Chipich chimekeshina chimet ni disun dizezetishinau kwiur
1922 Kwasut Kal Mivu Chitot
“NZAMB . . . ndiy ukata kutwinkish etu ukash wa kupandakan . . . [kusutin] Yesu Kristu.” (1 Kor. 15:57) Mazu minam matondau kwikal mufund wa muvu wa 1922 mayinkisha in Kwilej a Bibil kashinsh anch afanyina kuyifut mulong wa kushinshaman kwau. Mu muvu winiwa, Yehova wayifuta in kulejan a mushiku inay. Wayiyukisha pasambishau kuchap ni kutek yibur ku mabuku mau ni pasambishau kusadin radio mulong wa kupalangesh uyakin wa Want. Mu kusut kwa chisu mu muvu wa 1922, chamekana kand patok anch Yehova wading uyiyukishin antu end. In Kwilej a Bibil atwisha kusal chitentam chasha kashimushimu mu Cedar Point, mu Ohio (États-Unis). Chitentam chinech chikala ni chibachikin pa midimu ya dirijek dia Yehova kudiosh pinipa djat ni nlel.
“CHITONGIJOK CHIWAMP NAKASH”
Pavulijanau in kulejan, uvud wa in kwit mikand wapandakana. Akadivar a ku Betel wa Brooklyn ading kubudishang magazet, pakwez chading chiyitin kufut nfalang ku sosiyete wachapang mikand chakwel ayitekin yibur ku mabuku. Kupwa kwa angond avud, sosiyete winou katwishap kand kubudish mabuku mawanyidina mulong wa kusadin mu mudimu wa kulejan. Chawiy Mukadivar Rutherford wamwipula mukadivar Robert Martin wading ntakel (manager) wa sosiyete winou anch akutwish kusambish ayinau kubudish mabuku.
Ndond yetu ya kubudishin mabuku yading mu Concord Street mu Brooklyn, mu New York
Mukadivar Martin ulondin anch: “Chading chitongijok chiwamp nakash, mulong chading chirumburikin kufungul ndond yetu ya kubudishin mabuku.” Akadivar afutina ndond yau mu Brooklyn (18 Concord Street), ni ikala ni yom ya mudimu yading yiswirikedinau.
Kadiap antu awonsu asangera anch akadivar asambish kwichapinap mabuku ayinau. Mwin sosiyete wading kutubudishinang mabuku weza kutal ndond yiney yisu ya kubudishin mabuku. Walonda anch: “Ukwetany yom ya mudimu yiwamp nakash ya kubudish nich mabuku, pakwez kwikil pakach pen muntu wija kuyisadin nawamp. Mu angond musamban, ukuyipishany yom yin yawonsu.”
Mukadivar Martin walonda anch: “Chamekana mud chid chakin, pakwez twading twij anch Yehova wafanyina kutukwash, ni mwawiy kamu mwasalay.” Mukadivar Martin wading uyingin nich. Kupwa kwa chisu chikemp, twasambisha kubudish mabuku 2 000 pa dichuku kwi ndond yetu ya kubudishin mabuku.
In kusal mudimu iminy ku mashiny mau ma kuchap nich mwi ndond ya kuchapin
KULEJAN UYAKIN KUD TUNAN NI TUNAN TWA ANTU KUSUTIN RADIO
Kupwa kwa kusambish kwichapinap mabuku mau mamwing, antu a Yehova asambisha kusadin mulad usu wa kupalangesh rusangu ruwamp kusutin radio. Diarubing urel, machuku ma ngond 26 Ngond wa 2, 1922, Mukadivar Rutherford walonda kapamp ka kusambish ku radio wa KOG mu musumb wa Los Angeles mu Kaliforni, mu États-Unis. Wasala diskur diading dilondina anch: “Mamiliyon ma Antu Adia Aom Katat Kakufap Bwat.”
Piswimp antu 25 000 alondula program winou. Amwing pakach pau afunda mikand mulong wa kujikitish piur pa diskur dined dia ku radio. Mukand umwing wadiokala kud Willard Ashford wading ushicha mu musumb wa Santa Ana, mu Kaliforni. Wamujikitisha Mukadivar Rutherford mulong wa diskur diend “diwamp ni disangareshina.” Kupwa wawejinaku anch: “Mulong twading ku chikumbu ni ayej asatu ading akad mutapu wa kushemunik, chawiy pakad radio, chafanyinang kutukasiken kukutesh ap anch wasadinang diskur piswimp ni kwol kwetu.”
Mwi mbing jalondulaku, asala kand ma diskur makwau mavud. Kwinsudiel kwa muvu wa 1922, Chinong cha Kalam chalonda anch “piswimp antu 300 000 atambula rusangu ruwamp kusutin radio.”
Kukasikesh kwatambulau kusutin mikand kwayikwasha in Kwilej a Bibil kukwat mupak wa kutek radio mu rupang rau rading mu Staten Island, piswimp ni Betel wa Brooklyn. Mu mivu yalondulaku, in Kwilej a Bibil asadina radio winou watazukau anch WBBR, mulong wa kupalangesh chipandakena uruu wa Want.
“ADV”
Chinong cha Kalam cha 15 Ngond wa 6, 1922 chalejana anch kukwikal chitentam chikusadikina ku Cedar Point, mu Ohio, kusambishin pa machuku ma ngond 5 djat ku 13 Ngond wa 9, 1922. In Kwilej a Bibil ova musangar nakash pashikau mu Cedar Point.
Mu diskur dia kusambish, Mukadivar Rutherford wayileja antu anch: “Nitongin ni nikwet kamu kashinsh anch Nsalejetu . . . ukuyukish chitentam chinech ni kupan uman ujim nakash mu mutapu wakadingawap kal kuulejan pa divu.” Akadivar asala ma diskur ayikasikesha akadivar nau anambaz kusal mudimu wa kulejan.
Rumbu ra antu akumanganang kal ku chitentam chasadikina mu Cedar Point mu Ohio mu muvu wa 1922
Kupwa, Diakatan machuku ma ngond 8 Ngond wa 9, in kukumangan piswimp 8 000 izula mwi ndond ya chitentam, ni ading ni musangar nakash wa kutesh diskur dia Mukadivar Rutherford. Ading achingejin anch ukulejan kurumburik kwa mamuny “ADV,” mading pa diladikij diau dia kuchap. Pashakamau, antu avud amana chibel chijim chading kwiur kwa chimet. Arthur Claus, wadiokala mu musumb wa Tulsa, mu Oklahoma, mu États-Unis, mulong wa kuya ku chitentam, wamana ndond yiwamp yafanyinay kushakam mulong wa kutesh nawamp, mulong pa chisu chinicha kwadingap yom ya kujimbish nich mazu.
“Twading tukat kutesh nawamp mazu min mawonsu”
Mulong wa kulik kuletish kanrumbangesh, mwin kutakel walejana anch kwikil kand muntu ukuswinkana ukutwisha kwandam mwi ndond ya chitentam pa chisu chisadinay Mukadivar Rutherford diskur. Pamanch pa saa ya 9:30, Mukadivar Rutherford wasambisha diskur diend ni mazu ma Yesu madia mu Mateu 4:17: “Want wa Nzamb udi piswimp.” Chisu chisambinay piur pa mutapu ukuteshau antu uruu wa Want, walonda anch: “Yesu amwinend walonda anch pa chirung cha kwikalaku kwend, ukutakel mudimu wa kwangul ukusalau antu end, ni pa chirung chinech wafanyina kuyikumangej amwinend antu akin ni ashinshamena.”
Mukadivar Claus, wading ushicha mukach uvurikin anch: Twading tukat kutesh nawamp mazu min mawonsu.” Pakwez kukashimuk wayel ni wabudik pol. Arthur widjidjeka pa kubudik, mulong wading wij anch kakumwitiyijap kand kwandam.
Mu aminit akemp, wasambisha kwiyov nawamp. Warumburila anch pading pachirikinay mwi ndond ya chitentam, watesha antu abul nkash nakash. Chinech chamuzazatisha nakash! Watonga anch ang wakandam ku rubumbu, ukutwish kutesh nawamp chikunku cha nsudiel cha diskur dined dipandakena kuwap. Mukadivar Claus, wading uchidia nsand wa mivu 23 wamana mutapu wa kukandam ku rubumbu mulong wa kutesh! Kwiur kwinikwa kwading tumadididish, ni pasejay piswimp ni madididish minam, wasambisha kutesh nawamp nakash.
Pakwez Arthur kadingap amwinend. Amwing pakach pa arund nend niyau ading akandamang kal kwiur kwa rubumbu. Frank Johnson, umwing wa pakach pa arund inay, wamusejina ni wamwipula anch, “ov, ukwetaku kapak?”
Arthur wamwakula anch: “Nikwet.”
Frank wamuleja anch: “Ud kamu chakul ku malembil metu. Ov, umen chibel chijim acha? Chid chijingidij chikasinau ku misumad. Tang matu nakash ku yom yilondinay Nzuj.a Ukukatul moj yinying yiney pakulonday anch: ‘Ufanyidinany kulejan, kulejan’”
Chawiy, Arthur walama mpak mu chikas, ni wachingela pamwing ni arund nend mulong wa kutesh mazu mamulejau makumekesha chisu cha kukatul moj. Pakad kulab, Mukadivar Rutherford washika pa chikunku cha usey nakash cha diskur. Mukadivar Rutherford wova musangar nakash ni watoya anch: “Ikalany atuman ashinshamena ni akin a Nsalejetu. Yangany kurutu mu kurish djat ni pakumusheshinau Babilon rawonsu. Lejanany uruu ndond jin jawonsu. Mangand mafanyidin kwijik anch Yehova ud Nzamb ni anch Yesu Kristu ud Mwant wa ant ni Nsalej wa ansalej. Dined did dichuku dia usey nakash. Talany, Mwant uyikedil! En udiany in kulejan end. Chawiy, lejanany, lejanany, lejanany Mwant ni Want wend!”
Arthur urumburil anch ndiy ni akadivar akwau akatula moj ni disun diatangurika kapamp kamwing. Ading afundin pa chibel kukwatijan ni mamuny “ADV,” anch: “Lejanany Mwant ni Want Wend.”
MUDIMU WA USEY
Chitentam cha mu Cedar Point chayikwasha akadivar kushinshikin pa mudimu wa usey wa kulejan Want wa Nzamb, ni antu ading akweta muchim wa kwipan, ipana nich musangar mu mudimu winou. Colporteur umwing (utazukinau katat anch chibol) wa mu Oklahoma, mu États-Unis, wafunda anch: “Distrik wetu wadinga kwi ndond kwading mayal ma charbon ni kwadinga uzwendj nakash.” Walonda anch yisu yivud pateshangau antu uruu wading mu gazet wa L’Âge d’Or, “asambishang kudil.” Ulondin anch: “Chading chiyukish nakash kuyongoj.”
Il Kwilej a Bibil inay amana anch mazu ma usey ma Yesu madia mu Luka 10:2 mading ma kuswapej: “Yakwangul yidi yivud, pakwez in mudimu wa kwangul adi akemp.” Pading payila muvu mu kupwa, ikala ni mushiku nakash kusutamu pasak wa kulejan uruu wa Want.
a Mukadivar Rutherford amutazukang yisu yimwing anch “Nzuj” mulong wasala yisu yimwing mud nzuj mu Missouri, mu États-Unis.