Ilejina ku Dizu dia Nzamb

Ov, Mutapu ik Ukutwisha Kwikal Piswimp ni Nzamb?

Mutu wa mulong winou ulangwishin yipul ukutwisha kwiyipul ni ulejen ndond ukutwisha kutang yakul mu Bibil wey. Atuman a Yehova akusangar kwisambin pamwing ney pa yakul yiney.

1. Ov, mutapu ik ukata malembil kutushejish piswimp ni Nzamb?

Yehova uyitin antu a michid yawonsu kumushejin piswimp mu malembil. (Kuseng 65:2) Pakwez kateshiningap malembil mawonsu. Chilakej, padandamenau in Isarel mu uyimp, Nzamb walika kutesh malembil mau. (Isay 1:15) Chikwau kand, malembil ma ikundj umeshina mukajend mar makutwish kukangany. (1 Pita 3:7) Pakwez, Nzamb ukat kuyitesh ap in kusal yitil yijim anch akarumuk.—Tang 2 Jinsangu 33:9-13.

2. Mutapu ik tufanyidina kulembil?

Kulembil chidi chisend ni chikunku cha difukwil dietu, chawiy lel tufanyidin kulembil ching kusu kudiay Yehova. (Mateu 4:10; 6:9) Mulong tudi akad kuwanyin, tufanyidin kulembil mu dijin dia Yesu mulong ndiy “njil” yatondau. (Yohan 14:6) Yehova kasotinap tuchirikina pa mutu ap malembil mafundau kal pakwez usotil tulembila mu mazu metu ayinetu kulondulijan ni yovil yetu.—Tang Mateu 6:7; Filip 4:6, 7.

Sakatang wetu ukutwish ap kutesh malembil ma mu muchim. (1 Samwel 1:12, 13) Utwitin kulembil mu yisu yawonsu, mudi kwinsambishil ni kwinsudiel kwa dichuku, pa yisu ya kudia, ni pa chisu turishina nich yikokujol.—Tang Kuseng 55:22; Mateu 15:36.

3. Mulong wak in Kristu akumangening pamwing?

Kumushejin Nzamb piswimp kuswapelap mulong tushich pakach pa antu akad ritiy mudiay Nzamb ni akata kusip kushilamu kwend kwa kulet chisambu pa divu. (2 Timote 3:1, 4; 2 Pita 3:3, 13) Chawiy lel tufanyidin kwikal nich urund wa ambay akaritiy akutwisha kutukasikesh.—Tang Hebereu 10:24, 25.

Ukutwish kumushejin Nzamb piswimp anch wata urund ni antu amukatina Nzamb. Yikumangan ya Atuman a Yehova yiletin yisu ya kutambul ukwash udiokila ku kushinshikin ritiy ra akwetu.—Tang Rom 1:11, 12.

4. Mutapu ik tukutwisha kwikal piswimp ni Nzamb?

Tukutwish kumushejin Yehova piswimp kusutil ku kutongijokin pa yom twileja mu Dizu diend. Shinshikin mijikit yend, umutakel wend, ni kushilamu kwend. Kutongijokin kuwamp kukat kukasikesh muchim wetu wa kujikitish mulong wa rukat ra Nzamb ni manangu mend.—Tang Joshua 1:8; Kuseng 1:1-3.

Ukutwish kumushejin Nzamb piswimp ching kusu anch wamuchingejin, anch ukwet ritiy mudiay ndiy. Pakwez ritiy ridi mudi chom chikweta mwom chiswiridina ukwash. Ufanyidin kudish ritiy rey kusutil ku kutongijokin pa yom wilejina.—Tang 1 Tesalonik 5:21; Hebereu 11:1, 6.

5. Ov, kwikal piswimp ni Nzamb kukukwashin mutapu ik?

Yehova uyibangidin antu amukatina. Ukat kuyiking ku yom yin yawonsu yikutwisha kutek mu ubaj ritiy ni ruchingej rau ra mwom wa chikupu. (Kuseng 91:1, 2, 7-10) Utubabeshin pantaliken ni milad ya mwom yiyipishina mujimbu ni musangar wetu. Yehova utulejin mulad wa mwom upandakena kuwap.—Tang Kuseng 73:27, 28; Jakob 4:4, 8.

Mulong wa jinsangu jikwau jivud, tal shapitre 17 wa buku unou, Chom Ik Chakin Kamu Chifudishinay Bibil?, wapalangeshau kudi Atuman a Yehova.