Mutapu Ukutwisha Kumutesh Bibil

2. Tang Ni Manangu MAWAMP

Ov, kandikal murund ney akulejap yom yiyimp piur pa muntu wakad ey kwijik? Pakwez pa chisu chiwamumana muntu amwinend, ov, yom yakulejay murund ney yakukangesha kuman ukaliweny ni ngikadil yiwamp ya muntu winou? Chom mudi chinech chikutwish chashiken kand piur pa Bibil.

KAMBUY Paul wababeshana piur pa chom chikutwisha kusadik anch twakangany kumutang Bibil ni manangu mawamp. Paul wafunda piur pa in Yuda amwing adingaku mu machuku mend anch: “Am nidi kaman wa chinech, chakwel awiy akwet kal mushiku wa Nzamb, pakwez kiudip wa ronganyin.”—Rome 10:2.

In Yuda amwing inay adingaku mu mivu chitot ya kusambish kadingap ni kusot kwitiyij uyakin wadinga ulejenau patok mu Mifund ya Hebereu wadinga ulondila piur pa: Mutapu wa kumwijik Mesia. Yesu wa ku Nazaret wadinga uwanyishin kachom ni kachom kadinga kalondilau mu Mifund, wawanyisha uprofet win wawonsu. Pakwez, mulong wa yitongijok yikash yadingau nich, an a ngand yau avud akanganya kutesh yadinga yilondila Dizu dia Nzamb.

Chom ik tukutwisha kwilej ku rusangu riner? Chidi cha usey twileja Bibil ni manangu mawamp. Kusambel kwikal nich yitongijok kanang kukutwish kwamukangesh muntu kutesh uyakin wa Bibil.

Chilakej, mulej umwing wa relijon wa Kwindum kwa Carolina, mu États-Unis, walonda anch Bibil udi mudi “buku win mwawonsu wa muntu, nich yitongijok ya chiuntu, chimwing ni chimwing chishalijadin kulemp ni chikwau ni mwikil chitongijok chilejena anch udi umutakel wakin utufanyidina kuchingejin mu mwom.” Anch muntu utangin Bibil mudi “buku win mwawonsu wa muntu,” ukwikal nich chibachikin cha kusot kulik umutakel ap yijidik yikata kusangaresh untu wend?

Pakwez, Bibil utukasikeshin chakwel tumwileja nich mushiku. Mifund yilondil piur pa in ku Beroy adingaku mu machuku ma Paul anch: “[Atambula] dizu nich michim yitentamina adinga ni kutang mukand wa Nzamb pichuku pichuku, ni kutal anch yom yiney mwamu muyidia.” (Midimu 17:11) Mudi mwadingau in kutang inay, niyey ukutwish waswiriken kudiosh yitongijok yiyimp ap ya runyinyit yikutwisha kukukangesh kutesh. Tang Dizu dia Nzamb nich manangu mawamp, sal usu wa kujingunin uruu usangareshina wa Nzamb.