Mu winyikel wa Nzamb, yitang yawonsu yikwikal mu uumwing ni mu chisambu.

Mulong wak Tukwet Kuswir kwa Want wa Nzamb?

Kwinsambishin kwa rusangu ra antu, ching kusu Sakatang wetu, ukweta dijin Yehova ndiy wading Nyikel. Wading utakedil nich rukat. Wasala ndond yiwamp nakash—chir cha Eden—chakwel antu ashakamamu. Wayinkisha kand yakudia yivud. Kupwa wayinkisha antu mudimu uwamp nakash. (Disambishil 1:28, 29; 2:8, 15) Antu afanyina kudandamen kusanger chisambu anch adandamena kushal mwinshin mwa umutakel wa rukat wa Nzamb.

Adam walamang kal dibuj diayikangeshau kudia diamwinkishau kal kudi Ev. — Antu akusambish amulika kwau Nzamb kwikal Ntakel wau.

Bibil ulejen anch mwangel umwing ntombwij, wezau kutazuk anch Satan Djabul, walonda anch Nzamb kakwetap mbil ya kuyiyikel antu. Chidi mudi walonda anch, antu akwikal ni musangar anch alik kulondul umutakel ni winyikel wa Nzamb. Cha ushon, Adam ni Ev, anvajetu akusambish, imburija chilakej cha Satan ni amubwambwila Nzamb.—Disambishil 3:1-6; Kujingunik 12:9.

Mulong Adam ni Ev amulika Nzamb kwikal Ntakel wau, ashadisha paradis ni ruchingej rau ra kushakam chikupu nich ukash wa mujimbu uwanyidina. (Disambishil 3:17-19) Mupak wau wikala kand ni chibudikin chiyimp padi an avalau. Bibil ulejen anch mulong Adam wasala chitil, “chitil chandama mu mangand . . . ni rufu randama mulong wa chitil.” (Rom 5:12, TMK) Chitil chaleta kand chibudikin chikwau chiyimp: ‘Muntu ukat kumuyikel mukwau mulong wa kumumesh mar.’ (Mulej 8:9) Charumburik anch, ang antu iyikel ayinau, yibudikin yikwikal kamu ching yiyimp.

DISAMBISHIL DIA WINYIKEL WA ANTU

Nimrod wimanang kal mu mutapu wa kwibaz. Kwinyim, antu akat kutung chimet. — Nimirod wamubwambwila Yehova.

Nyikel wa chiuntu wakusambish wisambidinau mu Bibil udi Nimirod. Wabwambwila ku umutakel wa Yehova. Kudiosh kamu pa chirung cha Nimirod, amakundj akweta usu akat kusadin nayimp umutakel wau. Kwasut kal mivu piswimp 3000, kudiosh pafundinay Mwant Salomon anch: “Antu azengodilau ading ni kudil mulong [kadingap ni] muntu mwin kuyongoj . . . in kuyizengol awiy kand adinga akwet usu.”—Mulej 4:1.

Yom yidi kand mutapu umwing nlel. Mu muvu wa 2009, buku umwing wa Nations unies walonda anch winyikel uyimp udi “pakach pa mayingishin majim maletishina uyimp mu mangand nlel.”

CHISU CHA KUWAPISH YOM!

Mangand makwet kuswir kwa antakel awamp nakash ni guvernema udia muwamp nakash. Ni chom chinech chawiy chikaninay Sakatang wetu kusal!

Tuyipich: Yibudikin ya winyikel wa antu. 1. Mband umwing wa mu Aziy washakamang kal mwi njil yikisina umusendin mwanend udidina. 2. Ikundj umwing ipal mu ulal wa kuyel mu opital. 3. Amasalay akat kubul yidiang kwi njit. 4. Antu atombukang kal akat kutoy ni alamang kal chom pafundinau uruu. 5. Maku umwing ni mwanend mband iminy pol pa chikumbu chau, akat kutal dikalash dia pa dididish diau diabarikang kal. 6. Ka musumb kakweta nsambu ja kasu ni mish yibudikina mu mimbund. — Ap maguvernema ma antu mamekena mudi madi mawamp, makangeny kupwish milong yikash ya antu.

Nzamb watenchikin kal Want, ap guvernema, ukuswinkana pa mant mawonsu ma chiuntu, ni “wawiy ukez kushakam chikupu.” (Daniel 2:44) Winou wawiy Want ukatau kwit mu malembil kudi mamiliyon ma antu. (Mateu 6:9, 10) Pakwez Nzamb kindiyap ukwikala Mwant wa guvernema winou. Kudi muntu watonday kal mulong wa kwikal Mwant, muntu winou washakamaku pa divu. Nany watondinau kal kudi Nzamb?