IKALANY PISWIMP NI NZAMB
“Itany Mu Kulembil, Nzamb Ukez Kukwinkishany”
“Nsalejetu, tulejap niyetu mutapu wa kulembil.” (Luka 11:1) Chinech chidi chipul chamwipulau Yesu kudi muntu umwing pakach pa in kwilej end. Mu chakul chend, Yesu waleta yifanikesh yaad yitulejina mutapu wa kulembil ni chakwel Nzamb atesha. Anch witiyinap anch Nzamb ukat kutesh malembil mey, ukez kusanger anch watesh mutapu wakulay Yesu.—Tang Luka 11:5-13.
Chifanikesh chakusambish chisambidin piur pa muntu ukata kulembil. (Luka 11:5-8) Mu rusangu riner, muntu umwing umwakina ngendj uchuku nakash ni kakwetap yakudia ya kumwinkish. Kudi ngendj, chifanyidin kusal yom swa. Chikalap nchik saa winou, uyil ku chikumbu cha murund nend chakwel amwinkisha yakudia. Chakusambish, murund nend wasambisha kwidjidjek pa kumwandjik mulong dijuku diend dilel. Pakwez, padandamedinay kukokal, ngendj winou witin pakad kuziy djat ni pa chisu chifungwilay murund nend chis ni kumwinkish yakudia.a
Ov, chom ik twilejina mu chilakej chinech piur pa malembil? Yesu utulejin anch tufanyidin kudandamen—kudandamen kwit, kukimb, ni kukokal. (Luka 11:9, 10) Mulong wak? Ov, Yesu wasota kulond anch pitukata kulembil Nzamb ukat kwidjidjek pa kutesh malembil metu? Bwat. Chitongijok cha Yesu chidi anch chinyim ni murund ukata kwidjidjek, Nzamb usotin nakash kutesh malembil ma antu akata kumulembil ni ritiy. Tumekeshin ritiy riner kusutil ku kudandamen kwetu. Kusutil ku kwit chisu ni chisu, tumekeshin anch tuswiridin chakin kamu yom twitina ni twitiyijin chakin kamu anch Nzamb ukutwish kwakul—anch malembil minam mambaten ni rusot rend.—Marko 11:24; 1 Yohan 5:14.
Chifanikesh chakaad chisambidin piur pa ‘ukata kutesh kulembil,’ Yehova. (Kuseng 65:2) Yesu wipula anch: “Ov, kudi umwing wenen atatuku, anch mwanend wamwit insh, ndiy ukumwingish nnak? Ap anch mwanend wamwit diy, ov, ndiy ukumwingishay kapambamb?” Chakul choviken—kwikil tatuku ukutwisha kuyinkish anend chom chiyimp. Parumburilay, Yesu chifanikesh chinech anch: Anch atatuku akad kuwanyin akat ‘kupan yom yiwamp’ kudi anau, “Chawiy Tatukwen udia mwiur ukez kupandakeshamu kupan Mwiku Utumbila kudi awonsu akata kwit”—yipan yipandakena kuwap—yimwitinau kudi anend adia pa divu!b—Luka 11:11-13; Mateu 7:11.
Nzamb usotin nakash kutesh ku malembil ma antu akata kumulembil ni ritiy
Ov, chom ik twilejina kusutil ku chifanakesh chinech piur pa Yehova, ‘ukata kutesh kulembil’? Yesu ukat kutwit chakwel tumumana Yehova mudi Tatuku muwamp usotina kuwanyish maswir ma anend. Chawiy lel, atushalapol a Yehova akutwish kwikal nich want ipau wa kusej kudi ndiy mu kulembil mu michim yau. Ni kwijik anch ndiy ukatin chakwel tushakama nawamp, akutwish kwitiy kwakul ku malembil mau, ap anch chidiap chakul chadingau ni kuchingejin.c
Chilejenau mulong wa kutang Bibil pa Ndol
Luka 7-21
a Chifanikesh cha Yesu chimekeshin yisal ni yaku yadinga ni kusadik yisu yivud. In Yuda amana anch kwakan chading chisend chitumbila. Dijuku diading dikat kwisuk mabot mawanyidina mulong wa dijuku, ading akat kusondam anch yakudia yikepin. Chikwau kand, anch ading atuzwendj, dijuku diawonsu diading dikat kulal pansh mu kapalikany kamwing.
b Yesu wasadina yisu yivud dizu “ukez kupandakeshamu” mu chitongijok chend—waleta yitongijok kusambishin ku kakemp ni kushik ku chijim. Mwin kwilej umwing ulejen anch: “Chitongijok chiding mwamu, ‘Anch A udi wakin, chimeken kamu nakash anch B uwapin ni ndiy.’”
c Chakwel wileja yom yivud piur pa mutapu wa kulembil ni kukutesh kudi Nzamb, tal shapitre wa 17 wa buku Chom ik chakin kamu chifundishinay Bibil? wa palangeshau kudi Atuman a Yehova.