“Ilamany Ayinen Mu Rukat Ra Nzamb”
“Ilamany ayinen mu rukat ra Nzamb, utalangany riy ra Nsalejetu Yesu Kristu ni kushik ku mwom wa chikupu.” —YUDA 21.
1, 2. Mutapu ik wamekeshay Yehova rukat mulong wetwetu, ni mutapu ik twija anch kakatap kutulamin kapamp kamwing mu rukat rend?
YEHOVA NZAMB utulejining rukat rend mu jinjil kushalijan. Pakad kwidjidjek, uman ujim wa rukat ra Yehova udi ditenchik dia mulambu wa difut. Rukat rend mulong wa antu ridi rijim nakash ni chawiy wamutuma Mwanend mukatish panap pansh chakwel afa mulong wetwetu. (Yoh. 3:16) Yehova wasala mwamu mulong ndiy utukatin anch twikala nich mwom wa chikupu, ni usotin kand anch twisakina rukat rend chikupu ni chikupu!
2 Pakwez, tukutwish twatongin anch, Yehova ukutulamin kapamp kamwing mu rukat rend chikalap nchik chom chitukutwisha kusal? Bwat. Mulong tutangin mu Yuda verse wa 21 dikasikesh dined: “Ilamany ayinen mu rukat ra Nzamb, utalangany riy ra Nsalejetu Yesu Kristu ni kushik ku mwom wa chikupu.” Mazu “ilamany ayinen mu rukat ra Nzamb” malejen anch kudi yom yimwing yitukutwisha niyetu kusal. Ov, chom ik lel tufanyidina kusal chakwel twilamina mu rukat ra Nzamb?
Mutapu ik Tukutwisha Kwilamin mu Rukat ra Nzamb?
3. Chom ik chalonday Yesu anch chawiy cha usey nakash chakwel kwilamin mu rukat ra Tatukwend?
3 Tutanin chakul cha chipul chinech mu mazu ma Yesu amwinend, malonday pa uchuku wa nsudiel wa mwom wend padingay panap pansh. Ndiy walonda anch: “Anch walamany yijidik yam ukez kashakamany mu rukat ram, mudi chinalama am yijidik ya Tatuku ni kushakam mu rukat rend.” (Yoh. 15:10) Chakin kamu, Yesu walejana patok anch kulam yijidik ya Yehova kwadinga kwa usey mulong wa kwikal ni urund uwamp nenday Tatukwend. Katat, anch mwamu chadinga ku mutambu wa Mwan uwanyidina wa Nzamb, ov, chikutwisha chikal chilik chimwing ku mutambu wetu?
4, 5. (a) Mwinjil ik ya kusambish mutukata kumekeshin anch tumukatin Yehova? (b) Ov, mulong wak kitukwetap diyingish dia kulikin chitongijok cha kuziyil yijidik ya Yehova?
4 Cha kusambish, tukat kumekesh anch tumukatin Yehova kusutil ku kumuziyil. Kambuy Yohan wachilonda mu mutapu unou: “Rukat ra Nzamb rawiy er, chakwel tukulam yijidik yend; ni yijidik yend kiyikutukasikenip.” (1 Yoh. 5:3) Chakin kamu, malejan ma kuziyil kakatap kumasanger ilel unou mu mangand. Chikalap nchik mwamu, talany mazu manam: “Yijidik yend kiyikutukasikenip.” Yehova kakatap kutwit tusala chom chitukasikedina nakash.
5 Chilakej: Ov, ukutwish wamwit murund ney mukatish asenda chom chiwija anch chilimin nakash ni kakutwishap kuchizambul? Bwat kwau! Yehova udi mwin riy nakash kutupandakanam ni wij nakash yom yivud kutupandakanamu kulemp. Bibil utulejin nich kashinsh anch Yehova “wij mwatutangilay, ukata kuvurik anch tudi kwetu rufunfut.” (Kus. 103:14) Kakutwishap kutwit tusala yom yipandakenamu yitukutwisha kusal. Chawiy komb kitukwetap diyingish dia kulik chitongijok cha kuziyil yijidik ya Yehova. Pakwez, twij anch kuziyil ku yom yitwinkishinay—mutapu umwing uwamp wa kumumekeshin Tatukwend wa mwiur anch tumukatin chakin kamu tusotil twilamina mu rukat rend.
Chipan cha Pakampwil Chidiokila Kudiay Yehova
6, 7. (a) Kom chom ik? (b) Let chilakej chilejena mutapu ukutwisha kom kutukwash twilamina mu rukat ra Nzamb.
6 Mu mangand manam makasikena mutushicha, mipak yivud yituswirikedina yitin anch tuziyila kudiay Nzamb. Ov, mutapu ik tukutwisha kwikal nich kashinsh anch mipak yiney yikwatijadin nich rusot ra Nzamb? Yehova watwinkisha chipan chikutwisha kutukwash nakash pa mulong winou wa kuziyil. Kadi kom. Kom chom ik? Kom kadi chipan cha kwishinshikin ayinetu. Kasadiling mudi nzwij wa mukach, kakat kututwish tushinshikina kutond kutukweta mu mwom ap kutongijokin pa yisal yitwasala kal ni kutal usey way anch yidi yiwamp ap anch yiyimp, yitentamin ap kiyitentaminap.—Tang Rome 2:14, 15.
7 Ov, mutapu ik uwamp tukutwisha kusadil kom? Tushinshikinany chilakej chimwing. Mwin kwend mu masuku wakatul ngwa mpat pa muchim. Mwikil tumikombil, jinjil, ap yijingidij. Chikalap nchik mwamu, ndiy uyil kamu kurutu kuyilay. Ov, chitwishikin nchik? Chidi mulong ukwet busol. Busol ukweting yijingidij yilejena makonk manying ma mangand ni karusambu kalejena ching kwindum. Pakad busol wend, mwin kwend mu masuku winou ukutwish washadik kamu. Chawiy chimwing, muntu wakad kom ukutwish kamu washadik anch wasot anch atonda mikadil, mashakamin, ni kutond kuwamp mu mwom.
8, 9. (a) Mipak ik ya kom ketu yitufanyidina kulam mu manangu? (b) Chom ik tufanyidina kusal chakwel twikala nich kashinsh anch kom ketu katukwashin chakin kamu?
8 Mudi busol, kom nikawiy kakwet mimbu. Anch mwin kwend mu masuku watek ema piswimp ni busol wend, ema ukutwish wapwit karusambu wakatadish ndond yindjing wakadiosh pa ndond yilejena kwindum. Chilik chimwing, anch twalikin maku ma muchim wetu mayikela mipak yetu, chom ik chikusadika? Maku metu ma choy makutwish marumbangesh kom ketu. Bibil utuyudil anch: “Kwikil chom chikata kudimban mudi muchim wa muntu.” (Yer. 17:9; Jinsw. 4:23) Chikwau, anch mwin kwendang wetu mu masuku kadiap nich kart muwamp, wa kuchingejin, busol wend kakutwishap wikal wa usey ukash kudi ndiy. Chawiy chimwing, anch kitwengamidinap pa umutakel wakin, wakad kukarumukang wa Dizu dia Nzamb, Bibil, kom ketu kakutwishap kikal ka usey nakash. (Kus. 119:105) Cha ushon, antu avud adia mu mangand manam akat kukasikeshin chamwamu maku ma michim yau ni kulik kutesh nakash ap kamu kulik kwin kamu yijidik yidia mu Dizu dia Nzamb. (Tang Efes 4:17-19.) Wawiy mulong antu avud, ap anch ayitanga nich kom, asadiling yom yimwing yijondila nakash.—1 Tim. 4:2.
9 Tukwatin mupak kangal twikal mudi antu inay! Pakwez, tulikany Dizu dia Nzamb dituleja ni difumba kom ketu chakwel kikal chakin kamu ka usey. Tuswiridin tutesha kom ketu kafumbilau kudi Bibil pa ndond pa kulikin maku metu ma choy makayikela. Pa chisu chawiy chimwing, tusadiling usu wa kulimish kom ka akadivar ni anambaz netu akatish a muspiritu. Tusadiling usu wawonsu kangal tuyipwakesha, nich kulam mu manangu anch kom ka akadivar netu kakutwish kikal kadimukina nakash ap katalela nakash pa kukisikesh ni ketwetu.—1 Kor. 8:12; 2 Kor. 4:2; 1 Pita 3:16.
10. Jinjil ik jisatu ja mwom tukwisambina katat?
10 Elany katat tushinshikinany mitambu yisatu ya mu mwom mutukutwisha kumekeshin anch tumukatin Yehova kusutil ku kumuziyil. Chakin kamu, mu mutapu umwing ni umwing, kom kakwet cha kusal, pakwez kasotin kukatakel, cha kusambish ni cha usey nakash, kudi yijidik yapepilau yidia mu Bibil yisambidina piur pa mwikadil. Jinjil jisatu mutukata kumukatin Yehova jawiy ej: (1) Tuyikatining antu akatinay Yehova, (2) tuyilimishin anyikel, ni (3) tusadiling usu wa kushal ishitwila ku mes kwa Nzamb.
Kuyikat Antu Akatinay Yehova
11. Ov, mulong wak tufanyidin tuyikata antu akatinay Yehova?
11 Cha kusambish, tuyikatining antu akatinay Yehova. Pa mulong wa urund, antu ading mudi chibel chipwitininga mem. Tukatining kupwit chom chawonsu chitwombilamu. Sakatang wetu wij nawamp muukutwisha urund kwikal chak—ap ukwash—kudi antu akayitil. Chawiy, chitwinkishinay chiyul chinech cha manangu: “Muntu ukata kwend ni in manangu niyend ukez kwikal mwin manangu, pakwez ukata kwend nau ayisup ukez kaman mar.” (Jinsw. 13:20; 1 Kor. 15:33) Kwikil muntu ap umwing udia pakach petu usotila ‘kuman mar.’ Umwing ni umwing wetu usotil “kwikal mwin manangu.” Chisangareshin kutesh anch, kwikil ukumupandakanamu Yehova ku manangu, ni kwikil chom chikutwisha kumujondish. Pakwez, ndiy watushila etu awonsu chilakej chipandakena kuwap pa mulong wa arund. Tongap bil—antu ik akayitil atonday Yehova ikala arund nend?
12. Yehova utondining arund a mutapu ik?
12 Yehova umwisambidin nshakur Abraham anch: “Murund nam.” (Isay 41:8) Ikundj winou wadinga muka ritiy nakash, mwin kutentam, mwin kuziyil—ikundj muka ritiy. (Yak. 2:21-23) Awiy arund a mutapu winou akatay Yehova kutond. Ni ilel udi kand murund wa antu mudi inay. Anch Yehova uyitondin arund mudi inay, ov, kichidiap cha usey anch niyetu tutonda arund adia mudi inay, chakwel twenda ni antu akweta manangu niyetu twikala in manangu?
13. Pa mulong wa kutond arund, chom ik chikutwisha kutukwash chakwel tutonda nawamp?
13 Chom ik chikutwisha kukukwash chakwel utonda kutond kuwamp pa mulong winou? Kwilej yilakej yidia mu Bibil kukutwish kwakukwash. Shinshikin urund wadinga pakach pa Rut ni mawenend Naomi, urund wadingau nich David nenday Yonatan, ap wadingau nich Timote nenday Paul. (Rut 1:16, 17; 1 Sam. 23:16-18; Filip. 2:19-22) Antu inay adinga arund akash mulong wa diyingish dimwing didia piur pa mayingishin mawonsu: Adinga engamidin pa kumukat chakin kamu Yehova. Ov, ukutwish wayiman arund amukatina nakash Yehova mudi muumukatina? Ikal nich kashinsh anch mu chikumangen cha Ukristu mwizwil too ni antu akutwisha kwikal arund a mutapu winou. Arund inay kakezap kukutwal ku kuyip nakash mu muspiritu. Pakwez, akez kukukwash umuziyila Yehova, upama muspiritu, ni chakwel ukunyina ku spiritu. (Tang Galatia 6:7, 8.) Akez kukukwash wilama mu rukat ra Nzamb.
Limishany Winyikel
14. Yom ik yikata chisu ni chisu kusal anch chikala chikasikena kulimish winyikel?
14 Njil ya kaad mutukata kumumekeshin Yehova anch tumukatin yikwatin ku winyikel. Tufanyidin kulimishin winyikel. Ov, mulong wak chikata kutukasiken pa yisu kanang? Diyingish dimwing didi anch, antu ayikedila adi akad kuwanyin. Chikwau, niyetu ayinetu tudi akad kuwanyin. Turishin tutaku nich chaku cha kubwambwil chitwavadika nich.
15, 16. (a) Ov, mulong wak chidi cha usey kudi etu kuyilimish antu ikinshinay Yehova ulabu wa kuyilam antwend? (b) Dilejan ik dia usey tukutwisha kwilejin ku mutapu wamanay Yehova pa chisu chamubwambwilau Moses kudiau in Isarel?
15 Ukutwish pamwingap wiyipul anch, ‘Anch chitukasikedin mwamu kuyilimish anyikel, ov, mulong wak lel tufanyidin tuyiziyila?’ Chipul chikwatin ku mulong wa ukaleng. Ov, nany ukeza katond mudi mukaleng wey, nyikel wey? Anch twamutond Yehova mudi Mukaleng wetu, tuswiridin kulimish winyikel wend. Anch tumulimishinap, ov, chakin kamu tukutwish twamutazuk anch Nyikel wetu? Chikwau, Yehova ukat kusadil winyikel wend kusutil kudi antu akad kuwanyin inkishay kal chisend cha kuyilam antwend. Anch twayibwambwil antu inay, ov, Yehova ukuman nchik yisal yetu?—Tang 1 Tesalonik 5:12, 13.
16 Chilakej, chisu in Isarel chamunyinyitau ni kumubwambwil Moses, Yehova amwinend wakwata yisal yau ya kubwambwil nich usey, mudi kwadinga kumubwambwil kwin kamu ndiy. (Kuch. 14:26, 27) Nzamb kakarumukinap. Anch twapakish ap pakemp kuyibwambwil ikinshinay ulabu, chakin kamu tukat kumubwambwil ndiy!
17. Ngikadil ik yiwamp yitufanyidina kusal usu chakwel tuyikudisha pantaliken ni antu ikinshinau ulabu mu chikumangen?
17 Kambuy Paul ulejen ngikadil yiwamp yitufanyidina kukudish pantaliken nau antu akweta ulabu wa yisend mu chikumangen cha Ukristu. Ndiy wafunda anch: “Yiziyilany awiy adia in kutakel en ni kwitudish kudi awiy, mulong adi in kulam a mipim yen ni pakez kapanau kuchind; asala yom yiney nich musangar, kangal nich ushon, mulong mwamu kichikunikwashanyip en.” (Heb. 13:17) Chakin kamu, chitining usu wakin ku mutambu wetu chakwel tukudisha spiritu winou wa kuziyil ni kwikepish. Vurikany anch, tusadil usu chakwel twilama mu rukat ra Nzamb. Ov, kitufanyidinap tusala usu wetu wawonsu mulong wa kuwanyish rutong riner?
Kushal Ishitwila ku Mes kwa Yehova
18. Ov, mulong wak usotilay Yehova anch twikal inangina?
18 Njil ya kasatu mu tukata kumekeshin anch tumukatin Yehova yidi anch tusadiling usu wa kushal ishitwila ku mes mend. Anvaj akat kusal usu wau wawonsu chakwel ashinshikin anch anau inangin. Ov, mulong wak? Cha kusambish, kwinang kudi kwa usey mulong wa ukash wa mujimbu wa mwan. Chikwau, mwan winangina ulejen anch ni dijuku diau dinangin, umekeshin kand anch anvaj end amukatin ni amubangidin. Mulong wa mayingishin mudi minam, Yehova niyend usotin twikala ishitwila. Ndiy wij anch kwinang kudi kwa usey mulong wa ukash wa mujimbu wetu. Wij kand anch kwinang kwetu kumumekeshin mudingay, Tatukwetu wa mwiur. Kwinang kudi kwa usey ujim nakash, mulong antu akutwish ez kudi Nzamb utukata kwifukwil mulong atumen mutapu tushalijadina kulemp ni antu adia mu mangand manam mijondila.
19. Ov, mutapu ik twija anch kwinang kwa ku mujimbu kudi kwa usey ujim?
19 Mu jinjil ik mutufanyidina kwinang? Chakin kamu, mu mwom wetu wawonsu. Mu Isarel wa pasak, Yehova wachovikesha patok kudi antwend anch kwinang ku mujimbu kwadinga kwa usey. (Lev. 15:31) Chijil cha Moses chisambina pa milong mudi kwikis kwa rupang, koyish malong, kowal ku makas, mend ni kutut maswin. (Kub. 30:17-21; Lev. 11:32; Kuch. 19:17-20; Kuv. 23:13, 14) In Isarel adinga ni kuyivurish chisu ni chisu anch Nzamb wau, Yehova, udi utumbila—chirumburikina anch ‘wishitwila,’ ‘zwang’ ni ‘utumbila.’ Atushalapol a Nzamb utumbila aswiridin niyawiy kwikal atumbila.—Tang In Levi 11:44, 45.
20. Mu jinjil ik tuswiridina kwikal ishitwila?
20 Chawiy tuswiridin, twishitula mukach ni pol kumwing. Tukat kusal usu wa kwishitul mu manangu. Tukat kulondul nich kushinshaman yijidik ya Yehova ya ngikadil, kwikalap nchik kwijond kwa masandj kutwombilamu mu mangand. Chijim nakash, tukat kushindakeshin pa kulam difukwil dietu dishitwila, kwipuk kwijondish kwin kwawonsu nich relijon wa makasu. Tukat kulam mu manangu dibabesh diapepilau didia mu Isay 52:11 dilondila anch: “Chakin, diokalany mu Babilon, en awonsu ukata kusendany yichid ya mu Chikumbu cha [Yehova]. Diokalany wakad kupukun ku chom chitakanena, ishitwishany ayinen.” Ilel, tudi ishitwila muspiritu ku kulik kwin kwawonsu kupukun ku chom chin chawonsu chimenay Tatukwetu wa mwiur anch chijondil mu kurumburik kwa chirelijon. Chawiy, mudi chilakej, tukat kwiyep misambu ya chirelijon ni machuku matumbila mijikena mu mangand mawonsu ilel. Chakin, chikasiken nakash kwikal ishitwila. Pakwez, antu a Yehova asadil usu nakash wa kusal mwamu mulong chikat kuyikwash ilamina mu rukat ra Nzamb.
21. Mutapu ik tukutwisha kwikal nich kashinsh anch tukez kwilamin mu rukat ra Nzamb?
21 Yehova ukatin anch twilamina mu rukat rend chikupu. Pakwez etwawonsu tuswiridin umwing ni umwing tushinshikina anch tusadil usu wetu wawonsu chakwel twilamina mu rukat ra Nzamb. Tukutwish kusal mwamu ching anch twalondul mu chilakej cha Yesu ni kumekesh anch tumukatin Yehova kusutil ku kuziyil yijidik yend. Ang twasal mwamu, tukez kwikal nich kashinsh anch kwikil chom chikeza “kutwauril etu ku rukat ra Nzamb ridia mu Yesu Kristu Nsalejetu.”—Rome 8:38, 39.
Ov, Uvurikin?
• Ov, mutapu ik ukutwisha kom ketu kutukwash chakwel twilamina mu rukat ra Nzamb?
• Ov, mulong wak tufanyidina kuyikat antu akatinay Yehova?
• Ov, mulong wak chidi cha usey ujim kulimish winyikel?
• Ov, kwinang kukwet usey ik kudi antu a Nzamb?
[Kamushet/Chipich chidia pa paj wa 28]
Mukand Ukasikeshidina Mashakamin Mawamp
Pa chirung chasadika program wa chitentam cha distrik mu muvu wa 2008 ni wa 2009, apalangeshaku mukand ukweta mapaj 224 ukweta mutu wa mulong ulondila anch: “ Gardez-vous dans l’amour de Dieu. ” Ov, mukand winou usu ukwet rutong ik? Ausala mulong wa kuyikwash nich in Kristu chakwel ashikena ku kwijik ni kukat yijidik ya Yehova, wasidin bil cha kusambish pa mashakamin ma mwin Kristu. Kwilej nawamp mukand “ Gardez-vous dans l’amour de Dieu ” kukez kukasikesh ritiyij retu anch kushakam kukwatijan nich yijidik ya Yehova yawiy njil yipandakenamu kuwap mu mwom katat ni yitwadil ku mwom wa chikupu mu machuku ma kurutu.
Chipandakenamu, mukand winou ausala mulong wa kutukwash chakwel tumana anch kumuziyil Yehova kudia chom chikash. Pakwez, udi mutapu wa kumumekeshin Yehova chilik cha rukat retu mulong wendendiy. Chawiy lel, mukand winou ukutushikij ku kwiyipul ayinetu anch: ‘Ov, mulong wak unikata kumuziyil Yehova?’
Pakatau antu amwing kukwat mipak yiyimp ya kulik rukat ra Yehova, chisu chivud chiding mulong wa mashakamin, kichidingap mulong wa malejan. Chidi cha usey mudi ik, anch tukasikesha rukat retu ni kusangaredin kwetu yijil ni mbil ya Yehova yikata kutakel mu mwom wetu wa pichuku pichuku! Tukwet kashinsh anch mukand winou usu ukez kuyikwash amikoku a Yehova mu mangand mawonsu chakwel imana dang ku mutambu wa yom yitentamina, chakwel amekesha anch Satan udi mukamakasu, ni chipandakenamu ilamina mu rukat ra Nzamb!—Yuda 21.
[Chipich chidia pa paj wa 28]
“ GARDEZ-VOUS DANS L’AMOUR DE DIEU ”