En Kiwijanyap Mbut Jikusonga Nawamp!
“Kunany jimbut jen mu chisu cha pamanch, kunany kand jikwau chisu cha urel mulong en kiwijanyap anch mbut ja pamanch ap ja urel jawiy jikusonga nawamp.”—MUL. 11:6.
1. Ov, mulong wak kuman mutapu upamina yom kushimokishining ni kwitudish?
NDIM uswiridin kwikal ushimpishina. (Yak. 5:7) Kupwa kwa kukun mbut, ndiy uswiridin kuchingel djat ni pijikuvabuka. Pakemp-pakemp, anch mikadil yifanyidin, mitombu yikusambish kumekan, yikusambish kuvabuk pansh. Kupwa yikupam yikal mitond yikutwisha yasambish kusong mabuj. Chakin kamu, katat ndim ukutwish wikal nich ruchingej ra kwangul. Chishimwokishin mudi ik pa kuman chilay cha kupam! Chidi cha kwitudish mudi ik, pa kumwijik Musul wa kukul kwinoku. Tukutwish kulam nawamp mbut. Tukutwish twayikwash nich kwichilaku mem. Pakwez ching Nzamb kusu ndiy ukutwisha wayikudish.—Isikej 1 Korint 3:6.
2. Manans ik matulejay Yesu piur pa kupam muspiritu mu yishim yitwilejina mu mutu wasambedilaku ou?
2 Mudi mwachilejanangau mu mutu wa mulong wasambelangaku ou, Yesu wafanikesha mudimu wa kulejan Want nich mudimu wa ndim ukusina mbut. Mu chishimu cha mitapu ya mavu kushalijan, Yesu wakasikeshina anch ap anch ndim wakus mbut jiwamp, mwikadil wa muchim wa muntu wawiy ukulejana anch mbut jikupam nawamp ap bwat. (Marko 4:3-9) Mu chishimu cha mwin kukus mbut ulela, Yesu wakasikeshina anch ndim kateshinap kamu kurumburik kwa mutapu upamina mbut. Chidi mulong kupam kwinoku kwengamidin pa usu wa Nzamb, kichidiap ku usu wa muntu. (Marko 4:26-29) Elany katat tushinshikinany yishim yikwau yisatu yalonday Yesu—ritand ra mutard, chivish ni wand.a
Chishimu cha Ritand ra Mutard
3, 4. Chishimu cha ritand ra mutard chikasikeshidin mutambu ik wa uruu wa Want?
3 Chishimu cha ritand ra mutard, ni chawiy chidi mu Marko shapitre wa 4, chikasikeshidin yom yaad: cha kusambish, kupam kushimokishina kwa uruu wa Want; cha kaad, mutapu ulaminau antu itiyijina uruu. Yesu walonda anch: “Tukuufanikeship want wa Nzamb nchik? Ap chishimu ik chitukuutekap nich? Udi kwau mudi ritand ra mutard, rikata kwelau anch arikun pansh, kutal rawiy ripandakenumu mbut jawonsu jidia pansh kukep, Pakwez pakurikunau, rasapuk, rukupamb, rapandikan mbut jikwau jawonsu kujimb, rukupang mitiy, chawiy atujil a mwiur akwez ni kuwil mwishin mwa urel wau.”—Marko 4:30-32.
4 Pinap kisambidinap mutapu upamina “want wa Nzamb” mudi muwamekena ku kusutil ku kupalangan kwa uruu wa Want ni ku kupam kwa chikumangen cha Ukristu kusambishil pa Pentekot mu muvu wa 33 C.C. djat ni ilel. Ritand ra mutard ridi ritit rikemp nakash rikutwisha kufanikesh chom chikemp nakash. (Isikej Luka 17:6.) Pakwez, chakin kamu, mutond wa mutard ukutwish walep wikal wa mametre 3 djat ku 5 ni ukwikal nich mitiy yijim-yijim ni yikash, chawiy chiukushikena ku kwikal mutond ujim.—Mat. 13:31, 32.
5. Chikumangen cha Ukristu cha mu mivu chitot ya kusambish chapama mutapu ik?
5 Kupam kwa chikumangen cha Ukristu kwasambisha mu mutapu umwing ukemp mu muvu wa 33 C.C. pa chisu chayipanau many ma mwiku utumbila in kwilej 120. Mu kusut kwa kachisu kakemp kusu, kachikumangen kinak kakemp ka in kwilej kikala ni tunan twa in kwitiyij. (Tang Midimu 2:41; 4:4; 5:28; 6:7; 12:24; 19:20.) Mu mivu makum masatu yasuta, in kwangul avulijana nakash chawiy chatwishay kambuy Paul kuyilej in chikumangen cha in Kolosay anch rusangu ruwamp arilejen “kudi awonsu atangilau mwishin mwa diur.” (Kol. 1:23) Kupam kwamushena mudi ik!
6, 7. (a) Kujimb ik kusadikina kusambishin kamu mu muvu wa 1914? (b) Kujimb ik kukwau kukusadika kand?
6 Kusambishin pimikinau Want wa Nzamb mwiur mu muvu wa 1914, mitiy ya “mutond” wa mutard yapambin kal mutapu umwing wakad kutongin. Antu a Nzamb amen ni mes mau kuwanyin kwa uprofet wafunday Isay anch: “Dijuku diey dikemp dia uzwendj dikez kikal muchid wa usu.” (Isay 60:22) Kachisak kakemp ka antu azizidilau many asala mudimu wa kulejan Want kwisambishil kwa chitot cha 20 kadingap ni mutapu wa kwijik anch kushik mu muvu wa 2008, kukwikal piswimp mamiliyom sambwad ma Atuman akusala mudimu winou mu jingand 230 ni kusut. Chakin kamu kupam kushimokishina, kufaniken nich kwa ritand ra mutard ra mu chishimu cha Yesu!
7 Ov, kupam kwimanyina kwau pinipa? Bwat. Antu akeza kwikal mu Want wa Nzamb akez kwizulijan pa divu diawonsu. Akankuny awonsu akez kuyidioshap. Kwikil muntu ap umwing ukutwisha kuyisal yom yiney pakwez Mukaleng Mwant Yehova ndiy amwinend ukeza kwandam mu milong ya mangand. (Tang Daniel 2:34, 35.) Tukez kuman mutapu ukeza kuwanyin kapamp ka nsudiel uprofet ukwau wafunday Isay anch: “Ngand yikez kizul nich ronganyin ra [Yehova, NW] mudi mukata kwizul mem mu karung.”—Isay 11:9.
8. (a) Atujil a mu chishimu cha Yesu afanikeshin anany? (b) Atuchidijin ku chom ik kusambish kamu katat?
8 Yesu ulondil anch atujil a mwiur akutwish kwez kutungaku yinswal yau mu urel wa Want winou. Atujil inay kafanikeshinap akankuny a Want asotila kudia mbut jiwamp, mudi mwadingau ni kusal atujil isambidinau mu chishimu cha ikundj wadinga ni kukus mbut pa milad ya mavu kushalijan. (Marko 4:4) Pakwez, mu chishimu chinech atujil afanikeshin antu atentamina asotila kwikangin mu chikumangen cha Ukristu. Ap katat, antu inay ayichidijin ku yaku ya kuyishesh muspiritu ni ku yisal yijondila ya mangand manam mayimp. (Isikej Isay 32:1, 2.) Chilik chimwing, Yehova niyend ufanikeshin Want wa Mesia nich mutond ni walonda mu uprofet anch: “Wawiy kamu mukandu upandakena kulep wa in Isarel. Mitiy yau yikez kusong mabuj, chad ukez kwikal mutond wa ufun mudi wa kanjadil. Atujil a mitapu yawonsu akez kushakam ni kwiswedishil mu urel wa mitiy ya mutond winou.”—Ezek. 17:23.
Chishimu cha Chivish
9, 10. (a) Chom ik chakasikeshinay Yesu mu chishimu cha chivish? (b) Mu Bibil, chisu chivud chivish chifanikeshining ik, ni chipul ik tukushinshikina piur pa mutapu wisambinay Yesu chivish?
9 Kupam kumekeningap chisu chawonsu ku mes kwa antu. Mu chishimu chend cha kaad, Yesu ukasikeshidin chom chinech. Ndiy ulondil anch: “Want wa Mwiur ufanaken mudi chivish cha mabot chanonay mband umwing, wasamp nich wung wa chimpay chakabuj chakwel wung wawonsu ututuk.” (Mat. 13:33) Chivish chinech chifanikeshin ik, ni mutapu ik chisambidina kujimb kwa Want?
10 Mu Bibil, chivish akat kuchisadilang chisu chivud mulong wa kufanikesh nich chitil. Kambuy Paul wisambina chivish mwi njil yiney pisambinay chipwichik chiyimp cha mwin kusal yitil wadinga mu chikumangen cha pasak cha in Korint. (1 Kor. 5:6-8) Ov, Yesu wasadila chivish mulong wa kufanikesh kujimb kwa chom chiyimp?
11. Mutapu ik wadingau in Isarel a pasak ni kusadil chivish?
11 Kurutu kwa kwakul chipul chinech, tufanyidin bil twijika yom yijim yisatu. Cha kusambish, ap anch Yehova walikisha chivish pa chisu cha musambu wa Kusut kwa Yehova, pa yisu yimwing ndiy wadinga ni kwitiyij milambu yadinga nich chivish. Chivish adinga ni kuchisadil pa chisu cha yakupesh ya milambu ya chisambu, mulong mwin kuyipesh wadinga amwinend ni kuyipan nich muchim wa kumujikitish Yehova mulong wa yiyukish yend yivud. Yakudia yiney yadinga yisangareshina nakash.—In Levi 7:11-15.
12. Chom ik twilejidina mu mutapu usadidilay Bibil yom kanang mulong wa kuyifanikesh ni yom yikwau?
12 Cha kaad, ap anch chom kanang akutwish isambinach mu mutapu uyimp mu Mifund, pa yisu yikwau chom chawiy chimwing akutwish achisadil mulong wa chom chiwamp. chilakej, mu 1 Pita 5:8, Satan amufanikeshin ni ntambu, mulong wa kulejan ubaj wend, mwikadil wend uyimp. Pakwez mu Kuburik 5:5, Yesu niyend amufanikeshin ni ntambu—“ntambu udia ku muchid wa Yuda.” Mu chilakej chinech chansudiel, ntambu amusadidil mudi chijingidij cha kutentam ni kukapuk.
13. Chishimu cha Yesu cha chivish chilejen ik piur pa kupam kwa muspiritu?
13 Cha kasatu, mu chishimu cha Yesu, kalondap anch chivish chayipisha mutand wawonsu wa wung, wikal kand wakad usey. Ndiy wawisambina kusu mu mutapu uwamp wa kusal nich mikat. Mband mwin chikumbu ukutwish nich kukat watekaku chivish, ni yibudikin yikwikal yiwamp. Chivish chadinga chijingamen mu mutand wa wung. Chawiy lel, kututuk kwadingap kumekena ku mes ma mband mwin chikumbu. Chom chinech chituvurishin ikundj wadinga ukusina mbut ni walala uchuku. Yesu walonda anch “mbut jikat kuvabok ni kulep, ndiy kijip kwend muchidia.” (Marko 4:27) Mutapu uswapela mudi ik wa kufanikesh kupam kwa muspiritu kwakad kumekan ku mes! Kwisambishil tukutwishap twaman kamu kupam nawamp, pakwez tukuman yibudikin kamu yikal patok.
14. Mutambu ik wa mudimu wa kulejan ukasikeshidinau mu chishimu ku kulond anch chivish chandama mu mutand wawonsu?
14 Kichidiap kusu anch kujimb kwinoku kumekenap ku mes ma antu pakwez kusadikin mu mangand mawonsu. Chinech chidi mutapu ukwau wa kukasikeshin udia mu chishimu cha chivish. Chivish chandama mu mutand wawonsu, “mu yilik [yawonsu] yisatu ya wung.” (Luka 13:21) Mudi chivish, mudimu wa kulejan Want usadila anch in kuulejan avulijan wajimbin kal mu chilik cha kwel anch katat Want aulejen djat ni “kwisudiel kwa mangand.” (Mid. 1:8; Mat. 24:14) Kudi kwitapil dilau mudi ik kwikal umwing wa in atandurila mu mutapu wamushena mudimu wa Want!
Wand
15, 16. (a) Lond mu wiswimp chilakej cha wand. (b) Wand ufanikeshin ik, ni mutapu ik wa kujimb kwa Want wisambidina chishimu chinech?
15 Chipandakenamu nakash kusut uvud wa antu afila mukan nlel anch adi in kwilej a Yesu Kristu chidi ngikadil ya in kwilej inay. Yesu wisambina mutapu winou wa kujimb wa Want paletay chishimu chikwau, cha wand. Ndiy walond anch: “Chikwau kand, want wa mwiur udi mudi wand utilau mu karung, wakumangej ansh a mitapu yawonsu.”—Mat. 13:47.
16 Want, ufanikeshin mudimu wa kulejan Want, ukumangejina ansh a mitapu yawonsu. Yesu wadandamena nich kulond anch: “Chiwizula aukakila ku chikumu; ashakama pansh, ayitonda awamp ayitek mu jinsapu, pakwez ayimp ayidjibula kwau. Mwamu muchikeza kikal kwisudiel kwa mangand; angel akez kez ni kuyauril ayimp kuyidiosh pakach pa in kutentam, Akez kayidjibwil mu dibuku dia kasu; kukez kikal kudil ni kwisumakesh ku mazeu.”—Mat. 13:48-50.
17. Kutond kwisambidinau mu chishimu cha wand kudi kwa chirung ik?
17 Ov, kutond kwinoku kwisambidin dirumburish dia nsudiel dia amikoku ni ampemb kwisambinay Yesu anch kukez kusadik pakezay kuchirik mu uyaj wend? (Mat. 25:31-33) Bwat. Dirumburish dined dia nsudiel dikusadik pakezay kwez Yesu pa chirung cha mar makash. Pakwez, kutond kwisambidinau mu chishimu cha wand kusadikin “kwisudiel kwa mangand.”b Chawiy chisu chitudia katat—machuku mayila djat ni pimakwezina mar makash. Ov, kutond kwinoku kusadikin nchik katat?
18, 19. (a) Mutapu ik usadikina katat mudimu wa kutond? (b) Chom ik chifanyidinau kusal antu akweta michim yitentamina? (Tal kand note udia pa paj wa 21.)
18 Mamiliyon ma ansh achifanikesh adiokila mu karung wa antu arundumukidin mu dirijek dia Yehova mu yisu ya katat. Amwing akumangen ku Chivurikish, akwau ezining ku yikumangan yetu, ni akwau kand ni katat achisangaredin kwilej netu Bibil. Ov, inay awonsu adi chakin kamu in Kristu akin? Akutwish ez ‘ayikakil ku chikumu,’ pakwez Yesu utulejin anch ching kusu “awamp” awiy atekinau mu jinsapu, jifanikeshina yikumangen ya Ukristu. Pakwez akad kufanyin ayidjibwidil kwa, chakin kamu akez kayidjibwil mu dibuku dia chifanikesh dia kasu, ka disheshik diezinaku.
19 Mudi muchadinga piur pa ansh ayimp, antu avud ilejang Bibil ni antu a Yehova alika kal kwau kwilej. Amwing ayivala kudi anvaj in Kristu chakin kamu alika kal kwikal in kwilej a Yesu. Katwishap kwau kukwat mupak wa kumusadil Yehova ap anch amusadila mu kachisu ni kupwa alika kwau.c (Ezek. 33:32, 33) Chidi cha usey nakash, anch antu awonsu akweta michim yitentamina asala usu wau ayinau chakwel ayikumangejin mu jinsapu jifanikeshina yikumangen kurutu dichuku dia nsudiel dia dirumburish ni ashakama mu diking.
20, 21. (a) Chom ik twileja kal kusutil ku kushinshikin yishim ya Yesu piur pa kupam? (b) Ukwatin mupak wa kusal ik?
20 Ov, chom ik twileja kal kusutil ku kushinshikin kwetu mu wiswimp yishimu ya Yesu piur pa kupam? Cha kusambish, mudi kupamb kwa ritand ra mutard, yisakin ya Want ya panap pansh yapamin kal mu mutapu wamushena. Kwikil chom chikutwisha kukangesh kuya kurutu kwa mudimu wa Yehova! (Isay 54:17) Chikwau, diking dia muspiritu ayinkinshinadi kal antu asotina ‘kushakam mu urel wa mutond.’ Cha kaad, Nzamb ndiy ukata kukudish. Mudi mudia chivish chijingamena chipalangen mu mutand wawonsu, kupam kwinoku kukatap chisu chawonsu kovikan kurumburik kwaku pakwez, kupalangen nakash! Cha kasatu, kadiap awonsu itiyijina adia afanyidina. Amwing au adi mudi ansh akad kufanyin a mu chishimu cha Yesu.
21 Chikasikeshin mudi ik, pa kuyiman antu avud mwamu ezin kudiay Yehova! (Yoh. 6:44) Chawiy chisadila anch kwikal kwiwejinaku kukash mwi ngand yimwing kupwa mu yikwau. Uyaj wawonsu mulong wa kupam kwinoku uyil kudi Yehova Nzamb. Pitumena chom chinech, umwing ni umwing wetu ufanyidin kusal usu chakwel aziyila ku dibabesh diafundau pasutil kal yitot ya mivu dilondila anch: “Kunany jimbut jen mu chisu cha pamanch, . . . mulong en kiwijanyap anch mbut ja pamanch ap ja urel jawiy jikusonga nawamp.”—Mul. 11:6.
[Mazu madia kwishin kwa paj]
a Yirumburil yiney yidi kutenchik kwa yom yarumburilau mu Chinong cha Kalam cha Kalol 15, 1992, paj wa 17-22, ni cha Chiwong 15, 1976, paj wa 45-64, (yawonsu ya Français).
b Ap anch Mateu 13:39-43 wisambidin mutapu ukwau wa mudimu wa kulejan Want, chisu cha kuwanyin kwau kuyil pamwing nich chisu cha kuwanyin kwa chishimu cha wand, pakampwil, pa chirung cha “kwisudiel kwa mangand.” Kutond kwa chifanikesh kwa ansh udi mudimu uyila kamu kurutu, mudi mudia kamu mudimu wa kukus mbut ni wa kwangul udandamedin kamu djat ni mu chirung chetu chinech.—Chinong cha Kalam cha Mwinkind 15, 2000, paj wa 25-26 (Français); Mwifukwila Nzamb Umwing Kusu Wakin, paj wa 178-181, paragraf wa 8-11.
c Ov, chom chinech chirumburikin anch muntu win mwawonsu walika kal kwilej ap wiyaurila kal ni antu a Yehova anch amudjibwidil kal kwa kudi angel mudi anch kafanyidinap? Bwat! Anch muntu wakin usotil kumuchirikin Yehova, chis chidi cha kwazuril.—Mal. 3:7.
[Picture on page 18]
Chilakej cha ritand ra mutard ritulejin ik piur pa kuya kurutu kwa Want?
[Picture on page 19]
Chom ik twilejidina kusutil ku chishimu cha chivish?
[Picture on page 21]
Kuyitond ansh awamp
kuyauril nich ayimp
kufanikeshin ik?
[Picture on page 20]
Ov, Mutapu Ik Ukwakula?
• Chishimu cha Yesu piur pa ritand ra mutard chitulejin ik piur pa kupam kwa Want ni piur pa diking dia muspiritu?
• Chivish cha mu chishimu cha Yesu chifanikeshin ik, ni uyakin ik wakasikeshinay Yesu piur pa kujimb kwa Want?
• Mitambu ik ya kupam kwa Want yisambidinau patok mu chishimu cha wand?
• Ov, mutapu ik tukutwisha kushinshikin anch tudi ku mutambu wa antu ‘akumangejinau kal mu jinsapu’?