Relijon Muwamp Ukasikeshining Rukat ra Ukadivar

BIBIL ulondil anch: “Ndiy wakad kukatan kamwijip Nzamb, mulong Nzamb udi rukat.” (1 Yohan 4:8) Chawiy lel, relijon muwamp ukat kukasikeshin rukat ra ukadivar.

Marelijon mavud masadining mudimu umwing wa usey nakash wa kuyilam ni kuyital ayej, amapal ni atuzwendj. Makat kuyikasikesh antu adiamu asadila chiyul chafunday kambuy Yohan anch: “Wawonsu ukwet yom yiwamp ya mangand, ndiy umutadil mwanamakwend wend uswir ni wapat muchim wend kudiay ndiy, ing lel rukat ra Nzamb rukumushakam nchik? Anam akemp, kangal twikatilany mu mazu ap mu jindim, pakwez ching mu midimu ni mu yakin.”—1 Yohan 3:17, 18.

Pakwez, yom ik yikata kusadikaku anch michid yirishin njit? Ov, mbil ya Nzamb ya ‘kumukat mukwen mudi ey amwiney’ yiding ya kusadil ching mu chisu cha chisambu pakwez kuchijiril anch kudi mulong wa chipolitik ap anch mwant wa ngand watond kura njit ni ngand ya muchid usulangen nend?—Mateu 22:39.

Yesu walonda anch: “Ku chinech kwawiy kukwijikinau antu awonsu anch en udiany in kwilej amam anch wakatijanany.” (Yohan 13:35) Pa chisu wakwila yipul yilondwilaku ey, iyipula amwiney anch: ‘Ov, yid ya relijon winou yimekeshining rukat mulong wa antu awonsu pa yisu yawonsu kichidiap kusu ku kan pakwez ni mu yisal kand?’

MUTU WA MULONG: Njit.

CHILEJENAY BIBIL: Yesu wayinkisha in kwilejend mbil yiney: “Am nakulejany anch: Yikatany akankuny en, ni kuyilembidil awiy akata kunizengolany.”—Mateu 5:44.

Chisu chezau amasalay mulong wa kumukwat Yesu, kambuy Pita wapwita mpak ya musamun chakwel amuchidija. Pakwez, Yesu wamwela anch: “[Tek] . . . mpak yey mu chilal chau; mulong awonsu akutambula jimpak, akez kujiy kwi mpak.”—Mateu 26:52.

Kambuy Yohan wafunda anch: “Mu chinech mwawiy mwamekedinau anch anany adia an a Nzamb, ni an a Satan kand; wawonsu wakad kumukat mwanamakwend. Mulong diawiy dizu diwateshanya en pakusambish anch, tuwapidil kukatijan umwing ni mukwau; kangal mudi Kain wading muyimp, wamujipa mwanamakwend.”—1 Yohan 3:10-12.

CHIPUL: Ov, relijon winou uyikasikeshin yid yend kuya kwas njit?

MUTU WA MULONG: Milong ya chipolitik.

CHILEJENAY BIBIL: Pamanau ukaliweny wadingay nich Yesu wa kusal yilay, antu amwing atonga anch niyend ufanyidin kwiyandjik mu milong ya chipolitik yadingau nich. Chom ik chasalay? “Chawiy Yesu chijikay anch awiy asotil kwez ni kumuparil ku usu kumudish want, ndiy waya kand ku mukandu amwinend.”—Yohan 6:15.

Pamukwatau Yesu ni kumufund cha makasu anch wadinga ni kulet kanrumbangesh ka chipolitik, ndiy wayakula anch: “Want wam kiudip wa mangand minam; anch want wam wadi wa mangand minam ing atushalapol am arishang, ing kampanangap kudi Ayuda; pakwez katat want wam kiudip wa mangand.”—Yohan 18:36.

Pamwilembilay Nzamb piur pa in kwilejend, Yesu walonda anch: “Am nayinkishil kal dizu diey; ni mangand mayikisil mulong awiy kadip kand a mangand, mudi am kinidip wa mangand.”—Yohan 17:14.

CHIPUL: Ov, relijon winou ulondwiling chilakej cha Yesu ni kakatap kwiyandjik mu milong ya chipolitik, ap anch kusal mwamu kukutwish kwasal anch ayikisa antu adiamu kudi in mafef amwing?

MUTU WA MULONG: Kasolikany.

CHILEJENAY BIBIL: Pa chisu antu a kusambish ayidim akad kwikal Ayuda pikalau in Kristu, kambuy Pita walonda anch: “Komb chidi chakin, nijik kal Nzamb kakwetingip kasolikany ka muntu; pakwez ukat kwitiyij kwend kudi wa muchid wawonsu ukata kumwov ndiy wom, ni kusal midimu ya kutentam.”—Midimu 10:34, 35.

Payifundinay in Kristu adinga mu mivu chitot ya kusambish, Yakob wafunda anch: “Anamakwam, mudi walamany ritiy ra Nsalejetu Yesu Kristu, Mwant wa uyaj, kangal wikalany ni kasolikany kudiau antu. Mulong anch kwez muntu ku kukumangan kwen nich salamb wa or, ni maswin mawamp, kutal mwandam kand muntu kazwendj nich maswin makad kuwap, ni yenen anch wamwakany ndiy ukwet maswin mawamp ni kulond anch: Shakamany pinap pa nkwas amboku, ni kudi kazwendj anch: [iman] kwa ap shakam kwey pansh mwishin mwam; ov anch wasalany mwamu [ukumekeshany] kasolikany mukach mwen, ni kwikal in kurumbish adia ni manangu mayimp anchi?”—Yakob 2:1-4.

CHIPUL: Ov, relijon winou ulejen anch antu awonsu adi chilik chimwing ku mes kwa Nzamb ni anch yid ya relijon kiyifanyidinap kwikal ni kasolikany pa muntu ap wisu nich diyingishin dia ulombu wa chikit ap mulong wa nfalang jikwetau?