Lik Mazu Ma Yesu Mayikela Manangu men
“Mulong watumay Nzamb ukat kulond mazu ma Nzamb.”—YOH. 3:34.
1, 2. Mazu ma Yesu madia mu Mafundish ma pa Mukandu tukumafanikesh nich yik, ni mulong wak tukutwish twalond anch madinga mashindamedin pa “mazu ma Nzamb”?
KAMANG wa kusong upandakena kujimb nlel ukwet makara 530 amutazukin anch Katumb wa mu Afrik. Udi chakin kamu dipit dia usey ukash! Pakwez, chipandakena usey nakash, madi mapit ma muspiritu madia mu Mafundish ma pa Mukandu ma Yesu. Chishimokishinap, mulong Yehova ndiy Musul wa mazu ma Kristu! Pisambinay piur pa Yesu, Bibil walonda anch: “Mulong watumay Nzamb ukat kulond mazu ma Nzamb.”—Yoh. 3:34-36.
2 Ap anch Mafundish ma pa Mukandu mameken anch amasala mwishin mwa chikunku cha saa, ajimbwilamu tupamp 21 jinsangu jidia mu mikand chinan yidia mu Mifund ya Uhebereu. Chawiy mashindamedina kamu pa “mazu ma Nzamb.” El tushinshikinany mutapu tukutwisha kusadin mazu mavud ma usey madia mu mafundish minam ma usey ma Mwan mukatish wa Nzamb.
“Ukasambish Kuchakul Nend Mwanamakwey”
3. Kupwa kwa kuyibabesh in kwilej end piur pa yibudikin ya ujim, chiyul ik chapanay Yesu?
3 Chitudia in Kristu, tuyukin ni tukwet chisambu mulong tukwet spiritu utumbila wa Nzamb, ni mu dibuj diend mudi musangar ni chisambu. (Gal. 5:22, 23) Yesu kasotap anch in kwilej end ashadisha chisambu ni musangar wau, chawiy chayibabeshay pantaliken nich kulab labee nich ujim. (Tang Mateu 5:21, 22.) Kupwa walonda kand anch: “Chawiy anch ey ukat kupan yakupesh yey ku chitamb, chad wavurikin anch mwanamakwey ukwet dizu kudi ey, shang bil yakupesh yey kurutu kwa chitamb, yang mwi njil yey ukasambish kuchakul nend mwanamakwey, chad ey wez upana lel mulambu wey.”—Mat. 5:23, 24.
4, 5. (a) “Yakupesh” ik yadinga yisambidinay Yesu mazu mend madia mu Mateu 5:23, 24? (b) Kuchakul ni mwanamaku ujimena kukwet usey ik?
4 “Yakupesh” yadinga yisambidinay Yesu pinap yadinga mulambu win wawonsu walambulangau mu tempel ku Yerusalem. Chilakej, milambu ya annam yadinga ya usey mulong yadinga chikunku cha difukwil diadingau ni kumwifukwil Yehova kudi antu end. Pakwez, Yesu wakasikeshina chom kanang cha usey ujim—kuchakul bil ni mwanamaku ujimena kurutu kwa kupesh yakupesh kudi Nzamb.
5 “Kuchakul” kurumburikin ‘kusot kwovijan.’ Ov, dilejan ik tukutwisha kwilejin ku mazu ma Yesu? Chakin kamu chikutwish chamekan anch mutapu wetu wa kushakam ni akwetu ukwet usu pa urund wetu ni Nzamb. (1 Yoh. 4:20) Chakin kamu, yakupesh yamupeshau Nzamb pasak kiyadingap chakin kamu yirumburikina anch muntu uyipeshina kayisadilangap anamakwend mu uwamp.—Tang Mike 6:6-8.
Kwikepish Kudi kwa Usey Ujim
6, 7. Ov, mulong wak chifanyidina kwikepish anch tusotin kuchirish chisambu ni mwanamakwetu utwarumbukinang?
6 Kuchakul nend mwanamaku ujimena kudi kamu kupak kwikepish kwetu. Antu ikepishina kakatap kutadikijan ap kutend ni ambay nau akaritiy mulong wa kusot kwijik uyingina nich. Kusal mwamu ku kutwish kwayipish milong—umwing wa milong mudi wadingau nich in Kristu a pakur mu Korint. Kambuy Paul walonda yitongijok yimwing yikash pa mulong winou anch: “Chidi chiyimp anch mukach mwen ukat kufundijanany muntu ni mukwau. Mulong wak walikany kusu kuman mar? Chipandiken kusu kunibwit yom?”—1 Kor. 6:7.
7 Yesu kalondap anch tufanyidin tuya kudi mwanamakwetu mulong wa kumwitiyikish anch tuyingin nich pakwez ndiy ufil nich. Rutong retu ridi kuchirish chisambu. Pakwel anch tuchakula, tufanyidin kulond patok mutapu utwovila. Tufanyidin kand twijik anch niyend wova anch yom yimutapin ku muchim. Ni anch turumbukin, tufanyidin kamu kwit dilikishin nich kwikepish.
‘Anch Dis Diey dia Katatuku Diakupwakesh’
8. Lejan mu wiswimp chitongijok chijim chidia mu mazu ma Yesu madia mu Mateu 5:29, 30.
8 Yesu waleta chiyul chiwamp piur pa kwishitul, mu Mafundish mend ma pa Mukandu. Ndiy wading wij anch yid ya mujimbu wetu wakad kuwanyin yikutwish yikal nich usu wa ubaj padi etu. Chawiy chalonday Yesu anch: “Anch dis diey dia katatuku diakutadish ku kwipwakal dibwita, udidjibul dikudiokal; mulong chidi chiwamp kudi ey kushadish chid chimwing cha mujimbu wey, ni kulik kudjibwish mujimbu wey wa kabuj mu Gehen. Ni anch chikas chey cha katatuku chakutadishil ku kwipwakal chikatula uchidiosh, uchidjibula chidiokala kudi ey; mulong chidi chiwamp kudi kushadish chidi chimwing cha mujimbu wey, ni kulik kudjibwish mujimbu wey wakabuj mu Gehen.”—Mat. 5:29, 30.
9. Ov, mutapu ik ukutwisha “dis” dietu ap “chikas” chetu ‘kutupwakesh’?
9 “Dis” disambidinay Yesu difanikeshin usu ap anch ukaliweny wa kutadishin manangu metu pa chom kanang, ni “chikas” chifanikeshin yitukutwisha kusal nich. Anch tubabelap, yid yiney ya mujimbu yikutwish ‘yatupwakesh’ ni tukulik ‘kwend pamwing ni Nzamb.’ (Dis. 5:22; 6:9) Anch twapakiu chakwel tumubwambwila Yehova, tuswirikedin kusal chisal chikash, cha kudjibul dis ap cha kukatul chikas cha chinfan.
10, 11. Yom ik yikutwisha kutukwash chakwel twipuka masandj?
10 Mutapu ik tukutwisha kulam dis dietu chakwel kangal twatal yom yiyimp ya masandj? Yob muntu wamwovanga Nzamb wom walonda anch: “Nachipa machip ni mes mam, kinikutalap kand mes kudi amband.” (Yob 31:1) Yob wadinga ngatan wakwata mupak wa kulik kujip yijil ya Nzamb ya mashakamin mawamp. Mwamu mufanyidina kwikal manangu metu twikala ngatan ap mujich. Chakwel kwiyep milong ya masandj, tuswiridin kwikal atakedinau nich spiritu utumbila wa Nzamb, ukata kuyitwishish antu amukatina Nzamb chakwel itudisha.—Gal. 5:22-25.
11 Chakwel twipuka masandj, tukusal nawamp anch twiyipul anch: ‘Ov, nilikining mes mam chakwel malangwisha mudi am maku ma kutang mikand yisambidina masandj, ku televizion, ap ku Internet?’ El tuvurikany kand mazu am malonday mwin kwilej Yakob anch: “Pakwez wawonsu ukat kwoziu pakat kwikakilay ku upwepu wend amwinend. Chawiy upwepu, anch wimish, ukuval chitil, ni chitil, anch chakul, chikulet rufu.” (Yak. 1:14, 15) Pa chinech, anch muntu mwawonsu wipana kal kudi Nzamb “ukutala” mband ap ikundj nich maswir mayimp ma masandj, ufanyidin kamu kusal kuswimp kukash kufanikeshinau mudi kubwit dis ni kudidjibul.—Tang Mateu 5:27, 28.
12. Chiyul ik cha Paul chikutwisha kutukwash chakwel tura tutaku nich maku mayimp ma masandj?
12 Anch twasadil mutapu uyimp makash metu kukutwish kwatushikij ku kujip yijil ya Yehova piur pa mashakamin mawamp, tufanyidin kukwat mupak ukash wa kwikal ishitwila mu mashakamin metu. Chawiy lel, tufanyidin kutesh chiyul cha Paul cha kujip “yid . . . yidia ya mangand: kusotan, kwijond, ris, maku ma yiyimp, ni kwinan, yawiy yidia ya akish.” (Kol. 3:5) Dizu “jipany” dilejen mupak ukash ufanyidina kukwat mulong wa kura nich tutaku maku mayimp ma mujimbu.
13, 14. Mulong wak chidi cha usey kwiyep yitongijok ni yisal ya masandj?
13 Chakwel anch achidija mwom wend, muntu ukutwish witiyij anch amukatula chikas ap mwend. ‘Kudjibul’ dis ap chikas kwa chinfan kudi kwa usey kudi etu chakwel kwiyep yitongijok ni yisal yiyimp ya masandj yikutwisha kutek mu ubaj mwom wetu wa muspiritu. Kwishitul mu manangu, mu mwikadil, ni muspiritu yawiy njil yimwing kusu tukutwishina kwiyepin disheshik dia chikupu mu Gehen wa chinfan.
14 Mulong wa chitil ni kuburen kuwanyin kutwaswana, chitining usu chakwel twikal ishitwila mu mwikadil. Paul walonda anch: “Pakwez nikat kuziyish mujimbu wam ni kuutek ku uswik; mudi kulond anch: pinikulejana rusangu ruwamp kudi akwetu, amwinam kangal narezikuku.” (1 Kor. 9:27) Komb tukwatany mupak wa kusadil chiyul cha Yesu mulong wa kwishitul mu mwikadil, kangal twilikidin ayinetu tusala yom yimekeshina anch tuburedin kujikitish mulong wa mulambu wa difut.—Mat. 20:28; Heb. 6:4-6.
“Panany”
15, 16. (a) Mutapu ik washay Yesu chilakej cha kupan? (b) Mazu ma Yesu madia mu Luka 6:38 marumburikin ik?
15 Mazu ma Yesu ni chilakej chend chipandakena kuwap yiletishen muchim wa kupan. Wamekesha muchim wa kupan kujim pezay pa divu chakwel antu akad kuwanyin ataninamu. (Tang 2 Korint 8:9.) Yesu washa amwinend cha kwisotin uyaj wend wadingay nich mwiur ni waladika mwom wend mulong wa an a antu akayitil, amwing pakach pau akez kutambul mapit ma mwiur mudi answan nend mu Want. (Rome 8:16, 17) Ni Yesu wakasikesha kamu muchim wa kupanang chisu chalonday anch:
16 “Panany, ni yen akez kakwinkishany; pandikeshany, ni akez katul ku mend kwen chanyikeshau chishikuruka, chabatamishau, chikata kusompwok. Mulong chilik chawonsu chiukwilikanya nich chawiy chikeza kanilikinau nich ni yen.” (Luka 6:38) ‘Kutul ku mend chanyikeshau chashikurik’ kwisambidin chaku cha in kulandish amwing adinga ni kwizwish too yom mu mavav ma maswin ma mwin kuland, madingau ni kukas moj mulong wa kusendinamu yom. Kupan kwa kwikatin kukutwish kwayishikij akwetu niyawiy atwinkisha chilik chimwing, pamwingap pa chisu tudia mu maswir.—Mul. 11:2.
17. Mutapu ik mudiay Yehova chilakej chipandakena cha kupan, ni kupan kwa mutapu ik kukutwisha kwatuletin musangar?
17 Yehova uyikatin ni uyifutining antu akata kupan nich musangar. Ndiy amwinend washa chilakej chipandakena, wamupana Mwanend wa kuval kwend umwing “chakwel mwawonsu ukwitiya kudia ndiy kakujiyip, pakwez ukwet kal mwom wa chikupu.” (Yoh. 3:16) Paul wafunda anch muntu “ukukuna pajim ukez kapodil kand pajim. Muntu ni muntu asala mudi mwalonday mu muchim wend; kangal wapan ni ushon mu muchim wey wakad kufanyin; mulong Nzamb ukatil mwin kupan ukat kupan ni musangar.” (2 Kor. 9:6, 7) Kupan chisu chetu, usu wetu, ni mapit metu ma ku mujimbu mulong wa kukwash difukwil diakin kukat kutuletin musangar ni difut.—Tang Jinswir 19:17; Luka 16:9.
“Kangal Wadjimish Mpuny Kurutu Kwey”
18. Mikadil ik yikutwisha kushiken chakwel tweza ‘kuburen difut’ kudi Tatukwetu wa mwiur?
18 “Dimukany chakwel kangal wasadilany kutentam kwen kurutu kwa antu mulong wa kumekesh kudi awiy, palemp waburenany difut kudi Tatukwen udia mwiur.” (Mat. 6:1) Yesu wiyendisha kukwatijan nich rusot ra Nzamb kusutin ku “kutentam.” Kasotap kulond anch chiyipin kusal yisal ya winzamb ku mes kwa antu, mulong ndiy wayileja in kwilej end anch amunyika “kutok [kwau] kurutu kwa antu.” (Mat. 5:14-16) Pakwez tukez ‘kuburen difut’ kudi Tatukwetu wa mwiur anch twasal yom mulong wa ‘kwimekesh’ ni chakwel atubaza, mudi in kusengan adia pibur asengena teyatre. Anch tukwet yibachikin mudi yiney, tukezap kwikal nich urund wa piswimp ni Yehova ni tukezap kutambul yiyukish ya chikupu ya winyikel wa Want.
19, 20. (a) Yom ik yasotay Yesu palonday anch “kangal wadjimish mpuny” chisu upanina “chom cha riy”? (b) Ov, mutapu ik tukutwisha kuchikangesh chikas cha kamaku kangal chijik yisadila chikas cha katatuku?
19 Anch tukwet manangu mawamp, tukulondul chiyul cha Yesu chalonday anch: “Chawiy anch wasal chom cha riy, kangal wadjimish mpuny kurutu kwey, mudi chikat kusalau in kubabek mu masinagog ni mu mikombil, chakwel atambul uyaj kudi antu. Chakin kamu nakulejany anch: Awiy akil kal difut diau.” (Mat. 6:2) Apana “chom cha riy” mulong wa kuyikwash adia mu maswir. (Tang Isay 58:6, 7.) Yesu ni in kwilej end adinga nich chipau mulong wa kuyikwash atuzweny. (Yoh. 12:5-8; 13:29) Kichadingap chiwamp kudjimish mpuny payikwashau atuzweny, chawiy, chimeken anch Yesu wasadina chifanikesh chisu chalonday anch kitufanyidinap “kudjimish mpuny” kurutu kwetu chisu tupanina “chom cha riy.” Kitufanyidinap twalejan chom chinech tupanina, mudi mwasalangau Ayuda Afarise. Yesu wayela anch adi in rubabek mulong alejananga yom yau ya riy yapanangau “mu masinagog ni mu mikombil.” In rubabek inay adinga “akil kal difut diau.” Kuyibaz kudi antu ni kushakam pa jindond ja piur pamwing ni alej mu sinagog kwawiy ku kutwisha kusu kwikal difut diau, mulong Yehova kakezap kuyinkish chom. (Mat. 23:6) Ov, chom ik lel, chelau kusal in kwilej a Kristu? Yesu wayileja—niyetu kumwing anch:
20 “Pakwez anch ey wasal chom cha riy, kangal chikas chey cha kamaku chijik chom chasalangay chikas chey cha katatuku: Kusadil kwa riy kwikala kwau ku ujindj; ni Tatukwey ukat kumen mu ujindj ukez kakufut.” (Mat. 6:3, 4) Makas metu masadining pamwing chisu chawonsu. Chawiy lel, kulond anch kangal chikas chey cha kamaku chijik yisadila chikas cha katatuku chirumburikin anch tukutwishap kwijikish yisal yetu ya riy, ap kudi arund adia piswimp netu mudi mudinga chikas chetu cha kamaku piswimp ni chikas chetu cha katatuku.
21. Mu difut didiokila kudi ukata “kumen mu ujindj” mudi ik?
21 Anch kitututwilap mulong wa yom tuyinkishina akwetu, “chom cha riy” chetu chikwikal mu ujindj. Kupwa, Tatukwetu “ukat kumen mu ujindj” ukez kutufut. Chishichay mwiur mwakadiay kumekan ku mes ma antu, Tatukwetu wa mwiur ushich “mu ujindj” mu chilik cha kwel anch antu iyakamishin. (Yoh. 1:18) Mu difut didiokila kudi ukata “kumen mu ujindj” mudi urund wa piswimp ni Yehova, kutulikishin yitil yetu, ni kutwinkish mwom wa chikupu. (Jinsw. 3:32; Yoh. 17:3; Efes 1:7) Kudi yom yivud yipandakenamu kuwap kupandakanamu kushiman kwa antu!
Mazu ma Ranaken Mitufanyidina Kukat
22, 23. Ov, mulong wak tufanyidin kukat mazu ma Yesu?
22 Mu Mafundish ma pa Mukandu mudi malejan mavud ma usey ma muspiritu ma mitapu kushalijan. Makwet kamu mazu ma usey nakash makutwisha kutuletin musangar ap mu mangand manam mavundangena am. Mwawiy, tukez kasangar anch twakat mazu ma Yesu ni kumalik mayikela manangu metu ni mwom wetu.
23 Muntu mwawonsu ukata “kutesh” ni ‘kusadil’ yom yafundishay Yesu ukez kuyukishiu. (Tang Mateu 7:24, 25.) Komb tukwatany kamu mupak wa kushakam kukwatijan nich chiyul cha Yesu. Mazu minam mavud madia mu Mafundish ma pa Mukandu akumashinshikin mu mutu wa mulong wa nsudiel mu mitu yiney ya kwilej.
Ov, Ukwakul Nchik?
• Mulong wak chidi cha usey kuchakul ni mwanamaku warumbukinang?
• Mutapu ik tukutwisha kwiyep chakwel ‘dis dietu dia katatuku’ dilika kutupwakesh?
• Tufanyidin kwikal nich mwikadil ik pantaliken nich kupan?
[Chipich chidia pa paj wa 9]
Chidi chiwamp mudi ik “kuchakul” nend mbay ney mukaritiy warumbukinang!
[Chipich chidia pa paj wa 11]
Yehova ukuyiyukish antu akata kupan ni musangar