Ov, Nany Ukutwisha Kuyikamunin Antu Itina Ukwash?

“A Nzamb, mwinkisha mwant marumburish mey . . . Mulong ukumukamunin chimana mar pakudilay.”—KUS. 72:1, 12.

1. Ov, Chom ik twilejina piur pa riy ra Nzamb, kwambatan ni yamushikena David?

MAZU minam mafundau kudi Mwant David wa Isarel wa pasak makasikeshin mudi ik! Mu mivu yivud kurutu kwa kufund mazu minam, ndiy wova ushon kupwa kwa kusal masandj ni Batisheba. Pa chisu chinicha, David wamudidila Nzamb anch: “Mudi mudia miril ya mariy mey njimangeshila kubwambul kwam. . . . Yitil yam yidi kurutu kwam. . . . Tal, navadikina mu jinshid, makwam wangimishila mu yitil.” (Kus. 51:1-5) Nich riy, Yehova umening mwikadil wetu wa ukayitil utwaswana.

2. Ov, Kuseng 72 utukwashin mutapu ik?

² Yehova wij nawamp mwikadil wetu wa mar. Pakwez mudi mwatakelay kulejan, Mwant wazizilau many kudi Nzamb “ukumukamunin chimana mar pakudilay, ni kazwasu wakad mwin kumukwash. Ukwov riy kudi atuzwazu ni ayimana mar, ni kukamunin mupim wa ayimana mar.” (Kus. 72:12, 13) Ov, mutapu ik ukezau kupwish mar? Kuseng 72 utulejin. Yafundau piur pa want wa Salomon mwanend a David, muminy winou walejana yom yikeza kushiken mu machuku ma kurutu piur pa mutapu ukeza want wa Yesu Kristu Mwan a Nzamb kupwish mar ma antu.

Chasabela Kumekesh Winyikel wa Kristu

3. Ov, chom ik chitay Salomon, ni chom ik chamwinkishau kudi Nzamb?

³ Kupwa kwa kumushikij Salomon ku kwikal Mwant, ipal David wamwinkisha yany ya pakampwil yafanyidinay Salomon kulam nich kushinshaman. (1 Ant 1:32-35; 2:1-3) Kupwa Yehova wamekana kuday Salomon mu chilat ni wamulejan anch: “It chiukatila chakwel nikwinkishach.” Salomon wamwita chom chimwing kusu: “Mwinkisha kashalapol wey muchim wa manangu wa kwijik chakwel nikutwish kuyirumburish antwey, chikwau kand nikutwish kwauril kuwamp ni kuyip.” Mudi chibudikin cha kwit kwikepish kwa Salomon, Nzamb wamwinkisha chamwitay ni yom yikwau yivud.—1 Ant 3:5, 9-13.

4. Ov, mutapu ik walejanau piur pa winyikel wa Salomon kudi mwant mukwau watakela pa chisu chinicha?

⁴ Chiyukish cha Yehova, chasala anch wintakel wa Salomon wikala ni mivu yivud ya chisambu ni mapit mavud makad kwikalaku mu winyikel ap umwing watakela pa divu. (1 Ant 4:25) Pakach pa antu eza kuman mutapu wadinga wintakel wa Salomon kwading Mwant mband wa ku Seba, pamwing ni antu avud adinga amuyingumukina. Ndiy wamuleja Salomon anch: “Yom yawonsu yinatesha mwingand yam . . . Yading yakin. Anlejin kusu chikunku cha rusangu rey. Manangu mey ni dipit diey yipandaken katumb kinatesha kal.” (1 Ant 10:1, 6, 7) Mwaning, Yesu wamekesha manangu mapandakenamu kujimb, chawiy chasala ikala ni diyingish dia kulong piur pa amwinend anch: “Pinap padi chom chijim chimupandakenamu Mwant Salomon!”—Mat. 12:42, MN.

Kumunin mu Winyikel wa Salomon Mujim

5. Ov, chom ik chimekeshinau mu Kuseng 72, ni chom ik chasambelau kulejan mu Kuseng winou?

⁵ Shinshikinany katat yom yalejanau mu Kuseng 72 nich chitongijok cha kwilej piur pa yiyukish yikeza kushiken mu winyikel wa Yesu Kristu, Salomon Mujim. (Tang Kuseng 72:1-4.) Kuseng winou ulejen yovil ya Yehova piur pa “ukeza katutakel” Mwanend, “Mwant wa Chisambu,” Yesu Kristu. (Isay 9:6, 7) Mu umutakel wa Nzamb, Salomon Mujim ukez ‘kayilondin atuzwazu ni kuyikamunin an a ayimana mar.’ Winyikel wend ukez kwikal wa chisambu ni utentamina. Padingay Yesu pa divu, ndiy wasambela kumekesh yom yikeza kusadik mu Mivu Kanan ya Winyikel.—Kuj. 20:4.

6. Ov, chom ik chasambelay Yesu kumekesh piur pa yiyukish mu winyikel wa Want?

⁶ Shinshikinany mijikit yimwing ya Yesu Kristu yisambedila kutulej yom yikezay kuyisadil antu pa chisu chikeza kuwanyin Kuseng 72. Tukwet komb diyingish dia kwikal abachikinau nich riy rend rikash pantaliken ni ayimana mar. (Mat. 9:35, 36; 15:29-31) Chilakej, muntu wadinga uyedila musong wa mak wa mushejina Yesu ni kumulembijek anch: “Anch ey ukatil, ukutwish kwingok.” Yesu wamwakula anch: “Nikatil kukok, chawiy katat yerik!” Ni muntu wayerika! (Mar. 1:40-42, MN) Kupwa, Yesu wasankana mwadiamufu wafisha mwanend kusu umwing. Yesu “Wamwovila riy,” chawiy chalonday anch:, “Lank!” ni mwanend walanka. Ndiy wading kand mwom!—Luka 7:11-15, MN.

7, 8. Ov, yom ik yimwing yamekesha usu wa Yesu wa kwokan?

⁷ Yehova wamwinkisha Yesu usu wa kusal yilay. Chinech chamekana pantaliken ni “mband ukweta musong wa rulong ra mash mivu dikum ni yaad.” Ap anch “ndiy wamana mar nakash pamwokangau kudi amingang avud. Washesha yom yend yawonsu ya kwetingay,” pakwez musong wapandakana lel nakash. Mband winou wandama mu runtu ni wamukwata Yesu—chading kujiril kwa Chijil piur pa ‘kupwek kwa mash.’ (Lev. 15:19, 25) Pwovay Yesu anch usu wadiokal kal ndiy wipula anch nany wamukwata kal. Mband “weza ni kuzal, . . . was manungun ku mend yend, wamulej yom yawonsu patok.” Pamanay anch Yehova wamwoka mband winou, Yesu wamusadila uwamp ni kumwel anch: “Mwanam mband, ey wayerik kal mulong wa ritiy rey. Yang kwey nich chisambu, musong wey wapwa kal kamu chikupu.”—Mar. 5:25-27, 30, 33, 34, MN.

⁸ Usu wa kwokan wamwikishau Yesu kudi Nzamb woka ayej pakwez wafanyidina kwikal kand nich usu ukash pa antu imena ni mes mau. Chawiy lel, antu avud akashimuka chakin kamu pamumanau Yesu ukat kuyok antu kurutu kwa Mafundish mend mamushena ma pa Mukandu. (Luka 6:17-19) Patumay Yohan Mubatish aruu aad chakwel ijika anch Yesu wadinga chakin kamu Mesia, awiy amutana ukat ‘kwok antu avud akweta misong ya mitapu ni mitapu, udioshin kand ayilembil ni kuyok amputames avud.’ Yesu wayileja antu inay aad anch: “Yangany ukamulejany Yohan yiwamenanya ni yiwateshinanya. Amputames akat kuman, ayilim akat kwend, in musong wa mak akat kuyerik, atujika matu akat kutesh, afu akat kuvumbuk ikala kand aom, ni rusangu ruwamp akat kurilejan kudi atuzwendj.” (Luka 7:19-22, MN) Uruu winou wafanyidina chakin kamu kumukasikesh Yohan!

9. Ov, yilay ya Yesu yasambela kulejan chom ik?

⁹ Chakin, kamunin antu kudiokal ku mar kwasalay Yesu padingay mu mudimu wend wa kulejan pa divu kwading kwa chisu chikemp. Antu okay ap avumbulay afa kand. Chikwau kand, yilay yasalay Yesu pa divu yasambela kulejan kukamunin kwa nsudiel kukezau kusanger antu mu winyikel wend wa Umesia.

Divu Diawonsu Dikwikal Paradis!

10, 11. (a) Ov, yiyukish ya Want yikez kasal mivu yinch, ni wintakel wa Yesu ukez kwikal nchik? (b) Ov, nany ukeza kwikal pamwing ni Kristu mu Paradis, ni mutapu ik ukutwishay kushakam chikupu?

¹⁰ Pakish bil kutongijokin pa mutapu ukeza kwikal mwom mu Paradis pa divu. (Tang Kuseng 72:5-9.) In kumwifukwil Nzamb umwing kusu wakin akez kasanger mwom mu Paradis mudi uvud wa mivu ya muten ni ngond—Chikupu kamu! Mwant Yesu Kristu ukez kwikal mwin kukasikesh, ‘mudi ruvul ukata kunakin pakatwilau kal masuku ni mudi ruvul ukata kutalesh divu.’

¹¹ Piutongina piur pa kuwanyin kwa kuseng winou, ov muchim wey kaubachikinap kudi ruchingej ra kushakam chikupu pa divu dikwikal paradis? Muntu muyimp wapampau pa mutond wasangara chakin kamu pamulejau kudi Yesu anch: “Ukwikal ni yamam mu Paradis.” (Luka 23:43) Mu Mivu Kanan ya Winyikel wa Yesu, muntu winou akez kumuvumbul chakwel ikal mwom. Anch waziyil ku winyikel wa Kristu, ndiy ukez kushakam chikupu pa divu nich ukash wa mujimbu uwanyidina ni musangar.

12. Ov, chisu ik chikezau kuyinkish antu akad kutentam akeza kuvumbuk mu mivu Kanan ya Wintakel wa Kristu?

¹² Mu wintakel wa Salomon Mujim, Yesu Kristu, “kutentam [kukez] kuvulijan,” kupandakan ap kuya kurutu. (Kus. 72:7, MN) Rukat rudimukina ni kubangin kwa Kristu yikez kupandikan, mudi mu yasadika padingay pa divu. Mu mangand masu ma kushilamu ma Nzamb, ap antu ‘akad kutentam’ akeza kavumbuk akuyinkish nich rukat chisu cha kwilej yany ya Yehova ni ikala aom. (Mid. 24:15) Pakwez, antu akeza kulik kusal yom kwambatan nich yitinay Nzamb akezap kuyilikidil adandamena kushakam ni kuyipish chisambu ni mwikadil wa zoong mu mangand masu.

13. Ov, mutapu ik ukeza kujimb winyikel wa Want, ni mulong wak chisambu chend kakezap kuchishesh?

¹³ Kujimb kwa wintakel wa Salomon Mujim pa mangand mawonsu aulejen mu mazu minam anch: “Ndiy ukez kayikel kudiokal ku karung umwing djat ni karung mukwau, ni kudiokal wit wa Eferata djat ni kwinsudiel kwa ngand. Antu ashicha mwimpay akez kamuzengamin, ni akankuny nend akez kawil ku mend yend.” (Kus. 72:8, 9, MN) Mwaning, Yesu Kristu ukez kuyikel pa divu diawonsu. (Zak. 9:9, 10) Antu asangaredina winyikel ni yiyukish yend akez “kamuzengamin” mu kuziyil kwa kwisotil. Ku mutambu ukwau, akayitil akad kukarumuk akez kayijip, ap anch ashiken mu kuwanyish “mivu chitot.” (Isay 65:20) “Akez kawil ku mend yend.”

Ukat Kutwovil Riy

14, 15. Ov, mutapu ik twija anch Yesu wij nawamp yovil ya antu ni “ukumukamunin chimana mar pakudilay”?

¹⁴ Antu akayitil adi mu mwikadil umwing wa riy nakash, ashadishin kal kand ni ruchingej ra kwel anch akuyikwash. Pakwez etu tukwet ruchingej. (Tang Kuseng 72:12-14.) Yesu, Salomon Mujim, utwanakedin mulong wij nawamp mwikadil wetu wakad kuwanyin. Chikwau kand, Yesu wamana mar mulong wa kutentam, ni Nzamb wamulikidila chakwel yoziu yimushikena. Chawiy lel, Yesu wanenganana nakash ni “masuril mamubudika mudi manas ma mash, mawila pansh”! (Luka 22:44, MN) Kupwa pa mutond wa mar ndiy wabarika nich dizu dikash anch: “Nzamb wam, Nzamb wam, ov mulong wak wanlika am?” (Mat. 27:45, 46, MM) Chikalap nchik mar mawonsu mamanay, ap anch Satan wasala usu wend wawonsu chakwel amudiosha ku mutambu wa Yehova, Yesu wamekesha kushinshaman kwend kudi Yehova Nzamb.

¹⁵ Tukutwish kwikal nich kashinsh anch Yesu umen mar metu ni “ukumukamunin chimana mar pakudilay, ni kazwasu wakad mwin kumukwash.” Nich riy ni rukat rudimukina mudi Tatukwend, Yesu ukez ‘kuyitesh atuzwendj’ ni ukez ‘kuyok abukukina mu muchim, ni kukas yitat yau.’ (Kus. 69:33; 147:3) Yesu ukutwish “kutwovil riy mu kuziy kwa michim yetu, mulong ndiy watondilau kumwoz mu yawonsu mudi mutudia etu.” (Heb. 4:15) Chidi chom chiwamp mudi ik pa kwijik anch Mwant Yesu Kristu uyikedil katat mwiur ni ukwet musangar wa kupwish mar ma antu!

16. Ov, mulong wak Salomon watwisha kuyovil antwend riy?

¹⁶ Mulong wading ni manangu ni ronganyin, Salomon wading chakin kamu “ukat kumwovil chimanamar riy.” Chikwau kand, ndiy wamana yom ya ushon ni yikash mu mwom wend. Mwanamakwend Amunon wamukwata mpanyend Tamar ku usu ni walal nend, ni Abisalom mwanamakwend a Salomon wamujipa Amunon mulong wa chisal chinech chiyimp. (2 Sam. 13:1, 14, 28, 29) Abisalom wakimba kusend want wa David, pakwez wakanganya, ni amujipa kudi Jowab. (2 Sam. 15:10, 14; 18:9, 14) Dichuku dikwau kand, Adonija mwanamakwend a Salomon wapakisha kusend want. Anch watwisha, ing Salomon wela chakin kamu kufa. (1 Ant 1:5) Chitongijok chakwel anch Salomon wading ukat kutesh nawamp mar ma antu chimeken patok mu yalonday mu malembil mend pa chisu cha kufungul kwa tempel wa Yehova. Pa milong yiney mwant walembila anch: “Ni kunenganan muntu ni muntu mulong wa kuyip kwa muchim wend . . . Ey [Jehovah] ushicha mwiur . . . Mulikishina ni kusal kudi muntu ni muntu mudi mudia yaku ya muchim wend.”—2 Jsng. 6:29, 30.

17, 18. Ov, mar ik mamwing marishinau nich atushalapol a Nzamb, ni chom ik chayikwasha kusal mwamu?

¹⁷ ‘Mar metu ayinetu’ makutwish kudiokil ku yibudikin ya yom yashikena pasak. Mariy,a Kaman wa Yehova pawanyishay mivu 30 wafunda anch: “Nikwet mayingish mavud ma kwikal ni musangar, pakwez yisu yivud, yom nasala pasak yinyovishin usany ni kuyip. Nikat kushiken kukwov ushon nakash, ni kushiken ku kudil, mudi yom yiney yawonsu yashikenang nangalosh. Manangu malamina kal yom madandamedin kupudish ni katat yovil yikash ya kuburen usey ni ya kwifish nich.”

¹⁸ Atushalapol a Nzamb avud akutwish kujingunin yovil yiney, pakwez chom ik chikutwisha kuyikwash chakwel ikala ni usu wa kujijaman? Mariy ulondin anch: “Arund akashinsh ni dijuku dia muspiritu anletidin katat musangar, chikwau kand nipakishina kushinshikin pa kushilamu kwa Yehova kwa machuku ma kurutu, ni kwikal nich ruchingej anch kudil kwam mulong wa kwit ukwash kukwez kukarumuk kwikal dizu dia musangar.” (Kus. 126:5) Tufanyidin kumuchingejin Mwan a Nzamb, Ntakel watekay kudi ndiy. Atakela kulejan mulong wend anch: “Ukat kumwovil chimanamar riy, ni uburedina kand. Ukat kuyipandish atuzwendj. Ukat kuyikwol kukuzengol ni ku chisum. Mom yau yikwet usey kudi ndiy.” (Kus. 72:13, 14, MN) Chidi chom chikasikeshina mud ik!

Mangand Masu Mizwila Yakudia Sens Matuchingedil

19, 20. (a) Mudi mwalejanau mu Kuseng 72, ov, milong ik yikezau kupwish mu winyikel wa Want? (b) Ov, nany ufanyidina chakusambish kushiman mulong wa winyikel wa Kristu, ni mutapu ik wiyovila piur pa yom yikeza kuwanyin?

¹⁹ Pakish kand kutongijokin pa machuku ma kurutu ma antu atentamina mu winyikel wa Salomon Mujim. Atwinkishin kushilamu anch: “Kukwikal mbut jivud mwingand, ni mitu ya mbut yikazengamin mu yir.” (Kus. 72:16) Mulong mbut jikatap kusong pa mitu ya mikandu, mazu minam malejen mutapu divu dikeza kusongish nakash. Dikez kusongish mudi “pa mukandu wa Lebanon,” ngand yadinga ni kusongish nakash pa chisu cha winyikel wa Salomon. Tong bil! Kwikil tumungun, kuburen yakudia, kwikil muntu udila nayimp! Chawiy lel antu awonsu akez kusanger “musambu . . . wa yakudia yital.”—Isay 25:6-8; 35:1, 2.

²⁰ Ov, kudi nany kukezau kupan kushiman mulong wa yiyukish yawonsu yiney? Chakusambish akez kumushiman Mwant wa Chikupu ni Nyikel wa Mangand Mawonsu, Yehova Nzamb. Chawiy lel, etwawonsu tukez kuwejaku ni musangar mazu metu ku mazu mansudiel ma chikunku cha muminy winou uwamp nakash ni ukwachikina ku muchim anch: “Dijin diend [dia Mwant Yesu Kristu] dikashakam chikupu, katumb kend kakushakam mudi mukashakama muten, antu akez kayukil mwin ndiy, michid yawonsu yikez kamujimbul anch: uyukila! Mwant Nzamb uyukila! Mwant Nzamb wa Isarel ndiy kusu ukata kusal yikwamushena! Adiyukisha bil dijin diend dia uyaj chikupu, ni divu diawonsu dizula sens ni uyaj wend! Amen ni Amen.”—Kus. 72:17-19.

[Dizu didia kwishin kwa paj]

Ov, Ukwakul Nchik?

• Ov, Kuseng 72, wasambela kulejan mu uprofet ik?

• Ov, nany udia Salomon Mujim, ni mutapu ik ukeza kujimb winyikel wend?

• Ov, chom ik chikusangareshina piur pa yiyukish yasambelau kulejan mu kuseng 72?

[Chipich chidia pa paj wa 28]

Ov, chom chafanikeshau nich mapit masangerau piur pa winyikel wa Salomon?

[Chipich chidia pa paj wa 31]

Chifanyidin kusal usu wawonsu mulong wa kwikal ni mwom mu Paradis mu winyikel wa Salomon Mujim