Ringany Ra 6: nzamb Witiyijin Kusadil Akish Ni Yijingidij Mu Difukwil

Kwisu ku radiokala?

Cyclopedia of Biblical, Theological, and Ecclesiastical Literature, wafunday McClintock ni Strong, Volim wa 4, paj wa 503 ni 504 ulondil anch: “In Kristu a kusambish kadingap ni kusadil akish mu difukwil . . . Kwandam kwa chaku cha kusadil akish mu egliz mu chitot cha 4 ni cha 5 akuyingisha ku kan kusu anch mulong anch akat kwilej akutwish ilej uyakin wa Ukristu nawamp kusutil ku akish pa ndond kusadil malejan ni mikand.”

Bibil ulondil ik?

“Kangal wakasong mukish chirumbidij, ap chifu cha chom chidia mwiur, ap chidia panap pansh, ap mu mem kwishin kwa divu. Kangal wakayizengamin kurutu kway, ap kangal wakayisadil.” (Kubudik 20:4, 5, La Bible, wafunday Osty mukurump wa egliz) Kambuy Yohan wayifundina in Kristu adingaku mu mivu chitot ya kusambish anch: “An akemp, yibabelany akish.”—1 Yohan 5:21, La Sainte Bible, wafunday mwimpel Maredsous.

Ov, akish, mudi mulondila ma egliz, adi kwau yom ya kusadil mulong wa kumushejin ni kumulimish ufanikeshinau? The Encyclopedia of Religion ulondil anch: “Kwisambishil, akish adinga mudi yom ya kulejan nich ni yadinga mulong wa kuwapish kwau; mwamu mwadingau ni kulond mulong wa kwiyingish. Kukashimuk eza kusambish kuyifukwil. Mwamu chadinga pa mulong wa yijingidij yeza kwikal akish a usey nakash a in Ortodoks wa Kwingangel.” Pakwez, muprofet Isay wipula nawamp anch: “Ov, ukumufanakeshany Nzamb ni nany? Ov, mukish ik ukusalanya ufanikena nend?”—Isay 40:18, La Sainte Bible, wafunday Abbé Crampon.