SPIRITU UTUMBILA Chom Ik?

DICHUKU dimwing Yesu wayipula in kwilejend anch: “Nany umukweta tatukwend mukach mwen, anch wamwit . . . insh ndiy wamwink nnak? Ap anch wamwit diy komb ukumwink kapambamb?” (Luka 11:11, 12) An apamina mu Galaliya adinga ni kusanger kudia may ni ansh; adinga ij yom yitinau.

Yesu walonda anch tufanyidin kudandamen kwit spiritu utumbila, mudi mwitiningay yakudia mwan ufila nzal. (Luka 11:9, 13) Kutesh kurumburik kwa chidingay spiritu utumbila kukutukwash tutesha mudimu ujim usadilingay mu mwom wetu. Komb tushinshikinany bil yitulejinay Bibil piur pa spiritu utumbila.

“Ukash Wendendiy Udia Piur”

Mifund yilondil patok anch spiritu utumbila udi ukash ukatay Nzamb kusadil mulong wa kuwanyish rusot rend. Pamulejau Mariy kudiay mwangel Gabriel anch ukuval mwan ikundj ap anch chadingay kajik, mwangel wamuleja anch: “Spiritu [utumbila] ukez kawil padi ey, ni ukash wendendiy Udia Piur ukez kakubwik ey; chawiy kand ni mwan utumbila ukuvala akez kamupil anch Mwan a Nzamb.” (Luka 1:35) Kukwatijan ni mazu malonday Gabriel, kudi kukwatijan pakach pa spiritu utumbila ni “ukash wendendiy Udia Piur.”

Chitongijok mudi chinech chidi kand ndond yikwau mu Bibil. Muprofet Mike walonda anch: “Am, [Yehova, Les Saintes — Écritures du monde nouveau] ukat kwingizwish nich Mwiku ni ukash wend.” (Mike 3:8) Yesu wayikana in kwilejend anch: “En ukez kwakany ukash anch [spiritu utumbila] wez padi en.” (Midimu 1:8) Kambuy Paul niyend wisambina piur pa “ukash wa [piritu utumbila].”—Rome 15:13, 19.

Chawiy lel, chom ik tukutwisha kulond pa kutesh mazu minam mitwisambina kal? Spiritu utumbila uyiling pamwing ni ukash wa Nzamb. Spiritu utumbila udi chom chikatay Yehova kusadil mulong wa kumekesh ukash wend. Mu kulond kuswapela, spiritu utumbila udi kwend ukash wa Nzamb, ap anch usu wend wa kusal nich. Udi ukash wamushena mudi ik! Tukutwish twatesh ukash waswirikenay patangay mangand. Kusutil kudiay muprofet Isay, Yehova utukasikeshin chakwel tutongijokina pa mazu manam: “Zambulany mes men, utalany. Ov, nany watanga yom yawonsu yiumenanya? Ov, nany ukata kuyitakel yom yiney, ching kamu ndiy wija kuvul kway, ukata kuyitazuk pa dijin ap dijin. Mulong wa ukash wend ujim, kwikil umwing wau ukata kushadik.”—Isay 40:26.

Chawiy Bibil ulejen anch mangand mawonsu mudi mumadia ni kwovijan kudiamu kudiay mulong wa “ukash . . . ujim,” wa Nzamb Mwin Dikand Diawonsu. Choviken patok anch, Nzamb ukwet usu upandakenamu nakash, ni kwikal kwetu aom kwengamidin pa usu winou.—Tal mushet ulondila anch: “Spiritu Utumbila Usadil.”

Yehova ukutwish wasadil spiritu wend utumbila mu mutapu umwing ujim nakash, mudi mwasalay patangay mangand. Pakwez ukutwish wamusadil kand mulong wa antu. Bibil wisambidin chisu chivud piur pa mutapu Nzamb wasadilay wend mulong wa kuyinkish ukash atushalapol end adia pa divu.

“Spiritu wa Nzamb Udi Padi Am”

Mudimu wasalay Yesu utwinkishin chitokish chijim piur pa mutapu ukutwishay Nzamb kuyinkish atushalapol end spiritu wend utumbila. Yesu wayileja antu adinga ku Nazaret anch: “Spiritu wa Nzamb udi padi am.” (Luka 4:18) Yom ik yasalay Yesu nich “ukash wa [spiritu]”? (Luka 4:14) Woka milad yawonsu ya mayej, waninetisha mambek pa karung, wayidisha tunan twa antu nich tumukat tukemp ni ansh, ni wayivumbula afu. Kambuy Pita wisambidin piur pa Yesu anch: “Muntu wamekeshay Nzamb . . . ku midimu yikash ni yishimokish ni yijingidij yasadilay Nzamb mwi ndiy.”—Midimu 2:22.

Katat spiritu utumbila kakatap kand kusadish yijingidij mudi yiney. Chikalap nchik mwamu, ukutwish watusadil yom yijim. Yehova ukat kuyinkish in kumwifukwil end spiritu wend utumbila mudi mukatinay, mudi mwayilejau in kwilej kudiay Yesu. (Luka 11:13) Chawiy lel, kambuy Paul watwisha kulond anch: “Nikutwish kusal yom yawonsu mwi ndiy ukata kwinkasikesh am.” (Filipoi 4:13) Ov, spiritu utumbila ukutwish wasal mudimu winou mu mwom wey? Mutu wa mulong ulondwilaku ou ukwakul ku chipul chinech.

[Kamushet/​Chipich chidia pa paj wa 5]

Chilejena anch spiritu utumbila kadiap muntu

Bibil wilikejin spiritu utumbila ni mem. Nzamb walonda anch: “Nikez kapan mem kudi antu akweta impu, chad nikez kapalangesh Mwiku wam kudi an a muchid wen, ni kupan kand chiyukish cham kudi a majuku men makeza kez,” payikanay antwend yiyukish—Isay 44:3.

Pa chisu chayinkishay Nzamb atushalapol end spiritu wend, ‘izula ni spiritu utumbila,’ ap anch ‘izwila nich spiritu utumbila.’ Yesu, Yohan Mubatish, Pita, Paul, Barnaba ni in kwilej adinga akumangena pamwing pa dichuku dia Pentakost mu muvu wa 33 C.C. ayisambidin awonsu mudi anch adinga izwila ni, ap anch izwila nich spiritu utumbila.—Luka 1:15; 4:1; Midimu 4:8; 9:17; 11:22, 24; 13:9.

Tushinshikinany chom chinech: Chitwishikin ‘kumwizwish muntu’ mu antu kushalijan? Ukutwish walond anch muntu ukutwish ‘wizul’ mu antu? Kulond mwamu kwovikenap. Bibil wisambidin piur pa antu adinga izwila nich manangu, ni chovu, ap adinga izwila nich ronganyin rakin, pakwez kandikal alondap anch muntu wizwil mu muntu mukwau.—Kubudik 28:3; 1 Ant 7:14, NW; Luka 2:40; Kolosay 1:9.

Dizu dia Grek diakarumunau anch “spiritu” didi pneuʹma, dikweta chitongijok cha ukash wakad kumekan ku mes. Kukwatijan ni Expository Dictionary of New Testament Words, wenday Vine, dizu pneuʹma “cha kusambish dirumburikin bil rinkind . . . ni dirumburikin kand mwiku; kupwa, pakampwil dirumburikin spiritu, udia mudi rinkind, wakad kumekan, wakad mujimbu ni ukweta ukash nakash.”

Choviken komb zwang anch, spiritu utumbila kadiap muntu.a

[Dizu didia Kwishin kwa paj]

[Dizu dirumburila]

Photodisc/SuperStock