Ov, Nzamb Witin Kwit Dilikishin Mulong wa Yitil?

Amwimpel ni antakel atongining anch kwit dilikishin kwa muntu mulong wa yitil yend kudiandamedin kwikal chikunku cha usey mu yisal ya relijon ni ya kwifukwil mu maegliz mavud. Chikwau kand, mu chisak cha nlel unou chilikidila uyimp, ov, kwit dilikishin kusadikining chakin kamu ap kudi kwa usey?

KUDING yitongijok kushalijan pa mulong winou. Chilakej, gazet umwing wa mu Canada National Post ulejen piur pa muntu umwing witiyija anch mulong chikasiken kumulej muntu mukwau anch wasalang chom chiyimp, “kuding chovil chiwamp nakash pa kumulejamu muntu mukwau, kulembil nend pamwing ni kukulej yiufanyidina kusal mulong wa kutenchik yom.” Pakwez, buku Bénissez-moi mon Père, parce que j’ai péché (mu anglais) wisambidin piur pa muntu umwing walonda anch: “Kwit dilikishin chidi chisal chimwing cha egliz chikata kuyipishang nakash yom. Chisadining anch antu ikala nich ushon upandakena.” Ov, chom ik chilejenay Bibil pa mulong winou?

Chilejenay Bibil

Mu Chijil chapanay Nzamb ku muchid wa in Isarel, mwading yany ya pakampwil piur pa yom yifanyidinay muntu kusal anch wasal chitil. Chilakej, anch muntu wasal chitil pantaliken ni mbay nend ap wajiril yijil ya Nzamb, ndiy wadinga ufanyidina kwit dilikishin kudi mwin kupesh watenchikau wa muchid wa in Levi, ndiy wafanyidina kuchakwish mulong wendend kusutil ku kupan yakupesh kudi Nzamb mulong wa dilikishin dia chitil chend.—In Levi 5:1-6.

Kwinyim kwa yitot ya mivu, pezay muprofet Natan mulong wa kumubabesh Mwant David mulong wa chitil chend, ov, mutapu ik wakulay David? Ndiy witiya kapamp kamwing anch: “Am nasadil kal chitil kudi [Yehova].” (2 Samwel 2:13) Ndiy walembila kand, ni wamwita dilikishin. Ov, chom ik chashikena? Kupwa David wafunda anch: “Chad nitiyil chitil cham kudi ey, [Yehova], kinajindjikap jinshid jam. Nalonda anch: ‘Nikwitiyil kuyip kwam kudi [Yehova]. Chad ey wanlikishidin yitil yam yawonsu.’”—Kuseng 32:5; 51:1-4.

Kwit dilikishin mulong wa yitil chading chom chitiyijinau kudi Nzamb mu chikumangen cha in Kristu mu chitot chakusambish cha mivu mu chirung chetu. Jakob, mwanamakwend a Yesu ni muntu umwing wa pakampwil wa mu chikumangen chadinga mu Yerusalem, wayibabesha ambay in Kristu anch: “Itiyinany yitil yen muntu ni muntu kudi mukwau. Lembilijadilany muntu ni mukwau chakwel akwokany.” (Jakob 5:16) Chawiy lel, Ov, chom ik chifanyidina kusal in Kristu chakwel ita dilikishin, ni kudi nany?

Ov, Chom ik Chifanyidina Kwitin Dilikishin?

Dichuku ni dichuku, etu antu akad kuwanyin tukweting chibachikin cha kusal yom pakad manangu ap tulondining yom yiyimp ni chawiy tukata kusal chitil pakach pa umwing ni mukwau. (Rom 3:23) Ov, chinech chirumburikin anch tufanyidin kwit dilikishin mulong wa uyimp wawonsu utukata kusal kudi antu amwing atutakedila?

Mulong chitil chawonsu chidi kumurumbukin Nzamb, ndiy ukat kutwovilang riy pitukata kurumbuk mulong wa kuburen kuwanyin kutwavadika nich. Chikwau kand, nfund a Kuseng walonda anch: “Anch ey, [Yehova], wading ni kuvurik yitil yetu yawonsu, ing kwikil muntu ukutwish kupand wakad kufa nich.” (Kuseng 130:3, 4) Ov, chom ik tufanyidina kusal anch twasambish kushadik ni twasal chitil pantaliken ni antu akwau, pamwing ap pakad kwisotil? Vurik anch malembil ma chilakej ma Yesu mayilejay in kwilej end chakwel alembila mading mwamu: “Tulikishinaku yitil yetu, mulong niyetu tukat kuyilikishinang antu awonsu akata kutusalang nayimp.” (Luka 11:4) Mwaning, Nzamb ukez katulikishin anch twaya kudi ndiy ni kwit dilikishin mu dijin dia Yesu.—Yohan 14:13, 14.

Ijik anch Yesu walonda anch chifanyidin kand kuyilikishin antu “akata kutusalang nayimp.” Kambuy Paul wayivurisha ambay nend akaritiy anch: “Pakwez ikalany antu adimukina, in kwanakenijan muntu ni mukwau, in kulikishijadin muntu ni mukwau mudi mwakulikishinanyau en kudi Nzamb mu Kristu.” (Efes 4:32) Pitukata kuyilikishin antu mulong wa kurumbuk kwau, tukez kikal nich diyingish diwamp dia kuchingejin anch Nzamb atulikishina niyetu.

Ov, chikwikal nchik piur pa yitil yikash mudi wij, makasu ma kwisotil, masandj, kukwachik maar, ni yikwau? Muntu mwawonsu usadila yitil yiney ukat kujiril yijil ya Nzamb ni usadil chitil pantaliken ni Nzamb. Ov, chom ik chifanyidinay kusal?

Ov, Chifanyidin Kwit Dilikishin Kudi Nany?

Nzamb kayinkishap antu mbil ya kuyilikishin antu yitil bwat, amwinend kusu ndiy ukutwisha kusal mwamu. Bibil utulejin patok anch: “Pakwez anch twitiyin yitil yetu kudi [Nzamb], ndiy utentamina, ukuwanyish kushilamu kwend, chawiy ndiy ukutulikishin yitil yetu, chad ukutokish kand michim yetu ku kuyip kwawonsu.” (1 Yohan 1:9) Pakwez, kudi nany tufanyidina kwit dilikishin?

Mulong dilikishin difanyidin kudiokal ching kusu kudi Nzamb, chifanyidin komb kwit dilikishin kudi Ndiy. Chawiy chasalay David, mudi mutwamena. Ov, dilikishin difanyidin kwimen pa chom ik? Bibil utulejin anch: “Chad karumukany, udiokalany ku yitil, wezany kudi [Yehova] chakwel akulikishinany yitil yen.” (Midimu. 3:19) Mwaning, dilikishin dirumburikinap kwitiyij kusu anch chaku chinech chading chiyimp ni kwit dilikishin mulong wa chitil bwat pakwez ridi rusot rikwetay muntu ra kulik yisal yend yiyimp. Jinzau jinej jikwau jikasikening yisu yivud. Pakwez, kudi ukwash umwing.

Vurik mazu ma kambuy Jakob twisambinang kwinsambishin malonday anch: “Itiyinany yitil yen muntu ni muntu kudi mukwau. Lembilijadilany muntu ni mukwau chakwel akwokany.” Jakob walonda kand anch: “Kulembil kwa muntu utentamina kukwet ukash wa kusal chom.” (Jakob 5:16) ‘Antu atentamina’ akutwish kwikal “amakurump a chikumbu cha Nzamb [chikumangen],” isambinay Jakob mu verse wa 14. Mu chikumangen cha in Kristu, mudi “amakurump” a muspiritu ap amakurump atekau mulong wa kuyikwash antu asotina anch Nzamb ayilikishina. “Amakurump” inay kakutwishap kumulikishin muntu ap umwing chitil chend, mulong kwikil muntu winkishau mbil ja kumulikishin mbay nend mulong wa chitil chasalay pantaliken ni Nzamb.a Pakwez, kudi antu aswila mu spiritu awanyishina yitinay mulong wa kubabesh ni kumuyul muntu wasala chitil chikash, ni kumukwash itiyija ukash wa chitil chend ni kuswir kwa kukarumuk.—Galatia 6:1.

Ov, Mulong Wak Muntu Ufanyidin Kwit Dilikishin Dia Yitil Yend?

Chikalap nchik ukash wa chitil ap bwat, muntu wasala chitil wayipishin urund wend ni ambay nend kupwa ni Nzamb. Chawiy lel, ukutwish kwov ushon ap kuyip. Winou wawiy mudimu wa kom, katwinkishay Sakatang wetu. (Rom 2:14, 15) Ov, chom ik chitukutwisha kusal?

Anch twachirikin kand ku mukand wa Jakob tukutan mazu minan makasikeshina anch: “Pakach pen padi uyedil? Lik ayitazuk amakurump a [chikumangen], awiy alembil padiay ndiy, amuzizil many mu dijin dia Mwant; kulembil kwa ritiy kukez kumupandish muyej, ni Mwant ukez kamulangwish ndiy; anch ndiy wasala kal chiitil, akez kamulikishil.”—Jakob 5:14, 15, TMK.

Pinap kand, amakurump akwet chisend cha kuwanyish maswir ma chisak. Ov, mutapu ik? Chidiap kusutil ku kutesh kusu mutapu witinay muntu dilikishin. Pakwez, mulong madi mayej ma muspiritu, chifanyidin kusal chom kanang chakwel ‘amwoka muyej.’ Kudi yom yaad yisambinay Jakob yitwishikina kusal.

Chakusambish kudi ‘kumupal many.’ Chinech chirumburikin usu wa kwokan ukweta Dizu dia Nzamb. Kambuy Paul walejana anch: “Dizu dialonday Nzamb dikwet mwom, dikwet kand ukash . . . ni dikat kujingunin yitongijok ni rusot ra mu muchim wa muntu,” kwandam mu manangu ni mu muchim wa muntu. (Hebereu 4:12) Kusutil ku kusadil Bibil nich ukaliweny, amakurump akutwish kumukwash muntu uyedina muspiritu chakwel amana chamushikija ku mulong winou ni kumukwash alondula jinzau jifanyidina mulong wa kutenchik yom kurutu kwa Nzamb.

Chawiy lel, kudi “kulembil kwa ritiy.” Ap anch malembil ma amakurump makezap kuswimp mutapu wa Nzamb wa kusadin kutentam, malembil minam makwet usey kudi Nzamb, usotina kumulikishin muntu piur pa difut dia yakupesh ya Kristu. (1 Yohan 2:2) Nzamb udi tayad mulong wa kumukwash muntu mwawonsu wasadina chitil ukarumukina nich muchim umwing ni asadina “yom yiwamp ya kumekesh kukarumuk kwau.”—Midimu 26:20.

Diyingish dijim dia kwitin dilikishin mulong wa chitil—pantaliken ni mbay ap ni Nzamb—kudi kwitapil dilau dia Nzamb. Yesu Kristu walejana anch tufanyidin cha kusambish kupwish milong tukweta pantaliken ni ambay netu ni kushakam nau mu chisambu kurutu kwa kwel anch tumwifukwila Nzamb nich kom katok. (Mateu 5:23, 24) Jinswir 28:13 ulondin anch: “Muntu mwin kujindjik kurumbuk kwend kakuzangijalap nawamp, pakwez mwin kwitiyil kurumbuk ni kukulik, akez kamwovil riy.” Anch twitudish ayinetu ku mes kwa Yehova Nzamb ni twamwit dilikishin, tukez kwitapil dilau diend ni akez katuyukish mu chisu chiwanyidina.—1 Pita 5:6.

[Dizu didia kwishin kwa paj]

[Dizu dirumburila chipich chidia pa paj wa 30]

Nzamb ukez kavuramen kurumbuk kwetu ni kutulikishin anch twaya kudi ndiy ni twamwit dilikishin kusutil mu dijin dia Yesu

[Chipich chidia pa paj wa 31]

Diyingish dijim dia kwitin dilikishin mulong wa chitil kudi kwitapil dilau dia Nzamb.