Yipul Ya In Kutang . . .

Ov, Nzamb ukwet disambishil?

▪ Bibil wakwil anch Nzamb kakwetap disambishil. Nzamb udingaku. Mulong chitongijok cha mwom wa chikupu wa Nzamb chikasiken kuchitesh nawamp, tukutwishap kulik kuchitiyij anch mulong tukutwishap kuchitesh nawamp.

Ov, chidi cha manangu anch twachingejin kwijik yom yawonsu piur pa Nzamb? Kambuy Paul walonda anch: “A, kujimb kwa rupit ni chiyul ni ronganyin ra Nzamb! Dirumburish diend diakad kwijikan ni jinjil jend jakad kurumburik kudi antu!” (Rom 11:33) Manangu metu makutwishap ap kapamp kamwing kwijik nawamp kujimb kwa manangu ma Nzamb ni ronganyin mudi kamu mutapu wakad mwanikanch kutwish kwijik yom yawonsu piur pa nvaj. Mazu minam mapepidilau ma Paul, ap anch malejen cha kusambish anch manangu ni riy ra Nzamb yidi ya pakampwil, malejen kand anch kudi mitambu kanang ya Yehova Nzamb ni midimu yend yidia yijim nakash chakwel manangu metu mayitesha. Chitongijok chakwel anch Nzamb kakwetap disambishil chidi pakach pa mitambu yend yijim nakash. Chikwau kand tukutwish kuchingejin nakash mu yom yifundishinay Bibil piur pa Nzamb. Yesu Kristu walonda piur pa mifund yitumbila anch: “Dizu diey diawiy uyakin.”—Yohan 17:17, MN.

Moses walonda mu malembil mend kudi Yehova anch: “Kudiokal chikupu ni chikupu, ey uding kwey Nzamb.” (Kuseng 90:2, MN) Pinap Moses urumburil kwikalaku kwa Nzamb mudi kuyila mu jinjil jaad. Kumwing kudi mwi njil ya dikez. Yehova “ndiy ukweta mwom wa chikupu ni chikupu.” (Kujingunik 4:10) Chawiy lel, kwikalaku kwa Nzamb kuyil kurutu mu dikez dia chikupu. Kukwau kuchirikin mwi njil ya pasak. Mu mutapu ukwau, Nzamb kamutangap ni kadingap nich disambishil. Chawiy lel, kwikalaku kwa Nzamb kuchirikin mwi njil ya pasak yakad nsambishil.

Yitongijok ya yom yakad kumekan yikasikening kuyitesh kudi antu avud pakach petu. Pakwez, yisu yimwing tuswiridining kwitiyij yitongijok kanang yikasikena kutesh, mudi uvud upandakena ni ukemp. Kuchind uvud kukutwish kudandamen kuya kurutu, ap kuchirik kwinyim. Ov, tukutwishap kusadil chilakej chinech pantaliken nich mivu mu mwom wa Sakatang?

Chawiy lel, chifanyidin anch Nzamb amwinend kusu ikala nich chijiken cha pakampwil cha “Mwant wa chikupu.” (1 Timote 1:17, MN) Tong bil: Yesu Kristu, tutikit ni tutikit twa angel mwiur, ni antu pa mangand awonsu akwet nsambishil mulong ayitanga. (Kolosay 1:15, 16) Chidiap mwamu pantaliken ni Nzamb. Kudandamen kulond anch Nzamb amutanga kuletin chitongijok chakad manangu piur pa nany wamutanga Sakatang. Bwat kwau. Yehova amwinend uding kwend Nzamb “kudiokal chikupu ni chikupu.” (Kuseng 90:2, MN) Mu mutapu ukwau wa kulond, Yehova wadingaku “kurutu kwa mivu ni minang ni katat, ni chikupu.”—Jud 25, MN.

Ap mwamu, lam mu manangu anch, chitongijok cha kwikalaku kwa chikupu kwa Nzamb chidiap kusu chitongijok cha mwamu. Kushinshikin nawamp malembil ma Moses kumekeshin anch kwikalaku kwa chikupu kwa Nzamb kutwinkishin kashinsh piur pa kushilamu kwa rukat kwa mwom wa chikupu. Chinyim ni wiswimp wa mwom wetu wa katat, Nzamb amumekeshin mudi “ndond yetu ya kushakam ya machuku mawonsu.” Chidiay Tatuku mwin rukat, Yehova wikalaku kal, udiaku, ni ukwikalaku chisu chawonsu mulong wa antu end. Ukutwish kutambul amboku rongoj mudi ik mu uyakin winou upandakena kuwap!—Kuseng 90:1.