Mushejina Nzamb Piswimp
Woviling Kusansan Kwetu
Yohan 11:33-35
“RANAKEN ridi mar mey mu muchim wam.” Mwamu mwarumburilay mishoner umwing ipal Kaman wa Yehova ngikadil yiney ya usey. Yehova Nzamb ndiy wa kusambish ku ranaken. Woviling kusansan kwa mar mamenau antu end. Ov, mutapu ik tuchija? Ranaken ra Yehova rimeken kamu mu mazu ma Yesu padingay pa divu. (Yohan 5:19) Chilakej, tushinshikinany rusangu risambidinau mu Yohan 11:33-35.
Pafay Lazar murund a Yesu, Yesu waya ku ul wa Lazar. Choviken, ampanyend a Lazar, Mariy ni Marta, adinga nich ushon nakash. Yesu wadinga udikatin nakash dijuku dined. (Yohan 11:5) Chad chom ik chikusalay? Rusangu rilondil anch: “Yesu wamumana Mariy ukat kudil, wamana kand antu ezay nau niyau akat kudil. Chawiy Yesu wova ushon, wanenganan nakash. Chad wayipula anch: ‘Ov, wamujikinany kwisu?’ Awiy amwakula anch: ‘Nsalejetu, ez utal.’ Yesu wadila.” (Yohan 11:33-35, MM) Ov, Yesu wadila mulong wak? Chakin kamu, murund nend mukatish Lazar wafa, pakwez Yesu wadinga usotil kumuvumbul. (Yohan 11:41-44) Ov, kudi chom chikwau chamukwata Yesu ku muchim?
Shinshikinany kand mazu majimbwilau madia kwiur oku. Shinshikinany anch chisu Yesu chamumanay Mariy ni antu adinga pamwing nend end adil, Yesu “wova ushon” ni “wanenganan nakash.” Dizu dia rudim ra kusambish rasadilau pa ndond pinap rilejen yovil yikash.a Yesu wakwachika nakash nich yom yamanay. Kwovu yovil yikash yovay kwamekena patok pa chisu chadilay. Patok kamu, muchim wa Yesu wova kusansan kwovau antu akwau. Ov, washikenap kal ku kudil mulong muntu ubangidina wadinga udidin?—Rome 12:15.
Ranaken ra Yesu ritwinkishin njingunin yikash ya kwandam mu ngikadil ni kwijik mutapu wovilingay Tatukwend, Yehova. Vurikany anch Yesu wamekesha muchifanyidina kamu ngikadil ya Tatukwend chawiy chatwishay kulond anch: “Muntu mwawonsu wamena kal am, wamumen kal Tatuku.” (Yohan 14:9) Komb pitutangina anch “Yesu wadila,” tukutwish twikal nich kashinsh anch Yehova woviling kamu kusansan kwa in kumwifukwil end. Chakin kamu, in kufund Bibil akwau akasikeshidin uman winou. (Isay 63:9; Zakariy 2:8) Yehova udi Nzamb wa ranaken nakash!
Ranaken riyipwitining antu. Pituziyila ap kunenganan, tukutwish twamusejin mbay ukutwisha kutesh mikadil yetu ni kwov kusansan kwetu. Tusejidin piswimp kudiay Yehova mu chilik ik, Nzamb mwin ranaken wovilinga kusansan kwetu ni uteshining diyingish dia kudil kwetu!—Kuseng 56:8.
[Mazu madia kwishin kwa paj]
a Dizu dia Grek diakarumunau anch “wadila” chisu chivud dirumburikining “kushikok kudil,” pakwez dizu diasadilau mulong wa kurumburil mutapu wadilay Mariy ni antu akwau dirumburikining “kuboy kudil.”