Yipul ya in Kutang

Mulong wak in Kristu afanyidin kubabal nakash chisu chisadidinau ma application ma kutumijadin nich ma mesaj?

In Kristu amwing akat kusadin teknoloji wa katat mulong wa kudandamen kwambamb ni anamakwau adia kulemp, ap ni ambay nau akwau in Kristu. Pakwez mwin Kristu uswila ukulam mu manangu chiyul chinech: “Muntu wa manangu anch waman [ubaj ukat] kwez ukat kujingam amwinend, pakwez antu amwamu akat kuya kurutu ni kwisheshol.”​—Jnsw. 27:12.

Verse winou umekeshin anch Yehova ukatin kutuchidij. Tukatap kuta urund nau antu akata kulet kwaurok, antu opatinau kal, ap in kupumbok. (Rom 16:17; 1 Kor. 5:11; 2 Yoh. 10, 11) Kud antu amwing tukata kukumangan nau, pakwez kakwetap kwau mwikadil uwamp. (2 Tim. 2:20, 21) Tufanyidin kuvurik yom yiney chisu tutondina arund. Pakwez chikasiken kutond arund awamp kusutil ma application ma kutumijadin nich mesaj.

Tufanyidin kubabal nakash piur pa arund tutondina, pakampwil anch antu tudia nau mu chisak ad avud nakash. In Kristu amwing ading mu yisak yijim ya kwambambin atanin yibudikin yiyimp. Ov, utongin anch mukadivar ap nambaz ukumekesh anch ubabel ni kwipuk yibudikin yiyimp anch ud mu chisak chikweta yitot ap tunan twa antu? Ukutwishap kuyijik nawamp antu awonsu adia mu chisak ap kwijik mwikadil wau wa mu spiritu. Kuseng 26:4 ulondin anch: “Kinishichap nau antu a makasu, ap kwend nau in [rubabek].” Chinech chimekeshin anch chid cha manangu kusadin ma application ma kutumijadin nich mesaj mulong wa kwambamb ching kusu nau antu twija nawamp.

Ap anch tud kwetu mu kachisak kakemp, pakwez mwin Kristu ufanyidin kushinshikin chisu chisutishinay mu kufundijadin nau akwau ni yom yambambinau. Tukwetap kuswir kwa kwakul ku mesaj mawonsu matuminau ap kudandamen kwambamb chikalap nchik kulep kwa chisu tukusutisha. Paul wamubabesha Timote piur pa antu “in mboj, ni kwichik pa milong yayen.” (1 Tim. 5:13) Nlel unou muntu ukutwish kwikal mwin mboj ni mwin kwichik pa milong yayen kusutin yom ya elektronik.

Mwin Kristu uswila kakutwishap kufund ap kuta matu ku yom ya mboj ap nsangu ja ujindj piur pa ambay nend in Kristu. (Kus. 15:3; Jnsw. 20:19) Ni kakutwishap kupalangesh ap kuta matu ku yom yikutwisha kuyisal antu akwau nayimp, ap ku manyinyit makadiay kwikal nich uman wakin. (Efes 4:25) Pa kapend ketu ka jw.org ni mu maprogram ma JW Télédiffusion mwauy tukata kutan yakudia yiwamp ya mu spiritu ni jinsangu ja kuchingejin.

Akadivar ni anambaz amwing akat kusadin ma application ma kutumijadin nich ma mesaj mulong wa kulandish, kuland, ap mulong wa kupalangesh nich jinsangu piur pa yom yilandishinau, ap kand mulong wa kukimb antu akusal nau mudimu. Yiney yid milong ya kwisak, yidiap yom ya uteokras bwat. Mwin Kristu ukatina kwipuk “ris ra nfalang” kakuyisadinap akadivar mulong wa kutanyinamu kwend amwinend mu yom yend ya kwisak.​—Heb. 13:5.

Chad chid nchik piur pa kusadin ma application ma kutumijadin nich ma mesaj mulong wa kwitol nfalang ja kuyikwash nich akadivar adia mu maswir, ap arishina ni yinship ya mar? Tukat kumekeshang yisu yawonsu anch tukatijadin kusutil kukwashijan ni kukasikeshijan. (Jak. 2:15, 16) Pakwez anch tukat kuyitodin akadivar ukwash kusutin ma application minam, chikutwish kukasikan pakwel anch biro wa mutiy ap amakurump a mu chikumangen akwat mupak mulong wa kuyikwash akadivar inay. (1 Tim. 5:3, 4, 9, 10, 16) Ni kwikil muntu ap umwing pakach petu ukukata kwimekesh kud antu akwau anch ndiy ukweta chisend cha pakampwil cha kuyibangin amikoku a Nzamb.

Tukatin kusal yom yikumutumbisha Nzamb. (1 Kor. 10:31) Chawiy anch twakwat mupak wa kusadin ma application ma kutumijadin nich ma mesaj ap yom yikwau ya teknoloji, tufanyidin kushinshikin ubaj udiaku ni kubabal.