YESU wakasikeshina kulimish Dizu dia Nzamb, Bibil. Uyakin winou umekening kusutil ku mutapu tukata kusal anch Djabul ukat kusot kutwoz. (Mateu 4:4-11) Chilakej, chom ik chasalay Yesu pa chisu chamwelau kudiay Satan anch akarumunaku mayal mamwing mikala mukat? Yesu walika ni wajimbula mazu mapepidilau malonday Moses, mitutangininga mu Kuvurik Yijil 8:3. Ni pa chisu chamwinkishay Yesu kudiay Satan winyikel piur pa mant mawonsu madia mu mangand chakwel niyend amusadilaku chisal chimwing cha kumwifukwil, Yesu wasala chom ik? Ndiy walika yom yamwinkishau ni walonda chitongijok cha mifund chiukutwisha kutan mu Kuvurik Yijil 6:13.

Tutonga bil! Ap anch ndiy wadinga Mwan a Nzamb, Yesu wadinga wengamidin pa Bibil anch ndiy musul wa ulabu wa malejan mend. Ni chawiy kadingap ni kudiul Dizu dia Nzamb mulong wa kukasikeshin bil yishankur ya antu. (Yohan 7:16-18) Pakwez, antakel avud a marelijon adingaku mu machuku ma Yesu kitiyijap yadingay ni kulond piur pa Dizu dia Nzamb. Ov, mulong wak? Mulong alikina yishankur ya antu yirumbangesha Mifund Yitumbila. Yesu wayileja patok amakurump inay a relijon anch: “Mwamu muwasheshilanya kal dizu dia Nzamb mulong wa yaku yen. En in rubabek, komb [Isay] chilondilay chidi chakin anch: Antu ang akat kwinlimish ni milamu yau, pakwez michim yau yidi kulemp ni yamam. Akat kwingifukwil chamwamu, mulong malejan mau madi kwau malejan ma antu kusu.”—Mateu 15:6-9.

Marelijon mavud madia mu mangand, ma Ukristu ni makad kwikal ma Ukristu kumwing, malondiling anch malimishin Bibil. Chikalap nchik mwamu, marelijon minch miwija malikina yaku ya antu anch yimeken patok kamu anch yipwitijadin ni malejan madia mu Dizu dia Nzamb? El twisambina yom yaad kusu.

MUTU WA MULONG: Majin mipidilau antakel a relijon.

CHILEJENAY BIBIL: Yesu wayifisha nich amakurump a relijon adingaku mu machuku mend piur pa kukat kwau majin ni impu ya ntumb yadingau nich. Ndiy walonda anch amakundj inay adinga akatin “kushakam mu jindond ja ant pakuyau ku misambu, ni mu jinkwas jau ant mu masinagog; Akat kusot kuyifukwil mu yiku, ayitazukang kudi antu anch, Rabi.” Kupwa Yesu wayileja in kwilejend anch: “Pakwez en kangal akutazukanyip kudi antu anch Rabi; mulong mulej wen udi umwing, en awonsu udiany akadivar. Kangal wakamutazukany muntu wa pansh anch tatukwen; mulong Tatukwen udi umwing, ndiy kamu udia mwiur.”—Mateu 23:1-10.

CHIPUL: Ov, antakel a relijon winou akatining kuyitazuk nich majin ma kuyinkish nich kalimish ni asotining anch antu ayitumbisha, ap anch akat kuziyil kwi mbil ya Yesu ya kwipuk kusal mwamu?

MUTU WA MULONG: Kusadil akish mu difukwil.

CHILEJENAY BIBIL: “Kangal wakasong mukish chirumbidij, ap chifu cha chom chidia mwiur, ap chidia panap pansh, ap mu mem kwishin kwa divu. Kangal wakayizengamin kurutu kway, ap kangal wakayisadil.”—Kubudik 20:4, 5.

Kambuy Yohan wayifundina in Kristu anch: “Anam akemp, babalany ayinen kudiok ku akish.”—1 Yohan 5:21.

CHIPUL: Ov, relijon winou uziyidil kwi mbil ya Bibil yovikena patok ya kulik kusadil akish mulong wa kumwifukwil Nzamb?

Ukutwish Kutan Njil Yitentamina

Chikalap nchik kuvulijan kwa marelijon madiaku nlel, ukutwish kumujingunin relijon utwadila ku mwom. Kudi yijingidij yivud yilejena “ritiy ra zwang rakad chitaj rusotilay Nzamb.” (Yakob 1:27) Mifund yitwisambina kal mu mitu ya milong yiney yikutwish yikal yijingidij yikutwisha kututwal ku relijon winou.

Ukutwish wayipul Atuman a Yehova chakwel akwinkisha yakul yau ku kuyipul yiney yadia yidia mu mitu ya milong yiney? Anch washinshikin yom yilondilau, londul chilakej chiwamp cha in Beroy adingaku mu mivu chitot ya kusambish. Pateshay yom yayilejau kudiay kambuy Paul, awiy “adinga ni kutang mukand wa Nzamb pichuku pichuku, ni kutal anch yom yiney mwamu muyidia.” (Midimu 17:11) Anch ulimishin Dizu dia Nzamb mudi in Beroy, ni anch ukat kwilejad nakash, ukez kutan njil yitwadila ku kupand. Kwendil kwey mwi njil yiney udi mupak wey amwiney.