Want wa Nzamb Ukuyikel pa Divu Chisu ik?

YINSHIP IK YALONDAY YESU ANCH YIKUSHIKEN?

Yesu walonda anch: “Muchid ukez kurish ni muchid ukwau, want ukez kurish ni want ukwau. Kukez kwikal kunyikek kwa ngand kuyimp, ni kamungun, ni yipupu kwawonsu.” (Luka 21:10, 11) Mudi mifund yisadila chijingidij cha muny, yinship yiney yawonsu yisadin chijingidij chakad kutwish kutadik. Ni mudi mutapu tukutwisha kumujingunin muntu kusutil chijingidij cha muny (empreinte digitale), kushiken kwa yinship yiney yawonsu pa chisu chimwing kumekeshin anch “Want wa Nzamb udi piswimp ni kushik.” Ov, yinship mudi yiney yashikedin kal yawonsu ni yameken kal pa chisu chimwing pa mangand mawonsu? Shinshikin uman.

1. JINJIT

Mu muvu wa 1914, kwasadika njit jimwing jijim nakash jakad kal kusadikangap mu rusangu ra antu! Yisu yivud in kwilej nsangu ja pakur ja antu isambidining piur pa muvu wa 1914 mudi muvu wakarumuna rusangu ra antu, mulong wawiy muvu wasambisha njit ja kusambish ja pa mangand mawonsu. Njit jinija jayishikija antu kusadil kapamp ka kusambish mu chilik chijim nakash matemb ma njit, mabomb ma mu rinkind, mat matazukinau anch mitrailleuse, magaz makweta ulemb, ni milad yikwau ya mat ma kujipan nich. Kupwa kwasadika kand njit ja kaad ja pa mangand mawonsu, njit jayishikija antu ku kusal mabomb atomik ni kumasadin kapamp ka kusambish. Ni kudiosh mu muvu wa 1914 antu akat kurish jinjit ku jindond kushalijan, ni jinjit jinej jajipin kal mamiliyon ma antu.

2. KUZAL KWA DIVU

Buku Britannica Academic ulondin anch muvu ni muvu kukat kusadik kuzal kwa divu piswimp 100 kudia kujim nakash kukutwisha “kushesh yom yivud.” Ni rapor wa Institut géologique américain ulejen anch “kukwatijan ni rapor wasalau pakur (kudiosh piswimp muvu wa 1900), tukat kuchingej muvu ni muvu anch kukutwish kwikal kuzal kwa divu kujim piswimp 16.” Ap anch antu amwing akutwish kutong anch kudi kuzal kuvud kwa divu mulong antu akwet mitapu yiwamp ya kujingunin nich kuzal kwa divu, pakwez uyakin udi anch, kuzal kwa divu kujim kusadikina mu mangand kukat kulet mar ni kujipin antu mu chilik chijim nakash kusutamu pakur.

3. KAMUNGUN

Nlel kudi kamungun pa mangand mawonsu mulong wa njit, kukatul milamu, milong ya kuburen nfalang, kuburen ndond jiwamp ja kudimin, kukangany kutenchik yom mulong wa yirung yikash. “Rapor wa Muvu wa 2018” wa Programme alimentaire mondial ulejen anch: “Pa mangand mawonsu, antu mamiliyon 821 kakwetap yakudia yiwanyidina—pakwez mamiliyon 124 afil kamu nzal nakash.” Kuburen yakudia kukat kujip an mamiliyon piswimp 3.1 muvu ni muvu. Mu muvu wa 2011, pakach pa an afila pa mangand mawonsu, an 45 pa chitot afil mulong wa kuburen kwa yakudia.

4. MAYEJ NI YIPUPU

Buku umwing wa Organisation mondiale de la santé ulondin anch: “Yitot ya mivu ya 21, yading mivu yimwing yading ni yipupu yikash. Mayej makur mudi—kolera, chipupu ni fièvre jaune—mapalangen kand, ni mayej makwau masu masambishin kand, mudi—syndrome respiratoire aigu sévère (SRAS), grippe pandémiques, Syndrome respiratoire du Moyen-Orient (MERS), Ebola ni Zika.” Ap anch in siyans nau amingang asadin usu mulong wa kwilej yom yivud piur pa mayej, pakwez katwishinap kwok mayej mawonsu.

5. MUDIMU WA KULEJAN USADIKINA PA MANGAND MAWONSU

Yesu wisambina kand chikunku chikwau cha chijingidij palonday anch: “Chifanyidin rusangu ruwamp ra Want wa Nzamb ez arulejan bil ku mangand mawonsu ni kwikal uman kudi antu a michid yawonsu, chad lel disudiel dia mangand dieza.” (Mateu 24:14) Padandamedina mangand kurish ni milong yikash, mamiliyon chinan ni kusut ma antu adiokila ku michid yawonsu akat kulejan rusangu ruwamp ra Want wa Nzamb mu mazu 1000 ni kusut mu jingand 240. Mudimu winou kandikal usadikangap mwamu kudiokal pakur.

CHIJINGIDIJ CHINECH CHIRUMBURIKIN IK KUDI ETU?

Yom yisadikina nlel yawiy kamu yinship yisambinay Yesu mu chijingidij chapanay. Mulong wak tufanyidin kushinshikin uman winou? Mulong Yesu walonda anch: “Anch wamanany yom [yiney] yikat kushik, ukez kwijikany anch Want wa Nzamb udi piswimp ni kushik.”—Luka 21:31.

Chijingidij chapanay Yesu ni tupamp twimedina pa Bibil, yitukwashin kwijik anch Want wa Nzamb wasambisha kuyikel mwiur mu muvu wa 1914.a Mu muvu winiwa, Nzamb wamudisha Mwanend, Yesu Kristu want. (Kuseng 2:2, 4, 6-9) Piswimp ap Want wa Nzamb ukuyikel pa divu, ni ukushesh mant mawonsu ni kukarumun divu kwikal paradis chakwel antu ashakamap chikupu.

Piswimp ap mazu madia mu malembil ma chilakej mafundishay Yesu malondina anch: “Want wey weza. Rusot rey arusala pansh mudi mwiur” makuwanyin. (Mateu 6:10) Chad, Want usadin ik kudiosh wasambishina kuyikel mu muvu wa 1914? Ni yom ik tukutwisha kuchingej chisu Want wa Nzamb ukushesha mant ma antu?