Uumwing Ukat Kuyijikish In Kumwifukwil Akin

“Nikez kakukumangejany pamwing mudi amikoku achirikina mu diyind.”​—MIKE 2:12.

1. Ov, mutapu ik chitang chimekeshin manangu ma Nzamb?

NFUND A KUSENG walonda anch: “A! [Yehova], midimu yey yivud! Ey wayisala yawonsu nich manangu. Ngand yizwil nich yitang yey.” (Kus. 104:24) Manangu ma Nzamb mameken pa kuswir kwa umwing ni mukwau kudinga pakach pa tutikit ni tutikit twa mitond, atupwapu, anam ni atupwapu adia mu mwom wamushena nakash pa divu. Chikwau kand, mu mujimbu wetu mudi tunan twa yid kushalijan, kusambishin ku yid yijim kushik ni ku kachikunku kakemp nakash ka maselil mey, yawonsu yisadin pamwing chakwel ey wikala muntu uwanyidina ni ukweta ukash wa mujimbu.

2. Ov, mudi muyimekeshinau pa paj wa 13, mulong wak uumwing udia pakach pa in Kristu wading ushimokishina?

² Yehova wayitanga antu chakwel ikala nich kuswir kwa umwing ni mukwau. Antu amekeshining yifu kushalijan, untu, ni ukaliweny kushalijan. Chikwau kand, ndiy wayitanga antu a kusambish nich ngikadil ya winzamb yela kuyikwash chakwel asala pamwing umwing ni mukwau ni ikala kuswir kwa umwing ni mukwau. (Dis. 1:27; 2:18) Pakwez, mangand mawonsu madi katat kulemp ni Nzamb ni makutwishap kusal yom mu uumwing. (1 Yoh. 5:19) Chawiy lel, ijik anch chikumangen cha in Kristu cha pa chitot cha mivu chakusambish chading ni antu kushalijan mudi aswik in Efes, amband in Grek a katumb nakash, amakundj in Yuda ileja nakash, ni antu adinga pasak in kwifukwil akish, uumwing wau wafanyina kumekan mudi chom chimwing chishimokishina nakash.​—Mid. 13:1; 17:4; 1 Tes. 1:9; 1 Tim. 6:1.

3. Ov, mutapu ik ulejenay Bibil piur pa uumwing wa in Kristu akin, ni chom ik chitukeza kushinshikin mu dilejan dined?

³ Difukwil diakin diyikwashin antu chakwel asala mu umwing mudi mukata kusal yid ya mujimbu wetu. (Tang 1 Korint 12:12, 13.) Yom yimwing yitukeza kushinshikin mu mutu wa mulong winou yidi anch: Ov, mutapu ik ukata difukwil diakin kuyitek antu mu uumwing? Ov, mulong wak Yehova amwinend kusu, ndiy ukutwisha kukumangej tutikit twa antu a michid yawonsu mu uumwing? Ov, chikangesh ik cha kwikal mu uumwing chitukwashinay Yehova kupandakan? Pakatau kulimish uumwing, ov, mutapu ik ushalijadinau in Kristu akin ni Kristendom?

Ov, Mutapu ik Dikata Difukwil Diakin Kuyitek Antu Mu Uumwing?

4. Ov, mutapu ik dikata difukwil diakin kuyitek antu mu uumwing?

⁴ Antu adia mu difukwil diakin ij anch Yehova ukwet mbil ja kwikal Mukaleng wa mangand mawonsu mulong ndiy watanga yom yawonsu. (Kuj. 4:11) Chawiy lel, ap anch in Kristu akashinsh adi mu yisak yivud ya antu ni mu mashakamin kushalijan, awonsu akat kuziyil ku yany yimwing yidia mu Bibil. In kwifukwil akin awonsu akwet mbil ya kumutazuk Yehova anch “Tatuku.” (Isay 64:8; Mat. 6:9) Chawiy chiyisadina anch ikala akadivar a muspiritu ni akutwish kusanger uumwing uwamp nakash ulejenau kudi nfund a kuseng anch: “Talany kuwap ni musangar anch akadivar abombakan ni kushakam!”​—Kus. 133:1.

5. Ov, ngikadil ik yiyikwashina in kwifukwil akin ikala mu uumwing?

⁵ Chawiy, in Kristu awonsu adi kwau akad kuwanyin, pakwez akat kumwifukwil pamwing mu uumwing mulong ileja kukatijan umwing ni mukwau. Yehova uyifundishin kumekesh rukat kupandakenamu chikutwishay kusal muntu mukwau. (Tang 1 Yohan 4:7, 8.) Dizu diend dilondin anch: “Chawiy djalany mudi kanitondilanyau kudi Nzamb, atumbila ni akatijadina, ni michim ya kwovijan, ni kudimuk, kwikepish ni kwitudish, ni kushimpish muchim, kangal wajimanijadinany muntu ni mukwau, likishijadinany anch kudi muntu ukweta mulong ni mukwau, mudi Mwant chakulikishilanyay en ni yen salany kand mwamu. Ni piur pa yom yiney yawonsu djalany rukat, wawiy mwoj uwanyidina ukasila yawonsu pamwing mu kwovijan.” (Kol. 3:12-14, TMK) Mwoj winou uwanyidina ukasila pamwing mu kwovijan udi​—rukat—​udi ngikadil ya kusambish yiyijikishina in Kristu akin. Kusambishin ku yom ya kushikena amwiney, ov, wamenap anch uumwing winou udi chijingidij chijim cha difukwil diakin?​—Yoh. 13:35.

6. Ov, mutapu ik rutukwashina ruchingej ra Want kwikal mu uumwing?

⁶ In kwifukwil akin adi kand mu uumwing mulong achingejin anch Want wa Nzamb wawiy udia ruchingej rumwing kusu ra antu. Ij anch piswimp ap Want wa Nzamb ukez kaswinkan wintakel wa antu ni kuyiyukish antu amuziyidila nich chisambu cha kashinsh ni cha chikupu. (Isay 11:4-9; Dan. 2:44) Chawiy lel, in Kristu ashinshikin pa yalonday Yesu piur pa in kumulondul end anch: “Awiy kadip a mangand, mudi am kinidip wa mangand.” (Yoh. 17:16, TMK) In Kristu akin akat kwipuk kwiyandjik mu milong ya mangand; chawiy chitwishinau kushakam mu uumwing ap anch antu ayinyingumukina adi mwi njit.

Musul Umwing Kusu wa Malejan ma Muspiritu

7, 8. Ov, malejan ma Bibil makwashin mwi njil ik chakwel uumwing wetu wikalaku?

⁷ In Kristu a mu mivu chitot ya kusambish adinga mu uumwing mulong awonsu ading atambwil dikasikesh didiokila ku musul umwing. Itiyija anch Yesu ndiy wading ufundishina ni utakedila chikumangen kusutil chisak chitakedila, cha atwimbuy ni amakurump adinga mu Yerusalem. Mipak ya antu inay ipanina yading yimedin pa Dizu dia Nzamb ni atulam in kwendangan ading akat kupan malejan mau ku yikumangen yadinga mu jingand jivud. Piur pa atulam amwing, Bibil ulondin anch: “Pasutangau mu ul ni ul, ayilejanga in kwitiyij yijil yatenchikau kudi atwimbuy a Yesu ni kudi amakurump mu Yerusalem. Ayileja kuziyil ku yijil yiney.”​—Mid. 15:6, 19-22; 16:4.

⁸ Chilik chimwing kand nlel unou, Chisak Chitakedila chikweta in Kristu azizidilau many chikwashin chakwel kwikala uumwing pakach pa yikumangen yidia mu mangand mawonsu. Chisak Chitakedila chipalangeshin mikand yikasikeshina mu spiritu mu jindim jivud. Yakudia yiney ya muspiritu yimedin pa Dizu dia Nzamb. Chawiy lel, yawonsu yifundishinau yidiokilap kud antu bwat pakwez yidiokil kudi Yehova.​—Isay 54:13.

9. Ov, mutapu ik utukwashina mudimu wetu watwinkishau kudi Nzamb kwikal mu uumwing?

⁹ Atulam in Kristu niyawiy akasikeshin uumwing kusutil ku kutakel mudimu wa kulejan. Usu wa urund uyitekina mu uumwing antu asadina pamwing mu mudimu wa Nzamb udi ukash kupandakanamu usu uyikumangejin antu akwau mu mangand minungina kusu mulong wa kushakam pamwing. Chikumangen cha in Kristu chadingap chimedina pa mudimu wa kuyitek antu pamwing kusu bwat, pakwez chakwel kumulimish Yehova ni kumusadin pamwing—mudimu wa kulejan rusangu ruwamp, wa kwikadish in kwilej, ni wa kukasikesh chikumangen. (Rom 1:11, 12; 1 Tes. 5:11; Heb. 10:24, 25) Chawiy chalejanay kambuy Paul piur pa in Kristu anch: “En wimanany dang mu yitongijok yimwing, chad nich muchim umwing ukata kurishany mu uumwing mulong wa kujimbish ritiy rilejenau mu Rusangu Ruwamp.”​—Fil. 1:27.

10. Ov, mu mitapu ik yimwing tudinga mu uumwing wa antu a Nzamb?

¹⁰ Pa chinech, etu antu a Yehova, tudi mu uumwing mulong twitiyijin ukaleng wa Yehova, tuyikatin akadivar netu, tuchingejidin mu Want wa Nzamb, ni tuyilimishin antu atekinau kudi Nzamb chakwel atutakela. Yehova utukwashin chakwel tupandakana mikadil yimwing yikutwisha kuyipish uumwing wetu mulong wa kuburen kuwanyin kwetu.​—Rom 12:2.

Kupandakan Chibud ni Mukau

11. Ov, mulong wak chibud chikat kuyaurilang antu, ni mutapu ik utukwashinay Yehova chakwel tuchipandakana?

¹¹ Chibud chikat kuyaurilang antu. Muntu ukweta chibud usotining kwiman anch udi piur ni usotining kwisangaresh amwinend kusutil ku kwibaz. Pakwez chinech chimekening yisu yivud mu kushakam mu uumwing; mulong antu akata kuyitesh in kwibaz akutwish kwikal nich mukau. Kambuy Jakob utulejin patok anch: “Kwibaz kwa mitapu yawonsu kudi kwau kuyimp.” (Jak. 4:16) Kuyiman antu akwau anch adi mwishin kudi kuburen rukat. Chimeken patok anch Yehova udi chilakej cha kwitudish mu mutapu ukatay kushakam ni antu akad kuwanyin mudi etu. David wafunda anch: “Kudimuk kwey [Nzamb] kwangikadisha muntu mujim.” (2 Sam. 22:36) Dizu dia Nzamb ditukwashining kupandakan chibud kusutil ku kutulej mutapu wa kutongijok nawamp. Amupepila Paul chakwel ipula anch: “Ov, nany wakuteka ey kwikal mujim kuyipandakanamu akwen? Ov, Nzamb kindiyap wakwinkisha yom yiney yiukweta? Chawiy ing, ukutwish kwibaz nchik anch yom yawonsu yiukweta yidi kwau yakwinkishau kudi Nzamb ya riy?”​—1 Kor. 4:7.

12, 13. (a) Ov, mulong wak chiswapeling kwikal nich mukau? (b) Ov, yibudikin yikwikal nchik anch tudi nich chitongijok cha Yehova piur pa antu akwau?

¹² Mukau chidi chom chikwau chikata kuyikangesh antu avud kushakam mu uumwing. Mulong twaswana kuburen kuwanyin, etwawonsu tukweting “mukau” ap in Kristu asadina kal mivu yivud akutwish kwikal chisu chimwing nich mukau mulong wa mikadil, yisend, ap ukaliweny wa antu akwau. (Jak. 4:5) Chilakej, mukadivar ukweta dijuku ukutwish kwov mukau mulong wa yisend yikwetay mwin kulejan wa chisu chawonsu, pakad kwijik anch mwin kulejan wa chisu chawonsu ukutwish ni ndiy kumwovil mukau muntu ukweta dijuku ni an. Ov, mutapu ik tukutwisha kukangesh mukau winou chakwel kangal uyipisha uumwing wetu?

¹³ Mulong wa kutukwash twipuka mukau, vurikany anch Bibil uyisikejin yid ya azizidilau many nich yikunku ya mujimbu wa muntu. (Tang 1 Korint 12:14-18.) Chilakej, ap anch dis diey dikutwish kumekan patok kupandakanamu muchim wey, ov, yawonsu yidiap ya usey kud ey? Chilik chimwing, Yehova ni ndiy umening anch yid yawonsu ya chikumangen yikwet usey ap anch yikwau yimekening nakash kupandakanamu yid yikwau. Chawiy lel, ikalany amboku nich chitongijok cha Yehova piur pa akadivar netu. Pa ndond pa kuyovil antu akwau mukau, tufanyidin kuyibangin ni kuyisanger. Kusutil ku kusal mwamu, tukez kumekesh kushalijan kudia pakach pa in Kristu akin ni antu ayilinga mu maegliz ma Kristendom.

Kristendom​—Wamekana Kusutil ku Kwiyauril

14, 15. Ov, mutapu ik wiyaurila win Kristu wa in kupumbwok?

¹⁴ Uumwing wa in Kristu akin ushalijadin ni kupwitijan kudia pakach pa maegliz ma Kristendom. Mu chitot cha mivu cha kanying, win Kristu wa in kupumbwok wapalangana chawiy lel mwant umwing wa in Rom wakad kumwijik Nzamb wasambisha kutakel, ni kusal anch Kristendom aya kurutu. Chawiy lel, kusutil ku kwaurik ni kwaurik, mant mavud ma in Rom madiokala ku wintakel wa in Rom kupwa masala maegliz ma ngand yau.

¹⁵ Mavud ma ku mant minam marisha njit umwing ni ukwau mu yitot ya mivu. Mu chitot cha 17 cha mivu ni cha 18, in Grande-Bretagne, in France, ni in États-Unis akasikesha kwipan kwi Ngand jau, chawiy lel, wan a ngand wikala mudi relijon. Mu chitot cha 19 cha mivu ni cha 20, wan a ngand wasambisha kutakel yitongijok ya antu avud mu mangand. Pa chisu chinicha, maegliz ma Kristendom masambisha kwiyauril mu tuyisak tuvud, tukata kulikidil wan a ngand. Ap antu ayilinga mu maegliz niyawiy asambisha kwas njit ni ambay nau in ritiy a muchid ukwau. Chawiy lel, Lel unou, Kristendom wiyauril kal mu yikunku yambatena nich yitiyij ya chirelijon ni yikwau ya wan a ngand.

16. Ov, milong ya mutapu ik yikata kuyauril in Kristendom?

¹⁶ Mu chitot cha 20 cha mivu, yisak yimwing ya Kristendom chitot yasambisha kwikal nich chaku cha kulembil pamwing mulong wa kukasikesh uumwing. Pakwez kupwa kwa makum ma mivu yasalau usu, maegliz makemp kusu mawiy mibomba mu uumwing, ni antu ayilinga ku maegliz adandamedin kwiyauril pa milong ya dikarumun, kudiosh madikaj, utum wa amakundj ni amakundj, ni kusal anch amband ikala amwimpel. Mu jindond jimwing ja Kristendom, antakel a maegliz akat kupakish kuyibomb antu adia mu yisak kushalijan ni kuyitek pamwing kusutil ku kupipesh ukash wa kushalijan kwa yitiyij yikata kuyauril. Pakwez, kupipesh ukash wa yitiyij kukat kushadish ritiy ra antu ni kukutwishap kutek mu uumwing marelijon ma Kristendom miyaurila kal.

Difukwil Diakin Didi Piur pa Wan a Ngand

17. Ov, mutapu ik wasambelau kulejan anch difukwil diakin dikez kuyitek antu mu uumwing “Mu machuku makeza kez”?

¹⁷ Ap anch, nlel unou mangand madi ma kwauril mu mutapu ukash kupandakenamu pasak, uumwing udandamedin kuyijikish in kwifukwil akin. Mike muprofet wa Nzamb wasambela kulejan anch: “Nikez kakukumangejany pamwing mudi amikoku achirikina mu diyind.” (Mike 2:12) Mike wabwaka anch difukwil diakin dikez kwikal piur pa milad yikwau ya kwifukwil, ap piur pa anzamb a makasu ap pa kwifukwil angand mudi nzamb. Ndiy wafunda anch: “Mu machuku makeza kez, mukandu padia chikumbu cha [Yehova] ukez kalep kupandakan mikandu ni yinangina yawonsu. Chawiy michid yivud yikez kayang kwinikwa. Antu a michid yawonsu akat kuziyil ni kwifukwil akish au ayinau. Pakwez etu tukez kamuziyil ni kumwifukwil [Yehova] Nzamb wetu chikupu ni chikupu.”​—Mike 4:1, 5.

18. Ov, difukwil diakin diatukwasha kukarumuk mu mutapu ik?

¹⁸ Mike walejana kand mutapu dikeza difukwil diakin kuyitek mu uumwing antu adinga pasak akankuny anch: “Antu avud akez kaya kwinikwa, akez kalond anch: ‘Ezany tukandamany pa mukandu wa [Yehova], ku chikumbu cha [Yehova] Nzamb. Ndiy ukutulej rusot rend, chad etu tukez kwendil mu jinjil jatonday ndiy.’ . . . Antu akez kachil jimpak jau ja misamun jikala jinkasu, ni mirumbu yau yikala jimpak ja kukatul nich yakwangul. Kwikil muchid ukeza kapuril mpak ya musamun kurish ni muchid ukwau. Kakez kilejap kand kurish njit.” (Mike 4:2, 3) Antu alikina kwiyifukwil antu mudi anzamb ap michid asambishin kal kumwifukwil Yehova ni kwandam mu uumwing wa mangand mawonsu. Nzamb uyifundishin jinjil ja rukat.

19. Ov, uumwing wa mamiliyon ma antu mu difukwil diakin umekeshin patok chom ik?

¹⁹ Uumwing wa in Kristu akin a pa mangand mawonsu udi wa pakampwil ni umekeshin patok anch Yehova udandamedin kuyitakel antu end kusutil ku spiritu wend. Antu a michid yawonsu ayitekin mu uumwing mu mutapu umwing kandikal usadikap mu rusangu ra antu. Kudi kuwanyin kwa patok kwa yalejanau mu Kujingunik 7:9, 14, ni kulejen anch angel a Nzamb akez piswimp ap kulikidil “rinkind” rikeza kushesh ditenchik diyimp dia katat dia yom. (Tang Kujingunik 7:1-4, 9, 10, 14.) Ov, chidap chom cha katumb anch twashakam mu uumwing wa ukadivar mu mangand mawonsu? Ov, mutapu ik ukutwishay muntu ni muntu kukasikesh uumwing winou? Chawiy chitukeza kwisambin mu mutu wa mulong ulondwila.

Ov, Mutapu ik Ukutwisha Kwakul?

• Ov, mutapu ik diyitekina difukwil diakin antu mu uumwing?

• Ov, mutapu ik tukutwisha kukangesh mukau ukutwisha kuyipish uumwing wetu?

• Ov, mulong wak wan a ngand ukutwishap kuyauril in kwifukwil akin?

[Chipich chidia pa paj wa 16]

In Kristu a mu mivu chitot ya kusambish adiokila mu jingand jivud

[Yipich yidia pa paj wa 18]

Ov, mutapu ik ukasikeshina ukwash wey mu mudimu wa kutung Chot cha Want uumwing?