Ov, Nzamb Ukat Kukutesh?

YOM TWILEJIDINA KU YITANG

Tong piur pa urund wa piswimp nakash ukutwishau antu kwikal nich​—urund wa ampamb afanakena. Ading arund a piswimp nakash. Nancy Segal, direkter wa Shikol ya Kwilej an Ampamb ni udia amwinend mpamb ulondin anch an ampamb amwing “akutwish kwambamb ni kuteshijan nawamp umwing ni mukwau.” Mband umwing urumburil urund udia pakach pend ni mpand nend anch: “Muntu ni muntu wij yom yawonsu piur pa mukwau.”

Yom ik yikata kusal anch ateshijana nawamp mwamu? Kukimbijol kumwing kumekeshin anch ndond ni dilij yikwet yibachikin kampand, pakwez chimeken anch ma gènes (chikunku cha selil chikweta jinsangu piur pa mutapu ukwikalay muntu) mafanakena makwetau an ampamb mawiy masadina anch yom yiney yikala mwamu.

TONG BIL: Sakatang watutanga umwij nawamp nakash muntu win mwawonsu pakach petu kusutamu muntu mukwau. Chawiy, nfund a kuseng David walonda anch: “Wannunga mwivumu mwa makwam. Piwatanga mafup mam ni kumanung mwivumu mwa makwam, pimasambisha kukul mu ujindj, . . . Pinading kand kal nivadik, ey wading kwey wingij. [Yikunku yam yawonsu ading ayifunda kal mu mukand wey].” (Kuseng 139:13, 15, 16) Ching Nzamb kusu ndiy wija ni uteshina nawamp ma gènes tukweta ni yom yawonsu yasala mujimbu wetu. Ronganyin rikurikina rikwetay Nzamb piur petwetu ni piur pa ma gènes metu ritwinkin kashinsh anch wij nawamp nakash kamu kachom ni kachom piur petu.

YOM YITUFUNDISHINAY BIBIL PIUR PA RONGANYIN RA NZAMB

David walembila anch: “A! [Yehova], Ey wampaka kal, wangijika. Pinikushakama ap pinikutumbuka, ey wij yisalijok yam. Pinakadia kal kulond, ey wij kwey yom yawonsu yinisotila kulond.” (Kuseng 139:1, 2, 4) Chikwau kand, Yehova wij nawamp yovil yetu ya mukach ni ukat “kwonganyin kurijek kwa muntu ni yitongijok yend yawonsu.” (1 Jinsangu 28:9; 1 Samwel 16:6, 7) Maverse minam mamekeshin yom ik piur pa Nzamb?

Ap anch tukutwishap kumekesh yitongijok ni yovil yetu mu mazu chisu tumulembila Nzamb, Sakatang wetu kakatap ching kuman yom tusadina pakwez ukat kuman kand mulong wak tusadina yom yiney. Chikwau kand, ukat kwijik yom yiwamp tukatina kusal, ap anch mimbu tukweta yitukangeshin kuwanyish yom tutongina mu michim yetu. Chakin kamu, mulong Nzamb wateka rukat mu michim yetu pa ndond ya kusambish, ukatin ni udi tayad mulong wa kuman ni kutesh yitongijok ni yovil yetu ya rukat.​—1 Yohan 4:7-10.

Mifund yitukasikeshin anch

• “Mes ma [Yehova] mayitadil in kutentam, ni matu mend makat kutesh kulembil kwau.”​—1 PITA 3:12.

• Nzamb ushidinamu anch: “Nikukulej ey ni kukwijikish njil yiufanyidina kulondul. Nikukutal ni kukuyul.”​—KUSENG 32:8.

NZAMB UDI MWIN RANAKEN NAKASH

Ov, kwijik anch Nzamb ukat kutesh milong ni yovil yetu kukutwish kutukwash kujijamen mar metu? Tal yom yamushikena Anna, wa mu Nigeria. Urumburil anch: “Niyipulang anch chidi cha usey kwikal mwom mulong wa yom yiyimp yanshikena. Nading mwadia mufu ni nading nilidin mwanam changadim wading uyedina mu rupital mayej ma kuvul kwa mem mu wong (hydrocéphalie) ni ajingunina kand anch am nikwet kanser wa diyel ni chading chifanyidin kwimbaril, kwingok ni mon ya kanser ni kwinsal radiothérapie. Chading chinkasikedin nakash kwikal mu rupital pa chisu chawiy chimwing kumulam kand mwanam wading uyedina.”

Yom ik yamukwasha Anna kujijaman? “Natongijokina nakash pa mukand wa Filip 4:6, 7, ulondina anch ‘chisambu cha Nzamb chisutila ronganyin ra antu chikulam michim yen ni yitongijok yen.’ Chisu ni chisu navurikang mukand winou, niyova anch nidi piswimp nakash ni Yehova ni nijika anch winteshin nawamp kusutamu am amwinam. Natambula kand kukasikesh kudiokila kudi akadivar nau anambaz akatish a mu chikumangen cha win Kristu.

“Ap anch nidandamedin kurish ni ukash wa mujimbu wam, pakwez mashakamin mam ni ma mwanam maswimpin. Mulong tumukwet Yehova ku mutambu wetu, twilejin anch chiwapinap kwikal ni yitongijok yiyimp chisu turishina ni yakamish. Jakobu 5:11 utwinkin kashinsh anch: ‘Antu akata kwiman dang, tuyij akwet musangar. En wijany rusangu ra kushimpish kwa muchim kwa Job, chad wijany yom yamusadilau kudi [Yehova]. Mulong [Yehova] wizwil nich kuwap ni riy.’” Yehova wijika nawamp yom yamushikena Job, niyetu tukutwish kwikal nich kashinsh anch wij kamulong kin kawonsu turishina nich.