Chirumburikina Kwijik Dijin dia Nzamb

OV, DIJIN diey dikwet kurumburik kwa pakampwil? Mu jindond jimwing pa mangand, chiding chaku cha kumwinkish mwan dijin dirumburikina nakash. Dijin ditondinau dikutwish kumekesh yitiyij ya anvaj ni yijil ap yichingejinau ap kutongin piur pa dikez dia mwanau.

Chisal cha kupan majin makweta kurumburik kujim chidiap cha katat. Pa chirung cha Bibil, adinga yisu yivud ni kumupil muntu dijin mulong wa kurumburik kudikweta. Majin makutwish kulejan chaku ap yisal yimuchingejidinau muntu kuwanyish. Chilakej, pamulejau David kudi Yehova piur pa mudimu ukezay kusal mwanend Salomon mu machuku ma kurutu, Walonda anch: “Dijin diend ukez kikal Salomon [dirumburikina “Chisambu”] chad nikez kalet chisambu ni kunenet kudi in Isarel mu machuku ma mwom wend.”—1 Jinsangu 22:9.

Yisu yimwing Yehova wading ni kumupil dijin disu muntu wadinga ufanyidina kusal mudimu kanang usu. Wamupila mukajend a Aburaham wadinga mumb dijin dia Sara, dirumburikina “Mwan a Mwant.” Mulong wak? Yehovah urumburil anch: “Am nikez kamuyukish, chikwau kand nikez kakwinkish ey mwan ikundj kwi ndiy. Nikez kamuyukish ndiy, ukez kwikal maku wa majuku mavud, ni ant a michid akez kadiok kwi ndiy.” (Disambishil 17:16, MN) Chakin kamu, kutesh mulong wak Sara watambula dijin disu kukutwish kurumburik kutesh mudimu wend usu.

Chikwikal nchik piur pa dijin Yehova— dipandakenamu majim mawonsu usey? Dirumburikin ik? Pa chisu chamwipulau Nzamb kudi Moses piur pa dijin diend, Yehova wamwakula anch: “Am nidi mudi nidia.” (Kubudik 3:14, MN) Dikarumun dia Rotherham dikarumwin anch: “Am nikwikal mutapu wawonsu nisotila.” Dijin dia Yehova dimekeshin anch udi Nzamb wizwila nich midimu yivud. Tusadila chilakej chiswapela: Maku umwing ukutwish kwikal nich midimu yivud ya kusal dichuku ni dichuku mu kuwanyish maswir ma anend—mudi mwin kuyilam, kwisuk, mudi mulej—kulondwish maswir mamekena. Chilik chimwing ni Yehova, ap anch udi pa ndond ya piur nakash. Mu kutenchik chakwel kuwanyish ntong jend ja rukat mulong wa antu, ukutwish kwikal mutapu wawonsu usotilay, kuwanyish mudimu wawonsu uswiridikina. Chawiy lel kumwijik Yehova pa dijin kurumburikin kutesh ni kusanger midimu yend yivud.

Cha ushon, mulong ufun wa untu wa Nzamb udi ujingamena pantaliken ni antu akad kumwijik pa dijin diend. Pakwez, kusutil ku kwilej Bibil, ukutwish kusanger mudimu wa Yehova mudi mwin Chiyul mwin manangu, Mupandish mwin dikand, ni mwin Kupan ukweta muchim wa kupan, ku dijin didia kusu diswimp. Chakin, kurumburik kwa usey kwa dijin dia Yehova kushimokishen.

Pakwez, kumwijik Nzamb pa dijin kudingap chisu chawonsu kuswapela. Mutu wa mulong wambakedinap ukulejan mulong wak.