Ov, Chitwishikin Kumutesh Bibil?

Steven wa mu Angleterre ulondil anch: “Dijuku dietu ditangining Bibil Diarubing ni Diarubing. Pakwez kinadingap ni kusanger nakash. Nadinga nitiyijin anch Bibil udi Dizu dia Nzamb, pakwez yom yivud yinadinga ni kutang yadinga yinkasikedin nakash kuyitesh.”

Valvanera, wa mu Espagne ulondil anch: “Panadinga ni mivu 17, napakisha kutang Bibil. Pakwez wadinga ni kwinkasiken kumutesh, chawiy chinalikina kumutang.”

Jo-Anne wa mu Australie ulondil anch: “Natanga Bibil kapamp kamwing mulong nadinga ni kwiyov anch chinidia mwin Katolik, nifanyidin kamu nimutanga. Nasala mivu yisatu kumutang chakwel nimupwisha! Pakwez natesha kwam ching yom yikemp kusu.”

BIBIL udi buku umwing upalangena nakash mu mangand. Achidi ni kumuland nakash kupandakanamu mabuku makwau, antu avud amukwet nakash, udiaku mu jindim jivud ni mu mitapu kushalijan kupandakanamu mwadingay pa kusambish. Pakwez ni katat antu avud akweta Bibil chiyikasikedin kumutesh. Ov, mwamu chidia ni kudi ey?

Ov, Nzamb Usotil Anch Tutesha Dizu Diend?

Bibil ulondil anch: “Mazu mawonsu ma mukand wa Nzamb madiokala ku [spiritu] wa Nzamb.” (2 Timote 3:16) Chakin kamu, Yehova Nzamb ndiy wafundisha Bibil. Ov, ndiy usotin anch etu tutesha Dizu diend? Ap anch ndiy wasala chakwel anch chiyikasikena antu avud kumutesh Bibil ni ching anch antu akemp kusu amutesha, mudi amakurump a relijon ni antu in kwilej Bibil?

Tushinshikinany maverse manam madia mu Bibil kamu:

“Yijil yiney yinikulejinany ilel unou kiyidiap kulemp, ap kiyikasikenap kwau kuyitesh.”—Kuvurik Yijil 30:11.

“Mazu mey madi kutok, makat kumunyik ni kupan manangu kudi asotila kwilej.”—Kuseng 119:130.

“Pa muten winiwa kamu wasangera mu [spiritu utumbila], walond anch: Nakujikitish ey, A Tatuku, Mwant wa diur ni divu, piwajindjika yom yiney kudiau ababela ni in manangu, wayimekesha kudi anikanch.”—Luka 10:21.

Chakin kamu, muntu wafundisha Bibil, ukusotin anch utesha Dizu diend! Pakwez, uyakin udi anch antu avud akweta michim yitok amen anch buku winou uyikasikedin kumutesh. Ov, chom ik chikutwisha kuyikwash? Mitu ya milong yilondwilaku ey yiletin yiyul yisatu yikutwisha kukukwash umutesha Bibil.