Chom ni Chom Chikwet Chisu Chau

Bibil ulondil anch: “Kudi chirung cha yom yawonsu, chom ni chom chikwet chisu chau pa mangand.” Mwant Salomon mwin manangu wa pakur ndiy wafunda mazu minam, wadandamena nich kulond anch, kudi chisu cha kuvadik ni kudi chisu chikwau cha kufa, chisu cha kutung ni cha kubumwon, chisu cha kukat ni cha kukis. Kupwa walonda kand anch: “Ov, muntu ukutanamu ik ku mudimu wend wawonsu?”—Mulej 3:1-9.

PATANGININGAU antu amwing mazu minam, alondining anch chakin kamu Bibil ulejen anch chisu cha chom ni chom achifunda kal; charumburik anch, awiy atongining anch Bibil niyend ukasikeshidin ritiy ra kwel anch yom yawonsu ayifunda kal. Ov, chakin kamu mwamu chidia? Ov, ukasikeshidin chitongijok chilondila anch chom ni chom chishikedina mu mwom achifunda kal? Mulong “mazu mawonsu ma mukand wa Nzamb madiokala ku [spiritu, NW] wa Nzamb,” yom yitutangina mu chikunku chimwing cha Bibil yifanyidin kukwatijan nich yidia mu yikunku yikwau. Chawiy lel, el tushinshikinany yilondila yikunku yikwau ya Dizu dia Nzamb, Bibil, pa mulong winou.—2 Timote 3:16.

Chisu cha Mar Chikat Kushik

Salomon wafunda mu mukand wa Mulej anch: “Namana kand pa mangand anch, yisu yimwing in kubambil mau akat kukangany kupandakan njit, ni in chiyul akat kuburen yakudia, ni in manangu akat kuburen dipit, ni antu ija midimu nakash akat kukangany kutakel.” Mulong wak? Ndiy warumburila anch: “Chakin, chisu cha mar chikat kushik kudi antu awonsu.”—Mulej 9:11.

Pa ndond pa kutonginang anch yom yikata kushikena mu mwom ayifunda kal, Salomon wadinga ulondil patok anch antu kakutwisha ijik yom yikutwisha kuyishiken kurutu ap anch asal chom ik, “chakin, chisu cha mar chikat kushik kudi antu awonsu.” Chisu ni chisu chom chikutwish chamushekin muntu mulong kwau udi pa ndond pafanyidina mu chisu chifanyidina, ap tukutwish twalond anch, udi pa ndond yiyimp pa chisu chiyimp.

Chilakej, dizu dilondila anch: “in kubambil mau akat kukangany kupandakan.” Ukutwish wavurik ap anch watangap kal rusangu ra amband ayifuvu, ap anch adinga angendj, abambela ametre 3000 mu masengan ma Kubambel kwa mu muvu wa 1984 kwasadika mu Los Angeles, mu Californie, mu États-Unis. In kubambel aad, umwing wa mu Grande-Bretagne ni mukwau wa mu États-Unis, awonsu aad adinga ni kuchingejin anch akutambul difut dia rupash (meday) ra or. Pakwez, kupwa kushiken pakach ni pakach pa njil, abumbijana. Umwing wawa ni katwishap kand kubambel; mukwau waziya nakash chad washika muntu wa sambwad.

Ov, yom yiney yayishikena adinga ayifunda kal? Antu amwing akutwish alonda anch mwawiy. Pakwez choviken patok anch chadinga mulong ambubijana—kwikil ap umwing wau wadinga wija anch kukusadik aksident—wayikangesha awonsu aad kubambel. Ov, adinga achifunda kal anch ambubijana? Kakwau antu akutwish alond kand anch mwawiy. Pakwez, atwamb-a-sang arumburila anch aksident winou wasadika mulong wa kubambel kukash kwa in kubambel aad akash adinga alondulijadin piswimp-piswimp, umwing ni umwing wasota kumwambaken mukwau. Mudi mulondilay Bibil, “chisu cha mar chikat kushik kudi antu awonsu.” Chikalap nchik mutapu ukuwishay muntu kwirijek nawamp, kuding yom yakad kuchingejin yikutwisha kwikal nich usu pa yibudikin, ni kwikil chom chafundau kal.

Chad Bibil usotil kulond ik palondilay anch: “Chom ni chom chikwet chisu chau”? Ov, kudi chom tukutwisha kusal chikutwisha kwikal nich usu pa mwom wetu—pa yom yatufundinau kal?

Chisu Chiwamp cha Chom ni Chom

Palemp nich kwisambin piur pa yom yamufundinau kal muntu ap kurumburil yom yikutwisha kumushiken muntu mu mwom, mwin kufund Bibil wapepilau wadinga ni kwisambin piur pa rutong ra Nzamb ni usu rikweta padi antu. Ov, mutapu ik tuchija? Chakin kamu yawiy yom yisambidina mifund yikwau yidia kwiur ni kwishin. Kupwa kwa kwisambin piur pa yom yivud yimekena anch yikwet “chirung,” Salomon wafunda kand anch: “Namana kukwatikan kwapanay Nzamb kudi antu. Ndiy warijeka yom yawonsu yiwamp mu chisu chau.”—Mulej 3:10, 11.

Nzamb wayinkisha antu kukwatikan kuvud, ap anch yom ya kusal—Salomon wayijimbula yimwing ya yom yiney. Nzamb watwinkisha kand wan ipetu wa kutond chitusotina kusal. Pakwez, mulong wa mudimu ni mudimu, ukweting chisu chau, chifanyidina, chakwel uleta yibudikin yiwamp. Chilakej, mazu manam ma Salomon anch: “Kudi chisu chimwing cha kukun, kudi chisu chikwau cha kwangul,” madia mu Mulej 3:2. Andim ij anch kudi chirung cha kukun rubut ni rubut. Chikwikal nchik anch ndim wavuramen chom chinech ni wakun pa chisu ap pa chirung chindjing rubut kanang? Ov, ukulond anch achifunda kal anch kangwilap mbut jivud, ap anch wasala mudimu ukash? Bwat kwau! Chidi mulong ndiy kakunap rubut riner pa chirung chau. Ndim ukusal nawamp anch walondul yom mutapu mwayitangau ni kuyitenchik kudiay Sakatang.

Chawiy komb chatenchikay Nzamb, kichidiap yishiken yikata kuyishiken antu ap yibudikin ya yinship, pakwez yijidik yimwing yikata kutakel yom yisadikininga mu mwom wa muntu kukwatijan nich rutong rend. Chakwel anch antu asangaredina yibudikin ya midimu yau, afanyidin kujingunin ni kusal mudimu kukwatijan nich rutong ni chisu chatenchikay Nzamb. Chom chikukanganyau antu kukarumun chidiap yom yikata kuyishiken pakwez chidi rutong ra Nzamb ra kuyisal. Yehova walonda kusutil kudiay muprofet Isay anch: “Mwamu mukeza kikal kand mazu mam, kimakutwishap kukangany yom yinatenchika kal. Mazu mam makez kasal yom yawonsu mudi munalonda.”—Isay 55:11.

“Mazu” minam ma Nzamb madi mazu ik, ap anch rutong ralonday, piur pa divu ni dikez dia antu “makez kasal yom yawonsu”?

Kwijik kwa Chisu cha Nzamb

Salomon waleta chitongijok. Palonday kand anch: “[Nzamb] warijeka yom yawonsu yiwamp mu chisu chau,” wadandamena nich kulond anch: “Ndiy watwinkisha etu rusot̀ ra kwijik yom ya kurutu, pakwez katwinkishap kujingunin yom yawonsu yasalay kudiokal kwisambishil djat ni kwisudiel.” The NIV Study Bible ukarumwin verse winou anch: “Wateka kand uchikupu mu michim ya antu; pakwez kakutwishap ajingunin yom yasalay Nzamb kudiosh kwinsambishil djat ni kwisudiel.”—Mulej 3:11.

Afunda kal yom yivud piur pa verse winou. Pakwez uyakin udi anch mu michim yetu kamu, pa chisu chimwing ap chikwau etwawonsu tukat kutongin pa kurumburik kwa mwom ni piur pa machuku metu ma kurutu. Mu kusut kwa yirung, chiyikasikedin antu kwitiyij anch mwom udi kwau ching kukwatikan chamwamu nich midimu ya kusal, ni kupwa kufa kwau. Etu antu tudi yitang ya pakampwil pakach pa yitang yawonsu yikweta mwom mulong yetu kusu tukata kutong piur pa chisu cha katat pakwez kand piur pa nsudiel ya mwom ni ya kurutu kamu. Tukat kand kuchingejin mulong wa kushakam chikupu, ni minang. Ov, mulong wak? Mudi mulondila mufund, Nzamb “wateka kand uchikupu mu michim ya antu.”

Chakwel kuwanyish impu yiney, antu akat kutongijokin nakash piur pa mwom wa kwinyim kwa rufu. Amwing alondining anch kudi chom chidinga mu etu chikata kupand ku rufu. Akwau itiyijin anch tukudandamen kuvadikin mu yitang kushalijan. Akwau niyawiy atongining anch yom yawonsu yikata kushiken mu mwom ayifunda kal ni anch kwikil chom tukutwisha kusal mulong wa kuyiyep. Cha ushon, yirumburil yiney yawonsu yiwanyishinap impu yetu. Chidi mulong, Bibil ulondil anch “[antu] katwinkishap kujingunin yom yawonsu yasalay kudiokal kwisambishil djat ni kwisudiel,” ku usu wau ayinau kusu.

Kurish kwinoku kudinga pakach pa maku ma kusot kwijik ni kukangany kutan chakul kukat kuyirumbangesh nakash manangu ma in kutong ni afilozof a mu yirung yawonsu. Pakwez, mulong Nzamb wateka impu yiney mu michim yetu, ov, kichidiap cha manangu kumuchingejin chakwel asala yitwiswiridina mulong wa kuwanyish maku minam? Pa chinech, Bibil ulondil piur pa Yehova anch: “Ukat kuburil chikas chey ni kuwanyish rusot ra chom chawonsu chikweta mwom.” (Kuseng 145:16) Anch twakarumukin ku Dizu dia Nzamb, Bibil, tukutwish kuwanyish yirumburil yetu piur pa mwom ni rufu ni piur pa rutong ra chikupu ra Nzamb piur pa divu ni dijuku dia muntu.—Efes 3:11.

[Tablo wa jinsangu udia pa paj wa 5]

“In kubambil mau akat kukangany kupandakan.”—Mulej 9:11

[Tablo wa jinsangu udia pa paj wa 6]

Anch ndim kakuninap rubut pa chisu chiwamp, ov, ukulond anch kangwilap yivud mulong ayifunda kal?

[Tablo wa jinsangu udia pa paj wa 7]

Tukat kutongin piur pa mwom ni rufu mulong Nzamb “wateka kand uchikupu mu michim ya antu”