Rukat Ra Kristu Ritubachikin Ku Kukat
“Yesu wading uyikatil ayend adia pa mangand, ndiy wayikata kamu djat ni kwisudiel kwa mwom wend.”—YOH. 13:1, MM.
1, 2. (a) Rukat ra Yesu ridi ra pakampwil mu mutapu ik? (b) Mitapu ik ya rukat yitukwisambina mu mutu wa mulong unou?
YESU washa chilakej chiwanyidina cha rukat. Yom yawonsu yasalay—kulond kwend, mashakamin mend, malejan mend ni rufu rend ra kwipan—yamekesha rukat rend. Pashikay kwinsudiel kwa mwom wend panap pa divu, Yesu wamekesha rukat kudia antu adingay nend ni pakampwil kudi in kwilejend.
2 Chilakej cha mashakamin ma rukat chashay Yesu chikala kudia in kwilejend. Chitubachikin kand tumekesha mu mutapu umwing rukat kudia akadivar netu ni anambaz a muspiritu mudi chidia chiwamp kudi antu awonsu. Mu mutu wa mulong winou, tukushinshikin yom yifanyidinau amakurump a chikumangen kwilejin kudiay Yesu piur pa mutapu wa kumekesh rukat kudiay antu arumbukina, ap in asadila yitil yikash. Tukwisambin kand mutapu rukat ra Yesu riyibachikining in Kristu chakwel asala yom yiwamp pa yisu kudia mikadil yikash, yak yikash ni mayej makash.
3. Chikalap nchik kurumbuk kujim kwa Pita, Yesu wamumana mutapu ik?
3 Pa uchuku kurutu kwa rufu ra Yesu, kambuy wend amwinend Pita wamwituna tupamp tusatu. (Marko 14:66-72) Pakwez, pachirikay Pita, mudi mwamulejau kudi Yesu, ndiy wamulikishina. Yesu wamwinkisha Pita yisend yijim nakash. (Luka 22:32; Mid. 2:14; 8:14-17; 10:44, 45) Ov, chom ik twilejidina ku manangu ma Yesu pantaliken nau antu arumbuka nakash?
Mekeshany Chitongijok cha Kristu Pantaliken nau in Kusal Yitil
4. Mwikadil ik wa pakampwil witininga kumekesh rukat mudi ra Kristu?
4 Pakach pa mikadil yivud yitina kumekesh chitongijok mudi cha Kristu, mwikadil umwing ukutwisha kwikal ukash pakampwil udi wa mutapu wa kuyisadil antu asadila yitil, ikala mu dijuku ap mu chikumangen. Cha ushon, mudi muyila kwinsudiel machuku ma ditenchik dia Satan, spiritu wa mangand wikal kal ni usu ukash mu mashakamin. Mikadil kushalijan yiyimp ya mangand yikutwish yayikwat ansand ni amakurump kumwing, nich kushesh mupak wau wa kwendil mu kajil katentamina. Mu mivu chitot ya kusambish, antu amwing ayopata mu chikumangen cha Ukristu ni akwau ayipupa. Mwamu chidia kand nlel. (1 Kor. 5:11-13; 1 Tim. 5:20) Ap mwamu, anch amakurump atadila milong mudi yiney amekesh rukat mudi ra Kristu, chikutwish chikal nich usu uwamp padiay mwin kusal chitil.
5. Ov, mutapu ik ukutwishau amakurump kwimburij chitongijok cha Kristu pantaliken nau in kusal yitil?
5 Mudi Yesu, amakurump afanyidin kukasikeshin chisu chawonsu yijidik yitentamina ya Yehova. Mu kusalang mwamu, akat kumekesh kwikepish, riy ni rukat ra Yehova. Anch chakin kamu muntu wit dilikishin, udi ni ‘muchim unenganena’ ni ‘spiritu unenganena’ mulong wa kurumbuk kwend, chikuyikadilap amakurump chikash kumuchirish “udia mwamu au mu muchim wa kwitudish.” (Kus. 34:18; Gal. 6:1) Pakwez, chikwikal nchik ku mutambu wa muntu wakad kubangaku ni wakad ap kwovu ushon?
6. Chom ik chifanyidinau amakurump kwipuk padiau ni muntu usadila chitil, ni mulong wak?
6 Anch mwin kusal chitil walik chiyul cha Mifund ap anch upakishin kwiyingish mulong wa chitil chend, amakurump ni antu akwau akutwish ikal anenganena. Chijau uyimp wasalay kal muntu winou, akutwish ikal mu choziu cha kusot kumekesh yovil yau mulong wa yisal ni ngikadil ya muntu winou. Pakwez, ujim ukat kusal yom yiyimp ni kiukatap kumekesh “chitongijok cha Kristu.” (1 Kor. 2:16, MM; tang Yakob 1:19, 20.) Yesu wayiyula antu amwing adingaku mu machuku mend mu mutapu wa patok, pakwez kayilondap chom chiyimp ap chikutwisha kuyovish kuswan ku michim. (1 Pita 2:23) Pakwez, ndiy wayileja patok in kusal yitil chifanyidinau kusal chakwel ita dilikishin ni amuchirikina Yehova. Chakin kamu, dimwing dia mayingishin majim mezinay Yesu mu mangand diadinga mulong wa “kupandish akayitil.”—1 Tim. 1:15.
7, 8. Chom ik chikutwisha kuyikwash amakurump mu milong ya dirumburish?
7 Mutapu ik ukutwisha chilakej cha Yesu pa mulong winou kwikal nich usu pa chitongijok chetu pantaliken ni antu afanyidinau kupup mu chikumangen? Vurikany anch ditenchik dia Mifund piur pa dirumburish mu chikumangen dikat kuyiking amikoku ni dikutwish kumushikij muntu upupinau ku kwit dilikishin. (2 Kor. 2:6-8) Chiding cha ushon nakash anch antu amwing alikining kwit dilikishin ni chawiy akat kuyopat, ni chituletidin musangar pa kwijik avud au akat kumuchirikin kand Yehova ni kuchirik mu chikumangen. Anch amakurump amekesh chitongijok mudi cha Kristu, akat kusal mu mutapu wa kumukwash muntu chakwel akarumuna muchim wend ni ukutwish wachirik kand. Mu machuku ma kurutu, amwing a pakach pa antu inay asala yitil akutwish avuramen yiyul yawonsu yengamidina pa Mifund yayinkishau kudi amakurump, pakwez akutwish avurik anch amakurump adinga alimishin untu wau ni ayisadila nich rukat.
8 Chawiy lel, en amakurump, ufanyidinany kumekesh ‘dibuj dia spiritu,’ pakampwil rukat mudi ra Kristu, ap mu mikadil yikash. (Gal. 5:22, 23) Kafanyidinap kumwopat swa-swa mwin kusal yitil pol pa chikumangen. Afanyidin kumekesh ang asotil anch antu asadila yitil amuchirikina Yehova. Chawiy lel, anch mwin kusal yitil wit dilikishin, mudi musadilingau avud au, ukutwish wamujikitish nakash Yehova pamwing ni ‘yipan mudi antu’ yisala anch chimuswapedila kuchirikin mu chikumangen.—Efes 4:8, 11, 12.
Mekeshany Rukat Mudi ra Kristu mu Chisu cha Kwisudiel
9. Let chilakej chimekeshina chisal chasalay Yesu chimekeshina rukat rend mulong wa in kwilejend.
9 Luka wafunda rusangu rumwing rilejena rukat rijim ra Yesu. Chadingay wij anch, pa chisu kanang, amasalay in Rome akez kez kuungumuk bwalikan musumb wa Yerusalem wafishau kal nich, chawiy chikwikal chikash mutapu wa kuchin, nich rukat Yesu wayibabesha in kwilejend anch: “Piukeza kamumanany Yerusalem amunyingumuk kudi in njit, chawiy ukwijikany anch kunong kwend kwashik kal.” Chom ik chadinga chifanyidinau kusal? Yesu wayinkisha yany yovikena zwang. “Chawiy yilikany adia mu Yudea achinyina ku mikandu, ni adia mukach mwa ul apalangan, ni adia kwi mpat kangal andam mu ul. Mulong minam mawiy machuku ma kufundakesh, chakwel yom yawonsu yafundau yilakenamu nich.” (Luka 21:20-22) Pezau amasalay in Rome aunyingumuk ul wa Yerusalem mu muvu wa 66 C.C., antu in kuziyil asala kulondulijan nich yany yiney.
10, 11. Kushinshikin mutapu wachinau in Kristu a kusambish kudiokal mu Yerusalem kutukwashin nchik twirijeka mulong wa “mar mapandakena”?
10 Pa kuchin kwau kudiokal mu Yerusalem, in Kristu adinga aswiridin kumekesh rukat mudi ra Kristu kudi umwing ni mukwau, ap anch Kristu wayimekeshina rukat rend. Chakin kamu adinga afanyidin kwanganijan yom yadingau nich umwing ni mukwau. Pakwez uprofet wa Yesu wadinga uyil kamu kulemp nakash kupandakanamu pa kusheshik kwa musumb winou wa pasak. Ndiy wasambela kulond anch: “Kukez kikal mar mapandakena, mar madia mwamu kand kal mamekanangip kudiokal pa kusambish kwa mangand ni katat ou, bwat, ap kurutu kukwikalip kand mar mwamu.” (Mat. 24:17, 18, 21) Kurutu ni pa chisu cha “mar mapandakena” minam madia kurutu, niyetu tukez kwikal mu mikadil yikash ni mu kuburen kwa yom. Anch tukwet chitongijok cha Kristu chikutukwash tuyikwasha.
11 Pa chisu chinicha, tukez kuswiriken kulondul chilakej cha Yesu, cha kumekesh rukat rakad choy. Pa chinech, Paul utuyudil anch: “Muntu ni muntu wa pakach petu amusangarisha mukwau ku kuwap kwend ni kumukudish. Mulong Kristu Kisangarishap amwinend . . . Katat Nzamb wa kudandamen ni wa kwongoj akwinkany en kushakamany mu kwovijan kudi muntu ni mukwau mudi musotilay Yesu Krisu.”—Rome 15:2, 3, 5.
12. Rukat ra mutapu ik ritufanyidina kukudish katat, ni mulong wak?
12 Pita, muntu wamekeshinau rukat kudiay Yesu, niyend chilik chimwing wayikasikesha in Kristu chakwel akudisha ‘rukat rakad rubabek mulong wa akadivar’ ni amekesha “kuziyil ku . . . uyakin.” Afanyidin akatijana “muntu ni mukwau mu michim.” (1 Pita 1:22) Nlel, tuswiridin kukudish nakash ngikadil mudi yadingay nich Kristu. Chisu ni chisu, antu a Nzamb akwet yakamish yikash. Kwikil ap umwing wau ufanyidina kuchingejin mu chom ap chimwing chidia mu mangand manam, mudi muchimekedina ku kanrumbangesh kadia mu mangand katat mu ditenchik dia kutan nfalang. (Tang 1 Yohan 2:15-17.) Pakwez, mudi mudishejidina piswimp disudiel dia ditenchik dined, tuswiridin tumushejina Yehova piswimp ni kudi umwing ni mukwau, nich kukudish urund wa piswimp mu chikumangen. Paul wayula anch: “Katijanany amwing ni akwau mudi mufanyidinau akadivar kukatijan. Chifanyidin kukasikesh kulimishijan amwing ni akwau.” (Rome 12:10, MM) Pita weza kukasikeshin kand pa mulong winou, palonday anch: “Piur pa yom yawonsu lamatinany mu rukat ren mukach mwen ayinen; mulong rukat rikat kubwik miril ya tuyimp.”—1 Pita 4:8.
13-15. Mutapu ik wamekeshau akadivar amwing rukat mudi ra Kristu kupwa kwa yak kanang?
13 Mu mangand, Atuman a Yehova ijiken mulong wa kusadil kwau rukat mudi ra Kristu. Tushinshikinany chilakej cha Atuman itiyija rubil ra kuya kukwash kupwa kwa rinkind mukash watuta ni washesha yom yivud kurul mu États-Unis mu muvu wa 2005. Chilakej cha Yesu chayibachika, antu in kwipan pakad kuyifut 20000 ni kusut, avud au asha yikumbu yau yiwamp ni midimu yau yiwamp mulong wa kuya kukayikwash akadivar nau adinga mu mar.
14 Mu mwab umwing, kawit kizula ni mem mimwanga maya ku makilometre 80, chawiy mem makandama mametre 10 piur. Chisu chipwita mem, yikumbu yivud yasheshika mwin mwasutina mem mwang. Atuman ipana kudiokal mu jingand kushalijan eza ni ukaliweny wau, yom ya kusal nich mudimu ni ya kutung nich yikumbu mu mwab winou ni adinga tayad kusal mudimu win wawonsu ukutwisha kwikalaku. Anambaz aad avarikena ku mujimbu, adinga adia-afu alongija yom yau mu ditemb dia kupwit ku motak ni aya weny wa makilometre 3000 mulong akayikwasha akwau. Nambaz mwanikanch pa in aad ay washala kwinikwa, mulong wa kukwash komite wa ukwash ni kusal mudi chibol wa rawonsu.
15 Atungirila ni kurijek yikumbu 5600 ni kusut ya Atuman a Yehova ni ya antu akwau mu mwab winiwa. Ov, mutapu ik wiyovau Atuman adinga kwinikwa pa kutambul ukwash winou uvud wa rukat? Nambaz umwing wadinga ni chikumbu chasheshika, wandama mu ka chikumbu kakemp kadinga kadjila ni kadinga nich mafik mafila kal. Akadivar amutungina chikumbu chiswapela pakwez chiwamp nakash. Pimanay ku kurutu kwa chikumbu chend chiwamp chisu, wadila mansoj mulong wa kumujikitish Yehova ni akadivar nend. Mu jindond jikwau jivud, Atuman ashemunoka mulong wa mar mayitana ashakama kwinikwa muvu wa kabuj ap ni kusut kuchingel djat ni pakupwishinau kuyitungin yikumbu yau. Mulong wak? Chadinga mulong wa kuyichingel eza ayikwasha chakwel apwisha kamu kuyitungin ap kuyirijekin yikumbu yau. Chilakej chipandakena kuwap mudi ik cha kumekesh chitongijok cha Kristu!
Imekeshinany Ayej Chitongijok cha Kristu
16, 17. Mu jinjil ik mutukutwisha kumekeshin chitongijok cha Kristu mulong wa ayej?
16 Pamwingap antu akemp kusu pakach petu akwachika kal ku chak cha chitangil. Pakwez umwing ni umwing wetu ukutwish wikal nich milong ya ukash wa mujimbu, yikala iyend amwinend ap ya yid ya dijuku. Chitongijok cha Yesu pantaliken nau ayej chidi chilakej kudi etu. Rukat rend rawiy ramubachika ayovila riy. Padingau antu ni kumuletin ayej au, “wayok awonsu ayediling.”—Mat. 8:16; 14:14.
17 Ilel, in Kristu kakwetap usu wa kusal yilay ya kwokan nich mudi Yesu, pakwez akat kuyovil ayej riy mudi Yesu. Mutapu ik ukata kuchimekesh? Uman umwing, amakurump amekeshining anch akwet chitongijok cha Kristu kusutil ku kutenchik yitenchik mulong wa kuyikwash ayej adia mu chikumangen, alondwil chijidik chisambidinau mu Mateu 25:39, 40.a (Tang.)
18. Mutapu ik wimekeshinau anambaz aad rukat umwing ni mukwau, ni kwadinga chibudikin ik?
18 Chakin kamu, muntu kakuchingelap anch ching ikala mukurump chadi lel ayisadila akwau yom yiwamp bwat. Tushinshikinany chilakej cha Charlene ukweta mivu 44, wadinga uyedila mayej ma kanser ni amuleja anch kwamushal kal ching machuku dikum ni kufa. Pamanau maswir ni mudimu ukash wadinga ufanyidinay kusal nfumwend mulong wa kumulam, anambaz aad in Kristu, Sharon ni Nicolette, ipana ayinau chisu chawonsu mulong wa kumukwash pichuku pichuku urel. Machuku minam makarumuka mikal mbing musamban, pakwez anambaz inay aad amekesha rukat rau djat ni kwisudiel. Sharon washikena ku kulond anch: “Chiding chikash anch wij anch muntu kakulankap kwend. Pakwez, Yehova watwinkisha usu. Chishiken chinech chatwikadisha piswimp nend ni piswimp umwing ni mukwau.” Nfumwend a Charlene ulondil anch: “Kinikezap kuvuramen rukat ni ukwash wa anambaz inay aad. Manangu mau mawamp ni ngikadil yau yiwamp yasala anch choziu chinech chimuswapela Charlene wam ushinshamena ni changinkisha usu mu manangu ni wa ku mujimbu unadinga niswirikedina. Nikuyijikitish mivu ni minang. Kwipan kwau kwakasikesha ritiy ram mudiay Yehova ni rukat ram mulong wa akadivar netu awonsu adia mu mangand.”
19, 20. (a) Yom ik yitan yitwileja kal piur pa chitongijok cha Kristu? (b) Wakwatin kal mupak wa kusal ik?
19 Mu mitu ya milong yiney yisatu yilondulijadina, twashinshikinamu kal yom yitan piur pa chitongijok cha Yesu ni mutapu tukutwisha kwimburij chilakej chend mu kutong ni mu yisal. El twikalany ‘itudishila ni ikepishila mu muchim,’ mudi mwadingay Yesu. (Mat. 11:29) Tusalany kand usu wa kuyisadil antu akwau mu mutapu uwamp, ap anch kuburen kwau kuwanyin ni kuziy kwau kumeken patok kudi etu. Ni nich kujijaman tuziyilany ku yom yawonsu yitinay Yehova, ap anch twikalap nchik mu yoziu.
20 Kupwa, el tuyimekeshinany akadivar netu awonsu rukat mudi ra Kristu, mudi mwasalay Kristu amwinend, “ni kwisudiel.” Rukat riner rawiy ritwijikishina anch tudi in kwilej akin a Yesu. (Yoh. 13:1, 34, 35) Mwaning, “rukat ra ukadivar rishakam chikupu.” (Heb. 13:1) Kangal wachirikany panyim! Sadilany mwom wen mulong wa kumushiman Yehova ni kuyikwash antu akwau! Yehova ukez kuyukish usey wen wakin.
[Mazu madia kwishin kwa paj]
a Tal mutu wa mulong ulondila anch: “Salany Kangal Kulond Kusu Anch: ‘Yangany Ukotany Kasu ni Kwikut’” mu Chinong cha Kalam cha Mwinkind 15, 1986, (Français).
Ov, Ukutwish Kurumburil?
• Mutapu ik ukutwishau amakurump kumekesh chitongijok cha Kristu pantaliken nau in kusal yitil?
• Mulong wak chidia cha pakampwil kwimburij rukat ra Kristu pa chirung chinech cha kwisudiel?
• Mutapu ik tukutwisha kuyimekeshin ayej chitongijok cha Kristu?
[Chipich chidia pa paj wa 19]
Amakurump akatin anch antu asadila yitil amuchirikina Yehova
[Chipich chidia pa paj wa 21]
Mutapu ik wamekeshau in Kristu adinga mu Yerusalem chitongijok cha Kristu?
[Chipich chidia pa paj wa 22]
Atuman a Yehova ijiken mulong wa kusadil kwau rukat mudi ra Kristu