Dandamenany Kusal Kuwap

“Yisadilany yom yiwamp.”—LUKA 6:35,MM.

1, 2. Ov, mulong wak chiding chikash kuyisadil antu akwau yom yiwamp?

CHISU chivud chikasikening kuyisadil antu akwau yom yiwamp. Antu tumekeshidina rukat kakutwishap niyawiy atumekeshinar. Ap anch tuyikimbidil antu kuwap kwau muspiritu ku kusal usu wa kuyilej “rusangu ruwamp ra uyaj wa Nzamb” ni ra Mwanend, akutwish arilik kwau ap alik kwau kurisanger. (1 Tim. 1:11) Akwau imekeshining patok anch adi “akankuny a” mutond wa mar wa Kristu. (Filip. 3:18) Mudi in Kristu, mutapu ik tukutwisha kuyisadil akwetu?

² Yesu Kristu wayileja in kwilejend anch: “Yikatany akankuny nen, yisadilany yom yiwamp.” (Luka 6:35, MM) El katat tushinshikinany piswimp dibabesh dined. Tukutwish kand kwisakin manans makwau malonday Yesu piur pa kuyisadil antu akwau yom yiwamp.

“Yikatany Akankuny Nen”

3. (a) Rumburil mu wiswimp mu mazu mey, mazu ma Yesu madia mu Mateu 5:43-45. (b) Chitongijok ik chadingau nich antakel a relijon wa Ayuda piur pa Ayuda ni akamichid?

³ Mu Malejan mend ma pa Mukandu mijikena nakash, Yesu wayileja in kutesh anch ayikata akankuny nau ni alembila mulong wa antu ayizengodila. (Tang Mateu 5:43-45.) Antu adingap pa dichuku dinidia adinga in Yuda, adinga ija nawamp chijil cha Nzamb chilondila anch: “Kangal wez wafundakesh ni [kuyilamin an a antu ey] rukuny mu muchim wey . . . Ukez kumukat mukwen mudi ey amwiney.” (In Levi 19:18) Antakel a relijon wa Ayuda a mu chitot cha kusambish atonganga anch “an a antu ey” ni “mukwen” ading ching Ayuda kusu. Chijil cha Moses chita anch in Isarel iyaurila ni michid yikwau, pakwez kwadinga chitongijok anch in michid awonsu adinga akankuny, chifanyidin kuyikis.

4. Mutapu ik wadinga ufanyidinau in kwilej a Yesu kuyisadil akankuny nau?

⁴ Pakwez, chinyim ni chinech Yesu walonda anch: “Yikatany akankuny nen, ni kuyilembidil awiy akata kunizengolany.” (Mat. 5:44) In kwilejend afanyidina kuyisadil nich rukat antu awonsu adinga ni kuyisadil kwa chisum. Kukwatijan nich Rusangu Ruwamp rafunday Luka, Yesu walonda anch: “Nikulejinany en winteshilany anch, yikatany akankuny nen, salany yom yiwamp kudi akukisinanya. Yiyukishany akata kukushingany, yilembilany akata kukuzengolany.” (Luka 6:27, 28, MM) Mudi antu a mu chitot cha kusambish atesha ni kusadil mazu ma Yesu, ‘tukat kuyisadil yom yiwamp in atukisila’ kusutil ku kuyisadil yom yiwamp patusadilau yisal yiyimp. ‘Tukat kuyiyukish in akata kutushing’ ku kuyilondil mu mutapu uwamp. Ni ‘tukat kuyilembidil in atuzengodila’ nich chisum cha ku mujimbu ap cha mulad ukwau mudi ‘kutupep masal.’ Malembil minam malejen anch tuyikatil akata kutuzengol mulong tukat kumwit Yehova anch akarumunaku michim yau ni asala chom chikusala itiyika kudi Yehova.

5, 6. Ov, mulong wak tufanyidin kuyikat akankuny netu?

⁵ Ov, mulong wak tufanyidina kuyikat akankuny netu? Yesu walonda anch: “Chakwel wikalany an a Tatukwen udia mwiur.” (Mat. 5:45) Anch twatesh ni kusadil chiyul chinech, tukwikal “an” a Nzamb mulong tukumwimburij Yehova, ukata “kubudishilang muten wend kumunyikin padi ayimp ni awamp.” Mudi mulondila rusangu ra Luka, Nzamb “ukat kumekesh kuwap kwend kudi antu akad kumujikitish, ni kudi antu ayimp.”—Luke 6:35, MM.

⁶ Pakasikeshinay usey uchadinga nich kudi in kwilejend ‘adandamena kuyikat akankuny nau,’ Yesu walonda anch: “Anch wayikatany anikatila en, difut ik lel ukwetany? In kulambwish kakat kusalip mwamu? Ni anch en wayilangwishany anamakwen kusu, uyipandakedilany pak antu akwau? Ov, in mangand kakat kusalip mwamu?” (Mat. 5:46, 47) Anch twayikat ching kusu in atukatilinga, chikezap kwikal nich “difut” ap pakemp, ap Nzamb kakukwitiyijap. Ap in kulambwish yitad, antu aswingishau nakash, ayikata ching in adinga ayikatila.—Luka 5:30; 7:34.

7. Ov, mulong wak chikutwishap chikal chipandakenamu anch tukat kuyilangwish ching kusu ‘anamakwetu’?

⁷ Mu kulangwishijan kwa Ayuda kwadinga kwijikena mwadinga dizu “chisambu.” (Ank. 19:20; Yoh. 20:19) Chadinga mulong wa kuyisotil antu ukash wa mujimbu, ni kuya kurutu kwa muntu ulangwishinau. Chadingap ‘chom chipandakenamu’ anch twayilangwish ching kusu in tumena anch awiy ‘anamakwetu’ kusu. Mudi mwalonday Yesu, chawiy chimwing kand chadinga chisadilau ‘antu amichid yikwau.’

8. Chom ik chadingay Yesu ni kuyikasikesh in kumutesh kusal palonday anch: “Ikalany awanyidina”?

⁸ Chitil chaswanau chayikangesha in kwilej a Yesu kwikal awamp, awanyidina. (Rome 5:12) Pakwez, Yesu wapwisha chikunku chinech cha malejan mend nich kulond anch: “Ikalany awanyidina mudi chidiay Tatukwen udia mwiur uwanyidin.” (Mat. 5:48) Chawiy chadingay ni kuyikasikesh antu adinga ni kumutesh amwimburija “Tatukw[au] udia mwiur,” Yehova, kusutil ku kuwapish rukat rau—riwanyina ku kuyikat akankuny nau. Chawiy chituchingejidinau kand niyetu.

Kulikishin, Mulong Wak?

9. Mazu “itulikishila milong yetu” marumburikin ik?

⁹ Tukudandamen kusal nawamp anch twamulikishin muntu waturumbukinang. Chakin, mu chikunku cha malembil ma nsampwil ma Yesu mudi mazu manam: “Itulikishila milong yetu mudi etu tukat kuyilikish[in] awiy akat kutusal nayimp.” (Mat. 6:12) Chakin kamu, mazu minam kimadingap misambidina pa kulikishin mabaz ma nfalang. Rusangu Ruwamp ra Luka rilejen anch “milong” yadinga yisambidinay Yesu yadinga yitil, mulong ndiy walonda anch: “Tulikishina yitil yetu, mulong etu tukat kuyilikishil mwawonsu ukweta chikal kudi etu.”—Luka 11:4.

10. Piur pa mulong wa kulikishin, mutapu ik tukutwisha kumwimburij Nzamb?

¹⁰ Tuswiridin kumwimburij Nzamb, ukata kuyilikishinang akayitil akarumukina. Kambuy Paul wafunda anch: “Ikalany antu adimukina kudi muntu ni mukwau, likishijadinany mudi chikat kunilikishilau en kudi Nzamb mu Kristu.” (Efes 4:32) Mwin kufund kuseng David wawang anch: “[Yehova] udi mwin riy ni ranaken, ukat kulab pa kwov ujim, wizwil sens ni rukat rudimukina. . . . Ndiy kakutusalangip mudi mudia yitil yetu, kakutuchirishangip mudi mudia kuyip kwetu. . . . Mudi kwingangel chi kudia kulemp ni kurand, chawiy chashemuninau kal kubwambul kwetu. Mudi tatuku ukata kuyovil anend riy, chawiy kand [Yehova] ukat kuyovil awiy riy akata kumwov Ndiy wom. Ndiy wij mwatutangilay, ukata kuvurik anch tudi kwetu rufunfut.”—Kus. 103:8-14.

11. Nzamb ukat kuyilikishinang anany?

¹¹ Nzamb ukutwish kuyilikishin antu ching anch niyawiy ayilikishina kal antu ayirumbukidina. (Mar. 11:25) Pakasikeshinay dinans dined, Yesu wawejinaku anch: “Mulong anch en wayilikishilany antu tuyimp twau, ni yend Tatukwen wa mwiur ukunilikishilany kand en. Pakwez anch en kiuyilikishidilanyip antu tuyimp twau, ni yend Tatukwen kakunilikishilip tuyimp twen.” (Mat. 6:14, 15) Inge, Nzamb ukat kuyilikishin in akata kuyilikishin akwau. Ni njil yimwing ya kudandamen nich kusal yom yiwamp kusadil chiyul cha Paul: “Mudi Mwant chakulikishilanyay en ni yen salany kand mwamu.”—Kol. 3:13.

“Kangal Warumburishany”

12. Chiyul ik chaletay Yesu piur pa kuyirumburishang antu akwau?

¹² Njil yikwau ya kusadil yom yiwamp ayilejana mu Malejan ma pa Mukandu payilejay Yesu in kumutesh anch kangal wayirumburishany akwen ni kupwa wasadila chilakej chimwing chikash mulong wa kukasikeshin dinans dined. (Tang Mateu 7:1-5.) El tushinshikinany chasotay kulond Yesu palonday anch “Kangal warumburishany.”

13. Mutapu ik welau in kumutesh Yesu kudandamen nich ‘kulikishin’?

¹³ Rusangu Ruwamp ra Mateu rilondil anch Yesu walonda anch: “Kangal warumburishany, chakwel ni yen ez anirumburish.” (Mat. 7:1) Kukwatijan nenday Luka, Yesu walonda anch: “Kangal warumburishany, ni yen kakez kanirumburiship; kangal wafishanany, ni yen kakez kanifiship nich; likishilany, ni yen akez kanilikishil.” (Luka 6:37) Afaris a mu chitot cha kusambish ayirumburisha akwau nayimp, nich kudandamen kusal yishankur yakad kulondul Bibil. In kumutesh Yesu adinga ni kusal mwamu afanyidina ‘kulik kurumburishan.’ Chinyim ni chinech, afanyidina adandamen nich ‘kulikishin,’ charumburik, kuyilikish akwau kurumbuk kwau. Kambuy Paul niyend waleta chiyul cha chilik chimwing piur pa kulikishin, mudi mulejenau kwiur oku.

14. Ku kusadil kulikishin, in kwilej a Yesu ela kuyishikij antu ku kusal ik?

¹⁴ Ku kulikishin, in kwilej a Yesu ela kuyibachik antu ashikena ku kwikal nich muchim wa kulikishin. Yesu walonda anch: “Mulong nich dirumburish diukurumburishanya en, diawiy dikunirumburishau ni yen; chilik chiukwilikany nich en chawiy chikanilikinau nich ni yen.” (Mat. 7:2) Nich mutapu tuyisadidila akwetu, tukupol chawonsu tukukuna.—Gal. 6:7.

15. Mutapu ik wamekeshay Yesu anch chiyipin kwikal mwin kunyinyit nakash?

¹⁵ Vurikany anch chakwel alejana muchidia chiyimp kuyinyinyit antu akwau, Yesu wipula anch: “Mulong ik ujikishidila kutal kachishoshot kadia pa dis dia mwanamakwey, pakwez walik kutal mukambu udia mu dis diey amwiney? Ap ey ukez kumwel nchik mwanamakwey anch: El nikudiosh kachishoshot ka pa dis diey; kutal mukambu udi mu dis diey amwiney?” (Mat. 7:3, 4) Muntu ukweta chaku cha kumunyinyit muntu windjing umening ni tuyom tukemp-tukemp tudia mu “dis” dia mwanamakwend. Mwin kunyinyit ukulond anch mukadivar nend urumbukin nakash ni ukumurumburish nayimp. Ap anch kurumbuk kudi kukemp—mudi kachishoshot—mwin kunyinyit ukusot anch “el nikudiosh kachishoshot.” Wipanin nich rubabek kumukwash mukadivar amana yom nawamp.

16. Ov, mulong wak tukutwish twalond anch Afaris adinga nich “mukambu” mu mes mau?

¹⁶ Antakel Ayuda a chirelijon adinga in kunyinyitan akash. Chilakej: Chisu chalonday mputames umwing wokay Kristu anch Yesu udiokil kudi Nzamb, nich ujim Afaris amwakula anch: “Ni yey wavadikina mu yitil usotil kutulej etu?” (Yoh. 9:30-34) Piur pa kuman kuwamp kwa muspiritu ni ukaliweny wa kurumburish nawamp, Afaris adinga nich “mukambu” mu mes mau ni adinga kamu amputames. Chawiy lel Yesu walonda anch: “Mwin kubabek ey, sambil bil udiosha mukambu udia mu dis diey amwiney, chad umana zwang utwisha kudiosh lel kachishoshot kadia mu dis dia mwanamakwey.” (Mat. 7:5; Luka 6:42) Anch twakwatin kal mupak wa kusal nawamp ni kuyisadil akwetu nawamp, tukwikalap in runyinyit a chisum, atadilinga chisu chawonsu kachishoshot ka chifanikesh kadia mu dis dia mwanamakwetu. Pakwez, tukujingunin anch tudi akayitil ni tufanyidin kwiyep kwikal in kuyirumburish ni kuyinyinyit nakash ambay netu akaritiy.

Mutapu Utufanyidina Kuyisadil Akwetu

17. Kukwatijan nich yilondilau mu Mateu 7:12, ov, mutap ik tufanyidina kuyisadil antu akwau?

¹⁷ Mu Malejan ma pa Mukandu, Yesu walonda patok anch Nzamb usadining mudi tatuku pantaliken nau atushalapol End kusutil ku kwakul ku malembil mau. (Tang Mateu 7:7-12.) Chidi cha usey anch Yesu washa mbil yiney ya kulondul mu mwikadil: “Chawiy yom yawonsu yiwovilany ing antu akusadilangany en, ni yen yisadilany kand mwamu awiy.” (Mat. 7:12) Ching anch twayisadil ambay netu antu mu mutapu winou chawiy tukutwisha kumekesh anch tudi in kwilej akin a Yesu Kristu.

18. “Yijil” yalejana anch mutapu ik tufanyidin kuyisadil antu mudi mutusotila ing atusadilang?

¹⁸ Kupwa kwa kulond mwamu tufanyidin kuyisadil akwetu mudi mutusotila atusadila niyetu, Yesu wawejinaku anch: “Mulong mwamu mulondila yijil ni mazu ma aprofet.” Anch twayisadil akadivar mwi njil yalonday Yesu, tusadil kukwatijan nich rutong ra “yijil”—yom yifundilau mu mikand ya Bibil kusambishin ku Disambishil djat ku Kuvurik Yijil. Kuwejin pa kujingunish rutong ra Yehova ra kubudish mbut yikeza kuushesh uyimp, mikand yiney yikwet Chijil chapanay Nzamb ku muchid wa Isarel kusutil kudiay Moses mu muvu wa 1513 K.C.C. (Dis. 3:15) Mu yom yiney, Chijil chadinga chilondil patok anch in Isarel adinga afanyidin kutentam, kadingap afanyidina kwikal nich kasolikany, ni chayifanyidina kuyisadil nawamp ayimana mar ni angez adinga mwi ngand.—In Levi 19:9, 10, 15, 34.

19. Ov, “aprofet” alejen nchik anch tufanyidin kusal nawamp?

¹⁹ Pisambidinay “aprofet,” Yesu wadinga wisambidin mikand ya uprofet yidia mu Mifund ya Hebereu. Mudi kand uprofet wa Umesia wawanyishay Kristu amwinend. Mikand yiney yilejen anch Nzamb uyiyukishining antwend anch asal yom yitentamina ku mes kwend ni kuyisadil akwau mudi muchifanyidina. Chilakej, uprofet wa Isay wayinkisha in Isarel chiyul chinech: “[Yehova] uyilejin antwend anch: ‘Salany yom yitentamina ni yiwamp, . . . Am nikez kayukish antu awonsu akata kulimish Dichuku dia Kwinswedish, . . . antu awonsu akad kusal kuyip.’” (Is. 56:1, 2) Inge, Nzamb uyichingejin antwend adandamena kusal yom yiwamp.

Salany Nawamp Chisu Chawonsu

20, 21. Yisak yasala nchik payatesha Malejan ma pa Mukandu ma Yesu, ni mulong wak tufanyidin kutongijokinap?

²⁰ Twashinshikin kal manans makemp pa manans ma usey malonday Yesu mu Malejan mend ma usey ma pa Mukandu. Chikalap nchik mwamu, tukutwish kutesh nawamp yisal ya antu atesha yalonday pa dichuku dinidia. Rusangu rapepilau rilondil anch: “Yesu chapwishay kulond mazu mend minam, yisak ya antu yashimoka ku malejan mend; Mulong wayileja mudi imend ma pa kampwil, kimadip mudi ma in kufund au.”—Mat. 7:28, 29.

²¹ Pakad kwidjidjek Yesu Kristu wimekesha kwikal “Mwin Kuyulan Muwamp.” (Is. 9:6, NW) Malejan ma pa Mukandu madi chilakej chijim cha ronganyin ra Yesu piur pa Tatukwend wa mwiur malejena mudi mumenay yom. Chikwau cha kuwejin pa manans minam twisambina kal, malejan minam misambidin yivud pa musangar wakin, mutapu wa kwiyep masandj, mutapu wa kusadil kutentam, yitufanyidina kusal mulong wa kwez kwikal nich dikez dia diking ni dia musangar, ni milong yikwau yivud. Ov, ulikidin ik kutang Mateu shapitre wa 5 djat ku wa 7 kapamp kakwau ni kumashinshikin piswimp ni kulembil? Kutongijokin pa chiyul chikash cha Yesu chifundinaumu. Kusadil mu mwom wey yalonday Kristu mu Malejan mend ma pa Mukandu. Chawiy ukez kwikal witenchikina nawamp kumusangaresh Yehova, kuyisadil akwen mu mutapu uwamp, ni kudandamen kusal yom yiwamp.

Ov, Ukwakul Nchik?

• Mutapu ik tufanyidina kuyisadil akankuny netu?

• Ov, mulong wak tufanyidin kulikishin?

• Yom ik yalonday Yesu piur pa kuyirumburish antu?

• Kukwatijan nich yilondilau mu Mateu 7:12, ov, mutap ik tufanyidina kuyisadil antu akwau?

[Tablo wa jinsangu udia pa paj wa 10]

Ov, wij mulong wak walonday Yesu anch: “Kangal warumurishany”?

[Chipich chidia pa paj wa 8]

Ov, mulong wak tufanyidina kuyilembidil akata kutuzengol?

[Chipich chidia pa paj wa 10]

Ov, ukat kuyisadil akwen mudi muusotila ing akusadilang?