Ov, Mutapu ik Wasambisha Yom Yiney?

Mu mazu makemp ni maswapela, Disambishil udi mukand wa kusambish wa Bibil, urumburil piur pa disambishil dia mangand mawonsu anch: “Pakusambish Nzamb watanga diur ni divu.” (Disambishil 1:1) Kupwa kwa Nzamb kutang mitond ni anam, ndiy wayitanga antu a kusambish, Adam nenday Ev. Ading ashalijandin ni anam mulong antu akwet mikadil yikwetay Nzamb, kuwejaku ni want ipau. Chawiy lel adinga nich chisend piur pa yisal yau. Anch aziyila ku yany ya Nzamb, ela kushakam mudi mwadia rutong ra Nzamb pantaliken ni anvaj a kusambish a dijuku dia antu awonsu ra kushakam mu chisambu, nich mwom uwanyidina pa divu chikupu.

Pakwez, mwangel umwing ap chitang cha muspiritu, chasadila want ipau wa antu mulong wa kuwanyish yisakin yend. Ndiy wikala Satan, charumburik anch “Mwin Kubwambwil.” Palonday kusutil kudi nnak, Satan wamudimba Ev, ni kumulej anch ukez kutambul yiyukish pakad umutakel wa Nzamb. Adam nenday Ev amulondula Satan, ayipisha urund wau ni Sakatang wau. Mulong wa kutond kwau kuyimp, anvaj etu a kusambish ashadisha mwom wa chikupu ni atuswanisha etu awonsu chitil, kuburen kuwanyin ni rufu.

Kapamp kamwing, Nzamb walejana rusot rend ra kukarumun mwikadil winou uyimp ni kupan kudi anend a Adam mutapu wa kutambul kand mwom wa chikupu. Nzamb wabwaka anch ‘mbut’​—ap muntu umwing wa pakampwil—​ukez kumushesh Satan rawonsu ni kudiosh mar mawonsu maletau kudi Satan, Adam, nenday Ev. (Disambishil 3:15) Ov, nany wafanyina kwikal “mbut” yiney? Yela kwijikan kupwa kwa machuku.

Pa chisu chimwing, Satan wapakisha kukangesh rutong ruwamp ra Nzamb. Uyimp ni chitil yapandakana swa. Nzamb wakwata mupak wa kuyishesh antu ayimp ku mabeb. Ndiy wamuleja Nowa muntu utentamina anch atunga waat​—mushet ujim wakad kwandam mu mem—​mulong wa kwipandish amwinend ni dijuku diend, pamwing ni anam afanyinay kwandjik mu waat.

Muvu umwing kupwa kwa Mabeb, Nowa ni dijuku diend adiokala mu waat ni kushakam pa divu dishitwila. Pakwez ‘mbut’ yading kandikal yimekana.

​—Yimedin pa Disambishil shapitre wa 1-11; Jud 6, 14, 15; Kujingunik 12:9.