Relijon Muwamp Ukasikeshining Malejan Mawamp ma Mashakamin

RELIJON muwamp ukat kutulej mutapu wa kutongijokin piur pa yom ni utulejin mutapu wa kuwapish mashakamin metu. Utukwashin kura nich njit ja kusal yom yitentamina ni utukwashin chakwel twikala antu awamp. Ov, mutapu ik twija anch mwamu musadilingay relijon muwamp?

Talany yayifundinau in Kristu in Korint adingaku mu mivu chitot ya kusambish mu Grèce, kudiay kambuy Paul. Musumb winou wa pasak wadinga wijiken nakash mulong wa masandj. Paul wayiyula anch: “Ap akamakaj, ap in akish, ap in kusotan, ap in utumu wa amakundj ni amakundj, ap aij, ap in ris, ap in kukwachik, ap in kusalan, ap ambwitan, kakuswanip want wa Nzamb.” Kupwa Paul wawejaku kand anch: “Mwamu mwadingau amwing pakach pen; pakwez en akutokishilany kal, wishitwilany kal, wayingilany kal mu dijin dia Mwant Yesu Kristu, ni mu [spiritu] wa Nzamb wetu.” (1 Korint 6:9-11) Tong bil—relijon muwamp wayikwasha antu amwing adinga pasak akad kwijik yijil piur pa mashakamin chakwel ishitula mu ngikadil ni ikala atushalapol atentamina a Nzamb!

Pakwez, Bibil ubabeshin anch: “Muten ukez kez anch antu kakuteship ku malejan makin, mulong wa matu mau makez kuyobakan, akez kwisotil alej akatila michim yau.”—2 Timote 4:3.

Mutapu ik usadilinga marelijon wija pa mulong winou? Makat kukasikeshin yijil ya Bibil pa mulong wa mashakamin? Ap anch makat kupipesh chiyul chovikena zwang chidia mu Dizu dia Nzamb, mayilej lel antu ching ‘yom yikatila michim yau’?

Chakwel anch tukukwasha umana anch relijon kanang usongin mabuj mawamp, ov, ukutwishap witekin chisu cha kwakul ku yipul yiney?

MUTU WA MULONG: Uruu.

CHILEJENAY BIBIL: “Uruu ulima mukach mwa awonsu, chakwel antu kangal asotan, mulong Nzamb ukez kayimikish in kusotan nau in kusal yitil.”—Hebereu 13:4.

CHIPUL: Ov, relijon winou ulejening anch mu yid yend, ikundj ni mband ashicha pamwing afanyidin ching kamu kwatijan?

MUTU WA MULONG: Kujip uruu.

CHILEJENAY BIBIL: Pamwipulay anch kudi mulong ukutwisha kushikij ku kujip uruu, Yesu walonda anch: “Muntu wawonsu ukumulika mukajend wakad kusotan, wakachik kudi muntu windjing, ndiy wasotan kal.”—Mateu 19:9.

CHIPUL: Ov, relijon winou ulimishin umutakel wa Yesu ni ukat kulet mbil ya kulikijan ni kwatan ap kwachik kand—ching kusu pa mulong wa kusotan?

MUTU WA MULONG: Kusotan.

CHILEJENAY BIBIL: “Chinany kusotan; chitil chawonsu chikwau chikusalay muntu chidi [pol pa] . . . mujimbu; pakwez mwin makaj ndiy wausadish kal mujimbu wend amwinend chitil.”—1 Korint 6:18.

“Mulong wa chom chinech Nzamb wayilikila mu yom yau ya usany; mulong amband au aswimpikesha chaku chau ku chaku chakad ichau; ni amakundj kand alika chaku cha kusankan ni amband, atema mu maku mau, ikundj ni ikundj alalijanang; awiy itambwidil kal difut diau dia yitil yadingau ni kusal.”—Rome 1:26, 27.

CHIPUL: Ov, relijon winou ulejen anch kusankanijan kwikala pakach pa ikundj ni mband ap pakach pa ikundj ni ikundj, mband ni mband kudi chitil?

MUTU WA MULONG: Kulondil nich kukapuk yijidik ya Bibil mukach mwa yid yend.

CHILEJENAY BIBIL: “Kangal wovijanany nend muntu ukata kulond anch: ‘Nidi mwanamakwey mwin Kristu,’ anch ndiy udi mwin usund, ap ukwet ris, ap ukat kwifukwil akish, ap ukat kusaalan masaal, ap udi mwin kukwachik maar, ap mwij. Kangal wovijanany nend ap kusu kudia nend muntu wa mutapu winou.” (1 Korint 5:11, Manswik Masu) Chom ik chikutwisha kuyishiken antu akata kulonda anch adi in Kristu pakwez alikin kukarumuk kudiokal ku yitil yau? Dizu dia Nzamb dilondil anch: “Mwopatany muntu muyimp udia pakach pen.”—1 Korint 5:13.

CHIPUL: Ov, relijon winou ukat kuyopat antu akata kujiril yijil ya Bibil pakad kwit dilikishin?