“Chisu Cham Chadinga Kandikal Chiwanyina”

Mwin kwendish motak ujim wa kusendinang yishoshot, nkat ya motak (volant) yamukwasikika mu makas. Motak wapumbukina mu kanjil ka kuns ka in ra pansh, wayichany ambay atijadina ni nsand wa mivu 23 wadinga mu kanjil ka kuns ka in ra pansh. Kukwatijan nich rusangu ra mu jurnal wa New York City, ambay inay afa pinipa kamu ni nsand winou amudjibula kwa walengumuk. Chisu chapizurikay ni wijika yom yasadikang, dizu diend dia kusambish diadinga anch: ‘Nikutwishap nitiyij anch yom yiney yisadika. Nilemb amboku, Nzamb, el chom chinech chinsuta.’ Walonda kand anch: “Chisu cham chadinga kandikal chiwanyina.”

PAMWINGAP niyey wateshap kal jinsangu mudi jinej. Anch muntu wapand ku chak chikash, antu alondining anch, ‘Chadiap chisu chend,’ pakwez anch muntu wafa mu aksident, antu alondilining anch, ‘Chawiy chisu chend’ ap ‘Ridi rusot ra Nzamb.’ Ap alondining anch yawiy yamufundinau, ap Nzamb, witiyijin anch chisadika mwamu. Antu avud itiyijin anch yom yikata kuyishiken mu mwom yau ni yibudikin yach ayifunda kal ni kwikil chom chikutwishau kusal pa mulong winou. Ni chitongijok chinech chidiap kusu ching anch kwikal rufu ap aksident; ni chidiap cha nlel ap cha mu chirung chinech.

Chilakej, in Babilon a pakur, itiyija anch atutumb ni kushemunik kwau kukwet usu pa milong ya antu. Chawiy chadidngau ni kutal mwiur chakwel amana yijingidij ni abwaka yom yikusadika kurutu mu mwom yau. In Grek nau in Rome adinga ni kumwifukwil nzamb mband wa yom yikushikena, wadinga nich usu wa kulet yom yiwamp ap yiyimp ni yadinga ni kumekan pa yisu yimwing mudi uyipandakenamu anzamb au ajim mudi Zeus ni Yupiter.

Kwingangel, in Hindu ni in Buda itiyijin anch yom yawonsu yimushikedina muntu katat yidi yibudikin ya yom yasalay mu mwom wend wa pakur, ni yisal yend mu mwom winou yawiy yikeza kwikal mufulandal wa yom yikezay kusal mu mwom wend kurutu. Marelijon makwau—pamwing ni maegliz mavud ma in Kristendom—ni mawiy mitiyijin malejan ma makasu mudi malejan ma kwel anch yom yawonsu ayifunda kal.

Chawiy lel, chidiap cha kukashimuk anch, ap mu chirung chetu chinech cha windim ukash, antu avud achitiyijin anch mwikadil wa mwom yau, yibudikin ya milong yau ya pichuku pichuku, ni yom yikash yikata kuyishiken yawonsu ayifunda kal ni kwikil chikutwishau kusal chakwel kuyiyep. Ov, mwamu niyey umeninga mwom? Ov, yishiken ya maksident, kupandakan ni kukangany mu mwom—ap kuvadik ni rufu—ov, chakin kamu ayifunda kal? Ov, yishiken ya mu mwom wey ayifunda kal? El tushinshikinany mutapu ukutwishay Bibil kutukwash kwakul ku yipul yiney.

Dizu Dirumburila Chipich Chidia pa paj wa 3]

Ken Murray/New York Daily News