Ov, Nany Udia Mwin Kutesh Malembil?

ANCH kudi mwin Kutesh malembil, chakin kamu ufanyidin kwikal Sakatang. Pakwez nany mukwau watanga wong wa muntu ukutwisha kwijik yitongijok yey? Ov, nany mukwau ukutwisha kwakul ku malembil ni kuyinkish antu ukwash uswiridinau? Pakwez ukutwish kwiyipul anch, ‘Ov, chidi cha manangu kwitiyij mudiay Sakatang?’

Antu avud atongining anch chakwel kwitiyij mudiay Sakatang, ufanyidin kulik uman wa siyans wa katat. Pakwez chitongijok cha kwel anch kwitiyij mudiay Nzamb kwovijadinap nich siyans chidi kwau cha makasu. Shinshikin yilondwila ey.

◼ Kwilej kwa katat kwa alej in siyans 1 646 a mashikol majim nakash 21 madia mu États-Unis kwajingunina anch ching kusu muntu umwing pa antu asatu ndiy utondina mazu “Nitiyijinap mudiay Nzamb” chakwel kurumburil chitongijok chau.

Uyakin udi anch in siyans avud itiyijin mu kwikalaku kwa Nzamb.

Uman wa Sakatang

Ov, tukutwish kwitiy pakad uman anch mwin Kutesh wa malembil udingaku? Bwat kwau. Chitongijok chakwel anch ritiy rirumburikin kwitiyij pakad uman chidiap chakin. Bibil umekeshin ritiy mudi ‘kutwijikish ni kushinshik win yakin wa yom yakad kumekan ku mes.’ (Hebereu 11:1) Dikarumun dikwau dilondil anch “rikat kutwijikish ni kushinshik yom yakad kumekan ku mes.” Chilakej, ukutwishap kuman interferans wa radio, pakwez telefon wey umekeshin patok uyakin wa ma interferans minam makad kumekan makata kusamburish mazu; chawiy lel witiyijin anch ma interferans minam madiaku. Chilik chimwing, ap anch tukutwishap kumuman ni mes mwin Kutesh malembil, tukutwish kushinshikin uman udiaku ukutwisha kutwinkish kashinsh anch ufanyidin kwikalaku.

Kwisu tukutwisha kutan uman wa kwikalaku kwa Nzamb? Tuswiridin kushinshikin kusu ndond yitunyingumukina. Bibil ukat kutong mwi njil yiney: “Chikumbu ni chikumbu chikwet muntu wachitunga, pakwez Nzamb udi mwin kutung wa yom yawonsu.” (Hebereu 3:4) Ov, witiyijin chitongijok cha mazu minam? Anch watal kutenchik kudia mu diur ni pa divu, musul wa mwom, ap rutong ra chom chijim chatungau pa divu diawonsu, wong wa muntu, utongin anch chom kanang chijim kupandakanamu antu chifanyidin kwikalaku.a

Pakwez kudi mipak pa yom yikutwishau kutulej piur pa Nzamb kusutil ku yom yatangay. Kushinshikin uman wa Nzamb mu yom yatangay kudi mudi kutesh masok ma yidjatil ya muntu ushejidina kwinyim kwa chis chipatilau. Wij anch muntu kanang udi pinap, pakwez, ov, udi nany? Chakwel umana, ufanyidin kwazuril chis. Tufanyidin kusal chilik chimwing chakwel tumujingunina Muntu watanga yom yawonsu.

Bibil chawiy chis cha ronganyin piur pa Nzamb. Anch wazuril chis chinech ni kushinshikin umwing wa uprofet ulejenau kachom ni kachom ni kuwanyin kwau, ukutan uman wa kwikalaku kwa Nzamb.b Pakwez, chikwau kand, rusangu piur pa mutapu ukatay Nzamb kuyisadil antu rimekeshin untu wa kashinsh wa mwin Kutesh malembil.

Ov, Mwin Kutesh Malembil Udi Mutapu Ik?

Bibil ulejen anch mwin Kutesh malembil udi muntu chakin kamu—umwing ukutwisha kwijik. Chakin kamu ching kusu muntu ndiy ukutwisha kutesh ni kwov kurumburik. Chikasikeshin kutang anch: “Mbij jawonsu jikez kudi Ey anch yitil yapandikena, Ey ukat kutesh kulembil.” (Kuseng 65:2, TMK) Ukat kutesh awonsu akata kumulembil nich ritiy. Ni ukwet dijin. Bibil ulondin anch: “[Yehova] udi kulemp ni antu ayimp, pakwez ukat kutesh kulembil kwa antu in kutentam.”—Jinswir 15:29.

Yehova ukwet yovil. Udi “Nzamb wa rukat” ni amutazukin anch ‘Nzamb wa musangar.’ (2 Korint 13:11; 1 Timote 1:11) Piur pa kwakul kwend pa chisu chavulijana uyimp nakash, Bibil ulejen anch: “Wanenganana.” (Disambishil 6:5, 6) Kulond anch Nzamb ukat kuletish mar mulong wa kuyipak antu kudi kwa makasu. Bibil ulejen anch: “Nzamb udi kulemp ni kuyip.” (Job 34:10) Pakwez, ukutwish kwiyipul anch, ‘Anch Nzamb udi Sakatang mwin dikand diawonsu, mulong wak ulikidil uyimp udandamena?’

Yehova winkisha antu ukaliweny wa kusadil want ipau, ni chinech chitulejin chom kanang piur pa yom yisotilay Nzamb. Ov, tukat kusend nich usey want ipau wetu wa kutond mutapu tukushakama? Pakwez cha ushon, antu avud akat kusadil nayimp want ipau ni kwiletin mar ayinau ni akwau. Katat chinech chidi chipul chifanyidina kutongin nakash: Ov mutapu ik ukezay Nzamb kupwish mar pakad kuyipwit antu want ipau? Tukushinshikin chipul chinech mu mutu wa mulong ulondwilaku.

[Mazu madia kwishin kwa paj]

[Kamushet kadia pa paj wa 5]

Ov, Uyimp wa Relijon Ukukangeshin Kwitiyij?

Chaushon, relijon ndiy usadina anch antu avud alika kwitiyij anch kudi mwin Kutesh malembil ukweta riy. Kwiyandjik kwa relijon mwinjit, mu terorism, ni mu kulikidil kuyiyipish an akemp kwasala muntu ukata kulembil chakwel alonda anch: “Nitiyijiningap mudiay Nzamb.”

Ov, mulong wak relijon ukat yisu yivud kubachik ku kusal uyimp? Chikwau kand: Antu ayimp asala yom yiyimp mu dijin dia relijon. Bibil watakela kulejan anch usu windjing ukez kuyikel pa win Kristu ni kuusadil mwi njil yidia chinyim ni rusot ra Nzamb. Kambuy Paul wayileja atulam in Kristu anch: “Mukach mwa chisak chen mukez kwikal antu amwing akez kulond yom ya makasu, mulong wa kuyirumbul in kwitiyij chakwel ayikakil ku mutambu wau.”—Midimu 20:29, 30.

Nzamb amumekesha nayimp kudi relijon wa makasu. Pakwez, Dizu dia Nzamb, Bibil dilejen anch relijon wa makasu ndiy umwangina “mash . . . mau antu awonsu a pa mangand ajipau.” (Kujingunik 18:24) Mulong relijon wa makasu wakanganya kuyilej antu piur pa Nzamb wakin, ukweta chakin kamu rukat, ma relijon minam makat kumwang mash ku mes kwa Nzamb.—1 Yohan 4:8.

[Mwin] Kutesh kulembil uyimen antu ovila kuyip mulong wa mar maletinau kudi relijon. Piswimp ap, rukat ra Nzamb pantaliken ni antu awonsu rikez kumubachik chakwel arumburisha marelijon mawonsu ma makasu kusutil kudiay Yesu. Yesu walonda anch: “Avud akez kangel mu dichuku dinidia anch: Mwant Mwant, ov kitwalondap dizu mu dijin diey?’ . . . Chawiy am nikez kayichiril anch: Kand kal nikwijikanyip; ndiokilany kwa, midimu yiukat kusalany yiyimp.”—Mateu 7:22, 23, TMK.