Sadilany jw.org mu Mudimu Wen wa Kulejan

Kapend ketu ka Web kadi chom cha mudimu chitukwashininga kupalangesh nich rusangu ruwamp djat ni “kwisudiel kwa mangand.” (Mid. 1:8) In yikumbu avud kataninigap chisu cha kusadil jw.org ku yikumbu yau. Pakwez, akutwish kwilej piur pend ching kusu anch mwin kulejan wayilej kapamp kamwing.

Kalam wa munyingumuku umwing wabudisha video ukweta mutu wa mulong ulondina anch Ov, Mulong Wak Kwilej Bibil? mu telefon wend ni wamumekesha patanangay chisu cha kusal mwamu. Chilakej, chisu chayangay ku chikumbu ni chikumbu, ndiy walonda anch: “Niyendidil antu mu wiswimp chakwel niyikwasha kutan yakul ku yipul yisatu ya usey ey: Ov, mulong wak mangand mizwila too nich milong yivud? Ov, mutapu ik ukezay Nzamb kuyipwish? Ov, mutapu ik tukutwisha kurish nich chikokujol pa chisu chinech? Video winou wa kachisu kakemp wakwil ku yipul yiney.” Kupwa wadjat kapamp kamwing pa buton ni wachingel mutapu ukwakulay mwin chikumbu. Video winou uyisangareshin antu avud ni kasotiningap kudiosh mes mau pa telefon djat ni kwisudiel. Kupwa, kalam wa munyingumuku ulondin anch: “Watesh kal anch ukutwish kwit dilejan dia Bibil pa kapend. Pinidia pinap, nikutwish kukulej kapamp kamwing.” Anch mwin chikumbu witiy, ndiy ukwilej nend kusutil ku kusadil broshir Rusangu Ruwamp. Anch mwin chikumbu kakwetap chisu, ndiy ukwirijek chakwel amuchirikina pa chisu chikwau. Chisu chiyilingay kuna kafe ku restoran, ndiy ulondining mu mutapu umwing kudi muntu kanang ushichay nend piswimp kupwa wasambish nend minsamb ya urund. Ov, ukat kusadil jw.org mu mudimu wey wa kulejan?