Chakasatu 3
Lam Chaku cha Kujikitish
OV, CHOM IK CHIFUNDISHINAY BIBIL? “Mujikitishany Nzamb mu yom yawonsu.”—1 Tesalonik 5:18.
OV, CHISU CHIKOKUJOL? Tudi mukach mwa antu in kwibaz ni akad kujikitish, akweta yaku yitukutwisha kwimburij. (2 Timote 3:1, 2) Chikwau kand, tukutwish kwiyov ashindidilau kuwejinaku mijikit yivud yipandikenamu yitukata kusal mu mwom wetu. Tukutwish kukwachik nich milong yikash ap nich midimu ya kudandamen kukimb yisakin yetu ayinetu ni kuburen chisu cha kusanger yom tukweta ap kuyijikitish antu akwau mulong wa yom yatusadilau.
OV, CHOM IK UKUTWISHA KUSAL? Itekina chisu cha kutongijokin pa yom yiwamp yiukweta katat. Ukutwish kuman anch milong yikupandikedin. Pakwez, shinshikin chilakej cha Mwant David. Yisu yimwing, ndiy wiyova kuziy, muchim wend wova ushon mulong wa yoziu. Ap mwamu, ndiy wamulembila Nzamb anch: “Nikat kutong yisalijok yey yawonsu. Nikat kwilej kand yisalijok yey yawonsu.” (Kuseng 143:3-5) Chikalap nchik yoziu yend, David wadandamena kujikitish ni kusanger yom yikwetay.
Tongin pa yom yasalau antu akwau mulong wa kukukwash, ni yijikitisha mulong wa usu wasalau. Yesu washa chilakej chiwamp pa mulong winou. Chilakej, pamuzizilau malash ma usey pa mutu ni ku mend kudi murund nend Mariy, antu amwing ipula anch: “Ov, mulong wak washeshay kal malash minam?”a Mazu minam mamekesha anch malash minam afanyidina kumalandish ni kuyinkish atuzwendj nfalang. Yesu wayakula anch: “Mulikany kwend mband. Ov, mulong wak umumeshinanya mar?” Kupwa walonda anch: “Ndiy wasal kal chom chikutwishay kusal.” (Marko 14:3-8; Yohan 12:3) Pa ndond pa kushinshikin pa chom chalikay kusal Mariy, Yesu wamujikitisha mulong wa chom chasalay.
Antu amwing akat kusangerang dijuku, arund, ap yiyukish yikwau ching kupwa kwa kuyishadish. Ukutwish kwipuk chibudikin chinech cha ushon kusutil ku kutongijokin pa yom yiwamp ukweta katat! Ov, mulong wak ukutwishap kutongijokin ap kufund yom kanang yakusadilau yiukutwisha kujikitish?
Mulong “yiyukish yawonsu yiwamp” yidiokil kudi Nzamb, tukez kusal nawamp anch twamujikitish ndiy mu malembil. (Jakob 1:17) Kusal mwamu pakad kujing kukutwish kutukwash kudandamen kwikal nich spiritu wa kujikitish ni kukudish kusanger yom tukweta.—Filip 4:6, 7.
[Dizu didia kwishin kwa paj]
a Mu mivu chitot ya kusambish, kumuzizin mweny malash pa mutu chading chisal cha kwakan; pakwez, kumuzizin ku mend chading chisal cha kumekesh kwikepish.
[Chipich chidia pa paj wa 6]
Ov, ukat kuyijikitish antu akwau mulong wa yom yikatau kukusal?