“Land Uyakin, Kangal Waulandish”

1, 2. (a) Chom ik chidia cha usey nakash mu mwom wey? (b) Uyakin ik tukwatina nich usey ni mulong wak? (Tal chipich cha kwinsambishin.)

CHOM ik chidia cha usey nakash mu mwom wey? Mulong tudi antu a Yehova, chom chidia cha usey nakash kudi etu udi urund wetu ni ndiy. Tukutwishap kuuswimp nich chom chikwau. Tukwatining kand nich usey uyakin udia mu Bibil mulong ukat kusal anch chituswapel kwikal arund a Yehova.​—Kolosay 1:9, 10.

² Yehova udi Mulej wetu Mujim, ukata kutufundish uyakin wa usey udia mu Dizu diend Bibil. Ukat kutufundish usey wa dijin diend ni ukat kutulej piur pa mikadil yend yiwamp. Ukat kutulej anch utukatin nakash, ni rukat riner rasala anch apana mwom wa Mwanend mukatish mulong wetwetu. Yehova ukat kutufundish piur pa Want wa Umesia. Ukat kupan ruchingej piur pa mwom wa kurutu, ra kushakam mwiur kudi azizidilau many, ni mu Paradis panap pansh kudi “amikoku akwau.” (Yohan 10:16) Yehova ukat kutufundish mutapu tufanyidina kushakam. Tumen uyakin winou mudi dipit mulong ukat kutukwash kumusejin Sakatang wetu ni ukat kutwinkish chitongijok mu mwom.

3. Ov, Yehova ukat kutwit nfalang mulong wa kwilej uyakin?

³ Yehova udi Nzamb ukweting muchim wa kupan. Muchim wend wa kupan wamubachika kupan Mwanend mulong wetwetu. Anch Yehova waman anch muntu kanang ukwet kuswir kwa uyakin, ukat kumukwash muntu winou kuutan. Kakutwishap kutwit nfalang mulong wa kwilej uyakin. Dichuku dimwing, muntu utazukinau anch Simon wamwinkisha Pita nfalang mulong amwinkish ulabu wa kupan spiritu utumbila kudi antu akwau. Pita warumburila anch yitongijok yend yading yiyimp ni wamwela anch: “Chifanyidin ey kujiy ni nfalang jey pamwing, mulong utongin anch ukutwish kuland chiyukish cha kusal nich chinech cha Nzamb nich nfalang.” (Midimu 8:18-20) Chawiy, chirumburikin ik ‘kuland uyakin’?

CHOM IK CHIRUMBURIKINA ‘KULAND UYAKIN’?

4. Mu mutu wa mulong winou, yom ik tukwileja piur pa uyakin?

⁴ Tang Jinswir 23:23. Chitin usu mulong wa kwilej uyakin wa mu Bibil. Tufanyidin kulik yom yimwing mulong wa uyakin. Ni kupwa kwa ‘kuland uyakin,’ charumburik anch kwilej uyakin, tufanyidin kubabal chakwel kangal ‘twaulandish’ charumburik anch kuulik. Mutapu ik tukata ‘kuland’ uyakin wa mu Bibil? Aulandishining jinch? Yakul ku yipul yiney kukutukwash kukwat uyakin nich usey nakash ni kusal kand anch tukwata mupak wa kulam dang uyakin. Tukwijik mulong wak uyakin udiokila kudi Yehova udi wa usey nakash kusutamu chom chin chawonsu.

5, 6. (a) Mutapu ik tukutwisha kuland uyakin pakad nfalang? Rumburil. (b) Mutapu ik tutanidinamu mu uyakin?

⁵ Anch alond anch chom chidi chamwamu chirumburikinap anch chom chinech chikwetap usey kanang. Dizu dia Hebereu dikarumwinau mu Jinswir 23:23 dilondina anch “land” dikutwish kurumburik kand anch “tambul.” Mazu minam maad mamekeshin anch muntu usadin usu ap ulikin chom kanang mulong wa kutambul chom chimenay anch chidi cha usey. Mulong wa kutukwash kutesh nawamp piur pa mutapu tukutwisha kuland uyakin, tong bil anch apanin makond mamwamu pa sok. Ov, tukutwish kuchingej anch makond makwiyezin aminau pa tebur? Bwat, tufanyidin kuya mu sok ni kumasend chakwel tweza nich ku chikumbu. Chawiy ap anch chitinap nfalang mulong wa kwikal nich makond, tufanyidin kusal usu mulong wa kumikal nich. Chilik chimwing, tukwetap kuswir kwa nfalang mulong wa kuland uyakin, pakwez chitin usu ni kwipan.

⁶ Tang Isay 55:1-3. Yom yalonday Yehova yitukwashin kutesh chirumburikina kuland uyakin. Mu verse winou, Yehova wilakejin mazu mend ma uyakin ni mem, mayel ni maar ma nviny. Mudi mukata mem matalel kumupizurish muntu wovila impu, uyakin ukat kutupizurish. Ni mudi mutapu ukata mayel kusal anch mwan akasikana, uyakin wa mu Bibil ukat kusal anch urund wetu ni Yehova wikal ukash. Yehova wilikejin kand mazu mend ni maar ma nviny. Mulong wak? Bibil ulondin anch maar ma nviny makat kumusangaresh muntu. (Kuseng 104:15) Chawiy anch Yehova watulej ‘kuland maar ma nviny,’ utulejin ang anch twalondul wintakel wend mu mwom wetu, tukwikal ni musangar. (Kuseng 19:8) Yehova usadidin kwilakej kwinoku mulong wa kutukwash kutesh mutapu tutanidinamu anch twilej uyakin ni twausadin. Katat el twisambinany yom yitan yitwalika pamwing ap mulong wa kuland uyakin.

YOM IK WALIKA MULONG WA KULAND UYAKIN?

7, 8. (a) Mulong wak kwilej uyakin kwitin chisu? (b) Kwipan ik kwasalay mwin kwilej umwing, ni kwading ni yibudikin ik?

⁷ Chisu. Chitin chisu chakwel anch muntu atesh uruu wa Want, kutang Bibil ni mikand yimedina pa Bibil, kwilej Bibil nau Atuman a Yehova, kurijek yikumangan, ni kuya ku yikumangan. Mulong wa kusal yom yiney yawonsu, tufanyidin kusadin chisu chitwafanyinang kusal midimu yikwau yakad usey nakash. (Tang Efes 5:15, 16.) Chitin machuku minch mulong wa kwilej uyakin wa pa dishin wa mu Bibil? Yishalijangen kulondwish muntu ni muntu. Kwikil mwimbu piur pa yom tukutwisha kwilej piur pa manangu ma Yehova, jinjil jend, ni piur pa yom yasalay kal. (Rom 11:33) Nimero wakusambish wa Chinong cha Kalam wafanikesha uyakin nich “kachisalamb kakemp kawamp” ni walonda anch: “Kangal wasanger kwey chisalamb chimwing cha uyakin. Anch chimwing chading chiwanyidin, ing kwafanyinangap kwau kwikal makwau. Pol kamu, kimb kamu yisalamb yivud.” Chawiy tukutwish kwiyipul anch, ‘Yom yinch nilejina kal piur pa Yehova?’ Ap anch twashakam chikupu, kukudandamen kwikal yom yivud tufanyidina kwilej piur pa Yehova. Nlel chidi cha usey nakash kusadin chisu tukweta katat mulong wa kwilej nakash piur pa Yehova. El tumanany chilakej cha muntu umwing wasala mwamu.

⁸ Mariko,a (tal mazu ma kwinshin) changadim wa mu Japon, waya mu États-Unis mulong wa kwilej shikol mu New York City. Dichuku dimwing, nambaz chibol wamuleja rusangu ruwamp kwol kwend. Mariko wading ni relijon wend, pakwez wasambisha kwilej Bibil ni nambaz umwing. Wakata nakash yom yading yilejinay, chawiy wita chakwel asambish kwilej tupamp twaad pa rubing. Ap anch Mariko wading ukwatiken nakash ni milong ya shikol ni mudimu wasalangay, wasambisha kuya ku yikumangan pakad kulab. Wasutishang chisu chikemp mu kwipuwangej chawiy watwishang kwikal ni chisu chivud mulong wa kwilej uyakin. Kusutin kwipan mudi kwinoku, Mariko wamusejina Yehova piswimp nakash, ni kupwa kwa angond, watambula dibatish. Kupwa kwa angond musamban, mu muvu wa 2006, wikala chibol, ni udandamedin kwikal chibol kushik ni katat.

9, 10. (a) Kwilej uyakin kukat kuswimp mutapu ik chitongijok chetu piur pa yom ya ku mujimbu? (b) Changadim umwing walikap kusal yom ik, ni mutapu ik wiyovilay piur pa chom chinech?

⁹ Yom ya ku mujimbu. Mulong wa kwilej uyakin, tukutwish kulik mudimu utufutinau nawamp ap mudimu utufutinau nfalang jivud. Chilakej, Pita ni Andare ading in kuta ansh, pakwez chisu chayitazukau kudi Yesu mulong ikala in kwilejend, alika mudimu wau wa kuta ansh. (Mateu 4:18-20) Chinech chirumburikinap anch ang wilej uyakin, ufanyidin kulik mudimu wey. Muntu ufanyidin kusal mudimu mulong wa kuwanyish maswir ma dijuku diend. (1 Timote 5:8) Pakwez anch wilej uyakin, mutapu wey wa kutong piur pa yom ya ku mujimbu ukuswimp. Ukwijik chom chidia cha usey nakash mu mwom wey. Yesu walonda anch: “Kangal wikumangejinany mapit ma pansh pa mangand.” Pakwez watukasikesha anch: “Kumangejinany mapit men mwiur.” (Mateu 6:19, 20) Yiney yawiy yasalay changadim umwing dijin diend Maria.

¹⁰ Maria wakatang kusengan masengan matazukinau anch golf chisu chadingay uchid mwan mukemp. Padingay ku sekonder, wijika kusengan nawamp nakash. Wikala mwin kusengan muwamp wa masengan minam ni chinech chasala anch amwinkish bourse charumburik anch amufutin nfalang mulong ileja universite. Chitongijok cha Maria chading anch ikala mwin kusengan wa piur wa masengan ma golf mu mwom wend chakwel ikal ni nfalang jivud. Pakwez wasambisha kwilej Bibil. Wakata nakash yom yading yilejinay ni wasambisha kuyisadin mu mwom wend. Walonda anch, “Mulong narijeka chitongijok ni mashakamin mam kukwatijan ni mbil ja Bibil, nikala ni musangar.” Maria wajingunina anch chikutwish kumukasiken kushinshikin pa urund wend ni Yehova ni pa masengan. (Mateu 6:24) Wakwata mupak wa kulik chitongijok cha kwikal mwin kusengan wa piur wa masengan ma golf mulong wa chom chimwing chipandakena kuwap. Nlel, Maria udi chibol ni ulondin anch ukwet “mwom wa musangar ni uwamp.”

11. Anch twilej uyakin, yom ik yikutwishau kutusal antu twijikijadina nau?

¹¹ Mutapu wa kushakam nau antu akwau. Anch twasambish kusadin yom twilejina mu Bibil, mutapu wa kushakam nau antu akwau ni antu a mu dijuku ukutwish kuswimp. Yesu watukwasha kutesh diyingishin dia yom yiney palembilay piur pa in kwilejend anch: ‘Yishitwisha kusutil ku uyakin; dizu diey didi uyakin.’ (Yohan 17:17) ‘Kwishitwish’ kukutwish kurumburik kand anch ‘kwauril.’ Anch twasambish kusadin uyakin mu mwom wetu, tudi antu aurilau ni mangand mulong tulondwil mbil ja Bibil. Ap anch tusadin usu wa kwikal ni urund uwamp ni antu akwau ni anamakwetu, amwing akutwish kutukis ni kukis yitiyij yetu yisu. Yiney yikutwishap kutushimokish. Yesu walonda anch: “Akankuny ayimp a muntu akez kwikal ching antu a mu dijiku diend.” (Mateu 10:36) Pakwez Yesu wakana kand anch chikalap nchik yom yivud tulikina mulong wa uyakin, tukez katambul yom yivud nakash!​—Tang Marko 10:28-30.

12. Yom ik yalikay mwin Yuda umwing mulong wa kwilej uyakin?

¹² Mu mwom wend wawonsu, mwin Yuda umwing utazukinau anch Aaron wading witiyijin anch chidi chiyimp kujimbul dijin dia Nzamb. Pakwez wakata kamu kwijik uyakin piur pa Nzamb. Dichuku dimwing, Atuman amuleja anch ang wawej mavoyel ku mamuny manying ma dizu dia Hebereu ma dijin dia Nzamb, akutwish kudijimbul anch “Yehova.” Aaron wasangara nakash kwilej yom yiney chawiy waya ku sinagog mulong wa kuyilejamu alej a yijil! Watonga anch akutwish kusanger kwilej uyakin piur pa Dijin dia Nzamb, pakwez chadingap mwamu. Chawiy, amuchidina mat ni kumwopat. Dijuku dia Aaron niyawiy diamukisa. Pakwez kalikap yom yiney yimukangesh kwijik yom yivud piur pa Yehova. Aaron wikala Kaman wa Yehova ni wamusadina Yehova nich kushinshaman. Niyetu tukutwish kuchingej anch mutapu wetu wa kushakam nau antu akwau ukutwish kuswimp pitwilejina uyakin.

13, 14. Kuswimp ik tufanyidina kusal piur pa mutapu wetu wa kutong ni wa kusal yom anch twilej uyakin? Let chilakej.

¹³ Yitongijok ni yisal yijondila. Anch twilej uyakin ni twasambish kushakam kukwatijan ni mbil ja Bibil, tufanyidin kuswimp pakad kulab mutapu wetu wa kutong ni wa kusal yom. Kambuy Pita wafunda anch: “Mudi an amuziyidila Nzamb, kangal walondulany maku mayimp ma mujimbu, mudi muwadinganya pakur.” Kupwa waweja kand anch: “Ikalany atumbila mu yaku yen yawonsu.” (1 Pita 1:14, 15) Mu musumb wa pakur wa Korint, antu avud ading ni yisal yijondila. Antu ading ashicha mwinimwa afanyina kuswimp mulong wa kwikal ishitwila ku mes ma Yehova. (1 Korint 6:9-11) Nlel, antu avud akat kuswimp chisu chikatau kwilej uyakin mudi mwasalau antu inay. Pita wisambina yom yiney pafunday anch: ‘Chisu cha pakur, wadingana in kusal yitil mudi mukat kusalau antu a michid yikwau. Wasalanya kand usund, walondulanya maku mayimp ma mujimbu, wapandakeshanya kukwachik maar, wibombanya mu yisak ya kuna maar, chad wasalanya yitil ya usany, chad wifukwilanya kand akish atakanena.’​—1 Pita 4:3.

¹⁴ Devynn ni Jasmine alewang maar mu mivu yivud. Ap anch Devynn wading ni ukaliweny piur pa milong ya kutal nfalang, katwishap kulam mudimu wend mulong wa kuleu maar. Jasmine wading wijiken mulong wa ujim ni chisum. Dichuku dimwing, pading palewangay kal, Jasmine wasankanijana nau amishoner Atuman mwi njil. Amuleja anch asambish kwilej nend Bibil. Pakwez chisu chayau kwol kwau rubing ralondulaku, Jasmine ni Devynn ading alewang kal. Kadingap atongidina anch amishoner akutwish kuya ku chikumbu chau. Dichuku dikwau amishoner aya kand, pakwez pinipa yom yading mutapu windj. Jasmine ni Devynn ading ni musangar wa kwilej uyakin wa Bibil, ni pakad kulab asambisha kusadin yom yading yilejinau. Mu angond aad ni chikunku, alikap kuna maar ni kupwa afundisha uruw wau kudi mburamatad. Antu avud mu ul wau amana mutapu waswimpay Jasmine ni Devynn, niyau asambish kwilej Bibil.

15. Kuswimp ik kumwing kukash tufanyidina kusal mulong wa uyakin, ni mulong wak?

¹⁵ Yishankur ni yaku yakad kumusangaresh Nzamb. Kuswimp kumwing kukash tufanyidina kusal kudi kulik yishankur ni yaku yakad kumusangaresh Yehova. Ap kupwa kwa kwilej mutapu wiyovilingay Yehova piur pa yom yiney, antu amwing chiyikasikedin kuyilik. Akat kwiyakamish piur pa mutapu ukusalau antu a mu dijuku diau, ambay nau a mudimu ap arund nau. Ijing anch antu amwing akweting yisu yivud yovil yikash piur pa yishankur yimwing mudi kuyilimish anamakwau afila kal. (Kuvurik Yijil 14:1) Chawiy, yom ik yikutwisha kutukwash kuswimp? Tukutwish kwilejin ku yilakej yiwamp ya antu a pakur aswimpa chisu chilejau uyakin, mudi in Kristu a kusambish a mu Efes.

16. Kwipan ik kumwing kwasalau antu amwing ading mu Efes?

¹⁶ Mu musumb wa pakur wa Efes, antu avud ading kusalang yom ya ulaj. Yom ik yasalau antu inay chisu chikalau in Kristu? Bibil urumburil anch: “Antu avud a pakach pau in ulaj akumangeja mikand yau, chad ayosh patok kurutu kwa antu. Awiy achinda usey wa mikand yiney, wading wa nfalang tunan makum matan ja utad wa argent. Chawiy dizu dia Nzamb diapalangana pakach pa antu nich usu, chad miril ni miril ya antu itiyija.” (Midimu 19:19, 20) In Kristu inay ashinshamena ajiyisha pakad kulab mikand yau ya nfalang jivud yading yilondina piur pa ulaj, ni Yehova wayiyukisha.

17. (a) Yom ik yimwing twalika pamwing ap mulong wa uyakin? (b) Yipul ik tukwakula mu mutu wa mulong ulondwilaku ou?

¹⁷ Ing ey yom ik walika mulong wa kwilej uyakin? Etu awonsu twapana chisu chetu. Antu amwing pakach petu alikap mitapu yadingau nich mulong wa kwikal ampich. Ni pamwing ap twaswimpa mutapu wetu wa kushakam nau antu akwau. Antu avud pakach petu aswimpa mutapu wa kutong ni wa kusal yom kanang ni alika yishankur ni yaku yakad kumusangaresh Yehova. Pakwez tukwet kashinsh anch uyakin wa Bibil udi wa usey nakash kusutamu chom chin chawonsu twalika. Uyakin wa mu Bibil wasala anch chituswapela kwikal ni urund wa piswimp ni Yehova, udia chom cha usey nakash mu mwom wetu. Anch twatongin piur pa yiyukish yawonsu tukweta mulong wa uyakin, chikasiken kutesh mulong wak muntu ukutwish kukat ‘kuulandish.’ Chom chinech chikutwish kushiken mutapu ik? Ni mutapu ik tukutwisha kwipuk kusal kurumbuk kukash mudi kwinoku? Tukwakul yipul yiney mu muntu wa mulong ulondwilaku ou.