Ilejina ku Dizu Dia Nzamb

Mulong wak Tufanyidin Kusadil Dijin Dia Nzamb?

Mutu wa mulong winou wisambidin pa yipul ukutwisha kulangwish ni ulejen kwisu ukutwisha kutan yakul mu Bibil wey. Atuman a Yehova akez kusanger kwisambin ney pa yakul yiney.

1. Ov, mulong wak Nzamb wipila amwinend dijin?

Usotining chakin kamu kukutazuk pa dijin diey pa ndond pa kusadil chijiken mudi “ikundj,” “mwant,” ap “mband.” Dijin diey dikwashining chakwel kutek kushalijan pakach pey ni antu akwau. Nzamb amutazukining kusutil ku yijiken mudi ‘Mukaleng Mwant,’ “Nzamb wa Dikand Diawonsu,” ni “Sakatang.” (Disambishil 15:2; 17:1; Mulej 12:1) Pakwez wipila kand amwinend dijin chakwel kutukwash kwikal ni urund wa piswimp ni ndiy. Mu Uruund, Yehova diawiy dijin dia Nzamb.—Tang Isay 42:8, NW.

Ap anch antu avud akarumuna Bibil adiosha dijin dia Nzamb ni kutek majin makwau mudi “Nzamb” ni “Mwant,” pakwez dijin diend aditana tupamp 7000 mu mikand ya pasak ya Bibil yafundau mu Hebereu. Chimeken patok anch, Nzamb usotin anch dijin diend dijikana.—Tang Isay 12:4.

2. Ov, mulong wak chidi cha usey kwijik dijin dia Nzamb?

Kwijik dijin dia Nzamb kurumburikin yom yivud pa ndond pa kwijik kudijimbul kusu. Kwijik dijin dia Nzamb kurumburikin kwikal ni urund wa piswimp ni ndiy. Dijin Yehova dirumburikin anch “Ndiy Ukata Kwikadish.” Chinech chitukasikeshin anch Nzamb ukez kusal yawonsu yisotinay chakwel awanyisha rutong rend. Chawiy lel kwijik dijin dia Nzamb kurumburikin kwitiyij anch Nzamb ukez kuwanyish kushilamu kwend. (Kuseng 9:10) Ritiy ra antu ija ni akata kusadil dijin dia Nzamb rikat kuyibachik ku kumuchingejin ndiy ni kumutek pa ndond ya kusambish mu mwom wau. Yehova Nzamb ukez kuyilam antu inay.—Tang Kuseng 91:14.

3. Mulong wak Nzamb usotin dijin diend dijikana?

Nzamb usotin anch antu amwijika pa dijin diend mulong dijin dined didi dia ukwash kud awiy. Dikat kuyikwash kwikal arund nend Nzamb, nich ruchingej ra mwom wa chikupu. Kwikil chom chitushimokishina anch Yehova usotin anch twijikisha dijin diend!—Tang Yohan 17:3; Rom 10:13, 14.

Yesu wijikisha dijin dia Nzamb kusutil ku kuyifundish antu piur pa jinjil ja Nzamb, yijil Yend, ni kushilamu Kwend. Nlel unou, in kumulondul Yesu adandamedin kusal mudimu wa kulejan dijin dia Nzamb ku michid yawonsu. Asadil mwamu mulong asadil pamwing mudi “antu . . . mulong wa dijin diend [dia Nzamb].”—Tang Midimu 15:14; Yohan 17:26.

4. Ov, mutapu ik ukezay Nzamb katumbish dijin diend?

Yehova Nzamb usotin kutumbish dijin diend mulong alonda makasu piur pa dijin dined. Chilakej, antu amwing alondining anch ndiy katangap mwom ni tufanyidinap kumuziyil. Akwau alondin anch kakutwishap kutulam ni ndiy uletina mar. Antu inay akat kusaal dijin dia Nzamb. Pakwez kakezap kusal mwamu chikupu. Nzamb ukez kuyishesh antu alikina kulimish dijin diend.—Tang Kuseng 83:17, 18.

Yehova ukez kutumbish dijin diend pakezay kusadil Want wend mulong wa kushesh winyikel wawonsu wa antu ni kutek chisambu ni diking kudi antu. (Daniel 2:44) Piswimp ap, antu awonsu akez kwijik anch Yehova udi Nzamb wakin.—Tang Ezekiel 36:23; Mateu 6:9.

Ov, chom ik ufanyidina kusal? Kwikal piswimp ni Nzamb kusutil ku kwilej Dizu diend ni kushakam pamwing ni antu amukatina. Pakezay Yehova kutumbish dijin diend, ndiy ukez kuyivurik atushalapol end ashinshamena.—Malakiy 3:16.

Chakwel wileja yom yivud, tal shapitre wa 1 wa buku winou, Chom Ik Chakin Kamu Chifundishinay Bibil?, wapalangeshau kudi Atuman a Yehova.

[Chipich chidia pa paj wa 10]

Dijin dia Nzamb mu maniskri mukur wa Hebereu