Nzamb Utenchikin Yom Mulong wa Kuyipandish Antu

Nzamb washilamu kudi kashalapol Aburaham anch ‘mbut’ ikez kudiokal pakach pa an a Aburaham. Kusutil kudiay ndiy, antu a “michid yawonsu” akez kutambul yiyukish. (Disambishil 22:18) Jakobu mwijukurend a Aburaham waya mu Idjibit, ni kwinikwa dijuku diend diavulijana ni dikala muchid wa pasak wa in Isarel.

Kupwa, mu Idjibit, Farao umwing mwin chisum wayiteka in Isarel mu uswik djat ni palangwishay Nzamb muprofet Moses, wadiosha muchid winou mwi ngand yiniya kusutil ku kwauril mu chilay mem ma Karung Usunz. Kupwa, Nzamb wayinkisha in Isarel yijil, kuwejaku ni Yijil Dikum, mulong wa kuyitakel ni kuyilam. Yijil yiney yita yakupesh mulong wa dilikishin dia yitil. Pamupepilau kudi Nzamb, Moses wayileja in Isarel anch Nzamb ukez kayitumin muprofet mukwau. Muprofet winou wafanyidina kwikal ‘mbut’ ya kushilamu.

Pasuta piswimp yitot ya mivu yitan, Nzamb washilamu kudi Mwant David anch muntu ukweza, ap ‘mbut’ yatakelau kulejan mu Chir cha Eden, yikez kuyikel mu want wa chikupu. Muntu winou ukez kwikal Mesia, mwin Kupandish watekau kudi Nzamb mulong wa kuyikol antu ni kuchirish Paradis pa divu.

Kusutil kudi David ni aprofet akwau, Nzamb walejana pakemp pakemp yom yivud puir pa Mesia. Awiy abwaka anch ndiy ukez kwikal muwamp ni mwin kwikepish ni mu umutakel wend ujim, kuburen kutentam, ni njit yikez kupwa. Antu awonsu akez kwikal mu chisambu umwing ni mukwau ap ni annam. Mayej, mar, ni rufu​—yakad kwikal mu rutong ra kusambish ra Nzamb—​akez kayidiosh, ni antu afila kal akez kwikal kand aom pa divu.

Nzamb wabwaka kusutil kudi muprofet Mika anch Mesia ukez kavadikin mu Bethlem ni kusutil kudi muprofet Daniel anch akez kamujip. Pakwez, Nzamb wela kumuvumbul Mesia kudiokal ku rufu ni kumwikadish Mwant mwiur. Daniel watakela kuman Want wa Mesia mutapu ukezau kuswinkan mant makwau mawonsu chikupu. Ov, Mesia weza chakin kamu mudi mwatakelau kulejan?

​—Yimedin pa Disambishil, shapitre wa 22-50, ni Kubudik, Kuvurik Yijil, 2 Samwel, Kuseng, Isay, Daniel, Mika, Zakariy 9:9.