“Antu Atentamina Akez Kazut Mudi Muten”
“Pakwez antu atentamina akez kazut mudi muten mu Want wa Tatukwau.”—MAT. 13:43, MN.
1. Ov, yisu milad kushalijan ya Want yasadidinay Yesu yishimu mulong wa kuyirumburil?
YESU KRISTU wasadila yilakej, ap yishimu yivud, mulong wa kurumburil milad kushalijan ya Want. Ndiy “wayileja yisak ya antu yom yiney yawonsu mu yishimu. Kayilejap chom wakad kuyitil yishimu.” (Mat. 13:34, MN) Mu chishimu cha kukus mbut ja uyakin ja Want, Yesu wakasikeshina piur pa mudimu ukweta mwikadil wa muchim wa muntu pateshinay dizu, ni mudimu usadinay Yehova wa kumukudish muntu muspiritu. (Marko 4:3-9, 26-29) Yesu wafanikesha kand kukul kukash kwa yisakin ya Want pinap pa divu ap anch kukul kwa mbut jinej kumekeningap kwinsambishil. (Mat. 13:31-33) Chikwau kand, ndiy walejana anch kadap mwawonsu uteshina rusangu ra Want ukutwisha kwandam mu Want winou.—Mat. 13:47-50.a
2. Mu chishimu cha Yesu cha tidiku ni yinfananfan, mbut jiwamp jirumburikin chom ik?
2 Pakwez, chimwing cha yishimu ya Yesu chisambidin pa kukumangan kwa antu akeza kuyikel nenday Yesu mu Want wend. Chinech achitazukin anch chishimu cha tidiku ni yifananfan chifundinau mu Mateu pa chipitre wa 13. Pakwez mu chishimu chikwau, Yesu utulejin anch mbut jikusinau didi “dizu dia want”, utulejin anch mbut jiwamp jirumburikin chom chikwau—“an a want.” (Mat. 13:19, 38) Inay kadap antu a mu Want pakwez, adi “an” ap answan a Want.—Rome 8:14-17; tang Galatia 4:6, 7.
Chishimu cha Tidiku ni Yinfananfan
3. Rumburil mulong wamushikena muntu wisambidinau mu chishimu ni mutapu wakwatay mupak mulong wa kupwish mulong winou.
3 Chishimu chawiy ech: “Want wa Mwiur ufanaken mudi chishimu ech. Muntu umwing wakusa mbut jiwamp mu chir chend. Padingau antu alel, mukankuny weza uchuku, wakus yinfananfan mu chir cha tidiku, chad waya kwend. Chakulay, tidiku wasambisha kubudish mitu, yinfananfan niyau yamekana. Atushalapol a muntu winou eza amulej anch: ‘Mwant, ey wakusa mbut jiwamp mu chir chey, ov, ing yinfananfan yadiokal kal kwisu?’ Ndiy wayakula anch: ‘Mukankuny nam, ndiy wasala kal yom yiney.’ Awiy amwipula anch; ‘Ov, ey usotil etu kuya katat tukayibwit yinfananfan?’ Ndiy wayakula anch: ‘Bwat, mulong piukubwitanya yinfananfan ap wez wakabwitilanyaku tidiku. Likany tidiku ni yinfananfan yikudila kwau pamwing djat ni pa chirung cha kwangul. Chawiy nikez kayilej in kwangul anch: Yang, ubwitany bil yinfananfan, uyikasany yit yit, uyoshany. Chad lel ukumangejany tidiku, umutekany mwi nkil yam.’”—Mat. 13:24-30, MN.
4. (a) Ov, muntu wisambidinau mu chishimu udi nany? (b) Ov, chisu ik chasambishay Yesu kukus mbut jinej ni mutapu ik?
4 Ov, muntu winou wakusa mbut jiwamp mu chir udi nany? Pa chisu chikwau Yesu wakula payirumbulilay in kwilej end anch: “Muntu wakusa mbut jiwamp, ndiy kamu Mwan a Muntu.” (Mat. 13:37, MN) Yesu, “Mwan a Muntu,” warijeka mu chir mulong wa kukus mu mivu yisatu ni chikunku mu mudimu wend wa kulejan pa divu. (Mat. 8:20; 25:31; 26:64) Chawiy lel kudiosh pa Pantekot mu muvu wa 33 C.C., ndiy wasambisha kukus mbut jiwamp—“an a want.” Kukus kwinoku kwasambisha chakin kamu chisu Yesu, chifanikesh cha Yehova, wasambisha kuyizizil in kwilej spiritu utumbila, pasalay mwamu wayizizidila many chakwel ikala an a Nzamb.b (Mid. 2:33) Mbut jiwamp jakula jikala tidiku uswila. Chawiy lel, mu kukus mbut jiwamp chitong chading cha kukumangesh uvud uwanyidina wa antu akeza kwikal answan ni anyikel pamwing ni Yesu mu Want wend.
5. Nany mukankuny wisambidinau mu chishimu, ni anany afanikeshinau nich yinfananfan?
5 Ov, mukankuny udi nany, ni anany afanikeshinau nich Yinfananfan? Yesu utulejin anch mukankuny “ndiy Sakudimban.” Yinfananfan ayifanikeshin nich “antu a sakudimban.” (Mat. 13:25, 38, 39, MN) Kukwatijan ni yikata kusadik, yinfananfan yisambidinay Yesu yadinga pamwing ap mbut jitazukiningau anch ivraie. Mbut jinej jikwet ulemb jifanikening nakash nich tidiku pa jichida jikemp kurutu kwa kwikal jiswila. kudi kufanikesh kwamushena mudi ik kwa in Kristu ilikejina, antu alondina anch adi an a Want pakwez kasonginap mabuj makin! In Kristu inay akad kumekesh chidiau alondina anch amulondwil Kristu adi chakin kamu chikunku cha “mbut” ja Satan Sakudimban.—Dis. 3:15.
6. Ov, chisu ik chasambisha kumekan yinfananfan, ni mutapu ik wadinga antu “alel” pa chisu chinicha?
6 Ov, chisu ik chasambisha in Kristu inay afanikena nich tidiku kwikalaku? Yesu ulondin anch: “Padingau antu alel.” (Mat. 13:25, MN) Chadinga Chisu ik? Tutanin chakul mu mazu ma kambuy Paul mayelay amakurump a ku Efes anch: “Nij anch pinikudiokalaku, antu adia mudi atwingol aswejina akez kandam mukach mwen, awiy kakez kayovilap amikoku a Nzamb riy, bwat. Mukach mwa chisak chen mukez kikal antu amwing akez kalond yom ya makasu, mulong wa kuyirumbul in kwitiyij chakwel ayikakil ku mutambu wau.” (Mid. 20:29, 30, MN) Ndiy wayibabesha amakurump inay chakwel achisha ku mes muspiritu. Pasambishau kufaol atwimbuy adinga ni “kukangesh” kubwambwil, in Kristu avud awa mu tul twa muspiritu. (Tang 2 Tesalonik 2:3, 6-8.) Chawiy lel kubwambwil kukash kwasambisha.
7. Ov, antu amwing afanikeshau nich tidiku akarumuka ikal yinfananfan? Rumburil.
7 Yesu kalondap anch tidiku ukwikal yinfananfan pakwez yinfananfan ayikusin pakach pa tidiku. Chawiy lel, chishimu chinech chifanikeshinap in Kristu akin akeza kuwa ni kulik uyakin. Pakwez, chilejen anch Satan usadil usu wa kuyipish chikumangen cha in Kristu kusutil ku kuyandjik antu ayimp mu chikumangen. Padingay Yohan ipal kambuy wa nsudiel, kubwambwil kwinoku kwading kumeken kamu patok.—2 Pita 2:1-3; 1 Yoh. 2:18.
“Likany . . . yikudila Kwau Pamwing Djat ni pa Chirung cha Kwangul”
8, 9. (a) Ov, mulong wak yany yapanay Mwant kudi atushalapol end yadinga ni malejan kudi in kumutesh Yesu? (b) Mukuwanyin kwa chishimu, ov, mutapu ik tidiku ni yinfananfan yakula pamwing?
8 Atushalapol a mwant amuleja mulong winou ni amwipul anch: “Ov, ey usotil etu kuya katat tukayibwit yinfananfan?” (Mat. 13:27, 28, MN) Chakul chend chikutwish kwikal chishimokishina. Ndiy wayilej anch afanyidin kulik tidiku ni yinfananfan yikudila pamwing djat ni pa chirung cha kwangul. Kuyinkish bil yiney kwadinga ni malejan kudi in kwilej a Yesu. Afanyidina kutongin pa mutapu chikasikeninga kwauril tidiku pakach pa yinfananfan. Antu ija nawamp kudim akutwish kujingunin anch mij ya yinfananfan yikwatijadining nich mij ya tidiku.c Chishimokishinap anch Mwant wayiyula anch achingel bil!
9 Chilik chimwing, mu mivu chitot yasutina, yisak kushalijan ya Kristendom yasonga mabuj majim nakash ma yinfananfan—makusambish mading pakach pa Katolik wa in Rome ni ma ekliz ma Ortodox ni kupwa pakach pa yisak yivud ya Mishon mapandakana kuvul. Pa chisu chinicha, mbut jikemp ja tidiku jakin ajikusa mu chir cha mangand. Mwin chikumbu wisambidinau mu chishimu wachingela chisu chakula djat ni pa chisu chiswimp cha kwangul chashika.
Chirung cha Kwangul Chatakelau Kulejan Pasak
10, 11. (a) Ov, Kwangul kwasambisha chisu ik? (b) Mutapu ik umwandjikinau tidiku wa muchifanikesh mwi nkil ja Yehova?
10 Yesu utulejin anch: “Chirung cha kwangul diawiy disudiel dia mangand, chad in kwangul awiy aruu a mwiur.” (Mat. 13:39, MN) Mu machuku ma nsudiel ma ditenchik dined diyimp, kwauril kukat kusadik—an a Want ayikumangejin ni kuyitek kulemp ni antu adia mudi yinfananfan. Pachinech, kambuy Pita utulejen anch: “Chisu chashik kal chikuyirumburishau antu kudi Nzamb, pakusambish ukuyirumburish antu a chikumbu chend, Chawiy anch waturumburish etu pakusambish, ov, disudiel dia antu akad kwitiyij Rusangu Ruwamp ra Nzamb dikwikal nchik?”—1 Pita 4:17, MN.
11 Mu chisu chikemp pasambisha machuku ma nsudiel, ap “disudiel dia mangand,” dirumburish dia antu ading ni kulond anch adi in Kristu akin—mulong wa kwijik anch adinga chakin kamu “an a want” ap “antu a sakudimban.” “Chakusambish” Babilon Mujim wawa, ni “kupwa” an a Want ayikumangeja pamwing kwinsambishin kwa chirung cha kwangul. (Mat. 13:30) Pakwez mutapu ik umwandjikinau katat tidiku wa muchifanikesh mwi nkil ya Yehova? Antu inay awonsu angulau ayandjikin kand mu chikumangen cha win Kristu chatenchikau, ndond jatambulau kwitiyik ni diking dia Nzamb, ap chiyukish cha mwiur.
12. Ov, dirumburish dikez kusal machuku minch?
12 Ov, dirumburish dikusadik mu machuku minch? Yesu wisambina kwangul mudi “chirung,” chawiy chikudandamedina mu uvud wa yisu kanang. (Kubur. 14:15, 16) Dirumburish dia yid ya azizidilau many didandamedin mu chisu cha nsudiel. Dikez kupwa djat ni pakelau kutek chijingidij pa jimpal jau.—Kubur. 7:1-4.
13. Mutapu ik yinfananfan yikata kuyisadish akwau yitil, ni mutapu ik ujipilau ayinau chijil?
13 Ov, anany akezau kudiosh mu Want, ni mutapu ik uyiwishinau antu ni kujip chijil? (Mat. 13:41) Amakurump a Kristendom adia mudi yinfananfan ayidimba mamiliyon ma antu mu yitot ya mivu. Ayidimbin antu kusutil malejan makad kumulimish Nzamb, “akata kuyisadish akwau yitil,” mudi mafundish ma dirumburish dia chikupu mu karung ka kasu ni mafundish makad kwovakan nawamp ma Usatu. Amakurump avud a chirelijon ayishila yisal yau chilakej chiyimp mulong wa urund wau wa masandj ni mangand ni yisu yimwing kusutil ku yaku yiyimp nakash ya masandj. (Yak. 4:4) Chikwau kand, Kristendom wasambishin kal kulikidil nakash masandj pakach pa yid yend. (Tang Juda 4.) Chikalap nchik yiney yawonsu, adandamedin kwimekesh mudi in kushinshaman ni amwovila Nzamb wom. Chidi cha musangar mudi ik pa kuyauril an a Want nich yibachikin ya antu inay adia mudi yinfananfan ni mafundish mau mayimp makata kuyisadish akwau yitil!
14. Mutapu ik antu adia mudi yinfananfan akat kudil ni kudia pa mazeu?
14 Mutapu ik antu adia mudi yinfananfan akat kudil ni kudia pa mazeu? (Mat. 13:42) “An a sakudimban” amen mar mulong “an a want” alejana patok mwikadil uyimp wa malejan ma antu inay adia mudi yinfananfan. Ovil kand ushon wa kukep kwa ukwash utambwilau kudi yid ya ma ekliz mau, mulong katwishinap kuyitakel atushalapol au.—Tang Isay 65:13, 14.
15. Ov, kuyosh antu afanikeshinau nich yinfananfan kurumburikin ik?
15 Kuyikumangej yinfananfan ni kuyosh nich kasu kurumburikin ik? (Mat. 13:40) Chinech chisambidin pa yikeza kuyishiken yinfananfan kwinsudiel. Ayijimbwil mu chifanikesh mu dijiy dia kasu dimekeshina anch kusheshik kwa nsudiel kuyichingedin. (Kubur. 20:14; 21:8) In Kristu imburijina, adia mudi yinfananfan, in makasu, akez kayidioshaku pa chisu cha “mar mayimp kupandakan.”—Mat. 24:21.
“Akez Kazut Mudi Muten”
16, 17. Ov, uprofet ik wabwakay Malaki piur pa tempel wa Nzamb, ni mutapu ik uwasambish kuwanyin?
16 Ov, antu adia mudi tidiku “akez kazut mudi muten” pa chisu ik? (Mat. 13:43) Piur pa kutokish tempel wa Nzamb, Malaki wabwaka uprofet anch: “‘[Mwant wakin, NW] ukimbilanya ukwez, ukukashimukany washik mu chikumbu cha [Yehova, NW]. Muruu ukatilanya en kuman, ukez kez kulejan manswik mam.’ ‘Ov, nany ukeza kapand pa dichuku dikushikay? Ov, nany ukeza kashal mwom pakumekanay ndiy? Ndiy ukez kikal mudi sabang wa usu ukash, ap mudi kasu kakata kushitwish utad. Ndiy ukez kayirumburish antwend mudi muntu ukata kushitwish utad wa argent mu kasu. Mudi mukata kushitwishay mwin kuchil utad wa argent ni wa or, mwamu kand mukez kayishitwishau in kupesh kudi muruu wa [Yehova, NW], chakwel awiy akez kamuletil [Yehova, NW] milambu ya mitapu yiwamp.’”—Mal. 3:1-3, MN.
17 Mu chirung chetu, uprofet winou wasambisha chakin kamu kuwanyin mu muvu wa 1918 pasambishau Yehova nenday “muruu . . . ukeza kulejan manswik,” Yesu Kristu, kusop tempel wa muspiritu. Malaki utulejin yikeza kushiken anch kutokish kwinoku kwapwa anch: “Chad antwam akez kaman kand kwaurik kwa yom yikeza kamekan kudi antu atentamina ni kudi antu ayimp, mwaning, kudi antu akata kwinsadil am ni antu akaad kwinsadil.” (Mal. 3:18, MN) Kupandakan mu mujikit kudi chikunku cha in Kristu akin atambula usu kumekeshin anch kwangul kwasambisha pa chisu chinicha.
18. Ov, uprofet ik wabwakay Daniel anch ukez kashiken pa chirung chetu?
18 Muprofef Daniel wisambina pa chirung chetu pasambelay kulond anch: “In kutakel akweta manangu akez kazut mudi chitokish cha diur. Niyau ayikarumuna antu avud kwikal atentamina akez kazut chikupu mudi atutumbu.” (Dan. 12:3, MN) Anany inay akeza kazut mudi chitokish? Mulong wak kadiap antu akwau chidi ching in Kristu azizidilau many, adia tidiku wakin wisambidinay Yesu mu chishimu chend cha tidiku ni yinfananfan! ‘Kuyidiosh’ in Kristu adia mudi yinfananfan kwamekana patok kusutil kupandakan kujimb kwa chisak chijim cha amikoku. Kusutil ku kwinung ayinau kudi atushal a Isarel wa muspiritu, inay akwikal yidi ya Want mu machuku ma kurutu ni el ambok azuta chitokish chau mu mangand makad chitokish.—Zak. 8:23; Mat. 5:14-16; Filip. 2:15.
19, 20. Ov, yik yichingedinau nakash “an a want,” ni yom ik tukeza kwisambin mu mutu wa mulong wambakedina?
19 Nlel unou, “an a want” achingedin nakash matapish mau ma katumb mwiur. (Rome 8:18, 19; 1 Kor. 15:53; Filip. 1:21-24) Kudiosh pa chisu chinicha, afanyidin kushal ashinshamena, kudandamen kuzut nakash, kushakam kulemp nau “an a sakudimban.” (Mat. 13:38; Kubur. 2:10) Tukutwish kwikal etu awonsu ni musangar mudi ik anch tukwet chisend cha kuman pa chirung chetu yibudikin ya ‘kuyidiosh’ kwa chifanikesh kwa yinfanafan!
20 Pakwez urund ik udia pakach pa an inay a Want ni chisak chidandamedina kujimb cha antu akweta ruchingej ra kushakam chikupu pa divu mudi antu akuyikelau kudi Want? Mutu wa mulong ulondwila ukwakul ku chipul chinech.
[Mazu madia kwishin kwa paj]
a Mulong wa kwijik kachom ni kachom piur pa yishimu yiney, tal Chinong cha Kalam cha Kafunfut 15, 2008, paj wa 12-21.
b Mu chishimu chinech, kukus kufanikeshinap mudimu wa kulejan ni kuyikadish in kwilej, kufanikeshin mudimu wikadishina antu asu ikala in Kristu azizidilau. Piur pa mbut jiwamp jikusinau mu chir, Yesu walonda anch: ‘Inay adi [pikil anch ‘akwikal’ bwat] an a want.’ Kukus kwisambidin kuyizizil many an inay a Want mu chir cha mangand.
c Mij ya yifananfan yikwatijadining nakash nich mij ya tidiku anch ayibwit kurutu kwa chirung cha kwangul tidiku ukushadik.—Tal buku Études pespicace des Écritures, Volime wa 1, paj wa 836.
Ov, Uvurikin?
Mu chishimu cha Yesu cha tidiku ni yinfananfan mazu minam marumburikin ik?
• Mbut jiwamp
• Muntu wakusa mbut
• Kukus mbut
• Mukankuny
• Yinfananfan
• Chisu cha Kwangul
• Mwi nkil
• Kudil ni kudia pa mazeu
• Kasu kakad kujimang
[Yipich yidia pa paj wa 25]
Pantekot wa muvu wa 33 C.C. wamekesha kusambish kwa Kukus mbut jiwamp
[Chipich chidia pa paj wa 28]
Tidiku wa mu chifanikesh amwandjikin katat mwi nkil ja Yehova
[Dizu Dirumburila]
Pictorial Archive (Near Eastern History) Est.