Mulong wak Kanrumbangesh Mwamu Piur pa SPIRITU UTUMBILA?

SPIRITU utumbila chom ik? Chipul chinech chimeken mudi chiswapel, pakwez chiding chikash kutan chakul chiswapela. Pape Benoît XVI wayileja antu mu Australie anch: “Chidi chikasiken pakwel anch tutesha kamu chirumburikinay Spiritu.”

Chakin kamu, kudi yitongijok yivud ni kwidjidjek nakash pa chipul chinech: Spiritu utumbila chom ik? Yilondwilaku ey yidi yimwing ya yakul:

• Udi muntu udinga mukach mwa in kwilej a Kristu.

• Siyans wa Nzamb, chijil cha Nzamb chisadila.

• Kwikalaku kwa Nzamb pasadilay mudimu mu mangand.

• Muntu wa kasatu mu dilejan dia Usatu.

Mulong wak kudia kanrumbangesh mudi kinak? Kasambisha pakur mu chitot cha kanying C.C., padingau in kwilej teoloji amwing ni kulond anch spiritu utumbila udi muntu udinga chilik chimwing ni Nzamb. Pakwez, Mifund ni in kwilej a Kristu a kusambish kalejenap chitongijok chinech. New Catholic Encyclopedia urumburil anch: “Chakin kamu Testament Mukur kalondilap anch spiritu utumbila udi muntu . . . spiritu wa Nzamb udi kwend usu wa Nzamb.” Buku winou umwing ulondil kand anch: “Maverse mavud madia mu Testament Musu malondil anch spiritu wa Nzamb udi chom, kadiap muntu; mwamu chimekena patok anch wisikesh spiritu ni usu wa Nzamb.”

Choviken patok, chiyikasikedin antu avud kutongin anch usu wikala muntu. Chawiy lel, kukimbijol kwa katat kwasadikina mu États-Unis kwajingunishin anch antu avud alikin chitongijok cha kulond anch spiritu utumbila udi muntu ap anch “chom chikweta mwom.” Ov, antu inay ayingin? Ap anch tufanyidin kuyitiyij in kwilej teoloji akasikeshidina anch: “Spiritu Utumbila udi Muntu ushalijadina chakin kamu ni Tatuku ni Mwan”?

Chakwel anch tutana chakul chakin, tufanyidin tutala mu Bibil, Dizu dia Nzamb, wisambidina pa kachom kamwing ni kamwing piur pa spiritu utumbila. Kambuy Paul wafunda anch: “Mifund yawonsu ayipepila kudi Nzamb ni yidi ya usey mulong wa kulejan nich uyakin, kupup kurumbuk.”—2 Timote 3:16, Bible en français courant.

Mulong wak ufanyidina kukimb kujingunin uyakin piur pa spiritu utumbila? Chidi mulong kwijik uyakin winou kukutwish kwakwinkish njil ya kutambul ukwash wa Nzamb. Ukat kwiyovang chisu chimwing anch uziyil ni ukutwishap kujijamen? Yesu wayikana in kwilejend anch: “Itany, akez kaninkishany . . . Anch en . . . wijany mwa kupan yom yiwamp kudi anen, ing lel Tatukwen wa mwiur kakupandikeshimup kupan [spiritu utumbila] kudi aiwy akata kumwit?”—Luka 11:9, 13.

Mu mitu ya milong yilondwilaku ey, tukulikin Mifund ayinay yituleja chidingay spiritu utumbila. Ni chawiy tukez kuman mutapu ukutwishay kutukwash mu mwom wetu.

[Tablo wa jinsangu udia pa paj wa 3]

Mifund yitulejin chidinga spiritu utumbila