Fundish Uyakin

1, 2. (a) Wisu wadinga mudimu wa usey nakash mu mwom wa Yesu ni mulong wak? (b) Yom ik tufanyidina kusal mulong wa kusal nawamp mudi in ‘kusal mudimu pamwing ni Nzamb’?

YESU KRISTU wading nsongamabay ni kupwa wading mulej. (Marko 6:3; Yohan 13:13) Wileja kusal midimu yiney nawamp nakash. Mulong wading nsongamabay, wileja mutapu wa kusadin yom ya mudimu mulong wa kusal chom cha mabay chiwamp. Ni mulong wading mulej, wasadina ronganyin rend rikurikina ra Mifund mulong wa kukwash antu kutesh uyakin wa mu Dizu dia Nzamb. (Mateu 7:28; Luka 24:32, 45) Pawanyishay Yesu mivu 30, wimika mudimu wend wa kusong mabay ni wikala mulej mulong wading wij anch wawiy wading mudimu wa usey nakash wafanyinay kusal. Walonda anch kulejan rusangu ruwamp ra Want wa Nzamb diawiy diyingishin dimwing diamutuminau kudi Nzamb pa divu. (Mateu 20:28; Luka 3:23; 4:43) Mu mwom wend, Yesu washinshikina pa mudimu wa kulejan rusangu ruwamp ni wakata anch antu akwau asala mwamu.​—Mateu 9:35-38.

² Avud pakach petu kadiap ansongamabay, pakwez etu awonsu tudi in mudimu wa kulejan akata kuyilej antu akwau rusangu ruwamp. Mudimu winou udi wa usey nakash mulong tuusadin pamwing ni Nzamb. Chawiy, atutazukin anch in ‘kusal mudimu pamwing ni Nzamb.’ (1 Korint 3:9; 2 Korint 6:4) Twitiyijin yom yalonday nfund a Kuseng anch: “Mazu mey mawonsu . . . madi makin.” (Kuseng 119:159, 160) Mazu ma Yehova madi makin. Chawiy tufanyidina kwikal nich kashinsh anch tudi in “kulejan dizu dia uyakin nich kutentam” mu mudimu wetu wa kulejan. (Tang 2 Timote 2:15.) Chawiy tudandamedina kusal usu wa kwikal nich ukaliweny wa kusadin Bibil, chom chetu cha pakampwil mulong wa kuyifundish antu akwau piur pa Yehova, Yesu, ni piur pa Want. Mulong wa kutukwash kusal nawamp mudimu wetu wa kulejan, dirijek dia Yehova diatwinkishin kal yom yikwau ya mudimu ni tufanyidin kwijik mutapu wa kuyisadin. Yom yiney yidi mu Mushet Wetu wa Yom ya Kufundish Nich.

3. Pa chom ik tufanyidina kushinshikin mu mudimu wetu wa kulejan, ni mutapu ik utukwashina Midimu 13:48 kusal mwamu?

³ Ukutwish kwiyipul anch mulong wak tukata kulond anch Mushet wa Yom ya Kufundish Nich pa ndond pa kulond anch Mushet wa Yom ya Kulejan Nich. Chidi mulong “kulejan” kurumburikin kupan uruu, pakwez “kufundish” kurumburikin kurumburil uruu chakwel muntu atesha kurumburik kwa yom yiteshinay ni yimubachika kusal kukwatijan ni yom yilejinay. Mu chisu chinech chikemp chashala kal cha mangand minam mayimp, tufanyidin kwimen pa kusambish malejan ma Bibil ni kuyifundish antu uyakin chakwel atwisha kwikal in kwilej a Kristu. Chinech chirumburikin anch tufanyidin kukimb nich mushiku antu awonsu ‘awanyidina mulong wa kutambul mwom wa chikupu’ ni kuyikwash chakwel asambish kumusadin Yehova.​—Tang Midimu 13:44-48.

4. Mutapu ik tukutwisha kuyitan antu ‘awanyidina mulong wa kutambul mwom wa chikupu’?

⁴ Mutapu ik tukutwisha kuyitan antu ‘awanyidina mulong wa kutambul mwom wa chikupu’? Kudi in Kristu akusambish, mutapu umwing kusu wa kuyitan antu inay wading wa kulejan. Yesu wayileja in kwilej end anch: “Piukushikany mu musumb ap mu ul, [kimbany] muntu wa kashinsh uwanyidina kukwakany.” (Mateu 10:11) Niyetu tufanyidin kusal mwamu nlel. Chakin kamu, anch antu kadiap in kashinsh, adi in chibud ap kamubanginapaku chakin Nzamb, tufanyidinap kuyichingejin anch akutesh rusangu ruwamp. Tukimbin antu adia in kashinsh, ikepishina, akatina kamu chakin kwijik uyakin. Tukutwish kufanikesh kuyikimb antu kwinoku ni yom yasalangay Yesu chisu chadingay nsongamabay. Kurutu kwa kusal chom kanang, mudi chis, mpand, ap chom chikwau, chakusambish wakimbang dibay diwamp. Kupwa wanonang mushet wend wa yom ya mudimu, wasadinang ukaliweny wend, kupwa wasalang chom chikatinay. Chawiy chimwing kand nlel, tufanyidin chakusambish kuyikimb antu akashinsh, kupwa tukutwish kusadin yom yetu ya mudimu ni ukaliweny mulong wa kuyikwash kwikal in kwilej.​—Mateu 28:19, 20.

5. Yom ik tufanyidina kwijik piur pa yom yidia mu Mushet wa Yom ya Kufundish Nich? Let chilakej. (Tal chipich cha kwinsambishin.)

⁵ Mu mushet wa yom ya mudimu, chom ni chom chikwet mudimu wach wa pakampwil. Chilakej, tong piur pa yom yasadinay Yesu mudi nsongamabay.a (Tal mazu ma kwinshin.) Wading uswirikedin yom ya kupim nich, ya kufund nich, ya kukatul nich, ya kufuril nich ni ya kufet nich mabay, pamwing kand ni yom ya kwisikesh nich yikunku ni ya kuyibomb nich pamwing. Chilik chimwing, chom chawonsu chidia mu Mushet Wetu wa Yom ya Kufundish Nich chikwet mudimu wach wa pakampwil. Chawiy el tumanany mutapu wa kusadin yom yiney ya usey.

YOM YA KWIYIJIKISH NICH KUDI ANTU

6, 7. (a) Mutapu ik ukata kusadin makart ma kwiyijikish nich? (b) Mulong wak tukat kusadin maladikij ma yikumangan?

⁶ Makart ma Kwiyijikish Nich. Tudi tukemp tukemp pakwez tudi tuyom twa usey nakash mulong wa kwiyijikish kudi antu ni kuyitum pa kapend ketu ka web ka jw.org. Pa kapend ketu, akutwish kwilej yom yivud piur petu ap kand kwit dilejan dia Bibil. Antu 400 000 ni kusut adia kulemp nakash itin dilejan dia Bibil pa jw.org, ni yitot ya antu akat kusal mwamu dichiku diawonsu! Ukutwish kusend makart makemp ni kumasadin chisu wambambina nau antu utanina dichuku ni dichuku.

⁷ Maladikij. Maladikij machapinau mulong wa yikumangan yetu malondin anch: “Tukutazukin chakwel wileja Bibil ni Atuman a Yehova.” Kupwa afundinap kand anch “ku yikumangan yetu ya patok” “ap ni muntu ukwileja nend.” Chawiy diladikij dikat kuyilej antu chitudia ni kuyitazuk kand antu “[akweta] kuswir kwa yom ya Nzamb” mulong ilej netu Bibil. (Mateu 5:3) Chakin kamu, tuyitazukining antu ku yikumangan yetu ap anch itiyijin dilejan dia Bibil ap bwat. Anch ez ku yikumangan yetu, akutwish kuman mutapu ukutwishau kwilej yom yivud mu Bibil.

8. Mulong wak chidi cha usey kudi antu kwez ku yikumangan ap kapamp kamwing kwau? Let chilakej.

⁸ Chidi cha usey kudandamen kuyitazuk antu mulong wa kwez ku yikumangan yetu ap kapamp kamwing. Mulong wak? Mulong anch ez akuman anch Atuman a Yehova afundishining uyakin udia mu Bibil ni kuyikwash antu ashiken kumwijik Nzamb, pakangenya marelijon ma makasu kusal mwamu. (Isay 65:13) Chilakej, ambay a uruw amwing a mu États-Unis, atazukinau anch Ray ni Linda amana kushalijan kwinoku kwasut kal mivu. Ading amwitiyijin Nzamb ni ading akatin kumwijik nawamp. Chawiy akwata mupak wa kuya mu ma egliz mawonsu ma mu musumb wau ni ading akimbin yom yaad kurutu ikala a mu egliz kanang. Chakusambish ading akwet kuswir kwa kwilej chom kanang mu egliz, ni cha kaad ading akatin kuman antu a mu egliz adjadina nawamp mudi antu amusadidina Nzamb. Asala mwamu mu mivu yivud nakash mulong marelijon mading mavud nakash. Pakwez aziya nakash. Kilejap chom ap chimwing, ni antu a mu ma egliz ading adjadin nayimp nakash. Kupwa kwa kuya mu egliz wa nsudien, Linda waya mu mudimu ni Ray wachirika ku chikumbu. Pading pachirikinay wamana Chot cha Want. Walonda anch, ‘El nandamamu bil ni nimana yom yisadikinamu.’ Chakin kamu, yiney yading yom yiwamp yamanay! Antu awonsu ku Chot cha Want ading awamp ni akweta musangar ni ading adjadin nawamp nakash. Ray washakama kurutu ni wakata yom yading yilejay dichuku dinidia! Yom yiney yituvurishin yom yalonday Paul piur pa muntu weza ku chikumangan kapamp ka kusambish ni walonda anch: “Chakin, Nzamb udi ni yenen!” (1 Korint 14:23-25) Kupwa, Ray wasambisha kuya ku yikumangan Diarubing diawonsu. Kupwa kand wasambisha kuya ku yikumangan ya mukach mwa rubing. Linda niyend wasambisha kuya ku yikumangan, ni ap anch ading ni mivu 70 ni kusut, asambisha kwilej Bibil ni atambula dibatish.

YOM YA KUSAMBISH NICH MAMBAMB

9, 10. (a) Mulong wak matrak maswapel kumasadin? (b) Rumburil mutapu wa kusadin trakt Ov, Want wa Nzamb Chom Ik?

⁹ Matrakt. Tukwet matrakt chinan mu mushet wetu wa yom ya kufundish nich. Maswapel nakash kusadin ni makwashin nakash mulong wa kusambish mambamb. Kudiosh pabudishinau trakt wakusambish wa matrakt minam mu muvu wa 2013, amachapin kal mamiliyar matan! Matrakt madi mutapu umwing. Chawiy anch wilej mutapu wa kusadin trakt umwing, ukutwish kwijik mutapu wa kumasadin mawonsu! Mutapu ik ukutwisha kusadin trakt mulong wa kusambish mambamb ni muntu kanang?

¹⁰ Pamwing ap ukatin kusadin trakt Ov, Want wa Nzamb Chom Ik? Muleja muntu chipul chidia piur, ni mwipula anch: “Ov, wiyipwilap kal anch Want wa Nzamb chom ik? Ukutwish kulond anch . . . ?” Kupwa mwipula anch utondin chakul ik pakach pa yakul yiney yisatu. Pa ndond pa kulond anch chakul chend chiwapin ap chiyipin, buril kwey trakt mukach pa ndond pafundinau anch “Chilondinay Bibil” ni tang maverse malejenau, wa Daniel 2:44 ni Isay 9:6. Kwinsudien kwa mambamb, mwipula chipul chidia mwinshin mwa mutu wa mulong ulondina anch “Cha Kutongijokin” chilondina anch: “Ov, mwom ukwez kwikal mutapu ik mwinshin mwa umutakel wa Want wa Nzamb?” Ukutwish kwakul chipul chinech piukumuchirikina muntu. Chisu ukumuchirikina muntu winou, ukutwish kusadin dilejan dia 7 dia broshir Rusangu Ruwamp Ridiokila Kudi Nzamb! udia chom chimwing pakach pa yom yivud yakusambish nich malejan ma Bibil.

YOM YIKATA KUKASIKESH KUSANGER BIBIL

11. Magazet metu amabudishin mulong wa chom ik, ni yom ik tufanyidina kwijik?

¹¹ Magazet. Chinong cha Kalam ni Réveillez-vous! madi magazet mapalangeshinau ni kukarumun nakash pa mangand mawonsu! Mulong antu a mu jingand jivud akat kutang magazet minam, mitu ya milong ya pa chibur akat kuyisal chakwel yisangaresh antu a kwi ndond kwawonsu. Tukutwish kusadin magazet minam mulong wa kuyikwash antu kushinshikin pa chom chidia cha usey nakash mu mwom nlel. Pakwez, chakusambish tufanyidin kwijik anch gazet kampand amubudishin mulong wa antu a mutapu ik.

12. (a) Réveillez-vous! amubudishin mulong wa anany, ni ukwet chitongijok ik? (b) Yom ik yiwamp yiwamena mu kusadin Réveillez-vous!?

¹² Réveillez-vous! Amubudishin mulong wa antu akad kwijik chom ap ija yom yikemp piur Bibil. Pamwing ap kijap chom piur pa mafundish ma win Kristu, ap kachingejidinap kamu relijon ap kakutwishap kuchingejin anch Bibil ukutwish kuwapish mwom yau. Chitongijok cha pa dishin cha Réveillez-vous! chidi cha kuyinkish antu akata kumutang kashinsh anch Nzamb udiaku. (Rom 1:20; Hebereu 11:6) Ukat kuyikwash kand in kutang kwikal nich ritiy anch Bibil ‘udi chakin kamu dizu dia Nzamb.’ (1 Tesalonik 2:13) Ma nimero masatu mabudishinau mu muvu wa 2018 mading makwet mitu ya milong ey: “Le Chemin du Bonheur ,” “12 Clés du Bonheur Familial ,” ni “Quand on Perd Quelqu’un Qu’on Aime.”

13. (a) Chinong cha Kalam cha antu awonsu achibudishin mulong wa anany? (b) Yom ik yiwamp yiwamena mu kusadin Chinong cha Kalam cha antu awonsu?

¹³ Chitongijok cha pakampwil cha Chinong cha Kalam cha antu awonsu chidi cha kurumburil mafundish ma Bibil kudi antu akweta kalimish kampand mulong wa Nzamb ni mulong wa Bibil. Akutwish kwijik yom yimwing piur pa Bibil, pakwez kateshinap kamu nawamp yom ik yifundishinay. (Rom 10:2; 1 Timote 2:3, 4) Ma nimero masatu mabudishinau mu muvu wa 2018 makwil ku yipul yiney: “Ov, Bibil Uchikwet Usey ni Nlel?,” “Mutapu ik Ukwikala Machuku ma Kurutu?,” ni “Ov, Nzamb Ukat Kukubangin Kamu Ey?”

YOM YIKATA KUKASIKESH

14. (a) Mavideo manying madia mu Mushet Wetu wa Yom ya Kufundish Nich amabudishin mulong wa yom ik? (b) Yom ik yiwamp wamena mu kutadishan mavideo minam?

¹⁴ Mavideo. Pa chirung cha Yesu, yom ya mudimu ya nsongamabay yading yakusadin ching ku makas. Pakwez nlel, ansongamabay akwet kand yom yisadina nich kasu ka nzembu mudi sii, mesh, ni ponceuse. Pitukata kulejan nlel, kuwejin pa yichap yibudishinau pa mapaper, tukwet kand mavideo mawamp ma kuyitadish antu. Mavideo manying pakach pa mavideo minam madia mu mushet wetu wa yom ya kufundish nich mawiy am: Ov, Mulong Wak Kwilej Bibil?, Ov, Yom Ik Yisadikininga pa Chisu cha Dilejan dia Bibil?, Ov, Yom Ik Yisadikininga ku Chot cha Want?, ni Atuman a Yehova—Adi Anany? Mavideo miswimp akutwish kumatal mwinshin mwa aminit aad, ni makwashin nakash kwambamb ni muntu kapamp ka kusambish. Mavideo malemp tukutwish kumasadin chisu tumuchirikidina muntu ni kudi antu akweta chisu nakash. Mavideo minam yidi yom ya mudimu yiwamp nakash mulong makutwish kuyibachik antu kwilej Bibil ni kuya ku yikumangan.

15. Video umwing pakach pa mavideo metu ukutwish kwikal ni yibudikin ik anch muntu wamutal mu dizu diend dia chivadik? Let chilakej.

¹⁵ Chilakej, nambaz umwing wamusankana mband umwing wadiokala mwi ngand ya Micronesie ni mband winou dizu diend dia chivadik didi Yapese. Nambaz winou wamutadisha video, Ov, Mulong Wak Kwilej Bibil? mu dizu dia Yapese. Pasambishay video kulond, mband winou walonda anch: “Dined didi dizu diam. Nitiyinap! Alondin kamu mudi mulondiningau pa ditung dietu. Alondin dizu diam!” Kupwa walonda anch ukutang ni kutal yom yin yawonsu yidia pa jw.org mu dizu diend. (Ilakej ni Midimu 2:8, 11.) Chilakej chikwau chidi cha nambaz wa mu États-Unis ukweta mwipwend ushicha mu kontina mukwau. Wamutumina mesaj ma video winou mu dizu diend. Mwipwend watala video winou ni wamufundina anch: “Chikunku chilondina piur pa muntu muyimp utakedila mangand chansangareshang nakash. Nakwatin mupak wa kwilej Bibil.” Chinech chisangareshin kamu nakash mulong muntu winou wading ushich mwi ngand yading yikangeshinau mudimu wetu!

YOM YA KUFUNDISH NICH UYAKIN

16. Rumburil chitongijok cha pakampwil cha broshir mwawonsu: (a) Mutesha Nzamb ni Ikal ni Mwom Chikupu. (b) Rusangu Ruwamp Ridiokila Kudi Nzamb! (c) Ov, Anany Asadina Rusot ra Yehova Nlel Unou?

¹⁶ Mabroshir. Mutapu ik tukutwisha kufundish uyakin kudi muntu wakad kwijik kutang nawamp ap pakad kwikal ni mikand yimedina pa Bibil mu dizu diend? Tukutwish kusadin broshir Mutesha Nzamb ni Ikal ni Mwom Chikupu.b (Tal mazu ma kwinshin.) Chom chikwau chiwamp nakash cha kusambish nich malejan ma Bibil udi broshir Rusangu Ruwamp Ridiokila Kudi Nzamb! Ukumulej muntu mitu ya milong 14 yidia kwinyim kwa broshir winou ni ukumwipul anch wisu mutu wa mulong ukusangareshina nakash. Kupwa, sambish kwilej nend mutu wa mulong ukutonday. Ov, wasadinap kal mwamu piuyichirikidining antu? Broshir wa kasatu mu mushet wetu udi Ov, Anany Asadina Rusot ra Yehova Nlel Unou? Broshir winou amubudishin mulong wa kuyifundish nich in kwilej Bibil piur pa dirijek dietu. Mulong wa kwilej mutapu wa kumusadin broshir winou, pa chisu chawonsu cha dilejan dia Bibil, tal Mudimu ni Mashakamin ma In Kristu​—Mukand wa Chikumangan wa Ngond wa 3, 2017.

17. (a) Chisu chitongijok cha pakampwil cha buku ni buku wa kwilej? (b) Yom ik yifanyidinau kusal antu awonsu abatishinau, ni mulong wak?

¹⁷ Mabuku. Kupwa kwa kusambish dilejan dia Bibil ni muntu mu kusadin broshir, ukutwish kwimik broshir chisu chawonsu ukukata mulong wa kwilej nend buku Chom ik Chitufundishinay Bibil? Buku winou ukutwish kuyikwash antu kwilej yom yivud piur pa mafundish ma pa dishin ma mu Bibil. Anch mwin kwilej uyil kurutu nawamp ni wapwish kwilej buku winou, ukutwish kudandamen kwilej nend mu buku Mutapu wa Kushal mu Rukat ra Nzamb. Buku winou ukumufundish mwin kwilej mutapu wa kusadin mbil ja Bibil mu mwom wend wa pichuku pichiku. Vurik anch ap kupwa kwa kutambul dibatish, muntu musu ufanyidin kudandamen kwilej djat ni pakupwishinay mabuku minam maad. Chinech chikumukwash kwikal ni ritiy rikash mudiay Yehova ni kushal ushinshamena kudi ndiy.​—Tang Kolosay 2:6, 7.

18. (a) 1 Timote 4:16 utukasikeshin kusal yom ik mudi alej a uyakin, ni yibudikin ik yidiaku? (b) Chisu chitongijok chetu pitusadidina Mushet Wetu wa Yom ya Kufundish Nich?

¹⁸ Mulong tudi Atuman a Yehova, tukwet chisend cha kuyifundish antu ‘uruu wakin wa rusangu ruwamp’ rikutwisha kuyitwal ku mwom wa chikupu. (Kolosay 1:5; tang 1 Timote 4:16.) Mulong wa kutukwash kusal mwamu, tukwet Mushet wa Yom ya Kufundish Nich ukweta yom tuswirikedina. (Tal mushet ulondina anch “Mushet wa Yom ya Kufundish Nich.”) El tusadilany amboku nawamp yom yiney. Umwing ni umwing wetu ukutwish kutond chom ik chidia mu mushet chifanyidinay kusadin ni chisu chifanyidinay kuchisadin. Pakwez vurik anch chitongijok chetu chidiap cha kupanol mikand, ni chifanyidinap kupan mikand kudi antu akad kusanger uruu wetu. Chitongijok chetu chidi cha kuyikadish antu adia in kashinsh, antu ikepishina, ni akatina chakin kumwijik Nzamb, antu ‘awanyidina mulong wa kutambul mwom wa chikupu’ in kwilej​—Midimu 13:48; Mateu 28:19, 20.