Ov, Nzamb Ukwet Ranaken?

YOM TWILEJIDINA KU YITANG

Ranaken “udi ukaliweny wa kwijik ap kwov yovil ya muntu mukwau mu kuyitongin mutapu uyikwikala anch mudi yakushiken ey.” Dokiter Rick Hanson ukweta ukaliweny mu ukash wa manangu ulondin anch “ranaken udi mwikadil wa chivadik.”

TONG BIL: Mulong wak tukwet ukaliweny wa kumekesh ranaken, mwikadil wakad kwikal ku yitang yikwau yin yawonsu? Bibil urumburil anch Nzamb watanga antu mu chifu chend. (Disambishil 1:26) Atutanga mu chifu cha Nzamb chakwel tutwisha kumekesh wuntu wend ni kumekesh mu chilik kanang mikadil yend yiwamp. Chawiy, anch ranaken rikat kuyibachik antu kuyikwash antu akwau, akat kumekesh ranaken ra Sakatang wau mwin ranaken, Yehova Nzamb.​—Jinswir 14:31.

YOM YITUFUNDISHINAY BIBIL PIUR PA RANAKEN RA NZAMB

Nzamb ukwet ranaken mulong wetwetu ni ukisin pakatay kutuman tukat kuman mar. Piur pa antu a mu Isarel wa pasak amana mar nakash mu uswik mu Idjibit kupwa kand mu mivu 40 mwi mpay, Bibil ulondin anch: “Ndiy wamana nau mar.” (Isay 63:9) Tal anch Nzamb kadingap kusu umen mar mau. Wova kamu kusansan kwau. Walonda anch: “Nij mar mau.” (Kubudik 3:7) Nzamb ulondin anch: ‘Muntu mwawonsu ukupukwinanya en, upukwin ku kan a dis kam.’ (Zakariy 2:8) Anch antu akwau atumesh mar, niyend ukat kwov kusansan pamwing niyetu.

Bibil utwinkishin kashinsh anch ap anch tukutwish kutong anch tufil nich ni tukwetap usey mulong wa kutambul ranaken ra Nzamb, “Nzamb udi mujim kupandakanamu michim yetu, ndiy wij kand yom yawonsu.” (1 Yohan 3:19, 20) Nzamb utwij nakash kusutamu mutapu twiyija ayinetu. Ukat kuman kamu yom yikata kutushiken, yitongijok yetu ni yovil yetu. Ukat kutwanaken kamu.

Mifund yitukasikeshin anch

• “Piukwinlembilany[a], am [Yehova] nikutesh kulembil kwen, ni piukwintazukanya, am nikukwakulany.”​—ISAY 58:9.

• “Am amwinam nij [y]inatenchika kal mulong wenen. Kutenchik kwam kudi kwa kukuletilany kuzangam, pakwez mar, bwat. Kudi kand kwa kukuletilany ruchingej ra kurutu. Chad ukez kantazukany ni kwinlembil, chad am nikez kakwakulany.”​—JEREMIY 29:11, 12.

• ‘Tekap mansoj mam mu mulond wey. Kamafundilap mu mukand wey?’​—KUSENG 56:8.

NZAMB UTUMEN, UTUTESHIN NI UTUKATIN

Ov, kwijik anch Nzamb ukat kutwanaken kukutwish kutukwash kurish nich yakamish yetu? Tal yom yamushikena Maria:

“Namana anch mwom wading ukash ni wakad kutentam kupwa kwa kwov kusansan kukash kwa kufish mwanam ikundj wa mivu 18 kupwa kwa kuman mar mu mivu yaad mulong wa mayej ma kanser. Namujimena Yehova mulong kakwashap ni kumwok mwanam!

“Kupwa kwa mivu musamban, murund wa rukat ni wa ranaken wa mu chikumangen wantesha panading nikat kumulej yovil yam anch Yehova kankatinap. Kupwa kwa kwintesh nawamp mu asaa avud pakad kwinkaturij, wanjimbwila verse wanshika nakash ku muchim. Wading 1 Yohan 3:19, 20, ulondina anch: ‘Nzamb udi mujim kupandakanamu michim yetu, ndiy wij kand yom yawonsu.’ Murund winou wanrumburila anch Yehova wij mar metu.

“Chikalap nchik mwamu, chading chinkasikedin nakash kulikap ujim wam! Kupwa natanga Kuseng 94:19, ulondina anch: ‘Mu kuvul kwa minan mu muchim wam, kwongoj kwey kukat kwinkasikesh ni kwinlembijek.’ Niyova kamu mudi verse winou amufunda mulong wamam! Kupwa chad, namana anch chading cha kwongoj nakash kumulej Yehova piur pa yakamish yam nich kashinsh anch winteshin.”

Chidi chikasikeshina mud ik kwijik anch Nzamb ukat kututesh ni utukatin! Pakwez, mulong wak lel kudi mar nakash mwamu? Ov, chidi mulong Nzamb ukat kutupup mulong wa yom yiyimp tusadina? Ov, Nzamb ukez kapwish mar mawonsu? Yipul yiney akuyisambin mu mitu ya milong yilondwilaku ey.