” Kupwa, mudi David, niyey ukuwanyish kushilamu kwasalay kudi Yehova anch: “Nikendil mu uyakin wey.”​—Kuseng 86:11, TMK.