Ov, Kudi Muntu Uteshininga Malembil?

“Nading nidjidjekin piur pa kwikalaku kwa Nzamb. Pakwez, yisu yimwing nading ni kulembilang. Nadingap nichingejina anch muntu kanang wading uteshin, pakwez nafanyidina kwitiyij anch nading nich ruchingej anch muntu kanang wading uteshin. Naburena musangar ni kinadingap nich rutong ap rimwing mu mwom. Nova wom wa kwitiyij mudiay Nzamb mulong natonga anch kudi ching kusu antu aziyila awiy akata kwitiyij mudiay Nzamb.”—PATRICIA,a IRLANDE.

OV, WIYOVAP kal mudi mutapu wovay Patricia? Ov, ukat kulembil ap anch widjidjekin piur pa kwikalaku kwa Nzamb? Anch mwawiy, udiap amwiney widjidjekina piur pa kwikalaku kwa Nzamb. Shinshikin milong yilondwilaku.

◼ Antu 2 200 a mu Grande-Brétagne ipulau alejana anch ching antu 22 pa chitot awiy kusu itiyijina anch kudi Nzamb wakad kumekan watanga mangand ni ukata kutesh malembil. Pakwez, akwau 55 pa chitot ipulau kakatap kulembilang chisu chawonsu.

◼ Antu 10 000 ipulau pa mangand mawonsu amekesha anch, pakach pa antu akwila ayinau anch kitiyijinap kwikalaku kwa Nzamb, piswimp 30 pa chitot akat kulembilang.

Ov, Mulong Wak Idjidjekin?

Ikundj umwing udiokila mu Angleterre utazukinau anch Allan walonda anch: “Nadinga ni kulond anch nitiyijinap mudiay Nzamb mulong nading nitongin anch relijon amusala mulong wa kuyikel antu ni kukimb nfalang. Chikwau kand, anch kwadinga Nzamb, natonga anch, ing kwelap kwikalaku kuburen kutentam mudi kwinoku. Pakwez, yisu yimwing nashakama pakad kulond chom ni kulejan ‘chom ap chimwing.’ Niyipula kand amwinam, ‘Mutapu ik nashikena kwikalaku panap?’”

Muntu ni muntu ukweta yovil mudi yiney ukwet mayingish mend amwinend ma kwidjidjek piur pa malembil mend anch akutwish kumakul. Yisu yivud, kwidjidjek kukutwish kwikal chibudikin cha yipul yakad kwakul, mudi yilondwila ey:

◼ Ov, kudi Sakatang?

◼ Ov, mulong wak relijon ubachikin ku kusaluyimp mwamu?

◼ Ov, mulong wak Nzamb ulikidil mar?

Anch watambul yakul ku yipul yiney, ov, ukutwish kuchingejin nakash mu malembil?

[Dizu didia Kwishin kwa paj]