Chinech Chawiy Chisu cha Kutond

“Nzamb wamutanga muntu mu chifu chend amwinend, mu chifu cha Nzamb mwawiy mwamutangilau. Ndiy wamutanga ikundj ni mband.”—Disambishil 1:27.

MAZU minam mijikena ma kwisambishil kwa Bibil misambidin chom chimwing chipandakena kujimb charijekay Nzamb pa “yom yawonsu yiwamp mu chisu chau.”—wayitanga ikundj ni mband a kusambish awanyidina, Adam ni Eve. (Mulej 3:11) Mudi Sakatang wau, Yehova Nzamb wayileja anch: “Valijanany, vulijanany, shakamany, izwishany ngand ni kuyiziyish. Yikelany kand pa ansh a mu karung, ni pa atujil a mwiur, ni pa annam awonsu akata kwendil pansh.”—Disambishil 1:28.

Nzamb wijikisha rutong rend, kusutil ku mazu minam mayilejay antu aad a kusambish. Adinga afanyidin kuvalijan, avulijana mulong wa kuziyish ngand, ayikarumuna yikal paradis wa pa divu diawonsu mukushakamau pamwing ni anau. Kayifundinap mivu yikushakamau ni kupwa afa. Pakwez, Nzamb wayitekina machuku mawamp ma kurutu. Anch atonda kutond kuwamp ni kushakam mu kwovijan ni Nzamb, ela kushakam chikupu mu chisambu ni musangar chiwanyidina.

Awiy atonda kutond kuyimp, kwaleta, upal ni rufu. Chakin kamu, nshakur Yob witiyija anch: “Antu awonsu akwet mwom wa mivu yikemp, pakwez wizwil sens nich mar.” (Yob 14:1) Mulong wak?

Bibil ulondil anch: “Chawiy mudi chitil chandama mu mangand mulong wa muntu umwing, ni rufu randama mulong wa chitil, chawiy rufu rashika kudi antu awonsu mulong antu awonsu asala chitil.” (Rome 5:12) Chakin kamu, “muntu umwing” winou, wadinga Adam, muntu wabwambwila cha kwisotin chijil chipipela cha Nzamb. (Disambishil 2:17) Kusutil ku kutond kwend, Adam washadisha ruchingej rend ra kushakam chikupu mu paradis pa divu. Wayishadishina kand anend uswan upandakena kuwap pakwez wayiswanisha mashing ma chitil ni rufu. Ov, yom yawonsu yashadika kamu, mu chilik cha kuburen kuyichirish kand?

Chisu cha Kurijek

Pikwasuta tunan twa mivu, mwin kufund kuseng wapepilau wafunda anch: “Mwin kutentam ukez kaswan ngand, ukez kashakamamu chikupu.” (Kuseng 37:29) Kushilamu kwinoku kwashilaumu mu chir cha Eden kukez kuwanyin, Dizu dia Nzamb dirumburil nawamp win yom yikusadika piswimpap kamu anch: “Ndiy ukez kayikuswol mansoj mawonsu ku mes kwau; kukez kikalip kand rufu; ap kukez kikalip kand madil, ap kushikok kudil, ap kusansan, kwamwamu kand; mulong yom yikur yasutil kal.” Kupwa Nzamb amwinend ulondil anch: “Talany, am nayikarumwish kal yom yawonsu kwikal yisu.”—Kuburik 21:4, 5.

Mulong kudi chisu cha chom ni chom, chipul chiwamp chifanyidina kwiyipul chawiy ech, Chisu chinech cha kurijek chikwez chisu ik, chakwel anch yakushilamu yamushena ya Nzamb yiwanyina chakin kamu? Atuman a Yehova, akata kupalangesh gazet winou, asadiling usu ukash wa kuyendil antu chakwel ayijikisha anch tushich mu machuku majimbwilay Bibil anch, “machuku ma kwisudiel” ni anch chawiy chinech chisu cha Nzamb cha kusal chimwing cha ‘kuyikarumun yom yawonsu yikala yisu’ chidi piswimp. (2 Timote 3:1) Tukukasikeshin chakwel wileja Bibil ni wileja piur pa ruchingej ramushena ukutwisha kwikal nich. tukukasikeshin kand chakwel witiyija kutazuk kukutazukinau anch: “Mukimbany Yehova, en antu, pa chisu ukutwisha wamutanany. Mutazukany pachidiay piswimpap.” (Isay 55:6, NW) Pa ndond pa kulikin malejan malondila anch yom yawonsu ayifunda kal makutakela, yey amwiney ukweta usu pa ruchingej rey ra chikupu!

[Tablo wa jinsangu udia pa paj wa 8]

“Katat nikat kusal yom yawonsu yisu”