Anfungul A Musangar Mu Dijuku

Kushakam Nawamp ni Tatuwen ap Mawen

Jennya ulondin anch: Makwend a Ryan kadingap ni usany wa kwingel patok anch nimusangareshinap. Pakwez, Ryan ni ndiy wading wovil kuyip ang watanijan nau anvajam. Chakin kamu, nadinga kandikal niyimanap anvajam amusadil muntu ap umwing nayimp! Kuyendil anvajend ap anvajam kwading kutwakamishin nakash etwawonsu aad.

Ryan ulondin anch: Makwam wadinga ni kutong anch kwikil muntu ap umwing wadinga muwamp mulong wa anend, chawiy lel wasambisha kupwitijan ni Jenny kudiosh kwinsambishil. Anvaj a Jenny niyawiy ading apwitijadin nam—ading akat kwinlondol chisu chawonsu. Mulong wadinga mwamu, kupwa, kwa kupwitijan mudi kwinoku, Am nenday Jenny, muntu ni muntu wasambisha kwitek ku mutambu wa anvaj end ni kuyilondin nayimp anvaj a mukwau.

KUPWITIJAN ni tatuweney ap maweney kukutwish kumekan mudi maswimbu, pakwez anch kwikal kwa dichuku ni dichuku kukutwishap kusangareshan. Reena mband umwing wa mu Inde ulondin anch: “Mu mivu yivud, mawenam wading urishin ni uruw wetu, Yisu yivud, nading nikat kumupwishin nfumwam ujim mulong kinatwishap kuumekesh kudiay makwend. Chamekana anch ndiy wafanyidina dichuku ni dichuku kutond pakach pa kwikal ikundj muwamp ap kwikal mwan muwamp.”

Ov, mulong wak amawen ni atatuwen akat kwandamin mu mwom wa anau atena kal? Jenny, utwisambidina kwinsambishin, ulondin anch: “Pamwingap kakutwishap kwitiyij kuman muntu uchidia mwanikanch ni wakad manangu ikala nich chisend cha kumulam mwanau ikundj ap mwanau mband.” Dilip nfumwend a Reena, uletin diyingish dikwau anch: “Anvaj ipana mulong wa kumulam ni kumudish mwanau akutwish kwiyov mudi ayilikishin kumulam mwanau. Akutwish kwikal nich kashinsh ka kwakam anch mwanau ikundj ap mband uburedin manangu ma kuwapish nich uruw.”

Pakwez, yisu yivud amawen ni atatuwen ayitazukining chakwel iyandjika mu uruw. Chilakej, shinshikin yayishikena Michael nenday Leanne, ambay a uruw adinga mu Australie. Michael ulondin anch “Leanne udiokil mu kadijuku kakemp nakash mwadingau ni kwisambin yom patok, chawiy lel, pitwatijana, ndiy wasambisha kumwipul tatukwend piur pa mipak yafanyidinay ndiy ap am kukwat. Tatukwend wading ni manangu nakash ma kutukwash, nova kuyip mulong wading ni kumulondul pandond pa kwez kudi am!”

Chimeken patok anch, kupwitijan nau amawen ni atatuwen kukat kuletang mar mu uruw. Ov, chidi chakin kudi ey? Ov, mutapu ik ushakamina ni anvaj a mbay ney wa uruw, ni mutapu ik ushakaminay mbay ney wa uruw nau anvaj ey? Shinshikin milong yaad yikutwisha kulank ni yom ukutwisha kusal chakwel uyipwisha.

MULONG WA 1: Mbay ney umeken mudi winungin nakash kudi nvaj wend ap anvajend. Ikundj umwing wa mu Espagne upidilau anch Luis ulondin anch “Mukajam watonga anch ang tushakaminap piswimp ni anvajend, ukwambwil kudiau.” Uwejidinaku anch: “Kumutambu ukwau, pavadikay mwanetu, anvajam ading ni kutwendil dichuku ni dichuku, ni kumusha mukajam mu mar. Chinech chalangwisha kupwitijan kuvud pakach petu.”

Mitu ya mulong: Pisambidinay ditenchik dia uruw, Bibil ulondin anch chisu chimwing “ikundj ukez kadiokal kudi tatukwend ni makwend, ni kulamat kudi mukajend, chad awiy aad akwikal mujimbu umwing.” (Disambishil 2:24, MN) Kwikal “mujimbu umwing” kwitin yom yivud kupandakanamu kushakam kusu pamwing. Chirumburikin chakin kamu anch, ikundj ni mband asadin dijuku disu—didia pa ndond pa kusambish kupandakanamu majuku mau ma chivadikin. (1 Korint 11:3) Chawiy lel, ikundj ni mband aswiridin kuyilimish anvajau, ni yisu yivud afanyidin kuyitesh. (Efes 6:2) Chikwikal nchik anch mbay ney wa uruw uyilimishin anvajend ni kupwa wakudiul ey?

Chiukutwisha kusal: Shinshikin nawamp pa mwikadil winou. Ov, mbay ney wa uruw winungin chakin kamu, ap chitwishikin anch mulong kusu ey ukwetap urund wa mutapu winou ni anvajey? Anch chidi mwamu, mwikadil wa dijuku diey ukutwish kwikal nich yibudikin ik pa mutapu umena mulong winou? Ov, pamwing ap yeya umwovidila mukau?—Jinswir 14:30; 1 Korint 13:4; Galatia 5:26.

Chifanyidin kwishinshikin nawamp mulong wa kwakul ku yipul yiney. Pakwez chidi cha usey usala mwamu. Kupwa kwa yawonsu, anch yisadinay maweney ap tatuweney yawiy yilangwishina pakad kujing milong pakach peyey ni mbay ney wa uruw, chawiy lel chimeken anch ukwetany chakin kamu mulong mu uruw—udiap mulong wa mawen ap wa tatuwen.

Milong yivud yilankining mu uruw mulong ambay a uruw awonsu aad kakwetap chitongijok chimwing. Ov, ukutwish kuman yom mutapu muyichingejinay mbay ney wa uruw? (Filipoi 2:4; 4:5) Chawiy chasalay ikundj umwing wa mu Mexique upidilau anch Adrian. Ndiy ulondin anch: “Mukajam wapamina mu dijuku diadinga ni yibudikin yiyimp pa yovil yend, chawiy lel nalika kuta urund ni anvajend. Chawiy lel, nalika kuta urund nau—mivu yivud. Chinech chalangwisha kupwitijan mu uruw wetu mulong mukajam wasota kwinung ni anvajend, winunga nakash ni makwend.”

Pikwasuta machuku, Adrian wasambisha kutongin nawamp pa mwikadil winou. Ndiy ulondin anch: “Ap anch nij anch kutanijan dichuku ni dichuku ni anvajend kwading ni yibudikin yiyimp pa yovil ya mukajam, urund ni anvajend ukutwishap kulet milong, yisu yivud, napakisha kuwapish ni kulam urund uwamp ni anvaj a mukajam.”b

PAKISH KUSAL MWAMU: Ey ni mukajey fundany yiutonginanya pa ndond pa kusambish piur pa anvajen. Anch chitwishikin, sambishany mwamu “Nitongin anch . . .” Kupwa swimpijanany ma papel. Pamwing, nich muchim wa kusal pamwing, ovijanany nawamp pa mutapu ukutwishanya kulejan yovil ya umwing ni mukwau.

MULONG WA 2: Atatuwen ni amawen iyandjikin chisu ni chisu mu uruw wen, ni kulet yiyul yawakadany en kwit. Mband umwing wa mu Kazakhstan upidilau anch Nelya ulondin anch: “Mu mivu sambwad yakusambish ya uruw wetu pitwashakama kudi anvaj a nfumwam, kupwitijan kwadandamena kulank piur pa mutapu twafanyidina kulil an etu ni pa milong yikwau yivud mudi kwisuk ni kwowish. Pinadinga nimulejina nfumwam ni mawenam pa milong yiniya, kupwitijan kwadandamena kulank!”

Mitu ya mulong: Anch watijanany, udianyap kand pa wintakel wa anvajen. Pakwez, Bibil ulondin anch: “Kristu ndiy Mwant wa muntu mwawonsu, chad ikundj ndiy mwant wa mband”—mfumwend. (1 Korint 11:3) Chawiy lel, mudi mutwisambidina kwinsambishin, ikundj ni mband afanyidin kuyilimish anvajau. Chad, Jinswir 23:22 utulejin anch: “Mutesha tatukwey wakuvala, kangal wamupipej makwey wikadila kal ipal.” Ov, chikwikal nchik anch anvajey—ap anvaj a mbay ney wa uruw—uvuramen anch ikundj ndiya mwant ni asambish kupakish kulet yitongijok yau?

Chiukutwisha kusal: Nich muchim wa riy, pakish kujingunin chom ik chiyibachikina anvaj kwiyandjik mu uruw wen. Ryan utwajimbulang kwinsambishin ulondin anch: “Yisu yivud anvaj asotining kwijik anch achidi ni usey mu mwom wa anau.” Kwiyandjik kwa anvaj kukutwish kwikal kwakad kwisotin ni chitwishikin kupwish mulong winou mukusadil chiyul cha Bibil chilejena anch “kwashijanany akasikena ni aziyina, anch muntu ukwet mulong ni mukwau chifanyidin kulikishijadin umwing ni mukwau.” (Kolosai 3:13) Chikwikal nchik anch kwiyandjik kwa anvaj en kwikal kukash ni kwalangwish kupwitijan pakach pey ni mbay ney wa uruw?

Ambay amwing a uruw ileja kwitekin mimbu yifanyidina pakach pau ni anvajau. Chinench chirumburikinap anch udjibwil kulemp chijil chau.c Yisu yivud, chifanyidin kumekesh patok kusutil yisal yey anch mbay ney wa uruw udi pa ndond pa kusambish mu mwom wey. Chilakej ikundj umwing wa ku Japon upidilau anch Masayuki ulondin anch: “Ap anch anvaj alet yitongijok yau, kangal walond kapamp kamwing anch uyitiyijin. Vurik anch, utungin dijuku dimwing disu. Chawiy lel, jingunin mutapu uteshinay mbay ney wa uruw chiyul chinech.”

PAKISH KUSAL MWAMU: Isambina pamwing ni mbay ney wa uruw piur pa mutapu kwiyandjik kwa anvaj mu uruw wey kulangwishina kupwitijan. Fundany pamwing mipak yiukutwishanya kutek ni mutapu wa kuyilam ni kudandamen kuyilimish anvajen.

Chitwishikin kupwish kupwitijan kuvud nau amawen ap atatuwen kusutil ku kwijik nawamp yibachikin yau ni kulik kulikidil kupwitijan kwinoku kulangwisha matend pakach pey ni mbay ney wa uruw. Pa chinech, Jenny ulondin anch: “Yisu yivud minsamb pakach pa nfumwam ni am piur pa anvajetu yading yimedina pa yovil, ni chading chimeken anch chovishen ku muchim fu anch muntu wisambin pa kuburen kuwanyin kwa nvaj a mukwau. Katat, twilejin kal kulik kusadil kuburen kuwanyin kwa amawen ap atatuwen mulong wa kumwel mukwau pakwez tukimbining mutapu wa kupwish mulong. Mudi chibudikin, twikala nich urund wa piswimp nakash ikundj ni mband.”

[Mazu madia kwishin kwa paj]

IYIPULA AMWINEY . . .

▪ Ov, Mikadil ik yiwamp yikwetau anvaj a mukajam?

▪ Ov, mutapu ik nikutwisha kuyilimish anvajam pakad kumudiul mbay nam wa uruw?