Yitwilejidina Kudiay Yesu

Piur pa Mutapu wa Kuyisadil Antu Akwau

Mulong wak kwikal muntu muwamp?

Ov, uding muntu muwamp ap anch antu kadiap ney nawamp? Anch tusotil kumwimburij Yesu, tufanyidin kwikal muntu muwamp ap kudi antu atukisina. Yesu walonda anch: “Anch wayikatany ching kusu antu akukatilany en, ing, ukutwishany nchik kutambul chiyukish? In yitil niyau akat kuyikat antu ayikatila! Pakwez yikatany akankuny en . . . , chad ukez kwikalany an a Nzamb Upandakena Piur pa yawonsu. Mulong ndiy ukat kumekesh kuwap kwend kudi antu akad kumujikitish, ni kudi antu ayimp.”—Luka 6:32-36; 10:25-37 MM.

Mulong wak kulikishin?

Pitukata kurumbuk, tusotining anch Nzamb atulikishina. Yesu walejana anch chituwapidil tumulembilang chakwel atulikishinangaku. (Mateu 6:12) Pakwez, Yesu walonda kand anch Nzamb ukutulikishin mu chilik tukata kuyilikishin antu akwau. Ndiy walonda anch: “Anch en wayilikishilany antu tuyimp twau, ni yend Tatukwen wa mwiur ukunilikishilany kand en. Pakwez anch en kiuyilikishidilanyip antu tuyimp twau, ni yend Tatukwen kakunilikishilip tuyimp twen.”—Mateu 6:14, 15.

Majuku makwikal nchik ni musangar?

Ap anch Yesu katanap, tukutwish twilejin yom yivud kudiay ndiy piur pa kusangaresh dijuku. Kusutil ku mazu mend ni ku yisal yend, washa chilakej chifanyidina kulondul. Tushinshikinany manans masatu malondwilaku am:

1. Ngatan ufanyidin kumukat mukajend mudi mujimbu wend amwinend. Yesu wayishila angatan awonsu chilakej. Ndiy wayileja in kwilej end anch: “Napan kal chijidik chisu kudi en, chakwel en ukatijanany.” Mu chilik ik chifanyidinau kukatijan? Ndiy walonda anch: “Mudi chinakukatanya en.” (Yohan 13:34) Pasadidilay chijidik chinech pantaliken nau angatan, Bibil ulondil anch: “Amakundj, yikatany akajen mudi Kristu chikatilay chikumbu cha Nzamb ni kwipaniku amwinend . . . mwamu amakundj ni yau ayikata akajau mudi mijimbu yau ayinau. Wawonsu umukatila mukajend ndiy wikatil amwinend. Mulong kwikiling muntu ukisiling mujimbu wend amwinend; pakwez ukat kuudish ni kuulam mudi mukat kulamay Kristu chikumbu cha Nzamb.”—Efes 5:25, 28, 29.

2. Ambay atijadina afanyidin kushinshaman umwing ni mukwau. Kumanijan kwa ikundj ni mband pol pa uruw chidi chitil ku mes kwa Nzamb ni kusheshining majuku. Yesu walonda anch: “Kand kal utanganyip . . . mulong wa chinech ikundj ukez kamusha tatukwend ni makwend, ukez kilimikin kudi mukajend; ni awiy aad akez kwikal mujimbu umwing? Chawiy awiy kadip aad, pakwez ikalang kal mujimbu umwing. Chawiy chabombakeshay kal Nzamb wachinung. . . . Am nakulejany anch: Muntu wawonsu ukumulika mukajend wakad kusotan, wakachik kudi muntu windjing, ndiy wasotan kal; ni yend ukumwata pachimulikilau wamusot kal wakusot.”—Mateu 19:4-9.

3. An afanyidin kuyiziyil anvajau. Ap anch Yesu wadinga uwanyidin ni anvajend adinga akad kuwanyin, ndiy wayiziyila padingay uchidi mwan. Bibil ulondil piur pa Yesu padingay ni mivu 12 anch: “Ndiy wachirika nau, eza ku Nazaret; wading ni kuziyil kudi [anvajend].”—Luka 2:51; Efes 6:1-3.

Ov, mulong wak kusadil yijil yiney?

Piur pa malejan mayilejay in kwilejend, Yesu walonda anch: “Anch en wijany yom yiney, wayukany kwen anch wayisadilany.” (Yohan 13:17) Chakwel anch twikala in Kristu akin, tufanyidin tusadila chiyul chaletay Yesu piur pa mutapu wa kuyisadil antu akwau. Ndiy walonda anch: “Ku chinech kwawiy kukwijikinau antu awonsu anch en udiany in kwilej amam anch wakatijanany.”—Yohan 13:35.

Anch usotil jinsangu jikwau, tal shapitre wa 14 udia mu buku Chom Ik Chakin Kamu Chifundishinay Bibil?a

[Dizu didia Kwishin kwa paj]

[Chipich chidia pa paj wa 16]

Chishimu cha Yesu cha mwan washadika chitulejin usey wa kwikal antu awamp ni wa kulikishin. —Luka 15:11-32

[Chipich chidia pa paj wa 17]

Ambay atijadina afanyidin kwikal ashinshamena umwing ni mukwau