Kwisu ku radiokala?

New Catholic Encyclopedia (1967), Volim wa 14, paj wa 299 ulondil anch: “Kushinshikin kwa katat kumekeshin patok anch malejan ma Usatu amatomba kwinsudiel kwa chitot cha 4. Mu kurumburik kumwing, chom chinech chidi chakin . . . Kulond anch ‘Nzamb umwing mu Antu asatu’ kudiap kwakin, chakin kamu kumekenap mu mwom wa mwin Kristu ni mu ritiy rend, djat ni kushik kwinsudiel kwa chitot cha 4.”

Encyclopédie des religions, Bayard, Paris, 1997, Volim wa 2, paj wa 420, 423 ulondil anch: “Chikumangan chasalau ku Nicée mwi ngond wa Ndol-Mem 20, 325 [C.C.]. Constantin amwinend ndiy wachitakela, watakela nich kuzangurok minsamb, ni ndiy amwinend waleta chitongijok . . . chikash cheza kulejena urund udia pakach pa Kristu ni Nzamb mu yitiyij yitiyijau ku chikumangan, cha kwikal ‘mudi mudiay Tatuku.’ . . . Chayakamishau kudiay mwant, amimpel awonsu, kudioshamu ching aad kusu, afachika makas mau pa yitiyij yiney, avud au asala mwamu cha kuyishindil.”

Bibil ulondil ik?

‘Pakwez Stefan wizula sens ni spiritu utumbila, watal mwiur neng, waman uyaj wa Nzamb, ni Yesu wiminy ku chikas cha katatuku cha Nzamb, walond anch: Talany, naman kal maur ma kwanzuril, ni Mwan a muntu wiminy ku chikas cha katatuku cha Nzamb.’—Midimu 7:55, 56, Bible de Jérusalem.

Chishimushimu chinech chilejen ik? Pizulay nich usu wa Nzamb, Stefan wamumana Yesu “wiminy ku chikas cha katatuku cha Nzamb.” Choviken komb patok anch, Yesu kikalap Nzamb kakwau kupwa kwa kuvumbuk kwend ni kuya mwiur, pakwez, wadinga muntu wa muspiritu ushalijadina ni Nzamb. Mu rusangu riner mwikil chilejena anch kudi muntu mukwau wa kasatu wiminya piswimp ni Nzamb. Chikalap nchik usu usadilau wa kusot kutan mu Mifund maverse makasikeshidina malejan ma Usatu, Marie-Émile Boismard mwimpel wa mu chisak cha Dominique wafunda mu buku wend À l’aube du christianisme — La naissance des dogmes (Kwisambishil kwa Ukristu—Nsambishil ya Malejan), Paris, Cerf, 1998, paj wa 123 ulondil anch: “Ukutwishap watang pa ndond ap yimwing mu Testament Musu . . . mazu malondila anch kudi antu asatu mwi Nzamb umwing.”

Malejan matombay Constantin madinga mulong wa kupwish matend madinga mu Egliz mu chitot cha kanying. Pakwez, malangwisha kand chipul chikwau chinech: Ov, Mariy, mband wamuvala Yesu, wadinga “Makwend a Nzamb”?

Isikesh maverse manam madia mu Bibil: Mateu 26:39; Yohan 14:28; 1 Korint 15:27, 28; Kolosay 1:15, 16