Ov, Nzamb Winbangidin?
Yakul yituteshininga chisu chawonsu:
▪ “Nzamb udi mukash kakutwishap wabangin pa milong yam.”
▪ “Nitonginap anch winbangidin.”
Yom ik yalonday Yesu?
▪ “Atusakal atan kakat kuyilandiship ku makut maad? Kwikil umwing wa awiy uvuramedinau ku mes kwa Nzamb. Pakwez nswich ja ku mitu yen ajichindil kamu jawonsu. Kangal wovany wom; usey wenen upandakenamu wa atusakal avud.” (Luka 12:6, 7) Pakad kwidjidjek, Yesu walejana anch Nzamb ukat kutubangin.
▪ “Chawiy kangal utongamangany anch Tukudia ik? Tukana ik? ap anch Kwisu kukutudjikaup? Mulong yom yiney yawonsu yawiy yikatau kukimb in mangand; ni Tatukwen wa mwiur wij kal kwend anch en uswiridinany yom yiney yawonsu.” (Mateu 6:31, 32) Yesu witiyija anch Nzamb wij maswir ma muntu ni muntu.
BIBIL ulondil patok kamu anch Nzamb ukat kutubangin. (Kuseng 55:22; 1 Pita 5:7) Chad anch ndiy ukat kutubangin, ov, mulong wak lel tumen mar makash mwamu ilel? Anch Nzamb udi rukat ni mwin usu wawonsu, ov, mulong wak kasadilap chom kanang mulong wa kupwish mar?
Chakul chikwatin ku chom chimwing chiburedinau kwijik antu avud—Satan Djabul ndiy uyikedila mangand manam mayimp. Chisu chamwozay Yesu, Satan wamwinkisha mant mawonsu ma pa mangand, ni wamuleja anch: “Nikupan kwam usu winou wawonsu kudi ey ni uyaj wau; mulong aupana kal kudi am, ni kudi wawonsu unikatila nikumwink kwam.”—Luka 4:5-7.
Ov, nany wamwikadisha Satan nyikel wa mangand? Chisu, anvaj etu a kusambish, Adam ni Eve, chamulikau Nzamb ni amuziyila Satan, chakin kamu awiy amutonda Satan ikala nyikel wau. Kudiosh kamu pa wintombuj winiwa, Yehova Nzamb washa chisu nich kushimpish muchim chakwel amekesha anch winyikel wa Satan udi wa mar ni ukangeny. Yehova kakatap kuyishindil anch chakwel amusadila, pakwez ndiy watenchika kal mutapu wetwetu kutwish kuchirik kudiay ndiy.—Rome 5:10.
Mulong Nzamb ukat kutubangin, ndiy watenchika chakwel Yesu atukola kutudiosh mu winyikel wa Satan. Mu machuku ma kurutu madia piswimpap kamu, Yesu ukez “kumushesh ukwet usu wa rufu, ndiy Satan kamu.” (Hebereu 2:14) Pakezay kusal mwamu, ndiy ukez “kutwish kushesh mudimu wa Satan.”—1 Yohan 3:8.
Divu akez kudikarumun dikal Paradis. Pa chisu chinicha, Nzamb ukez “kayikuswol [antu] mansoj mawonsu ku mes kwau; kukez kikalip kand rufu; ap kukez kikalip kand madil, ap kushikok kudil, ap kusansan, kwamwamu kand; mulong yom yikuru yasutil kal.”—Kuburik 21:4, 5.a
[Mazu madia kwishin kwa paj]
a Mulong wa kutang jinsangu jivud piur pa mulong wak Nzamb ulikidin mar, tal shapitre wa 11 mu buku Chom Ik Chakin Kamu Chifundishinay Bibil? wapalangeshau kudi Atuman a Yehova
[Tablo wa jinsangu udia pa paj wa 8]
Divu akez kudikarumun dikal Paradis