Chirish Urund Wey wa Piswimp ni Yehova

MUVU ni muvu, amikoku avud a usey nakash ading opatinau kal akat kuyichirish kand mu chikumangen cha win Kristu. Tongin mutapu ukata “kwikal musangar mwiur” pakatay kuchirik umwing ni umwing wau mu dirijek! (Luka 15:7, 10) Anch akuchirishin mu dirijek, ukutwish kwikal nich kashinsh anch Yesu, angel ni Yehova amwinend akwet musangar nakash mulong wa mupak wey wa kuchirik mu uyakin. Pakwez, pausadina usu wa kuchirish urund wey wa piswimp ni Yehova, ukutwish kurish ni yikokujol. Yikokujol ik yimwing ukutwisha kurish nich, ni yom ik yikutwisha kukukwash?

YIKOKUJOL IK YIMWING UKUTWISHA KURISH NICH?

Antu avud akat kudandamen kurish ni yovil ya kwifish nich kupwa kwa kuyichirish. Pamwing ap wiyovil mud mutapu wiyovay Mwant David. Ap anch ading amulikishidin kal yitil yend, walonda anch: ‘Kuyip kwam kupandaken kulim.’ (Kus. 40:12; 65:3) Antu avud kupwa kwa kumuchirikin Yehova, akat kudandamen kurish ni yovil ya kwifish nich ni usany mu mivu yivud. Isabelle amwopata mu mivu 20 ni kusut.a Ulondin anch: “Chading chinkasikedin kwitiyij anch Yehova ukutwish kwinlikishin.” Anch wiziyishol, ukutwish kand kuziy mu spiritu. (Jnsw. 24:10) Kangal walikidil yom mud yiney chakwel yikushiken.

Antu akwau akat kwiyakamishang anch kakutwishap kusal yom yawonsu yidia ya usey mulong wa kuchirish urund wau wa piswimp ni Yehova. Kupwa kwa kumuchirish, Antoine walonda anch: “Niyova anch navuramedin kal yom yin yawonsu yinading nija ni yinasala mud mwin Kristu kurutu kwa kwingopat.” Mulong wa yovil mud yiney, amwing akutwish kwidjidjek kwipan nakash mu mijikit ya mu spiritu.

Chilakej, muntu ukweta chikumbu chading chikatinay nakash, pakwez chasheshau kal kud rinkind mukash, ukutwish kwiyov rumbangan anch watongijokin kand pa chisu ni usu witina kusal mulong wa kuchitunguril. Chisik chimwing, anch urund wey wa piswimp ni Yehova wayip mulong wa chitil chikash wasadina, ukutwish kutong anch chikwit kusal usu nakash mulong wa kuchirish urund winou. Pakwez ijik anch ukusalap mwamu diamwiney pakad ukwash.

Yehova ututazukin anch: ‘Ezany mulong wa kupwish milong pakach petu.’ (Isay 1:18) Wasadin kal usu nakash wa ‘kupwish milong.’ Yehova ukukatin mulong wa usu winou usadina. Tongijok bil: Mulong wamuchirikidin Yehova, ukutwish kukusadin mud chilakej mulong wa kumekesh anch Satan ud mukamakasu!​—Jnsw. 27:11.

Mulong wamuchirikidin Yehova, chawiy wamusejidin kal piswimp ni ukukanin anch niyend ukukusejin piswimp. (Jak. 4:8) Chid chiwamp nakash anch antu akwau akuman anch wachirikin kand mu chikumangen. Pakwez kud kand chom chikwau ufanyidina kusal. Ufanyidin kand kudandamen kukasikesh rukat mudiay Tatukwey ni Murund ney, Yehova. Mutapu ik ukutwisha kusal mwamu?

ITEKINA MIPAK UKUTWISHA KUWANYISH

Pakish kwitekin mipak yisikena. Chimeken anch uchivurikin yom ya pa dishin wileja piur pa Yehova ni kushilamu kwend mulong wa machuku ma kurutu. Pakwez ufanyidin kuchirish mashakamin ma mwin Kristu, ni chinech chitin kukumangan ni kusutish chisu pamwing ni akadivar ni anambaz ney. Shinshikin mipak yilondwilaku ey ukutwisha kwitekin.

Mulembilang Yehova yisu yawonsu. Tatukwey wij nawamp anch kudandamen kwifish nich kukutwish kukukangesh kumulembil. (Rom 8:26) Pakwez ey “[lembil ]yisu yawonsu,” muleja Yehova rusot rey ra kuchirish urund wa piswimp ni ndiy. (Rom 12:12) Andrej uvurikin anch: “Nifishang nich nakash ni kwov usany. Pakwez chisu chawonsu nalembilang, niyovang nawamp. Novang chisambu nakash mu manangu mam.” Anch umenap ya kwit mu malembil, shinshikin malembil ma kukarumuk ma Mwant David mafundinau mu Kuseng 51 ni 65.

Ileja Bibil chisu chin chawonsu. Kusal mwamu kukukwash kukul mu spiritu ni kukupamish rukat rey mudiay Yehova. (Kus. 19:7-11) Felipe walonda anch: “Kulik kutek pa ndond ya kusambish program wa kutang ni kwilej Bibil kwawiy kwasala anch niziy mu spiritu ni kumulik Yehova. Nadingap nikatina anch yom yiney yinshiken kapamp kakwau, chawiy nakwata mupak wa kwilejang Bibil pakad kujing.” Niyey ukutwish kumwimburij. Anch usotin ukwash mulong wa kwijik mutapu wa kutond mitu ya milong ya kwilej mu dilejan diey dia pakampwil, ufanyidin kumwipul murund waswila kal chakwel akukwash.

Chirish urund wey wa piswimp pamwing ni akadivar nau anambaz ney. Antu amwing akata kuchirik mu dirijek oviling wom anch akutwish kuyijimen kud antu akwau. Larissa walonda anch: “Nova usany nakash. Niyova anch nayirumbukina nakash akadivar ni anambaz nam. Nalaba nakash nich yovil yiney.” Ikal nich kashinsh anch amakurump ni akadivar aswila mu spiritu akatin kukukwash piusadina usu wa kuchirish urund wey ni Yehova. (Tal mushet: “Yom Yifanyidinau Kusal Amakurump.”) Ovil musangar nakash mulong wa usu wasadina mulong wa kuchirik ni akatin anch wikal ni musangar!​—Jnsw. 17:17.

Yom ik yikutwisha kukukwash kwikal piswimp ni chikumangen? Kumangan pamwing ni akadivar ni anambaz ney pakad kujing ni yangang nau mu mudimu wa kulejan. Kusal mwamu kukutwish kukukwash mutapu ik? Felix walonda anch: “Chikumangen chading chichingedin chisu nikuchirika. Niyova anch komb nikwet usey. Awonsu ankwasha kwikal kand muntu wa mu dijuku, kwiyov anch Yehova wanlikishidin kal, ni anch komb nikutwish kand kudandamen kumusadin.”—Tal mushet: “Yom Ufanyidina Kusal.”

KANGAL WAZIY!

Satan ukudandamen kukutekin “yikangesh” mulong wa kukuziyish pausadina usu wa kuchirish urund wey ni Yehova. (Luka 4:13) Ukutwish kupandikan yikangesh yiney kusutin kukasikesh urund wey ni Yehova.

Yehova ukanin piur pa amikoku end anch: “Nikez kuyisurab ashadikina, ni kuyichirish aya kulemp, ni kuyikas pa yitat, ni kuyok ayedila.” (Ezek. 34:16) Yehova wakwashin kal antu avud kumuchirikin. Ikal nich kashinsh anch ukatin kukukwash chakwel uchirish urund ukash ni wa piswimp ni ndiy.