Manangu Makin Makat Kutazwok

1. Mutapu ik ukatau kwakul antu avud nlel ku kutazuk kwa manangu? (Jinswir 1:20, 21)

MU JINGAND jivud, chiswapeling kutan in kulejan a Want kwi njil, akat kupan mikand kud antu asutina. Ov, wipaninap kal mu mulad wa kulejan winou usangareshina? Anch mwawiy, pakad kwidjidjek watongijokidin kal pa mazu madia mu buku wa Jinswir malondina anch manangu makat kutazwok pa dibur chakwel antu atesh yiyul yend. (Tang Jinswir 1:20, 21.) Bibil ni mikand yetu yikwet “manangu [makin]”—manangu ma Yehova. Manangu minam mawiy mafanyidinau kwikal nich antu mulong wa kwikal ni mwom wa chikupu. Tukweting musangar nakash anch muntu witiyij kutambul mukand wetu. Pakwez kadiap antu awonsu akata kusal mwamu. Antu amwing alikining kwau kwa kwikatin kwilej yom yilondinay Bibil. Amwing pakach pau akat kutusip. Atongining anch Bibil ud buku mukur nakash. Akwau akat kulond yom yiyimp piur pa mafundish ma Bibil malejena mwikadil wishitwila, ni kulond anch antu akata kumasadin akwet chisum ni imening ayinau mud atentamin nakash. Pakwez, nich rukat, Yehova udandamedin kuyinkish antu awonsu dilau dia kutan manangu mend. Mutapu ik?

2. Kwisu tukutwisha kutan manangu makin nlel, pakwez mupak ik ukwatinau antu avud?

² Mutapu umwing ukatay kusadin Yehova mulong wa kwijikish manangu makin ud kusutin Dizu diend, Bibil. Buku winou udiaku mulong wa muntu win mawonsu. Ni chid nchik piur pa mikand yetu yimedina pa Bibil? Kusutin chiyukish cha Yehova, mikand yiney yidiaku mu mazu 1 000 ni kusut. Antu ateshina yom yiney, charumburik anch antu atangina ni asadidina yom yitanginau, akat kutaninamu. Pakwez, kud antu avud alikina kwau kumutesh Yehova. Pakatau kukwat mipak, akat kwichingejin ayinau ap kutesh yom yiyilejinau kud antu akwau. Akutwish kand ap kutuswingish mulong tulondwil yom yilondinay Bibil. Mutu wa mulong winou ukwisambin mulong wak antu akat kusal mwamu. Chakusambish, el tumanany bil mutapu tukutwisha kwikal nich manangu madiokila kud Yehova.

RONGANYIN RA YEHOVA RIKAT KULET MANANGU

3. Yom ik tufanyidina kusal mulong wa kwikal ni manangu makin?

³ Tukutwish kulond anch manangu ud ukaliweny wa kusadin yom twija mulong wa kukwat mipak yiwamp. Pakwez, manangu makin marumburikin yom yivud. Bibil ulondin anch: “Kumwov [Yehova] wom diawiy disambishil dia manangu! Kumwijik ndiy Utumbila [Nakash] rawiy ronganyin.” (Jnsw. 9:10) Chawiy, anch tukwet mupak ujim wa kukwat, tufanyidin kwijik yom yitonginay Yehova— mulong “kumwijik ndiy Utumbila [Nakash] rawiy ronganyin.” Tukutwish kusal mwamu pitwilejina Bibil ni mikand yetu yimedina pa Bibil. Anch twasal mwamu, tukumekesh anch tukwet manangu makin.—Jnsw. 2:5-7.

4. Mulong wak ching kusu Yehova ndiy uwanyidina kutwinkish manangu makin?

⁴ Yehova ndiy kusu ukutwisha kutwinkish manangu makin. (Rom 16:27) Mulong wak tulondina anch Yehova ndiy musul wa manangu makin? Chakusambish, mulong ud Sakatang, ukwet ronganyin rakad mimbu, ni wij nawamp yom yawonsu yatangay. (Kus. 104:24) Cha kaad, yom yawonsu yisadiningay Yehova yimekeshining manang mend. (Rom 11:33) Cha kasatu, yiyul ya manangu yipaniningay Yehova yikat kuyikwash chisu chawonsu antu akata kuyisadin. (Jnsw. 2:10-12) Anch tukimbin kwikal nich manangu makin, tufanyidin kwitiy uyakin wa pa dishin ni kwitiy anch utakel mipak ni yisal yetu.

5. Yibudikin ik yikata kwikalaku anch antu alik kwitiy anch manangu makin madiokil ching kud Yehova?

⁵ Antu avud tukata kutanijan nau mu mudimu wa kulejan itiyijining anch kud yom yikwamushena mu yitang; pakwez kitiyijiningap anch kud Sakatang, ni alondining anch yom yiyezina kwau. Antu akwau tukata kusankan afiling mukan anch amwitiyijin Nzamb, pakwez amening mbil ja Bibil mud jikur nakash, ni akatining kusal yom mud mukatinau. Yibudikin ik yikata kwikalaku? Mulong antu achingejidin manangu mau ayinau pa ndond pa kuchingejin manangu ma Nzamb, ov, mangand mawapin? Ov, antu akat kwikal ni musangar wakin ap ruchingej mulong wa machuku ma kurutu? Yom tumena oku ni oku yitwinkishina kashinsh ka uyakin unou: “Kwikil manangu, ap ronganyin, ap chiyul yikutwisha kupompatijan nend [Yehova].” (Jnsw. 21:30) Chinech chitukasikeshin kamu kudandamen kumwit Yehova chakwel atwinkish manangu makin! Cha ushon, antu avud kakatap kusal mwamu. Mulong wak?

YISADINA ANCH ANTU ALIK MANANGU MAKIN

6. Kukwatijan ni Jinswir 1:22-25, anany akata kujik mu matu chisu chikata manangu makin kutazwok?

⁶ Antu avud akat kujik mu matu chisu chikata manangu makin “kutazwokin mu mikombil.” Kukwatijan ni Bibil, kud yisak yisatu ya antu akata kulik manangu: “antu akad ronganyin,” “in kuswing,” ni “ayisup.” (Tang Jinswir 1:22-25.)b El tushinshikinany nawamp mulong wak antu inay alikin manangu ma Nzamb, ni tumanany kand mutapu tukutwisha kwipuk kwikal mud awiy.

7. Mulong wak antu amwing atondin ayinau kushal “antu akad ronganyin”?

⁷ “Antu akad ronganyin” ad antu akata kwitiy yom yawonsu yikatau kutesh, ni aswakela kudimb makasu. (Jnsw. 14:15) Tukat kutanijanang yisu yivud ni antu mud inay mu mudimu wa kulejan. Chilakej, tong piur pa mamiliyon ma antu akatau kudimb kud antakel a chirelijon ap a chipolitik. Amwing akat kunengananang nakash anch ajingunin anch antakel inay ayidimbin. Pakwez antu ajimbwilau mu Jinswir 1:22 atondin kushal akad mamangu mulong akatin kwikal mu mwikadil winou. (Jer. 5:31) Akat kusal yawonsu yikatinau kusal ni kakatinap kwilej yom yilondinay Bibil ap kuziyin ku yijil yend. Antu avud akat kwiyov mud mband umwing wa mu Québec, mu Kanada, wipanina nakash mu yom ya relijon wamuleja Kaman umwing wamwendina pa chikumbu anch: “Anch paster wetu ukat kutudimbang makasu, kurumbuk kud kwendendiy, kadiap kwetwetu!” Chakin kamu, tukatinap kuyimburij antu inay akatina ayinau kulik kujingunin uyakin!—Jnsw. 1:32; 27:12.

8. Yom ik yikutukwasha kwikal ni manangu mawamp?

⁸ Bibil ukwet mayingishin mawamp ma kutukasikesh kulik kushal antu a kad manangu, pakwez utulejin anch “chifanyidin kutongijok mudi mukat kutongau amakurump.” (1 Kor. 14:20) Tukat kwikal ni manangu mawamp kusutin kusadin mbil ja Bibil mu mwom wetu. Anch twasal mwamu, tukuya mu kujingunin pakemp pakemp mutapu mbil ja Bibil jitukwashina kukwat mipak yiwamp ni kwipuk milong. Chid cha usey kushinshikin anch tuyil kurutu pa mulong winou. Anch twasambishin kal kwilej Bibil ni kukumangan ku yikumangan pasut kal chisu kanang, tufanyidin kwiyipul mulong wak djat ni katat tukwatinap mupak wa kwipan kud Yehova ni kutambul dibatish. Anch atubatishin kal, ov, tudandamedin kukudish ukaliweny wetu piur pa mutapu wa kulejan ni kufundish rusangu ruwamp? Ov, mbil ja Bibil jawiy jikata kutakel mipak yetu? Ov, tukat kumekesh mikadil ya win Kristu mu mashakamin metu ni antu akwau? Anch twaman anch kud chom kanang tufanyidina kuwapish, tufanyidin kutongijokin nakash pa yivurish ya Yehova, yikata kulet ronganyin “kud muntu uburedina.”—Kus. 19:7.

9. Mutapu ik umekeshinau “in kuswing” anch akat kulik manangu?

⁹ Chisak cha kaad cha antu akata kulik kutesh ku kutazuk kwa manangu ma Nzamb kwa kwisotin chid cha “in kuswing.” Yisu yimwing, tukat kusankan antu mud inay mu mudimu wa kulejan. Akatining kuyisip antu akwau. (Kus. 123:4) Bibil wasambela kulejan anch mu machuku ma kwisudiel, kukwikal in kuswing avud ap in kuyisip akwau. (2 Pita 3:3, 4) Mud mwadingau atatuwenend a ikundj ushinshamena Lot, antu amwing nlel kakatap kutesh ku kubabesh kwa Nzamb. (Dis. 19:14) Antu avud akat kuyisip antu akata kushakam kukwatijan ni mbil ja Bibil. In kuswing akat kusal mwamu mulong akatining “kwisangarish ayinau nich maku mau mayimp.” (Jud 7, 17, 18) Mutapu uyirumburilay Bibil in kuswing inay ukwatijadin kamu ni mikadil ya in kupumbok ni antu akwau amulikina kal Yehova!

10. Kukwatijan ni Kuseng 1:1, mutapu ik tukutwisha kwipuk kuyimburij in kuswing?

¹⁰ Mutapu ik tukutwisha kwilam chakwel kangal twayimburij in kuswing? Mutapu umwing wa kusal mwamu ud wa kwipuk arund akweta chaku cha kuyilond akwau nayimp. (Tang Kuseng 1:1.) Chinech chirumburikin anch tufanyidinap kutesh ap kutang chom chin chawonsu cha in kupumbok. Twij anch ang tubabelap, tukutwish kusambish kwikal ni chaku cha kulond yom yiyimp, ni kusambish kwidjidjek piur pa Yehova ni umutakel tukata kutambul mu dirijek diend. Mulong wa kwipuk kuwil mu mupit winou, tufanyidin kwiyipul anch: ‘Ov, nikweting chaku cha kulond yom yiyimp anch twatambul umutakel usu ap anch kwikal kurumburil kusu? Ov, nikat kusal usu wa kukimbijol kurumbok kwa antu atakedila?’ Anch twikal aswakela kuswimp yaku yiney yiyimp, Yehova ukutusanger nakash.—Jnsw. 3:34, 35.

11. Mutapu ik ukatau “ayisup” kuman mbil ja Yehova piur pa kutentam?

¹¹ Chisak cha kasatu cha antu akata kulik kutesh kwa kwisotin ku kutazok kwa manangu makin chid cha “ayisup.” Ad ayisup mulong akat kulik kushakam kukwatijan ni yijil ya Nzamb piur pa kutentam. Akat kusal yom yidia yiwamp ku mes mau ayinau. (Jnsw. 12:15) Antu mud inay akat kumulik Yehova, Musul wa manangu. (Kus. 53:1) Anch twatanijan nau mu mudimu wa kulejan, yisu yivud akat kutulond kwa chisum, mulong tulimishin mbil ja Bibil. Pakwez kakwetap chom chiwamp ap chimwing cha kutwinkish. Bibil ulondin anch: “Manangu mapandaken piur pa chisup. [Ku chis cha musumb] chisup kakwasulangap mukan mwend.” (Jnsw. 24:7) Chisup kakwetap chiyul cha manangu chikutwishay kutwinkish. Chawiy, chidiap cha kushimok patubabeshinay Yehova anch “mwiyepa chisup”!—Jnsw. 14:7.

12. Yom ik yikutukwasha kulik kuyimburij ayisup?

¹² Chinyim ni antu akisining yiyul yitentamina, etu tukat kukudish rukat mulong wa jinjil ja Nzamb, kuwejinaku ni yijil yend yawonsu piur pa kutentam. Tukutwish kukasikesh rukat riner kusutin kufanakesh yibudikin yikatau kwikal nich antu amuziyidina Nzamb ni antu amubwambwidila. Tal milong yikakidinau antu ayinau mulong wa usup wau kusutin kudjibul yiyul ya manangu ya Yehova. Kupwa shinshikin mutapu uwapina nakash mwom wey mulong ukat kumuziyin Nzamb.—Kus. 32:8, 10.

13. Ov, Yehova ukat kutushindil kuziyil ku yiyul yend ya mamangu?

¹³ Yehova ukatin kupan manangu mend kud muntu win mwawonsu, pakwez kakatap kumushindin muntu kumitiy. Chikalap nchik mwamu, ukat kulejan yibudikin yikatau kwikal nich antu akwatininga mupak wa kulik kutesh manangu mend. (Jnsw. 1:29-32) Antu akata kukwat mupak wa kulik kumuziyin Yehova “akez kadia mabuj ma yaku yau.” Mu kusut kwa chisu, mikadil yau yikuyiletinap chom chiwamp ap chimwing, pakwez runeng, mar, ni disheshik dia chikupu. Ku mutambu ukwau, antu akata kutesh yiyul ya manangu ya Yehova ni kuyisadin ayikanin kal anch: “Ukwintesha ukushakam wakad kwakam, ndiy ukwikal zong, wakad wom wa kuyip.”—Jnsw. 1:33.

TUKAT KUTANINAMU MU MANANGU MAKIN

14-15. Yom ik twilejina mu Jinswir 4:23?

¹⁴ Tukat kutaninamu yisu yawonsu tukata kusadin mamangu ma Nzamb. Mud twamana kal, Yehova usadin anch chiyiswapel antu awonsu kutan yiyul yend ya manangu. Chilakej, mu buku wa Jinswir, upaninamu yiyul yikutwisha kutukwash chisu chawonsu mu mwom wetu anch twayisadin. El tushinshikinanyaku kwetu yilakej yinying ya yiyul yiney ya manangu.

¹⁵ Chidij muchim wey wa chifanakesh. Bibil ulondin anch: “Kupandikan yom yawonsu, lam muchim wey, mulong mwawiy mudia misul ya mwom.” (Jnsw. 4:23) Tongijokin piur pa yom ufanyidina kusal mulong wa kuchidij muchim wakinakin. Chitin kudia yakudia yitungina mujimbu, kwiyijidish mujimbu, ni kwipuk yaku yiyimp. Chid kand mutapu umwing piur pa yom tufanyidina kusal mulong wa kuchidij muchim wetu wa chifanakesh. Tufanyidin kwilej Dizu dia Nzamb dichuku diawonsu. Tufanyidin kurijek yikumangan ni kukumangan ku yikumangan ya win Kristu, ni kupan kand yakul. Tukat kulam mushiku wetu chisu tukata kwiyijidish kusutin kwipan pakad kujing mu mudimu wa kulejan. Ni tukat kwipuk kukudish yaku yiyimp kusutin kwipuk chom chin chawonsu chikutwisha kwijondish manangu metu, mud kwipuwangej kwijondila, ni arund ayimp.

16. Mulong wak Jinswir 23:4, 5 ud wa usey nakash nlel?

¹⁶ Sanger yom ukweta. Bibil upanin chiyul chinech: “Kangal wiswidiosh mulong wa kupit dipit. . . . Anch wazazimwin mes pa dipit kidikumekanap. Dipit dikat kuminy jimpur ni kutwik, mudi mbur ukata kutwik kuya mwiur.” (Jnsw. 23:4, 5) Yom ya ku mujimbu yikushakamangap chisu chilemp. Pakwez ikal mpich ap kazwendj, awonsu akat kwinan mulong wa kwikal ni nfalang. Yakamish yiney yikat kuyishikij ku kwikal ni yisal yikata kuyiletin kapipej, kuyipish urund wau, ni ap kand kuyipish mijimbu yau. (Jnsw. 28:20; 1 Tim. 6:9, 10) Ku mutambu ukwau, manangu makat kutukwash kwikal ni chitongijok chisikena piur pa nfalang. Chitongijok mud chinech chikat kutukwash kwipuk ris ni kusanger yom tukweta, ni chikat kutuletin kand musangar.—Mul. 7:12.

17. Mutapu ik tukutwisha kwikal ni “jindim ja in manangu” mud mulejenau mu Jinswir 12:18?

¹⁷ Tong kurutu kwa kulond. Anch tubabelap, mazu metu makutwish kuyisal antu akwau nayimp. Bibil ulondin anch: “Kudi amwing akata kulond mazu makash mudi kutap kwa mpak ya musamun, pakwez jindim ja in manangu jikat kwokan.” (Jnsw. 12:18) Tukat kulam urund uwamp anch twipuk kulondol piur pa kurumbuk kwa antu akwau. (Jnsw. 20:19) Chakwel mazu metu mikal min kokan pa ndond pa kutapan, tufanyidin kwinzwish mu muchim wetu nich ronganyin ra Dizu dia Nzamb. (Luka 6:45) Anch twatongijokin pa yom yilondinay Bibil, mazu metu makwikal mud “musul wa manangu” makuyikasikesha antu akwau.—Jnsw. 18:4.

18. Kusadin Jinswir 24:6 kukutukwash mutapu ik kutwish mu mudimu wetu wa kulejan ni kufundish?

¹⁸ Londul umutakel. Mulong wa kutwish mu mwom, Bibil upanin chiyul chinech cha usey: “Ukurish njit nich chiyul cha manangu. Ku kuvul kwa in yiyul kudi kupandakan.” (Jnsw. 24:6) Man mutapu ukata mbil jinej kutukwash kutwish mu mudimu wetu wa kulejan ni kufundish anch twajisadin. Pa ndond pa kusal mudimu wa kulejan mud mutusotina etu, tukat kusal usu wa kulondul yitongijok yikatau kutwinkish. Tukat kutambul umutakel wa manangu ku yikumangan ya win Kristu, kukatau in kuyulan akweta ukaliweny kusal ma diskur mimedina pa Bibil ni yakumenaku mulong wa kutufumb. Chikwau kand, dirijek dia Yehova dikat kutubudishin yamu yiwamp nakash—mikand ni mavideo—yikutwisha kuyikwash antu kutesh nawamp Bibil. Ov, ukat kwilej kuyisadin yamu yiney nawamp?

19. Mutapu ik wiyovila piur pa manangu makatay kupan Yehova? (Jinswir 3:13-18)

¹⁹ Tang Jinswir 3:13-18. Tujikitishin mud ik mulong wa yiyul yiwamp tutanina mu Dizu dia Nzamb! Twijap chitwafanyinang kwikal pakad yiyul yiney. Mu mutu wa mulong winou, twaman kal yilakej ya yiyul ya usey yidia mu buku wa Jinswir. Chakin kamu, Bibil wakabuj wizwil too nich mazu ma manangu madiokila kud Yehova. El tukwatany amboku mupak wa kudandamen kusal yom kukwatijan ni manangu matwinkishinau kud Yehova. Mutapu umenau antu a mangand manangu minam kiukwetap usey kud etu; pakwez tukwet kashinsh anch “awonsu [akukwata manangu fe] akuyitazuk anch ayukil.”